السخان الهربائي الفوري !!!..مش العادي

[Hegazio]

كان نفسي أشارك من زمان علي الموضوع ده .. لأني كنت في الحيرة اللي كان فيها أحد الزملا دي الي أن وقع قراري علي الكهربائي الفوري !!!!!!
و ده للي مش عارفه نفس فكرة الغاز بس كهربا .. افهمكو
كويل رايح جاي ملفوف تدخل الميه تخرج من الناحية التانية فوري
بس بدل ما الكويل العادي من 1500 ل 2000 وات ..ده بقي من 5000 الي 24000 وات !!!!!!!!!!
طبعا حتقولو ايه خراب البيوت ده .. أبدا .. ده أوفر يجي 50 % من الكهربا العادي لأنه بيشتغل وقت فتح الميه فقط
و بصراحه أأمن من الغاز ( بسترخمه جدا ) و صوته مش مرعب زيه طبعا
نيجي بقي للسعر .. هو كان غالي جدا من 1500 ل 2500 جنيه ( وات عالي و صناعة المانية ) سيمنز و اشباهه .. الي أن وصلت مصر العظيمة بالماركة الجبارة أوليمبيك و تمنه 700 جنيه

إيه رأيكو ؟؟

[Ahmed Sharaf]

يوجد منة نوع تايوانى بـ 900 جنية و حجمة 25 سم فى 30 سم و السمك 15 سم , انا جايبة من سنتين وكويس جداً بس لازم يكون عندك الكهرباء 3 فاز

[mramzy]

عن تجربه مع التركى مش حلو لو الميه شديده مش حتحس بالسخونه وخصوصا فى الشتا

[د.محمود صلاح]

5000 واات يااااه ده هيسحب الكهربا من الشارع كله

[Hegazio]

ابدا يا دوك..هو زي مكيف 3 حصان بالظبط .. بس بحسبة بسيطة لا يمكن يشتغل أكتر من ساعة و كسر يوميا
و العادي بيشتغل حوالي 6 ساعات يوميا ( بما يساوي ساعتين و كسر من الفوري )

[sab3aawy]

لازم يكون عندك عداد يستحمل الحمل ده (40 امبير على الأقل) ولو 40 امبير متشغلش معاه لا تكييف ولا غسالة ولا مكواه ولا مكنسة لأن العداد هيكن يدوبك على قده ولازم له وصلة مخصوص من العداد متقلش عن 6 مم

اما بالنسبة لماركة اوليمبيك وشقيقتها ايديال فاعتقد ان البعد عنهم غنيمة فى الوقت الحالى، تجاربى معهم سيئة

[زهير فكري]

عندي واحد امريكاني 30 سم * 20 سم 3000 وات بس مش عملي لأغراض الاستحمام لأنه ( reduction flow ) يعني بيعمل تقليل لضغط المياه ليتيح تسخينها , بس الصراحه المياه بتنزل منه علي درجه الغليان. انصحك بسخان كهرباء عادي احسن بس يكون ماركه محترمه .

[Hegazio]

5000 وات يا جماعة يحتاج 22 وات ( احسبوها) و تكييف 1.5 حصان مش حيكمل 15 وات و العداد ده بيستحمل لفوق ال 50 وات

[Samir Elshahawy]

عندي 2 في البيت واحد 6 كيلو و الثاني 8 كيلو , مكونات انجليزي تقفيل تركي speed heat و سعره حوالي 760 جنيه يعني تقريبا نفس سعر المصري و عليه ضمان سنة و ضمان مدي الحياة علي الخزان و لو فيه مشكلة أو عيب هما بيتصلوا من نفسهم و يغيروا الخزان , بصراحة توكيل محترم و سخان ممتاز

[أبومعاذ]

في رأيي الغاز لا يعلى عليه وفي منه بيتشغل اوتوماتيك مع فتح المية بس

[sab3aawy]

5000 وات يا جماعة يحتاج 22 وات ( احسبوها) و تكييف 1.5 حصان مش حيكمل 15 وات و العداد ده بيستحمل لفوق ال 50 وات

5000 وات هيحتاج 5000/220= حوالى 22 امبير تقريبا (مع ملاحظة ان ده اقل نوع)
ضيف عليهم احمال البيت العادية لأنك مش معقول طبعا انك علشان هتشغل السخان هتطفى التليفزيون واللمبات والمراوح والكومبيوتر والتلاجة وتعلن حالة الطوارئ فى البيت علشان تستحمى، يعنى بنتكلم فى كمان 10 امبير تقريبا، يبقى كدة الحسبة 32 امبير

التكييف ال 1.5 حصان يعنى حوالى 1200 وات تقريبا ، يعنى 6 امبير، (مضافا اليهم 1 امبير تقريبا لمراوح التكييف )لكن لحظة بدء دوران محرك الكباس بيعلى فيها التيار لحوالى 3 اضعاف الحمل العادى لعدة ثوانى، يعنى حوالى 18 امبير لمده 3-5 ثوانى، مضاف ايها 1 امبير للمروحة، يبقى عندنا 19 امبير+ مجموع احمال السخان والاحمال المنزلية =32 امبير+19 امبير=51 امبير، وده ممكن جدا يتسبب فى اتلاف العداد ال 40 امبير، ونفس الكلام ينطبق على محرك الغسالة فى لحظة العصير، ومثله محرك المكنسة فى لحظة بدء حركته ، مع ملاحظة اننا اخترنا اصغر سخان ، وبالتالى العداد ال 40 امبير يعتبر يادوبك على قد السخان بدون احمال اخرى، لكن لكى يكون الامر مستقر لازم عداد 80 امبير

[compuland]

في رأيي الغاز لا يعلى عليه وفي منه بيتشغل اوتوماتيك مع فتح المية بس

كلام تماااااام

[Hegazio]

ايوه أنا قصدي 22 امبي مش وات .. و حضرتك حسبتها صح
بس انا قصدي العداد لو علي قومة التكييف أو حتي قومة السخان ( ماهو مش شغال علي طول ) يستحمل فوق ال 50 امبير
ده احنا فضلنا بالقديم ( كان 10 او 15 امبير مش فاكر ) لمده 3 شهور بعد ماشترينا تكييف 3 حصان و كان مستحمل عادي

[النوبي]

في رأيي الغاز لا يعلى عليه وفي منه بيتشغل اوتوماتيك مع فتح المية بس

والله كان هيموتني البتاع ده ابعد عنه

[Hegazio]

و الله بقي انا متعقد من الغاز ده مووووت
و تسبب في وفاة اخت أعز أصحابي و زوجها في شهر العسل