سؤال عن امتداد الايجار القديم

[joeyjeff77]

والدي كان يسكن في شقه ايجار قديم من 30 سنه و تزوجت فيها والدتي .وعند انجبنا نشانا في بيت جدتي لاجل ظروف عملهم حتى توفت جدتي و اصبحت الشقه من حق خالي و استمرنا في الاقامه في شقه خالي واقامت معنا والدتنا كنا نقيم ايضا مع والدي (اجازه صيف)و لكن قبل و فاته بفتره كنا في شقه خالي .الا ان مرض والدي و سفرنا بيه لمده عام متقطع الا ان توفى .و لا نملك من الدنيا انا و اختي و والدتي غير هذه الشقة .ورفض المالك اعطانا ايصال ايجار هذا الشهر وبعد مفاوضات اعطاني ايصال باسم ابي المتوفي و قال لي مافيش مشاكل. مع العلم اني كنت ابات معه قبل مرضه .ما العمل الان ارضى بي هذا الايصال؟ واثق به

[Samah AbdAllah]

المفروض الايصال يبقا باسم والدتك

وانتوا تقيموا فى الشقة عادى جدا

ومش من حقه يطردكوا

المهم تكونوا مقيمين فيها

[joeyjeff77]

انا دلوقتي المقيم فيها. و بوضبها تمهيدا لات والدتي تيجي. هل بعد ما ادانا الايصال ده اطمن؟

[Samah AbdAllah]

هو ليه مكتبش الوصل باسمك

[joeyjeff77]

مش عارف بس فيه ناس معايا في نفس العماره نفس القصه فانا قلت عادي!

[Samah AbdAllah]

مش عارفة لان احنا كان عندنا موقف مع صاحب العمارة وبندفع فى الحى مش بندفع له هو شخصيا بس بنعمل كل الكتابات اللى بينا وبينه او الوصولات فى الحى باسم ماما
هحاول اسأل وارد عليك

اكيد فى محامين فى نايل موتورز وان شاء الله يفيدوك اكتر منى

[joeyjeff77]

ميرسي جدا و اشكرك على الرد

[Samah AbdAllah]

لا شكر على واجب انا معملتش حاجة

[jisso82]

هو أكيد هيعوز يكتب الوصل باسم المستأجر الأساسى أيا كان لأن كتابته باسم حضرتك اعتراف ضمنى بأحقيتك فى الشقة حتى لو كان حقيقى فالحداية مش بترمى كتاكيت.

[joeyjeff77]

يعني اتكل على الله و اعيش كده و خلاص؟ ولا اعمل ايه؟

[hamedo0]

ياعم الحاج طلما خت وصل ايجار اطمن باسم الوالد ماهو صاحب عقد الايجار مش مشكله
انا حصلت المشكله دى ليا بعد وفات بابا بس المشكله عندى ان عقد ايجار الشقه باسم جدى فا صاحب البيت مش بيبعت ليا وصلات وانا بدفع ايجار سنه كامله في المحكمه كل سنه فاطمن
بس لو في حد من الاخوه المحامين ممكن يفدوك ويفدوني

[ashour100]

السلام عليكمطيب يا جماعة فين حق صاحب العقار؟!!!المعادلة موش صحيحة، لان امتداد عقد الايجار لاكثر من مؤجر وأكثر من جيل فيه ظلم بين لاصحاب هذه العقارات!!!الايجارات القديمة ملاليم والغلاء والتضخم يطيران بسرعة الصاروخ.لازم صيغة توفيقية بين المالك والمؤجر بنظام الايجار القديم، لابد من حل عادل لجميع الاطراف.

[Mohamed_Ibiza]

اولا : عقد الايجار عقد لا يعتد فيه بشخصية المؤجر او المستأجر .. فهو عقد من عقود المدة .. عليك ياسيدي انك ترجع لعقد الايجار اللي تم بين والدك وبين صاحب العقار وتشوف المدة المحدده لعقد الايجار ولو كان العقد يحتوي على احد الشروط الي هقولك عليها دلوقتي يبقى اذن عقد الايجار بتاعك مؤبدا وليس من حق صاحب العقار في انهاء العقد :

1 - الاتفاق على استمرار الايجار بدوام العين المؤجرة ( الشقه )

2 - اذا اتفق على استمرار الايجار طالما كان للمستأجر ( والدك ) فروع ( حضرتك واختك ) يحق لهم المطالبة بمد الايجار.. وانتقال حق الايجار الي الورثة يؤدي الي امكان الفصل بين الملكية والانتفاع المؤبد

3 - يعد الايجار مؤبدا في حالة الاتفاق على مده معينة ولكن يشترط تجدد العقد تلقائيا لذات المجه طالما لم يصدر من المستأجر ( والدك) اخطار بانهاء العقد

4 - كما يعد الايجار مؤبدا اذا بلغت مدته حدا من الطول ادت الي الفصل بين الملكية والانتفاع بشكل مؤبد ولو كان التابيد نسبيا

واخر بند ده هو اللي بيكون فيه خلاصة حالات الايجار القديم في مصر .. وعلى كلامك ان عمركم كلوا كان في الشقة دي يعني انتو ظهرتوا بمظهر المالك .. وسواء لوفاة والدك او لا محدش يقدر يطلعكم من الشقة .. بس هو كل اللي يقدر يعملوا هو تجديد العقد وساعتها هيزود ايجار العين وده هيكون مراعاة للظروف الحالية واختلافها مع وقت ابرام العقد

ارجو ان اكون افدتك

[M.Mostafa80]

هو أنت محامى يأبو حميد ولا أيه

[Mohamed_Ibiza]

هو أنت محامى يأبو حميد ولا أيه

اهو بلقط رزقي يا محمد بيك ..

هههههههههههههههههههههههههههههههههههههههههه