الحمد لله - الزجاج الامامي اتكسر

[Karim_Monir]

بداية الحمد لله على ما اصابنا
فما اصابنا من خير فمن الله وما اصابنا من شر فمن انفسنا

النهاردة الصبح كنت رايح العاشر للمصنع بتاعنا في مامورية عمل وسمعت نقرة على الزجاج الامامي غالبا بسبب زلطة صغيرة
قولت وانا راجع اعملها عند دكتور جريش او دكتور خالد
روحت العاشر 10:30 ومشيت بعد صلاة الضهر نزلت الجاج لقيت الازاز الامامي الشرخ بقي طولة 50 سم
الحمد لله قدر الله وما شاء فعل
روحت على مصنع دكتور جريش اغيره عشان عارف انه احسن واجود خامات الزجاج في مصر وكان في طريق للقاهرة
ثمن الزجاج 320 جنيها و10 جنيه اكرامية
ما دعاني للكتابة لكم هنا اني لاحظت دقة وجودة زي الفل في التركيب
انا في شارع جمال عبد الناصر حيث اسكن يوجد محل كبير للثلاثي بتاع زجاج السيارت لكن تركبيهم مشض قد كدة وبشوهو العربية بالسليكون
اهم ما لفت نظري نوعية السليكون اللي بيستعملوة للعربيات الغالية مش للنص نقل وغيرها
سليكون انجليزي في كيس بلاستيك بيتفضىى في مسدس كبير العبوة بتكفي عربية ونص فقط وتمن العبوة 90
طبعا انا مش بدفع حاجة بس لما الثلاثي بيركب للعربيات سليكون من اللي العلبة ب 7 جنية وده بيركب بسليكون ب 90 جنية يبقي في حاجة كويسة وايجابية لازم اقول عنها
نصيحتي لو قدر الله لك واتكسر الزجاج مشوار العاشر 40 كيلو بس لو خايف ويهمك شكل عربيتك لانهم بياخدو بالهم من تفاصيل فنية كتير وهما بيركبوا
----------
على الهامش واحد صاحبي بيكلمني وبيقولي مش لو كنت مامن كنت غيرتة في التوكيل
رديت قولت لله ما اعطى ولله ما اخذ
ماله واسترده بعدما اعطاياني من غير حول منى ولا قوة

[thegreatnileman]

فى ناس بتامن على عربياتها ولما تتخبط بتاخد التعويض ومبتخسرش فلوس

وناس بتامن عند ربنا وبيحفظهم

[sokasoon]

• قدر الله وما شاء فعل
  
  وقل ما يصيبنا الا ما كتب الله لنا
  
  وماتزعلش يا كريم انا لما غيرت الزجاج الراجل
  
  كان نضيف جداا فى تركيبه الحقيقة وماكنش فى نقطة
  
  سيلكون خارج بره الزجاج

[Karim_Monir]

نسيت اقول ان تمنه عند الثلاثي 460 جنيه

[إسلام شاهين]

معلش يا كريم قدر الله وما شاء فعل

أنا ليا ملاحظة :-
إنت قلت إن ممكن زلطة هي اللي عملت كده ، لأ هو مش ممكن هو أكيد ، لأنا إمبارح راجع من السلام دائري والطريق كان مليان تريلات اللي ينرفز إني طول السكة سامع نقر زلط ورمل على الزجاج بس مش عارف أعمل إيه البهوات مش مغطيين الحمولة بتاعتهم ومشيين يلوشوا في خلق الله ، وبعدين أنا من كثرالخبط والنقر قمت راكن على جنب لمدة نص ساعة وبعدين مشيت تاني ، فعلا حاجة تحرق الدم .

[Ahmed Hassan]

الحمد لله يا كريم... قدر الله و ما شاء فعل.

[د.محمود صلاح]

ممكن عنوان المصنع والمكان المناسب للتركيب؟
ملاحظة أخرى ؛-
عند شرخ الزجاج ضع شريط سيلوتيب على الجزء المشروخ حتى لا تدخل الرمال والمياه بين شطرى الشرح فيعيق عملية الاصلاح ( عند مركز الدكتور خالد ) حيث ان الاصلاح عندهم يخفى الشرخ تماما وكأن شيئا لم يحدث !!!

[اسلام المصرى]

الحمد لله يا كريم انها جت على قد كده قدر الله وما شاء فعل معاش حصل خير ان شاء الله ديه حاجات بسيطة كلها و الحمد لله أن انت و عائلتك الكريمة بألف خير ربنا يعوضك خير ان شاء الله. أنا ان شاء الله لو حصلى حاجة كده هكلمك و نروح للعاشر من عندى كده يعملوا 80 كم بش مش مشكلة لأنى انت طالما قولت الناس ديه 10 على 10 يبقوا كده لأنى بثق فى كلامك :)

[Abdallah]

حصل خير يا كريم والحمدلله على كل حال, والحمدلله انها جت على قد كدة وشاكرين على النصيحة بس ممكن اعرف هو الراجل دة ليه فروع برة القاهرة ؟؟؟

[Ahmed Hassan]

لأ يا عبد الله.. ده اصلا مصنع زجاج كبير و موجود في العاشر.

[OsKaR]

قدر الله و ما شاء فعل كويس انها جت لحد كده و على فكره جريش ده انضف مركز زجاج في مصر كفايه انه واخد أيزو

[أبو عبدالله]

قدر الله وماشاء فعل

ربنا يسترها علينا

ويا عبدالله مخزن الدكتور جريش عندي في شارع السنترال ده مخزن لهم بيطلعوا منه لكل المحلات اللي في الدقهليه وغيرها من المحافظات لو احتجت تسال عن حاجه قولي وانا اسألك وابقى عدي يا اخي

[dragonsmith]

لأنا إمبارح راجع من السلام دائري والطريق كان مليان تريلات اللي ينرفز إني طول السكة سامع نقر زلط ورمل على الزجاج بس مش عارف أعمل إيه البهوات مش مغطيين الحمولة بتاعتهم ومشيين يلوشوا في خلق الله

سبحان الله!
أنا امبارح برضه زجاج العربية اتنقر لنفس السبب و على الدائري كمان!
قدر الله و ما شاء فعل.

[Sharky]

قدر الله و ماشاء فعل و الحمد لله إنها جت على أد كده

[محمد ابراهيم 1]

فداك يا باشا بس كنت سيبه كام يوم عشان العين