لماذا يلبس كل منا سيارته حينما يتعامل مع الآخرين

[abo3bdolrahman]

الموضوع ده كنت عاوز أكتب فيه من فترة و نسيت بس اللى فكرنى حاجة حصلت معايا هنا فى لاجوس فى نيجيريا و أنا باصلى الجمعة فى الجامع السورى الكبير فى إيكوي فجأة دخلت عربية بورش كاريرا 4 ساحة الإنتظار فى المسجد و نزل منها واحد شكله عادى جدا و قعد على الأرض فى أقرب مكان لقاه و بعد الصلاة قمت أتفرج على العربية من بعيد كده علشان الزحمة و علشان صاحبها ما يخدش باله و بردوا لقيته قام من مكانه فى هدوء و وزع شوية فلوس على المتسولين و كل ما حد يقابله و يسلم عليه بيسلم عليه عادى و ركب عربيته و إستنى لغاية ما الزحمة قلت و إبتدا يرجع مرشدير كان السواق بتاعى فى الوقت ده جيه بالعربية الكرولا و ركن علشان أركب و البورش بيرجع بدهره فى إتجاهنا راح واقف لغاية ما ركبت و تقريبا رجله خفت على الفرامل فحسيت إن العربية بترجع بشاورله بأديا نزل من عربيت و جرى علينا قلت هايناولنى بكس فى وشى لقيته إبتسم و بيسأل فيه إيه قولته إنت خوفتنى بعربيتك لما نطت لورا فاشورتلك علشان تحاسب فوجئت بيه بيتأسف بشدة ليا و للسائق النيجيرى اللى كان عمال يزعق فى وشه كأنه شغال عنده مع العلم إن التويوتا الكرولا هنا السيارة الشعبية و البورش دى ما بيركابهاش إلا الناس الكبيرة هل لو الموقف ده فى مصر و واحد بمرسيدس سى 180 حتى مش بورش فى نفس الموقف هل كان هايعمل معانا كده :?:
الناس عندنا كل واحد لابس عربيته على جسمه و بيتكلم معاك على قد العربية اللى راكبها لكن تخيلوا إن هنا لأ و ممكن بتاع البى إم ال 740 يشاورلك و يتأسف لو غلطان إمتى بقى هانقلع العربيات اللى لابسينها على جسمنا و نتعامل مع بعض كآدميين :roll:

[AlmAhAtmA]

يا كسوفي يا كسوفي
ده انا بتوع التوكتوك حتي مش سايبني

فيه ناس حلوه كده تحس انها بتاخدك و تطبطب عليك حتي و ايديها في جيوبها :lol:
و فيه ناس عكره
جواها اللهم احفظنا بلاوي و ترسبات غير متحلله

النهادره علي الصحراوي كان فيه حادثه
عربيه من بتوع النظافه الكبار مقلوبه من فوق كوبري صغير في زي رياح حاجه كده

ياربي يا ريتني كنت صورت
انا عديت في حوالي 30 دقيقه
شفت فيهم

ناس ماسكه مصاحف و بتعيط علي السواق اللي متغطي بجرايد :D
و ناس ماسكه في بعض قال ايه زنق عليا و كلام فارغ :o
و واحد عربيته وقفت نزل سواق الاوتوبيس اللي وراه
تخيل ليه
علشان يساعدوا
لا ده مسكه ضربه و قطع له القفطان بتاعه :shock:

كل ده و اللواءات و العمداء و العساكر و الحراميه كله كله بيجري و كرشه مدلدل :lol:
و لا حياه لمن ينادي

[GalaxyMan]

هو فيه سؤال عام

انت نظرتك بتتغير للشخص لما تشوف عربيتة يعني

لو واحد راكب بورش مثلاً هتلاقيك عايز تتكلم معاة ولو راكب 127 مش هتشغل بالك بية

انا اعتقد ان هنا هتلاقي الموضوع لا أراضي بقى كدة تلاقيك بتتعامل مع دا غير ما بتتعامل مع دا

لو انت مش كدة يبقى هتقدر تخلع عربيتك وانت بتتعامل :)

[aboalm]

ده عيب فينا احنا بنبص لكل واحد على حسب مستواه لو معاه فلوس نخاف منه و نعمل له الف حساب و لو فقير و غلبان ندوس عليه

[abo3bdolrahman]

المشكلة مش إن انت اللى تتكلم معاه اذاى المشكلة هوا اللى بيتكلم معاك إزاى و المواقف اللى انا ذكرتها غن اللى بيسموهم هنا ناس كبار معاملتهم محترمة تخليك تقول فعلا ناس كبار للأسف الكلام ده ما بيحصلش عندنا إلا نادرا و بعدين ما هو بتاع ال127 ده بنى آدم زى ليه هاعملوا وحش و أنا شايف إن الموضوع ده أخلاقى بحت يعنى فيه ناس بتستمد شخصيتها ممما تملك و ده عندنا فى مصر طاغى للأسف و فيه ناس تطغى شخصيتها الأصيلة على كل شىء و للأسف ده اللى لقيته هنا فى لاجوس الناس بتحترم بعض إلى حد كبيييييييير و بتحترم المشاة و العربيات كلها زى بعض بغض النظر عن نوعها و عن اللى راكبها و الناس كلها بتتعامل من هذا المبدأ :roll:

[Akram]

يا باشمهندس GalaxyMan ,,
انا هقول شوية كلام و متاخدش بالك بيه أصلي انا معايا 127 ذي اللى بتتكلم عليها, مع تفهُّمي للمثال اللى بتتكلم عليه :?
صحيح في مصر موضوع العربية ده ليه شكل هام , فمش ممكن تلاقي واحد ربنا فتح عليه سواء من حلال أو من حرام و تلاقيه معاه عربية صغيرة , لا طبعاً إزاي ,, لازم يتفشخر و يجيب الزلمكة علشان الشكل و البريستيج , دا غير إنها بتعمل شغل معاه,
لكن مش كل الناس كده و إلا ده معناه إن كل الناس عايزة زينة الحياه الدنيا و مفيش حد بيبص للآخرة,
فيه ناس معاها كتير و تلاقيها معاها عربية بتاع 60 أو 70 , ناس عملية و بتقيس إمكانيات العربية طبقاً لإحتياجاتها,
على فكرة سواقين الميكروباصات اكتر ناس بيقدروا العربيات الفخمة و بيبعدوا عنها و مزاج عندهم يزنقو على العربيات المتوسطة أو الصغيرة, من باب اللى يخاف مني يوسّعلي............

[Abdallah]

عن نفسى انا لا اهتم بالعربية ولكنى اهتم باسلوب الانسان الى راكب جوة العربية, ياما فى ناس راكبين عربيات صغيرة ولكن محترمين وياما فى ناس راكبين عربيات كبير وهم ولاد ستين فى سبعين, ولكن للأسف فى بلدنا المظاهر بتحكم.
على فكرة يا استاذ اكرم انا حلم من احلامى انى اجيب زلموكة بس مش لزوم الفشخرة ولكن لزوم السفر بجانب عربية كورولا للأستعمال الشخصى وكدة يبقى تمام اوى.

[GalaxyMan]

يا باشمهندس GalaxyMan ,,
انا هقول شوية كلام و متاخدش بالك بيه أصلي انا معايا 127 ذي اللى بتتكلم عليها, مع تفهُّمي للمثال اللى بتتكلم عليه :?
صحيح في مصر موضوع العربية ده ليه شكل هام , فمش ممكن تلاقي واحد ربنا فتح عليه سواء من حلال أو من حرام و تلاقيه معاه عربية صغيرة , لا طبعاً إزاي ,, لازم يتفشخر و يجيب الزلمكة علشان الشكل و البريستيج , دا غير إنها بتعمل شغل معاه,
لكن مش كل الناس كده و إلا ده معناه إن كل الناس عايزة زينة الحياه الدنيا و مفيش حد بيبص للآخرة,
فيه ناس معاها كتير و تلاقيها معاها عربية بتاع 60 أو 70 , ناس عملية و بتقيس إمكانيات العربية طبقاً لإحتياجاتها,
على فكرة سواقين الميكروباصات اكتر ناس بيقدروا العربيات الفخمة و بيبعدوا عنها و مزاج عندهم يزنقو على العربيات المتوسطة أو الصغيرة, من باب اللى يخاف مني يوسّعلي............

أخي انا بتكلم عن نظرة عامة للمجتمع مش نظرة خاصة بيا
يعني فعلاً دا إلي بيحصل في مصر

أنا قريا قصة لكات بيتكلم إنه كان في دولة غربية
وكان في زيارة لسفير
وهو داخل للسفير ركن عربيتة وجالة طفلين سألوة إذا كان عايز يغسل العربية وياخدو منة 2 دولار مقابل الفسل
الراجل وافق

وبيحكي انه وهو عتد السفير في البيت لقى الطفلين جايين داخلين البيت زعل جداً وافتكر انهم جايين هنا عشان ياخدو فلوس الغسيل منه لكن الكاتب بيقول أنه لقاهم بيقولو للسفير يا بابا

ودخلو غيرو هدوهمهم وطلعوا أخدوا منه فلوس الغسيل منه

فهل حاجة زي دي ممكن تحصل عندنا؟

[Heshaam]

موضوع يستحق الإشادة - كالعادة - يا أبو عبد الرحمن

أنا شايف إن ممكن نقسم الموضوع لجزئين:

الأولي إن إحنا اللي بنلبس اللي قدامنا عربيته. بمعنى إيه - وطبعا ده رأيي وغير ملزم لأحد بتاتا - إن فيه نظرة طبقية مستشرية في المجتمع بيبقى فيها النظر لمعظم - ما بأقولش كل - الناس اللي راكبة عربيات فارهة هم من الفاسدين أو من الناس اللي إحنا مش قدهم - والجزئية الأخيرة ديه برضه بتسري على أي عربية مهكعة راكبها حتة عيل لسه في كلية الشرطة أو متخرج منها وهو مفيمها ومركبلها سارينة وما إلى ذلك - ده طبعا علاوة على المواكب العامة والملاكي اللي بتخلق حواجز بين الناس فبيتم إيثار السلامة والبعد عنهم غنيمة. وفي المقابل الناس بيطلعوا بقى غلهم في أصحاب العربيات القديمة نسبيا ومعهم سواقين النقل والتاكسي والميكروباص (هو طبعا القليل فيهم هو اللي محترم بجد بس أنا بتكلم عن النظرة العامة)

الثانية وهي إن الشخص بيلبس عربيته - وده للناس اللي بتعملها الفلوس مش الفلوس الي بتعملها - فأول ما يتحصل على عربية من دول خلاص يا أرض اتهدي ما عليكي قدي وما بيعملش اعتبار لحد غير اللي راكب عربية أغلى منه أو يوريله إنه معاه فلوس أكتر منه. ولا يخفى طبعا في ظل الظروف الجميلة اللي إحنا عايشين فيها إن كثير - لا أقول كل - من مقتني هذه السيارات هم من عينة أنا أقدر أشتري كل حاجة بفلوسي الذين لا تحكمهم قيم ولا أخلاق - ومش عايز أقول دين كمان.

أما الجزئيتين دول بيتفاعلوا مع بعض بالإضافة لغياب وجود أو تطبيق قانون يعلي من حقوق كل مواطن ويحترم فيه إنسانيته بنلاقي حالة عدم الاحترام الشائعة في الشارع المصري للأسف - اللي بتدفن كل جميل في حياتنا تحت غطاء من الكآبة والقبح.
:(

[Ahmed Anwer]

طيب أنا هاحكيلكم حكاية عكسية حصلت في مارينا
طفل صغير خبط شابة فابتاع الأمن وقفه و قاله سيب البتش باجي و هات والدك أو والدتك و تعال
تخيلوا والدته عملت أيه
مسألتش في بتاع الأمن و راحت اشتراتله بيتش باجي جديد
هيا دي التربية بتعلمه من أولها ميهمكش أي حاجة بفلوسك تشتري أي حاجة و تعمل أي حاجة

[hazem_khidr]

ياما ناس هنا في مصر راكبين عربيات فارهه و تلاقيهم بيتكلمو عادي برضه و بيضحكوا مفيش مشاكل و ياما ناس راكبين عربيات صغيره و تلاقيهم ماشيين يقولو يا ارض اتهدي ما عليكي قدي.
الموضوع كله تربيه و اصل مش موضوع غني و فقير خالص

[tmz9111]

أحنا أحسن بلد بتحب تتفشخر باى حاجة وده طبعا مش كل الناس

[tamohsen]

ياااااااااااه
حتي نيجيريا