ابنى بيتك لو راجل - الرجاله تتفضل

[msobhy]

حد عارف مشروع ابنى بيتك
سمعتوا عنه
طيب سمعتوا عن المشاكل اللى فيه
طيب ممكن احكى لكم عنه شويه
عارف انكم قارفنين وزهقانين وعايزين حاجه تسليكم
لكن انا معنديش غير الشكوى ولازم تسمعونى علشان انتم اخواتى واهلى
ربنا كرمنى (أو بيعاقبنى) بقطعة ارض فى مشروع ابنى بيتك - طيب فيييييين؟ .... ده سؤال ظريف
الارض فى مكان غريب اسمه 6 اكتوبر (لسه مفيش اى مشاكل) - والارض فى طريق الواحات (عادى مش هاتفرق فى 25 كيلو زيادة) - وارضى والحمد لله بعد حاجة اسمها شريط القطار

استلمت ارضى من فتره وكنت ناوى اكبر دماغى لكن واحد قريبى عرض عليه (ربنا يستره) انه يدينى المعدات بتاعته اشتغل بيها مجانا بشرط انى اخلصها فى خلال 20 يوم - مفيش مشاكل

اليوم الاول - معاينة الموقع
عربيتى غرزت بشكل بشع وخرجتها من الصحراء بعد تقريبا ساعة كاملة فى درجة حرارة 38 تقريبا

اليوم الثانى - الحفر
مر بسلام بدون خسائر غير انى دفعت تقريبا 50% أكثر من الطبيعى

اليوم الثالث - نقل المعدات
بدأت بغرز عربية النقل داخل الموقع بعد المزلاقان بشكل رائع لدرجة فشل 20 شخص تحريكها من مكانها - وتم الحمد لله اخراجها من الغرز عن طريق لودر والحمد لله الاضرار كانت بسيطه خدش بالعربية وكسر فى الفانوس (خمنوا مين اللى دفع ثمن الاضرار ديه) - العربية اتحركت لمدة 5 دقائق وبعد كدة غرزت تانى (حلوة اللعبة ديه) بعد مهاترات وصلت لأرضى وقمت بدفع ضعف تكاليف النقل العادية

اليوم الرابع - صب الخرسانة العادية
يوم عادى جدا لم يشوبة اى مشاكل غير ان الخامات سعرها اكتر بنسبة 30% وانها بتيجى ناقصة 20% من كميتها

اليوم الخامس اكتشاف ان الصبه طلعت ناقصه
وتم صب الجزء الناقص بتكلفه نسبيه 3 أضعاف

اليوم السادس - العاصفة
بدأنا بتقسيم القواعد لكن الحمد لله قامت عاصفة رمليه وبعد ساعتين فقط غادرنا الموقع (مين اللى دفع يوميات العمال؟؟؟؟؟)

اليوم السابع - الاسطى بطيخة تعبان
العمال تعمل بجد وكفاح تحت الشمس الحارقة والصحراء القاحلة وفجأه ....... عايزين نروح يا بشمهندس ....... طيب ليه؟؟؟؟؟؟ اصل الاسطى بطيخة تعبان وعايز يروح وهانعوضها لك فى يوم تانى

اليوم الثامن - انتهاء شغل النجارين
تم الانتهاء من شغل القواعد بنسبة 100% لكن النجاريين اصروا على حضورهم فى اليوم التالى لضبط بعض الاشياء مع الحداد

اليوم التاسع - حداد عنده ضمير
بدء الحداد بالعمل وكان سؤاله واضح وصريح عايز تعمل ايه وبالفعل بمنتهى النظام والترتيب تم العمل بسرعة رهيبة وجودة عاليه بشهادة الجميع - اصرار النجارين عدم الصب الا بعض تقوية بعض الاشياء وظبط بعضها الاخر (كلاكيت عاشر مره)

اليوم العاشر - لف وارجع تانى
النجاريين قاعدين وكبيرهم اول لما وصلت الموقع بيقول لى تعال يا بشمهندس عايزك فى حاجة ضرورية - خير يا عم - احنا نفذنا الرسم صح 100% لكن اخر جزء فى البيت طلع فيه 20 سم غلط!!!!!!!!!!!!!!!!!! يا نهار ابيض طيب وبعدين؟؟؟؟ متخفش يا بشمهندس بكره هانحل لك المشكله ديه

اليوم الحادى عشر - العمال بتتشمس - زيادة الاسعار 30%
الحمد لله العمال اخدوا اجرتهم ومعملوش حاجة وفى الاخر قالوا هايحلوها مع بتوع الخلاطة
المهم روحت اتفق على المون كل حاجة زادت 30% - طيب ليييييييييييييييه ؟؟؟؟ علشان مزلاقان الموت اتقفل والخامات زادت كلها لندرتها - وبالمناسبة السعيدة العمالة زادت بنسبة 20% يا جماله


طيب فين المأساه ؟؟؟؟؟؟؟؟؟
ولا حاجة - انا باصحى كل يوم الساعة 6 صباحا - اروح الموقع - بعد كدة اطلع على شغلى - بعد كدة ارجع الموقع - بعد كدة اروح (ده بعد اذنكم)

الطبيعى انى كنت بسوق يوميا 12 كيلو فقط والحمد لله لأنى بكره السواقة
دلوقتى بسوق 180 كيلو يوميا - يا كربنتس

يوميا بامشى على رجلى مسافة تقريبا 3 كيلو مرتين (مره الصبح - ومره اخر اليوم) يعنى 6 كيلو علشان العربية مش بتدخل جوه

العمال ولاد التييييييييييييييييييت باشتغل معاهم لما ارجع لهم بدرى علشان اشد شوية الشغل لما ظهرى اتقطم

الحمد لله بأكل دلوقتى وجبه واحده فى اليوم وباقى اليوم مش عايز غير سوائل

خسيت تقريبا لغاية دلوقتى 8 كيلو

لون بشرتى الطبيعى اسمر - دلوقتى اصبحت زنجى 100% (الكلام بجد مش هزار)

نظرى ضعف مش عارف ليه

وطبعا بما انى من اغنى اغنياء العالم بعت كل حاجة عندى ينفع تتباع واخر حاجه هانزل ابيع دهب والدتى (أدعوا لها بالشفاء)غدا ان شاء الله

قريبى بيكلمنى وعايز المعدات بتاعته (يا حلاااااااااااااوه)

نفسيتى بقت فى الارض
كرهت كل حاجة
كمية اهمال بشعة - سرقه - نصب - انعدام الضمير - قلة أدب
لا توجد ادمية هناك بالمره - بالمناسبة لازم ناخد كل حاجة معانا من اكل وشرب وبفضل احد العباقره فقدنا كل مياه الشرب فى احد الايام - والحمد لله شربت من تانك الخلاطه

للدرجة ديه احنا ناس رخيصة
للدرجة ديه المسؤلين مكبرين دماغهم
للدرجة ديه فى استهتار
للدرجة ديه فيه اسغلال وسرقة


الى كل اخوتى انا صرفت لغاية دلوقتى تقريبا 24.000 ويقال ان ثمن الارض من 25 الى 30 الف
انا على اتم استعداد لبيع تلك اللعنه على 50.000 ومش عايز لادعم ولا زفت

حسبى الله ونعم الوكيل فى كل اللى بيتلاعب بالشباب واحلامهم
حسبى الله فى كل واحد بيسرقنى عينى عينك
انا زهقت ومش قادر اكمل - اعتذر على الاطالة

[أبو صلاح]

انا حاسس بكل اللي انت فيه
لاني عارف يعني ايه مباني
فما بالك مباني بدون اي تيسيرات
مباني تعتبر في الصحراء
بس معلش حاول تثبت وبكرة تشوف بيتك باحسن صورة

[pro_samir]

ربنا يعينك :s

[Imhotep]

ياه دى قصة كفاح شديدة...... معلش ربنا يصبرك على كل ما صعب من مهمتك...... انت كان غرضك تبنى اربع جدران يستروك انت وولادك لكن منهم لله اللى صعبوا الامور و منعوا التسهيلات لانه مش معقول انك تبنى فى الصحراء كده المجردة بدون اى مساعدة من اى حد ولا حتى مجرد توفير اساسيات المعيشة الانسانية اليومية من اكل و ماء حتى تشتريهم بسعرهم بس اللى انت بتحكيه ان الدنيا خلاء ...... ربنا معاك....

[msobhy]

صدقونى انا بحارب طواحين الهواء
محبط بشكل بشع
حاسس فعلا ان ده اكبر قرار خاطئ انا اخدته فى حياتى
يا رتنى اتنيلت على عينى واشتريت العربية اللى كنت عايزها ولا حتى لعبت قمار بدل الذل والعذاب اللى انا شايفه ده

معلومة هامة
انا بعمل كل ده علشان اوفر
على الورق المفروض انى اوفر 15000 جنية
عمليا بالكتير هاوفر 5000 جنية
الصبررررررررررررررررررررررر

[نور القمر]

اولا ربنا يشفي الست والدتك يا رب ويديها الصحة وطولة العمر
ومعلش اصبر شوية مفيش حاجة بتيجي بالساهل وكل واحد اضرك باهماله و استهتاره وعدم تحمله مسئوليته ربنا هايعاقبه دنيا واخرة
وبالنسبة لنظرك اكيد لازم يضعف بسبب قلة الاكل والضعف العام والاجهاد لكن اعتقد النظر بيتحسن بالتحسن العام للصحة
وربنا يعينك

[Samah AbdAllah]

الف سلامة على والدتك وربنا يشفيها يارب
انا فاهمة مأساتك كويس لانى اختى وجوزها واخدين هنا فى اليكس فى مشروع ابنى بيتك ده

وحصل معاهم نفس القصة بالظبط العمالة اغلى من الطبيعى عشان بيروحوا الصحرا وكل حاجة نقلها مكلف اكتر والحاجات بتتسرق
او كانت الدنيا تمطر واللى اتعمل يبوظ ويرجع يتعمل تانى ومهازل كتير والحديد اختفى والاسمنت معرفش ايه

هو مش مشروع ابنى بيتك هو مشروع عذب نفسك
بس استحمل شوية معلش يمكن فى يوم من الايام البيت ده يبقا له قيمة سعرية اعلى ويعوض مجهودك وتعبك

بس هم هنا اكتفوا بالبناء الخارجى والتشطيب من برة وجوة ولا عملوا اى حاجة

[KoDaK_Gti]

الله يعينك يا محمد فعلا
ده الواحد بيكره تشطيب شقة مابالك بقة باللى بيأسس بيت
بجد الله يعينك

[ahmed1981]

أولاً بصفتى من أوائل نزلاء نايل موتورز اللي دخلوا في مشروع إبني بيتك

http://www.nilemotors.net/Nile/showthread.php?t=52124

إكتشفت الآتي:
أولاً: المشروع إسمه الحقيقي إخرب بيتك
ثانياً: 97% من المقاولين والحرفيين هناك حرامية ونصابين
ثالثا: أنا وصلت لغاية العواميد للدور الأرضي وصارف حوالي 48 ألف جنيه بالتمام والكمال
رابعاً : المقاول اللي إشتغللي في الأرض خلع مني بعد العواميد وبحاول أجري وراه
خامساً : سأعطيك عنوان مجموعة إسمها إبني بيتك على الياهو وموقع وهتستفيد منه جداً جداً وإشترك في المجموعة وهيجيلك رسائل كويسة
وفي جمعية في إمبابة إسمها جمعية إبني بيتك ممكن يفيدوك برضه وعنوانها موجود في المجموعة:

http://groups.yahoo.com/group/ibnybetk/

http://abnybetak.maktoobblog.com/

ولو عندك أي إستفسار أنا تحت أمرك

[EslaM_NagY]

مش قادر اقولك غير ربنا يعينك
ويشفي الوالدة

[ahmed1981]

آسف مخدتش بالي
أصلك فكرتني بالذي لم يمضي ومش باين عليه هيمضي

ألف سلامة للوالدة ربنا يديها الصحة والعافية وأمهاتنا كلنا

[aboalm]

يا عم احمد ربنا أنت راجل مهندس و بتقول كده أمال لو كنت صاحب اى مهنه تانيه كان حصل ليك ايه
هيا دى مصر بجد

[ayman_elkholy]

الف سلامة على الوالدة شفاها الله وعافاها وأعانك الله على انهاء ما انت فية

[TaoTao]

أولاً ألف سلامة للوالدة وربنا يتم شفاها

خد بقى عندك: انت بختك كويس إنك لقيت "صنايعية" .. أي عواطلي يعرف يدق مسمار يعرض خدماته "كنجار" ويخرب الدنيا ويطلع شغل يقرف ويطالب بأجر "صنايعي" محترم .. أي "فواعلي" ناول بنّا طوبتين يشتغل بنّا بأجر بنّا وأي معدوم ضمير شاف سباك بيشتغل يقولك "أنا سباك" .. أي نطع ممكن يتنطع عليك ويعرض خدماته كغفير وبعد يومين يجيبلك ومراته وعشر عيال يحتلوا البدروم بعد ماتبنيه وتجهزه "أهم يخدموك يابيه" .
أي خدمة تطلبها من أي جهة أو من أي شخص يكون هدفه الأول "هبش" أي أموال منك لأنك "باشا" من كبار المستثمرين ومعاك أرض بتبنيها فيللا .. مش انت عامللي باشا.؟ استحمل !!!!!!!!!!!!!

الواحد بيصعب عليه نفسه لما يطفح الكوتة ويستلف ويقعد ع البلاط ويبيع مصاغ أهل بيته والناس مستخسرة فيه حتة بيت 75 متر ويستغلوه أسوأ استغلال ويهبشوا منه كأنه من سلالة الريان أو أحمد عز شخصياً ولازم ينتقموا منه!!

قلبت علينا المواجع وربنا يتم البناء على خير ونصيحتي ليك فتح عينيك كويس وراجع على شغل الصنايعي يوم بيوم ولو حاجة ماتفهمش فيها هات اللي يفهم فيها يستلم وماتستجيبش لأي ابتزاز، العمال والفواعلية بدل الواحد فيهه عشرتلاف والسوق فعلاً نايم والناس دي في عرض أي شغلانة.

[WalidAdel]

ربنا يشفيلك الحاجه يارب
و ربنا معاك في اللي انت فيه انا مش عارف اقولك ايه بس هيا دي اخرة التعانل مع فئة العنال بالذات لانهم ابشع طبقه ممكن تتعامل معاها في الدنيا دي ربنا يعنيك
نصيحه مني حاول تبقلهم فلوس دايما بمعني تكون حضرتك اللي ماسكهم مش هما اللي واخدين حقهم و يعملوا اللي علي مزاجهم
و بعدين اقرصهم في الفلوس علشان يعرفوا ان لو حاجه غلط حصلت حتخصم من الفولس اللي عندك
و لو في اي استفسار في التعامل مع الفئه دي انا اقدر افيدك لاني تقريبا كل شغلي معتمد عليهم 100%
الله يعينك ياخي