طلب استشارة قانونية : أرضى الدوله هتاخدها وهتبقى منفعه عامه

[michohat]

السلام عليكم ورحمه الله وبركاته
عندى استفسار ويا ريت حد يعرف يقولى ايه الاجراءات
من فترة واحنا بنسمع ان الدوله بتعمل طريق جديد دولى بيوصل بين المنصورة والزقازيق وانهم ماشيين بيصادروا الاراضى والبيوت واى حاجه فى وش الطريق
دلوقتى وصلت لى اخبار ان الارض المملوكه لى هيعدى عليها الطريق و الدوله هتاخدها
اعمل ايه دلوقت ايه اللى فى امكانى اعمله
الارض دلوقتى لسه زراعيه لكنها فى كردون المبانى يعنى كانت بتتباع بالمتر و كانت جايبة فلوس كتير
دلوقتى لما الدوله تاخدها وهتدى تعويضات هتبقى ملاليم ( سمعت انهم بيدوا تعويض على الفدان اربعه الاف و القيراط الواحد كان ب 20 الف) فهل فى اجراءات اتشاكل بيها لمنع الاستيلاء على الارض من قبل الدولة

الدوله اختارت الطريق الصعب فبدل ما الطريق الدولى الجديد يمشى على مصرف قديم مفيش حد بيستفاد بيه مشته وسط اراضى الناس والناس الواصله واللى ليها نفوذ اتدخلت و بعدت الطريق بعيد عن ارضها ودفعت فلوس
هل فى طريقة لانقاذ الارض؟

[michohat]

فعلا الخبر طلع صح يا جماعه
نزلت اشوف ايه اللى بيحصل لما وصلت لقيت الارض متغطيه بالرمله وشغالين فيها اكنها ملهاش صاحب ولا يحزنون
حد يقدر يفيدنى اقدر اعمل ايه ولا خلاص الارض راحت عليا

[أبو صلاح]

قلبي معاك
بس موضوع زي ده منفعش فيه استشارات من منتديات
لازم تشوف محامي جامد وتستشيره

[mohmd76]

سيناريو فيلم الارض للعملاق محمود المليجى
عليك العوض لو تلحق تبيع بيعها
احمد مظهر مات مقهور لان الطريق الدائرى كان ولابد ان يمر فى منتصف ارضه ودمرها ودمر زراعات من كل بلاد الدنيا فى ارض كان يملكها فى المنصورية بالجيزة

[michohat]

الحمد لله الارض كلها ضاعت الطريق بلع الارض كلها و واخد من الجيران كمان
مقلق ادخل فى سكك محامين التعويضات
هل فيه حل لوقف الطريق

[aif]

ربنا يعوضك خير و احسن منها باذن الله
ماحدش عارف الخير فين
اعتقد ان اللي ممكن تعمله انك تتظلم من مبلغ التعويض ... ممكن تروح المحافظة او مجلس المدينة وهما ح يقولولك الاجراء اللي ممكن تتظلم بيه ... طلب ... دعوى ....
اعتقد ان ده كل اللي ممكن يتعمل
احنا عندنا ف العباسية بيوت ومحلات كانت ف الميدان ..... انت طبعا عارف يعني ايه محل في ميدان العباسية ... يعني ملايين
وازالوها عشان مترو الانفاق .... والتعويض اعتقد كان 30 الف للشقة او المحل .... حاجة زي كدة ... وفيهم ناس كانو لسة مشتريين المحلات بملايين ... زي صيدلية العزبي مثلا ....
العوض على الله
ما تزعلش .... يمكن ده خير لك .... ربنا وحده اللي عالم بالغيب

[SHNORY]

باشا معلش انا حخرج عن الجزئيه القانونيه شويه
حضرتك بتقول حيعملوا طريق في وسط ارضك
ممكن حضرتك طالما ارضط بقت علي طريق سريع تفكر في مشروع
كويس وتحاول تنفذه
زي بنزينه ومركز خدمه سيارات
كمان وجود الارض نفسها علي الطريق اكيد حيرفع سعرها بشكل يعوض الجزء اللي تم استقطاعه منها
وربنا معاك ويعوضك خير باذن الله

[aif]

باشا معلش انا حخرج عن الجزئيه القانونيه شويه
حضرتك بتقول حيعملوا طريق في وسط ارضك
ممكن حضرتك طالما ارضط بقت علي طريق سريع تفكر في مشروع
كويس وتحاول تنفذه
زي بنزينه ومركز خدمه سيارات
كمان وجود الارض نفسها علي الطريق اكيد حيرفع سعرها بشكل يعوض الجزء اللي تم استقطاعه منها
وربنا معاك ويعوضك خير باذن الله

والله انا فكرت زيك يا شنوري
ان او جزء اتاخد طريق يبقة الباقي ح يبقى ع الطريق وسعره يرتفع
لكن هو بيقول ان الارض اتاخدت كلها ......
ربنا يعوض خير

[michohat]

الارض كلها(كلها) اتاخدت الحمد لله وكمان خدوا من الجيران حولى
فعلا صدق المثل اللى يشوف مصيبة غيرة تهون عليه
الحمد لله على كل شئ
فى ناس راحت عليها ارضها وراحت عليها بيوتها اللى عايشة فيها
تخيل فى لحظه تفقد ارضك اللى هي محل نشاطك وتفقد بيتك اللى انت عايش فيه وتبقى فى الشارع
بقى فى حد يتخيل ان حد يعتمد فى تخطيط طريق دولى على تصوير جوى حصل من 10 سنين
عجبى
ومدام عايشين فيها ياما هنشوف

[Karim_Monir]

لا حول ولا قوة الا بالله العلي العظيم
يا اخى لا يضيع حق وراءه مطالب
اتظلم وارفع صوتك
وصل صوتك للمسئولين
للاعلام يمكن يكون ليهم فايدة
ما تسكتش عن حقك ربنا هايسئلك عنه يوم القيامة

[RED_OCTOBER_IV]

الحمد لله الارض كلها ضاعت الطريق بلع الارض كلها و واخد من الجيران كمان
مقلق ادخل فى سكك محامين التعويضات
هل فيه حل لوقف الطريق

ما ضاع حق ورأه مطالب ... أولاً أوعى تتكاسل فى البحث عن حقك اللى يرضيك ... الساكت عن الحق ........* اخرس

بالنسبه لسؤال حضرتك .. فـ الطريق ده هو عباره عن مشروع من مشروعات الحكومه وطالما بدء يبقى اعتقد مينفعش الرجوع فيه

بس أعتقد إننا لو لجئنا بالتظلم للمراقبين على الحكومه ( مجلس الشعب.. طبعاً) ممكن يتواجد حل يرضي حضرتك ..


الخلاصه : حضرتك تجمع عدد من المتضررين من المشروع ده .. وتطلعو على عضو مجلس شعب تقيل .. تشرحوله الموقف وتتابعه معاه ... وياريت لو كانت طالبتكم معقوله .. يعنى متطالبش بوقف الطريق .. بس تقدر تطالب بقطعة أرض مساويه للي كنت تملكها وبتطل على الطريق ... وأعتقد إنك هتكون كده كسبان .. او مرضى بالنسبه للجهد والوقت إللى هيتكلفه الموقف .. وربنا يوفقك وتطمنا .

[ابو حسين]

قلبي معاك

[Ahmed Samy]

قلبي معاك

بس مش هاتاخد حاجة من المطالبة

نزع الملكية بيكون بقرار جمهوري و ياما اتنزعت ملكيات

ربنا يعوضك خير في حاجة تانية

اللهم أجرني في مصيبتي و اخلفني خيرا منها

و صدقني لو صبرت و احتسبت عند الله هاتلاقي خير كتير

انما الحكومة .....ايدك منها و الأرض

[michohat]

من ضمن الكلام اللى سمعته ان عضو مجلس الشعب هوا اللى متسبب فى تحويل مسار الطريق لانه كان ماشى فى اراضى مملوكه له
و فى ناس ليها معرفة بدكاترة تبع رئاسة الجمهورية و مش نفعوهم بحاجه بيقولوا ده قرار رئاسى
بس نفسى اعرف ازاى يسيبوا حل تانى مش بيسبب ضرر لحد وهوا انهم يغطوا مصرف ويعملوا الطريق فوقة بدل ما يمشوا الطريق فى ارض زراعيه
ناس كتير حصل ليها ضرر كبير من الحكايه دى
ناس خسرت ارضها اللى هيا شغلها
وناس خسرت بيوت ليها
وناس خسرت ارض وبيت ليها مره واحده
وده مش على اصحاب الاراضى وبس
فين هيروح الناس اللى كانت بتزرع
فين هتروح الناس اللى كانت بتأجر الاراضى للزراعه
معرفش بيعملوا كده ليه عاوزين ايه تانى
طريق دولى وبدل ما يمشوه فى منطقة مش تسبب ضرر لحد وبالعكس هتفيد اللى حولها لانهم هيردموا مصرف
يجوا يضيقوها على الفلاح
والله اللى يشوف منظر الارض والطريق ناخر فيها يصعب عليه
فين الدولة اللى بتروح تستصلح اراضى وتدفع كتير وفى الاخر الفلوس تروح لناس كروشها كبيرة
واللى يقف فى وشهم يتاخد و يتحبس
معرفش ليه عاوزين يكرهونا فى مصر بس برضه مش هنكرهها
ولا حول ولا قوه الا بالله , وانا الى ربنا لمنقلبون

[michohat]

روابط ذات صله

http://www.2lex.com/archives/53217

http://www.alwafd.org/details.aspx?nid=18371

واهو عضو مجلس الشعب

http://enshas.com/salhy.htm