إستفسار ضرورى من محترفي الكمبيوتر بالمنتدى

[Adhmawy]

السلام عليكم . تحياتى لكم جميعا
ياريت لو حد من الأخوة ذوى الخبرة يوضحلى الفرق بين البلاى ستاشن-2 و الكمبيوتر؟ هو قد يبدو سؤال ساذج شويه بس الموضوع ببساطه إنى وعدت أولادى بهديه بعد الإمتحانات فطلبوا البلاى ستاشن بالرغم من إن عندهم جهاز كمبيوتر (ديسك توب) و عليه ألعاب و أعتقد ممكن يركب علية جوى ستيك. يبقى إيه الميزة الزياده فى البلاى ستاشن و ليه الناس بتدفع حوالى 1000 جنيه فيه لما ممكن تعمل نفس الكلام على الكمبيوتر؟؟؟؟
أنا سألت على البلاى ستاشن لقيت أن الجهاز+2جوى إستيك+رام+10 سيديهات ألعاب بحوالى 1050فهل دة سعر كويس؟
آسف على الإطاله و جزاكم الله خير.

[itsonlyme]

البلاي ستاشين ببساطة جهاز كمبيوتر مخصص للألعاب.
استخدم الكمبيوتر للألعاب برضو مش بسهولة وراحة استخدام البلاي ستاشين.

البلاي ستاشين بيبقى متوصل بالتلفزيون على طول.
بيفتح في ثواني.
فيه كارت جرافيكس قوي (صورة اجود) وله الألعاب الخاصة به.

يعني باختصار، صحيح الكمبيوتر العادي ممكن استخدامه للألعاب، بس البلاي ستاشين more convenient.

[محمد فريد]

+ فى نوعين من البلايستيشن
1- سيديهات وده الصغير
2- الكبير بهارد ديسك بالاضافه للسيديهات (الافضل)
وده مريح اكتر كل فترة كبيره تاخده وتبدل الالعاب اللى عليه باخرى حديثه

[SeMo_SiRiOnY]

البلاي ستيشن دة جهاز مخصص للالعاب
وغير كدة الكمبيوتر ممكن تلاقية امكانياتة صعبة تشغل بعض الالعاب
اما البلاي ستيشن فهو مخصص للالعاب والسيديهات معمولة علية مباشرة

[mahmoud_magdy]

انا هقول لحضرتك نصيحه
البلاي ستيشن بياكل الوقت جامد جدا جدا جدا جدا
وادمان بطريقه عجيبه طول ما في جديد طول ما هتلاقيهم اعدين عليه
وبالذات الكبار او الصغار اللي هاويين ألعاب
يعني اذا في الصيف فده هيكون كويس جدا ليهم ويقيهم من وقت الفراغ
انما في الدراسه منصحكش تحطو ادامهم بتاااااااتاااااااااااا

[Adhmawy]

جزاكم الله خير على التوضيح . بس ليه مافيش تعليق على السعر؟؟ هل مناسب للمواصفات ولا لأ؟؟
تحياتى

[محمد فريد]

أخر مرة شوفته كان ب 850 ومعاه 5 اسطوانات
ده الصغير