الوحدة في الوحدة

[M_ashraf]

انا طبيب حديث التخرج دفعة 2007
استلمت منذ فترة تكليفي في احد الوحدات الصحية
و احيانا بكون لوحدي في النبتشية
فكتير منت بفكر في حال البلد و كتب التالي




لقد اجبرتني "الوحدة" التي اعاني منها وفيها ان ابدا بكتابتة مجموعة من الملاحظات المجتمعية التي الاحظها منذ فترة
و بعد ان كثر الحديث في الآونة الاخيرة في الكثير من وسائل الاعلام عن ما يسمى ب " الاصلاح السياسي "
لابد و ان نواجه انفسنا باننا بحاجة ماسة الى اصلاح من نوع اخر و هو "الاصلاح المجتمعى " يفرز اصلاحا سياسيا سليما

ان الاهرامات الخالده منذ اكثر من 7000 سنه لهي دليل واضح و جلي على ان القاعدة القوية تفرز قمة لاتسقط
فالبناء لابد و ان يبدا من القاعدة فالاساس هو اهم نقطة في البناء
و بما انني فرد من افراد هذا المجتمع محب للوطن و احب كل من يعيشون معى على ارض هذا الوطن
فلابد ان يكون لي دور في هذا المجتمع و الا كنت عضوا فاسدا على هذه الارض

الملاحظة الاولى
دور الفرد
ما هو الفرد ؟ و ما هو دور الفرد ؟
الفرد هو الوحدة الاولى و الخلية الفردية في بناء نسيج المجتمع
فلابد ان تكون هذه الخلية خلية صالحة سليمة ومعافاة و ان خرجت عن قانونها تحولت الى ورم سرطاني و جب
التعامل معها و فقا لقانون جراحى المجتمع

ان الفرد في المجتمع المصري لايمل من الحديث عن ان كل شيء في البلد فاسد وسيء و الافراد الاخرون سيئون و البلد بايظة و مفيش حاجة نافعة و يكفيك
فقط ان تذهب في رحلة قصيرة بصحبة احد سائقي التاكسي ليبدأ الحديث معك في احد هذه المواضيع
اذن فلابد من اصلاح بيدا من الافراد
الحلقة المفزعة

و افصد هنا الحلقة المفرغة و ليس المفزعة و لكن ما دفعني الى كتابة العنوان بهذا الشكل هو الحال المفزع الذي نعانيه
و فيما يلي سأتحدث عن مجموعة من السلوكيات و هنا ليس من باب التعميم و لكنها مجرد اضاءة على مجموعة من الظواهر السلبية
تعالوا نبدأ
موظف حكومي و ليكن مدرسا
هو شخص ساخط على كل شيء يذهب الى عمله صباحا مكرها ويرى ان الراتب الذي يتحصل عليه لايكاد يكفي نفقاته المعيشية و انه مظلوم
و تأخر في الترقيات و يكره المدير و يكره الناظر و يخرج هذا الكبت على تلاميذه الذين هم ابني واخي وابن اخي و ابن البقال وابن سائق التاكسي و ابنه هو شخصيا
و يتوانى عن عمله الاساسي مختلقا لنفسه الاعذار
دول كلهم بياخدوا دروس خصوصية
على قد فلوس الحكومة
دول جيل صيع و مش بتوع تعليم
و هكذا

لكن
هو لو شرح كويس و بضمير فهؤلاء الطلاب بمن فيهم ابنه هو شخصيا مش هياخدوا دروس خصوصيه
فهذا بند من بنود النفقات وفره
و بالتالي البقال و السواق و الجزار و غيرهم مش هيرفعوا الاسعار علشان و لادهم ياخدوا دروس خصوصيه فالمدرس مش هيحتاج يزود في بنود اخرى من النغقات
الفكرة المرتب مزادش بس الهالك بدأ يكون اقل
و على فكرة بند الدروس الخصوصية ده مش مجرد اجرة مدرس لأ
ده كمان مواصلات من والى الدرس و تصوير ورق و مذكرات و دخول و خروج وهدوم بتتوسخ و غسيل اكتر و مسحوق غسيل اكتر و مكالمات تليفونيه لتحديد مواعيد الدروس و تغييرها و الغاءها
و هكذا
فبالتالي الغاء بند واحد من النفقات يلغي معه الكثير من النفقات

و بالتالي لو عمل موظف آخر بأحد المصالح الحكومية الخدمية بضمير و بشرف دونما رشوة و خلافه محدش هيطلب اكتر من حقه
فالبقال ايضا مش هيرفع الاسعار عشان يرشي الناس اللي بتفتش عليه
و السواق مش هيزود الاجرة عشان يدفع لموظف المرور المرتشي
و هكذا و تستمر الحلقة المفرغة في الدوران
و كله ايده في جيب كله

وحن كاطباء التكليف على سبيل المثال و انا منهم و برغم اعتراضي الشديد على نظام تكليف الاطباء في حد ذاته و هو ما سأتحدث عنه في موضع اخر
نذهب في ايام معينة الى الوحدات الصحية على سبيل المثال في
كل وحدة فيها طبيب واحد او 2 في اليوم حسب قوة الوحدة
هذا الطبيب و ان حضر في مواعيد العمل الرسمية وعمل بكامل طاقته
ما هي قدرته في العمل ؟
30 او 40 مريض في اليوم
مذا لو حضر الاربع اطباء يوميا و كل و احد كشف على 40 مريض
دخل التذاكر المقطوعة هيزيد و بالتالي زيادة في ادوية الصيدلية الموجوده في الوحده لتكفي المعدل المتزايد و تتبعها زياده في دخول الاطباء لزيادة ايرادات الوزارة مثلا
انها حقا حلقة مفزعة لكن لو تمت بالصورة الصحيحة جدا و ليس التكليف بالمفهوم الذي نعانيه
انا هنا لا ادافع عن التكليف لاني طبيب و لكن لكل فئة في المجتمع رؤية لتؤدي عملها على الوجه الصحيح لابد من اخذها في الاعتبار
الرضا و القناعة
عندنا الشعب المصري ده بتاع مظاهر و منظرة يعني تلاقي و احد مش لاقي ياكل بس لازم الموبايل ابو 19 كاميرا و اقل كاميرا فيهم 19 ميجا بكسل
هو عنده ايه اصلا يصوره بالموبايل ما يوفر تمن الموبايل و تمن كروت الشحن في مصروف بيته
الناس بتبص لبعضيها و بتغير من بعض مع ان سنة الحياة ان الناس في المجتمع طبقات و مش عيب ان الواحد يكون مش غني بس العيب انه يكون مش شريف
مثلا اي اتنين بيتجوزوا النهارده لازم الشقة تكون متجهزه من الابرة للصاروخ و كله احسن حاجة واحسن طراز
و يقلك اشمعنى فلان و فلانة لما اتجوزوا جابوا و انا لأ
و اي حد ميسور شوية تلاقي الناس لابد و ان تنال من شرفه و سمعته
من حق كل واحد انه يملك اي شيء باي ثمن مادام قادرا على دفع الثمن من الحلال دونما تقصيير في اوجه اخرى اساسية
و دون النظر الى ما في يد الآخرين
الملاحظة الثانية
المفتش كرومبو و الاصلاح المجتمعي
ياترى ما هي العلاقة بين الشخصية الاعلامية الكرتونية الشهيرة كرومبو و المجتمع
هنا انا لااقصد المفتش كرومبو بشخصه و لكن بصفته
الاعلام
الاعلام هو مرآة المجتمع
و برامج المسابقات التي انتشرت في الآونة الاخيرة هي افراز من اشخاص فاسدين لا هم لهم سوى الوصول الى ما في جيوب البسطاء
عن طريق طرح سؤال يحتاج الى مستوى وضيع من التفكير و الجائزه آلاف الدولارات يسيل لها لعاب الكثيرين من ابناء الشعب
ساعين للاشتراك بها عسى ان تحقق لهم بعضا من احلامهم
فهذا يرى ان ان الكثيرين قد اتصلوا بتلك القناة الحمقاء لاجابة ذلك السؤال الغبي و لم يفلح اي منهم في الاجابة لكن المواطن المصري الذكي بالطبع يعرف الجواب الصحيح
فلن يتوانى عن الاتصال و بعد اول مكالمه يكون قد خسر العديد من الجنيهات قيمة للمكالمة فيستفز شعوره ليفوز بالجائزة ليعوض قيمة المكالمة الباهظة
فيتصل مرارا و تكرارا فقيمة الجائزة تعوض مئات المكالمات
و دائما لايربح لأن المشترك الحقيقي لن يربح دائما
ان وصول الامر لهذا المستوى ارى فيه( وان كنا نحتاج الى راي رجل دين متفقه) مقامرة بقيمة الكالمات الهاتفية سعيا للفوز بالملايين
ان اغلب مشتركي هذه المسابقات من ابناء الشعب البسطاء سعيا و راء الثراء الغير متعب
يا جماعة الحداية مبتحدفش كتاكيت
نحتاج الى وقفةمع انفسنا لاعادة التفكييرفي هذا الامر
نحن في عصر اعلام فضائي حركل يبث كا يشاء طالما دفع قيمة ايجار بث المحطة على القمر الصناعي فلاسبيل رسمي للايقاف
فلنتوقف نحن عن الشاركة في هذه المسابقات ليتوقف انتاجها

الملاحظة رقم 3
النظام
اكاد اجزم اننا اكثر شعوب الارض كرها للنظام
نحن شعب ضاع الكثير من وقته وعمره في الطوابير "يعني بقينا خبرة 7000 سنه في الطوابير" و مع ذلك مبنعرفش نقف طابور منظم لازم تحصل خناقات و مشاكل و حب لخرق نظام الطابور و الوصول السريع لأي منفذ يؤدي اليه الطابور سواء كنت هتاخد حاجة او هتدفع حتى فلوس
مبنحبش نستنى مبنحبش نقف في الدو بندور على اي حيلة للتحايل على الدور
اللي يقلك اصلى كنت قدامك بس رحت اقعد شوية و ارجع تاني
و اللي يدور على واسطة علشان يدخل من ورا الشباك
او تلاقي واحده ست تيجي و تعمل طابور للستات تكون هي اول واحده فيه
الحل سهل و بسيط ومتبع في الكثير من الاماكن و غير متبع في اماكن اخرى اراها اكثر اهميه
بما ان احنا مبنحبش الطابور يبقى و انت داخل اي مكان تاخد رقم و تقعد في مكان مخصص للانتظار و لما ييجي الدور على رقمك تقوم
مع مراعات وجود منافذ لخدمة كبار السن و المعاقين
مش بس بنكره الطوابير لأ احنا كمان بنكره النظام في المشي
يعني محدش بيحب يمشي على الرصيف كله بيمشي وسط العربيات
يمكن لأن احنا معندناش رصيف بمعناه المصحيح ؟
لو الطريق وقف شوية ييجي واحد سايق عربيته و يعمل فيها اذكى اخواته ويزنق نفسه و يعمل حارة جديدة غير موجوده اصلا
فالناس تكتشف ان الشارع سعة 3 حارات مش 2
و يتحول الشارع الى 3 حارات
في حين انه لوفضل 2 بس ده هيعمل سيولة مرورية لان اغلب المناطق المزدحمة سببها ان عدد حارات اكتر بيفضي في عدد حارات اقل

و مازلنا مبنحبش النظام
اي واحد له صفة ذات سلطة لازم يستغلها لازم يفيم العربية و ميلبسش الحزام و يتكلم في الموبايل و هو سايق
عشان الناس كلها تعرف انه فوق القانون
دي كانت امثلة قليلة من نماذج مجتمعية تدل على ان احنا مبنحبش النظام


الملاحظة رقم 4
العمل دون رقيب
مبنعرفش نشتغل من غير ما يكون فيه رقاية علينا
لكن لو في مسؤول جاي زيارة تجد ناس غير الناس و اداء غير الاداء و مكان غير المكان
طيب ايه ذنب المواطن العادي انه مش مسؤول
ميعرفش يخلص اي خدمة تؤدى من اي مصلحة حكومية بسهولة ويسر
مشهد يتكرر كثيرا:
داخل اي مصلحة حكومية في ساعات الصباح الاولى في ايدك ورق رايح تخلصه محتاج اكيد جولة كبيرة فقلت تروح من بدري
الموظف قاعد على المكتب فارش جرنان عليه العديد من اصناف الطعام التى تكون كافية لقلب معدتك وتخليك تكره الاكل كله
تيجي تكلمه ميردش عليك و لو كررت السؤال
لو كان حظك ان الوظف ده مؤدب يروح ماسك عود جرجير ينطره من الميه و يغرقك و يقلك اتفضل افطر معايا و هو بيحشر عود الجرجير في بقه بطريقة مثيرة للاشمئزاز
في دليل على انه مش وقتك
مش فاضيلك
يعني الصبح بدري البيه مفطرش و متأخر البيه مزوغ امال نروح امتى
معندناش مفهوم احترام العميل منعرفش يعني ايه خدمة عملاء
مبنعرفش نشتغل من غير رقابة


الملاحظة بقى فين ؟
الملاحظه 3 و 4
نجد ان النظام و احترام العميل و العمل الجدي موجود في القطاع الخاص اكتر من الحكومي
او لما بنسافر بره
اذن نجد اننا محتاجين تفعيل نظام الثواب و العقاب في العمل الحكومي لازم الواحد يحس ان اكل عيشه في خطر لو ملتزمش
واضح اننا فعلا بنخاف و مبنختشيش!!!!!!!!!!!!!!!



الملاحظة رقم 5
التحرش
انا عارف ان العنوان صادم شوية لكن اوعدكم مش هخرج عن حدود اللياقة و الادب
انا حبيت اتكلم في الموضوع ده لان الكتابة في احيان كثيرة اسهل من الكلام
كثر احديث في الاونة الاخيرة عن مصطلح التحرش
يا جماعة اشمعنى اليومين دول بالذات بدأنا نتكلم
فجأة بقينا شعب قليل الادب
و لا الموضوع موضة و الفضائيات بتخاطب غرائز الناس لرفع نسب المشاهدة

الناس دي فييين من زمان
طول عمرنا بنعاني من الموضوع ده رجالا و نساء و اطفالا
يعني
لما امشي في الشارع انا و انت او اخويا او اختي او امي او...او,,,,
و تسمع واحد بيشتم بعلو صوته بأبشع الالفلظ ده يبقى اسمه ايه ؟؟؟؟؟؟؟؟؟


لما تلاقي واحد فتح محل لازم تلاقي على اليافطة صورة واحد شعرها اصفر وعينيها ملونة ايا كان نوع النشاط التجاري
ده لو فاتح سنترال تلاقي صورة واحده بتتكلم في الموبايل على اليافطة
ده يبقى اسمه ايييييييييه؟؟؟؟؟؟؟؟؟؟؟

لما تفتح التلفزيون و تلاقي مذيعة شكلها غير لائق شكلا و موضوعا ؟
ده يبقى اسمه ايييييه؟

سواق الميكروباص اللي بيتجاوز حمولته بعدد مهول من الركاب رجاة وستات و بنتا و شباب و يحشرهم في علبة السردين المتحركة دي
ده يبقى اسمه ايييييييييييه؟ليه ميبقاش فيه مواصلات عامة مخصصة للسيدات زي مترو الانفاق
ليه بتتسحب رخصة السواق و هو مش لابس الحزام و متتسحبش على الحمولة الزياده

يا جماعة لما نيجي نناقش موضوع لازم نناقشه من اساسه من من على الوش

و الى اللقاء مرة اخرى
اللهم ارزقنا الاخلاص
اللهم انا نعوذ بك من النفاق

[MoToRiZeR]

تحياتي الحارة و الشديدة و الكثيرة .
موضوع ممتع لأقصي درجة .

[ahmad--ezzat]

اة اة انا فهمت.............................................. ...............البلد بايظة ياباشا (ومحدش يقولى مصر امى دى مرات ابويا)

[gade2]

طب لو فكرنا فى الحل كل اما تيجى تاخد مشكله وتحاول تحلها تلاقى مشكله تانيه مرتبطه بيها فده بيغقد الموضوع شويه وان كنت ارى انا ان الحل يبدأمن البيت وبالاخص التربيه والدين

[M_ashraf]

اشكر كل اللي دخلوا و علقوا على التوبيك
بالنسبة للاخ احمد نوبيرا
انا عارف ان الموضوع معقد
لكن لو انت شايف زي ما انا شايف
دور الفرد ايوه دور الفرد يا جماعة انا شايف ان فيه مفاتيح لحلول الكثير من المشاكل
دور الجماعة هو مجموعة من الافراد تتعاون على القيام بشيء معين و تتينى مجموعة من الافكار
يعني البدايات فردية

الاخ gade2
انا اؤيدك في موضوع البيت و التربية و الدين
و بعدين احنا شعب عاطفي و الدين دايما بيكون مدخل كويس للتأثير على الناس
يعني الخطاب الديني برده له دور كبير
لكن اهم حاجة زي ما قلت هو الالتفاف حول الافكار و ليس الاشخاص

[نور القمر]

الموضوع رائع وبنياقش كتير من مشاكلنا للاسف بقت بالنسبة لنا زي المية والهواء
اقترح تناقش كل مشكلة على حدى

بس حقيقي الواحد فقد الامل في حاجات كتير انها ممكن تتصلح
زي التزاحم في الطوابير
وليه طوابير اساسا ماهو لازم يراعو ان في ناس متقدرش تقف فعلا ليه ميكنش الموضوع منظم اكتر زي البنوك مثلا او شركات الطيران كل واحد برقم ويقعد مرتاح معزز مكرم لحد ما يجي دوره

ليه الموظفين مصممين على سياسة (( اريحك ليه مادام بامكاني اعكنن عليك واقرفك))

هنقول ايه ولا ايه
الامل بعيد اوي تحقيقه