ايه اللى تاعبك فى شغلك!!!

[megaman]

ايه اكتر حاجات بتضايقك من شغلك ؟؟؟ انا مثلا بخرج من البيت 11 او 11.30 وبرجع تانى 11.30 !! عدم التخصص فى الشغل يعنى يتطلب منك اى حاجه فى اى وقت من اى شخص وفى النهايه كله مقصر وكله ملام حتى لو انجزت !! مفيش تقدير معنوى حاجه كمان عندى 3 مديرين !! تخيلوا بقى الحصار ومحدش يسال ازاى الاجازه يوم واحد ممكن ادخل البيت 12.30 او1 مفيش وقت لنفسك او بيتك او اولادك حنعمل ايه اكل عيش وكله عشان الاولاد يلا كل واحد يحكى ايه اللى تاعبه فى شغله

[Morieno]

1- أجازة يوم واحد
2- العائد المادى
3- ضياع الهيكل المنتظم للشركة
4- ضبابية الحدود بين الوظائف والمهام
5- اكترحاجه تعبانى انى بحبها والا كنت ضربتها 100 صرمه ومشيت وتولع على اصحابها

بس لو فى حد عنده اوفر بعائد مجزى حبتين انا جاهز

ودمتم زى الفل

[elassar2010]

انا الى قارفنى
1-بتعامل مع موظفين الحكومة يوميا واجارك الله من معاملتهم
2-الاكراميات الى بتدفع يوميا علشان الشغل يخلص
3-العائد المادى

[نور القمر]

انا في شغلي مع ان العائد المادي كان كويس لانه معتمد على توفيق ربنا اولا ثم على المهارة والنشاط
لكن بجد كرهته بسبب نوعية الناس اللي بتعامل معاهم معظمهم شباب خليجي صغير السن منتهى التفاهة
بجد انا مش فاكرة غير 3مواقع بس اللي اصحابها يستحقوا الاحترام

[abzoabzo]

هما يتهرو مكفات
واحنا نضحى بعمرنا ومش عاجب
اتفوووووووووووا على ده نظام

[KHALED AYMAN]

انا تاعبنى من شغلى :
1-قله العماله بدرجه كبيره بالرغم من ارتفاع العائد المادى عندنا و توفير وسائل مواصلات و راحه و معامله و كل حاجه حتى العلاج بيكون على حسابنا و كل ده و مفيش عمال و الى موجود ملوش مزاج يشتغل..
2-كميه الاتاوات الى بتدفع لموظفى الحكومه و تناحتهم و طلباتهم ...
3-مش عارف احدد وقت لاى حاجه لانى بروح الشغل فى اى وقت ممكن الفجر اضطر اروح بس الطبيعى من 9 الصبح ل 9 بالليل ..


ملحوظه :
الشغل ده بتاع والدى و انا معاه فيه ... وحاليا انا 18 سنه يعنى مهما كان مش هكون حاسس بقيمه المشاكل زى والدى ..فتخيلو انتو بقى كم الحاجات الى مضايقاه ...


ربنا يعونا على نفسنا....

[MRBEBO]

انا ايه تعبني في الشغل

عدم وجود التقدير الكافي حتى لو الواحد اشتغل بايديه وسنانه زي ما بيقولوا

في بعض الاحيان بتلاحظ ان المديرين ليهم ناس ناس يعني حد من وجهة نظري شغله نص نص وميستهلش التقدير بيقدروه

غير الزملاء اللي في نفس القسم بتاعك ممكن تلقيهم بيضربوا فيك زونب علشان يبينوا انك حمار ومبتفهمش وهما اللي شايلين الشغل ومن غيرهم العملية تبوظ

غير ان الزيادة في المرتب على مزاج صاحب الشغل وملهاش ضوابط وساعات كتير بتحس ان حقك ضايع

[A.Saad]

قلة العائد المادى
التمييز الشديد للادارة العليا
عدم وجود مواصلات او اى امتيازات
البارشوتات : البهوات اللى قريب طنط وبتاع ييجى من برة وتلاقيه خد منصب اعلى منك وكمان سنه اصغر يعنى انسى الترقية
المدير ين الجبناء

[ASKAFRAWY]

هو ممكن الموضوع يبقى ايه البيعجبك فى شغلك؟
اصل تقريبا كل شغل و له عيوب
انا مشكلتى مع شغلى (مهندس بحري)
- عدم استقرار بالشهور و البعد عن الاهل و الاصدقاء
- تجبرك انك تتعامل مع ناس اقل منك فى المستوى العلمى و الادبى لانك غصب عنك شغلك هو مكان نومك(على السفينة)
- فرص التعرض للامراض اكتر لانك بتتعامل مع غازات سامة احيانا وطبعا غازات العادم دة عادى
- عدم التقدير و دة التعبنى بجد فى شغلى
-اجهاد بدنى و ذهنى بصفة مستمرة وتتعرض لضغوط عصبية يوميا نتيجة الاعطال المفاجئة او لسوء الاحوال الجوية التى قد تعرضك للغرق.

[sherif_84]

انا اللى تاعبنى فى شغلى 3 حاجات :
1- 90% من الموظفين وتقريبا دى هواية عند الشعب المصرى اسمها ( التطفل ) وهقولكم حاجة حصلتلى من النقطة دى أنا مثلا مابحبش أركن عربيتى قدام الشغل يعنى عشان ماحدش بيروح الشغل بعربية الا انا والمدير حتى مش عربيته دى عربية الشركة وكل الموظفين زمايلى اه امكانيتهم المادية كويسة بس مش لدرجة انهم يشتروا عربية المهم وانا فى يوم الصبح كعادتى ركنت جنب الشغل كده بشارع ودخلت الشركة الاقى الموظفين يقولوا احنا عرفنا انك بتيجى بعربية !!
ماشى وبعدين استفتدوا ايه لما عرفتوا ؟ طبعا واحد من البهوات لمحنى مرة وانا بركب وقالهم وانا عرفته طبعا بس هاقوله ايه وانا اصلا من باب عدم التفاخر او الفشخرة انى عندى عربية واركنها قدامهم مابحبش كده لكن دى حاجة مثلا من الحاجات اللى تفرس الواحد .
2- ساعات بيقابل الواحد طبائع ناس غريبة يعنى ممكن تكون ماوردتش عليا قبل كده فالواحد بيلاقى صعوبة التعامل مع الناس دى وبالذات الناس اللى هزارها تقيل وكان هيحصل انى كنت خلاص هتخانق خناقة كبيرة مع واحد بسبب الموضوع ده لكن ربنا ستر الحمدلله ومسكت نفسى .
3- العائد المادى قليل مع طول ساعات العمل يعنى انا مواعيدى كل يوم من 9 ص الى 7 م والجمعة اجازة وطبعا يادوبك ارجع البيت والحق اتغدى وخلاص ماحدش يشوفنى الا جوه فى اوضتى وانا نايم طبعا .
معلش طولت عليكم بس حبيت اوضح الحاجات اللى بيضايقنى فعلا من الشغل ومن طباع الشعب المصرى الغريبة

[Fadi Ezzat]

انا الى تبعنى العمال والصنيعية
علشان انا طول اليومبتاعمل معاهم
والى تعبنى اكتر بردة انى بروح الشغل 8
وبرجع 12
او 1
او ابات باليومين

[Lord_Fouad]

اللي تاعبني في شغلي :
تخاذل مديري في مواجهة اي شخص الا انا .... يعني مش بيشيل مرؤوسينه ... ممكن اي حد من اي ادارة تانية يلطش فينا و فيه و هو ميفتحش بقه .. انما لو حد مننا غلط يتشطر عليه .. لو لي حق ضايع بضطر اشوف مدير ادارة تانية عشان يتصدرلي

[zanativich]

أنا الحمد لله شغلي كويس ،
من وجهة نظري الحالة النفسية أهم من العائد المادي

[نور العمر]

الروتين
الاصرار على التخلف العقلي
هدف الدهس على اي انسان طموح عاوز يصنع فكر ابداعي
الرغبة في الغلاسة لمجرد الغلاسة
ناس ما تستاهلش تاخد درجة تانية حتى وبيكونو وكلاء وزارة
الكوسة والبذنجان والبطيخ
الخ
الخ
الخ

[TIMODAX]

الغلاسه في مواعيد الحضور و الانصراف ناس ناس
أس المشاكل هيا نقطه ناس ناس ديه
لو الظلم او النظام يمشي علي كل الناس تمام انما ازاي ماتبقاش مصر