أحلام x أحلام

[Dr Ahmed]

السلام عليكم جميعا...

فكرة حبيت أكتبها ونتكلم فيها ومش عارف رد فعلكم هيبقى إيه..

مين فينا مبيحلمش؟
مقصدش أحلام اليقظة...
ولا الحلم ببكره والمستقبل...

أقصد الحلم وانت نايم..
كتير مننا شاف أحلام أثرت فيه ولسه فاكرها..
وكتير شاف أحلام واتحققت تماما..

أنا مش بحب برامج تفسير الأحلام ولا عايز موضوع عن تفسير الأحلام لكن نفسى نحكى مع بعض عن أهم الأحلام اللى لسه فاكرها أو اللى أثرت فيك جدا..

[Dr Ahmed]

سنة 2000 كان أحد أصدقائى حصل حديثا على الدكتوراة، حلمت بعد حصوله عليها أنى فى المستشفى التى نعمل بها وأنى أدخل أحد العنابر لأجده مصابا فى وجهه ويلتف الناس من حوله ، فأبكى وأسأله ما الذى فعل فيك هكذا؟ فيضحك ولا يرد، ورأيت بجانبه على سرير فى نفس الحجرة أحد الزملاء الذين توفى والدهم من ايام..

حكيت له هذا الحلم وشاهدت القلق فى عينيه..وفسرته أنه ربما يلاقى أباه ربه...

وتمر الأيام.. حوالى 40 يوما..
لم أكن نوبتجيا فى هذا اليوم لكن حدثت ظروف لأحد الزملاء مما اضطره أن يبدل نوبتجيته معى لأكون بالمستشفى مكانه..
جاءنى تليفون من الاستقبال أن زميلى الذى رأيته فى الحلم مصاب بالاستقبال..
نزلت مسرعا وليس فى ذهنى ذلك الحلم ..
لكن عندما نزلت وجدت إصابته كبيرة، وأنه فارق الحياة..
وكان يوما مشهودا.
رحمه الله وبارك له فيمن ترك من ذرية..

[hazem_khidr]

مفيش حلم معين اقدر قول انه اتحقق.
لكن في مواقف بتعدي عليا ببقي حاسس اني شوفتها قبل كده و ببقي عارف انا حقول ايه و بعد ما اتكلم ببقي عارف اللي قدامي حيرد يقول ايه و بالحرف!!!!!
حاجه كمان لما كنت في الامارات قعدت هناك حوالي 3 سنين مفيش يوم نمت فيه الا و حلمت بمصر و ششوارع مصر و اوقات كتير الاقي والدي معايا في الحلم!!!!!!
اصعب حلم اللي بيقومني من احلي نومه مفزوع اني بحلم اني لسه طالب و داخل امتحان و ما اعرفش حاجه عن الماده اللي حمتحن فيها و الحلم دا بيقتلني و بلاقي نفسي قايم مفزوع و اقول لحمد لله..
غير كده انا كل يوم بحلم مفيش يوم بنام غير لما احلم.
شكرا يا دكتور علي الموضوع الجامد دا :)

[جندى مجند]

اصعب حلم اللي بيقومني من احلي نومه مفزوع اني بحلم اني لسه طالب و داخل امتحان و ما اعرفش حاجه عن الماده اللي حمتحن فيها و الحلم دا بيقتلني و بلاقي نفسي قايم مفزوع و اقول لحمد لله..

+1 ... ايه دة؟؟ نفس الحلم دة بيجيلى بين الحين و الآخر و كمان بيزيد عليه انى بأوصل لجنة الامتحان متأخر!!! رغم انى مخلص كلية من أكتر من 7 سنين!!!

فى حلم جالى من حوالى 5 سنين و كنت فى الجيش فى الهايكستب أياميها و مش قادر أنسى الحلم دة الى الآن ... حلمت انى كنت واقف على الكورنيش فى اسكندرية و بدأ الموج يعلى جامد و بعدين بدأ يطلع من البحر قطعان ضخمة من الدواب و الحيوانات و الناس كلها بتجرى مفزوعة و مذهولة و صوت فى الخلفية بيقرأ "يوم يأتى بعض آيات ربك لا ينفع نفساً ايمانها لم تكن آمنت من قبل أو كسبت فى ايمانها خيراً" ... قمت من النوم مفزوع و مش قادر أنطق ... و لحظة ما قمت من النوم كان أذان الفجر بدأ ... و فضلت لعدة أيام فى حالة سكينة و هدوء و تأمل لأحوال الدنيا و الموت ... و لكن لأن الانسان ظلوم جهول و ينسى مع الوقت فللأسف فتر هذا الاحساس مع الوقت و عدت للانغماس فى الدنيا و مشاغلها و ان كنت أسترجع هذا الحلم بين الحين و الآخر ... و شكراً لك يا دكتور لفتح هذا الموضوع و تذكيرى بهذا الحلم.

[Dr Ahmed]

بحلم اني لسه طالب و داخل امتحان و ما اعرفش حاجه عن الماده اللي حمتحن فيها

برضه أنا كمان شفت الحلم دا كتير وأعرف كتير من أصدقائى برضه بيشوفوه!!!

حلمت انى كنت واقف على الكورنيش فى اسكندرية و بدأ الموج يعلى جامد و بعدين بدأ يطلع من البحر قطعان ضخمة من الدواب و الحيوانات و الناس كلها بتجرى مفزوعة و مذهولة و صوت فى الخلفية بيقرأ "يوم يأتى بعض آيات ربك لا ينفع نفساً ايمانها لم تكن آمنت من قبل أو كسبت فى ايمانها خيراً"

مش هتكلم عن التفسير بس دا واضح جدا وجميل جدا جدا

حضرتك فكرتنى برضه بحلم جميل أعتقد إنى كنت فيه بداخل الكعبة ، وكنت أدعو الله ويدى لأعلى فوجدتنى أعلو فى الهواء وتترك أرجلى الأرض فى شعور مازلت أشتاق إليه..

[hazem_khidr]

hazem_khidr كتب:
اصعب حلم اللي بيقومني من احلي نومه مفزوع اني بحلم اني لسه طالب و داخل امتحان و ما اعرفش حاجه عن الماده اللي حمتحن فيها و الحلم دا بيقتلني و بلاقي نفسي قايم مفزوع و اقول لحمد لله..



+1 ... ايه دة؟؟ نفس الحلم دة بيجيلى بين الحين و الآخر و كمان بيزيد عليه انى بأوصل لجنة الامتحان متأخر!!! رغم انى مخلص كلية من أكتر من 7 سنين!!!

بحلم اني لسه طالب و داخل امتحان و ما اعرفش حاجه عن الماده اللي حمتحن فيها


برضه أنا كمان شفت الحلم دا كتير وأعرف كتير من أصدقائى برضه بيشوفوه!!!

دا طلع مش انا لوحدي بس :shock:
:shock:
علي فكره انا الحلم دا ما بدأتش احلم بيه غير لما خلصت كليه و اتخرجت و بدأ يجيلي بقي

[محمدايهاب]

اصعب حلم اللي بيقومني من احلي نومه مفزوع اني بحلم اني لسه طالب و داخل امتحان و ما اعرفش حاجه عن الماده اللي حمتحن فيها و الحلم دا بيقتلني و بلاقي نفسي قايم مفزوع و اقول لحمد لله..

ده حلم ثابت لا يتغير بالنسبة ليا و بشوفه قبل كل امتحان صعب


أما أصعب و أسوء أحلامي كانت عن المسيح الدجال أنا مش فاكر الأحلام بالطبط بس إلي أنا عارفه أني كنت بصحى من النوم مفزووع ( كان عندي 15 سنة تقريبا ) و كل ده بسبب أني كنت بقرأ كتب كتيير عن علامات الساعة و كان الموضو ده مستهويني في النهار و مطلع عيني في الليل
لو سمحت أنا ما بحبش تفسيير الأحلام و لا عاوز حد يفسر الحلم و بالحلو و لا بالوحش

[Dr Ahmed]

لو سمحت أنا ما بحبش تفسيير الأحلام و لا عاوز حد يفسر الحلم و بالحلو و لا بالوحش

....
ولا أحنا عايزين نفسر لبعض
بس نعرف إيه اللى الناس بتشوفه فى العالم الغريب ده...

[ابو سيف]

انا بصراحه لا اذكر حلم مؤثر بس في حلم زوجتي حلمته من سنين قبل زواجنا انها رأت خالها المتوفى ووراءة حشد كبيرررر جداااااااااااااا من الرجال و النساء و الصبيان ماشيين في الشارع اللى زوجتي كانت ساكنه فيه مع والدها و عاملين ينادوا الناس ليلا قبل الفجر علشان يقوموا يصلوا و لو ركعه واحدة و يقولوا قوموا صلوا و لو ركعه احنا نفسنا دلوقتي و لو في نص ركعه

[أبو عبدالله]

حلمت انى كنت واقف على الكورنيش فى اسكندرية و بدأ الموج يعلى جامد و بعدين بدأ يطلع من البحر قطعان ضخمة من الدواب و الحيوانات و الناس كلها بتجرى مفزوعة و مذهولة و صوت فى الخلفية بيقرأ "يوم يأتى بعض آيات ربك لا ينفع نفساً ايمانها لم تكن آمنت من قبل أو كسبت فى ايمانها خيراً"

أبشر يا اخي
ان شاء الله خير بس ياريت متنساش الحلم وتتذكره دائما

[Akram]

انا من النوع اللي بيحلم كل يوم و لكن لما بقوم بكون نسيت الأحلام , لكن بكون عارف اني كنت بحلم , يعني ممكن تقول بكون فاكر طشاش , دا غير أني ما بحطش الموضوع ده في دماغي سواء كان حلم حلو أو مش حلو و بنساه بسرعة.
و الحلم الوحيد اللي فاكره و ده لأني حلمت بيه كتير هو إني كنت بحلم اني بطير و بعدين الاقي نفسي بقرب على الارض فأجاهد علشان أطير تاني و بعدن الاقي نفسي تاني بقريب على الارض و هكذا , بس محدش يضحك :roll:

[Dr Ahmed]

الحلم الوحيد اللي فاكره و ده لأني حلمت بيه كتير هو إني كنت بحلم اني بطير و بعدين الاقي نفسي بقرب على الارض فأجاهد علشان أطير تاني و بعدن الاقي نفسي تاني بقريب على الارض و هكذا , بس محدش يضحك

إن شاء الله تطير بأجنحة فى الجنة
وخليك دايما مجاهد إنك تبقى فى العالى..

[Akram]

إن شاء الله ربنا يجمعنا كلنا في الجنة,
اللهم آمين يا رحمن يا رحيم..... :arrow: :arrow: :arrow:

[PAYOO]

فكره ممتازه

=-=-=-=-=-=--=-=-=-=-=-=-=-=--=-=-=-=-=-=-=-=--=-=-

أنا عادة لا احلم بتاتا وإن حلمت يكون الحلم قصير جدا جدا ومش عارف إذا كان الموضوع ده له مغزى أو لا

ولأن احلامي قليلة جدا جدا فأنا أتذكر بعض هذه الأحلام التي نادرا ما تأتيني وأنا نائم مجهد

وأكثر حلم أتذكره هو حلم "الحرب" وأنا مسميه بالأسم ده لاني دايما بشوف نفسي في حرب 73 جندي من جنود البلد إللي كانوا بيحاولوا يحررو أرض بلدنا ودايما ألاقي تفاصيل كتيره كان والدي بيحكيهالي وبشوفها في حلم الحرب ده وكأن أنا إللي كنت في حرب 73

=-=-=-=-=-=--=-=-=-=-=-=-=-=--=-=-=-=-=-=-=-=--=-=-

وأنا دايما لما بحلم الحلم ده لازم احكيه لوالدي لانه هو المسئول عن حفر تلك التفاصيل في عقلي حيث أنه كان ومازال يحكي لي تفاصيل هذه الحرب التي يجزم أنها هي من صنعته هو كأنسان وصنعت غيره من الرجال الذين شربوا حب هذا الوطن وعشق تلك الأرض

[hatem_badawe]

انتو عارفين نفسي في اية ساعات نفسي اموت واخلص من كتر التعب في الشغل او اخرج معاش مع اني عندي 30 سنة بس للاسف عندي بيت لازم اشيلة وناس معتمدة عليا وكتير اوي اخاف يحصل حاجة لوالدي والدتي لانهم مسافرين برة مصر