النــمـــل هيجننـــــي

[pro_samir]

النــــــمــــــــل هيجننننننننننني

بجد مش عارف اعمل فية اية جماعة الصيف بيدخل من هنا والنمل يحتل الشقة من هنا

هوا حاليا احتل الصالة خلاص وبفكر جديا انى اسيبهالة

حيث قامت قوات النمل المحتل بأعمال حفر تخريبية بجانب أحد الحوائط واخراج كميات كبيرة من الرمال من أسفل السيراميك

كما قامت كتائب النمل بغزو لابتوب كنت سايبة فى الصالة أيضا على احد الكراسى وتجاهلت تماما كيس الشيبسى المفتوح الموضوع بجوارة وقامت بالتسلل الى اجزاء الابتوب الداخلية ، إلا أنها بدأت بالأنسحاب تدريجيا بعد تشغيل الجهاز

ومن الغريب أن النمل قام باقتحام "البويلر" بتاع الشااااى (طيب ليييييية دة مفيهوش غير مية) متجاهل تماما لبرطمان السكر اللى جنبة

ومن الأعجب بقى انى لسة داخل البيت وكنت جايب كيس عيش مقفول ومربوط و والله والله علقتة فى أعلى الضرفة فى شباك من بتوع الصالة ومفيش أقل من عشر دقايق على ما غيرت هدومى وبعدين نزلتة و بفتحة لاقيت نملة بدأت تتسرب لداخل الكيس من الجزء المربوط

بجد يعنى النمل دة يا اما غبى يا اما عايز ينرفذنى وخلاص


f1


حد عندة حل يا جماعة لموضوع النمل دة ؟

[homme49]

إبحث عن شقوق النمل و قم بسدها بإستخدام جبس أو أسمنت أبيض

و بعد ذلك بمدة 24 ساعة قم برش المكان و غلقه لمدة 6 ساعات تقريبا مع تتبع النمل الخارج من مكان الرش مدروخ و مش عارف يمشى ثم إنقض عليه بمياه مغلية .

[homme49]

طرق موجهة لربات البيوت منقولة من موقع عيون العرب


السلام عليكم ورحمة الله وبركاته
هذه طرق منزلية للتخلص من النمل

اتركها بين ايديكم

الطريقة الأولى :
- كوب سكر مذاب في كوب ماء
- كوب ملح ليمون
نخلط المقادير ونقوم بتقسيم الخليط علي برطمانات صغيرة لها أغطية محكمة الإغلاق ونقوم بعمل شقوق فيها من أعلى باستخدام شئ حاد والمطرقة
ثم قومي بتوزيع البرطمانات في أركان الغرف أو المطبخ واتركيه مدة من الزمن وسيختفي النمل بإذن الله

الطريقة الثانية :
- رشي ثقوب النمل بالخل .

الطريقة الثالثة :
- رشي بعض القرفة المطحونة أو الفلفل الأسود أو الكمون حيث تظنين أنه مدخل النمل .

الطريقة الرابعة :
- امزجي ثلثي كوب ماء، و ثلث كوب خل أبيض، 2-3 م ك صابون. و ضعيه في قنينة رش ورشي مكان النمل .

الطريقة الخامسة :
1 ملعقة حليب بودرة
1ملعقة سكر بودرة
بودرة حامض البوريك من الصيدلية والعطار
تعجن المقادير بالماء وتصنع كرات صغيره و توضع فى أنحاء متفرقة من المنزل والفاعليه تدوم لمده شهرين و اكثر .

الطريقة الأخيرة تفيد فى التخلص من الصراصير أيضا
حسب ما ورد فى باب بريد الأهرام أول هذا الشهر

[homme49]

منقول من موقع الأهرام فى أول يوليو 2009

بريد الاهرام

44767السنه 133-العدد2009يوليو18 من رجب 1430 هالاربعاء

العجينه السحريه

تحت عنوان النصب بالصراصير كتب الاستاذ محمد احمد نوار في بريد الاهرام شكوته من احدي شركات المبيدات في تعاملها معه لمكافحه الصراصير, ويبدو انه لم تدركه اعاده اكتشاف فاعليه حمض البوريك في قتل الصراصير والقضاء عليها مع فاعليه مضمونه لمده عام علي الاقل, حيث لم يستغرق الامر اكثر من اسبوع تنتهي بعده معاناته مع الصراصير.

وهذه الطريقه مكتشفه منذ العصور الوسطي عندما استفحلت مشكله الصراصير في سفن الركاب, وظل معمولا بها الي ان طمستها شركات المبيدات وفرضت عليها تعتميا اعلاميا كبيرا لاغراض معروفه بالطبع الي ان تمت اعاده الكشف عنها في السنوات الاخيره وانتشرت في المنتديات, والكل اشاد بنجاحها الباهر في مكافحه الصراصير.

وطريقه حمض البوريك ليس لها اي اثار جانبيه علي صحه الانسان, وهذا الحمض يستخدم كمطهر للبكتيريا وفي النظافه العامه والمركز منه يباع في محال الكيمياويات علي هيئه خرز ابيض بهيئه السكر وسعره لايتعدي20 جنيها للكيلوجرام ولن نحتاج الا لمعلقتين صغيرتين منه فقط لمكافحه شقه كامله. والطريقه هي خلط معلقتين صغيرتين من حمض البوريك مع ملعقه صغيره من السكر البورده وملعقه صغيره من اللبن الجاف ويتم عمل عجينه من هذه المكونات ويتم تقطيعها علي شكل كرات صغيره وتثبيتها في الاركان وعلي الجدران والزوايا, وسوف تختفي بعدها الصراصير لمده عام علي الاقل وبتكلفه لن تتعدي جنيها.

كيميائي مجدي عبد الرحمن

[pro_samir]

يا مسهل

هجرب و ادعيلك ان شاء الله

يا رب بس النمل ميكونش شايفنى دلوقتى

[MoDyBeNz2008]

بص حل حلو بس مش اوي لو عندك اطفال

احنا كل سنة في بداية موسم الصيف بنرش فليت (البودرة - الرش) على طول السفل بتاع السيراميك و بنكرر العملية كل كام شهر (او حسب ما يرجعوا للظهور) و الحمد لله مبنلاقيش حاجة نهائي

[pro_samir]

بص حل حلو بس مش اوي لو عندك اطفال

احنا كل سنة في بداية موسم الصيف بنرش فليت (البودرة - الرش) على طول السفل بتاع السيراميك و بنكرر العملية كل كام شهر (او حسب ما يرجعوا للظهور) و الحمد لله مبنلاقيش حاجة نهائي

جربت مرة فليت بس اسبراى ومحوقش معاهم وهجرب برضو موضوع البودرة .. مفيش اطفال انا قاعد لوحدى مع النمل هههههه

المشكلة انى مش عارف بييجى منيييين بجد

يعنى بعد ما حفرو جنب الحيطة رشيت مياة على الرمل اللى طلعوة وكبستة جنب الحيطة .. تانى يوم لاقيتهم طالعين على البواط بتاع الكهربا

[Karim_Mohy]

ربنا معاك يا استاذ سمير000وحلك زي ما الاعضاء قالوا الرش او البودرة
بس بلاش ترش عليهم مياه مغليه زي ما احد الاعضاء ذكر
وعلي فكرة اكيد اكيد النملة اللي لقيتها جوا كيس العيش كانت استطلاع بس مالحقتش ههههه
ربنا معاك وتتخلص منهم

[mobitic]

الحل المجرب بجد
شوية جاز (سولار) فى جردل ميه ولمع الشقة كلها وابقى قابلنى لو لقيت نملة قربت من الشقة
بس استحمل الريحة شوية

[Yarisawy]

انا زيك برضه نفس الموضوع والحل كالاتى

- التخلص من بقايا الاكل اول بأول وتشميس الشقه والسجاجيد بصفه دورية

- مسح الشقه بالجاز ممزوجه مع ماء

- مسح الشقه بسائل فليت ممزوج بالماء وما شابه وهو جركن بيتباع فى البنزينات

- شراء عجينه و وضعها فى الثقوب والاركان

وبكده هاتتخلص منه ان شاء الله

[أبومعاذ]

موضوع مفيد جدا ربنا يباركلكم

[ahmedhilmy]

استاذ سمير عرفنا اخر التطورات و ايه خطة الكفاح اللي اتبعتها من المعروض لاني انا خلاص النمل هيخليني اسيب الشقة ليه خالص تصوروا بيبقي بطرمان العسل مقفول و باحكام و بيخش جواه و الاقيه غطسان جوه العسل ميت يعني ايه مفيش تفكير كده خالص؟ ده مش سايب حته مغزهاش جوه الدولاب و الهدوم حاجة تخنق و انا مقدرش ارش مبيدات علشان الولاد فعايز حل صحي و يكون مجرب لصد هذه الهجمة النملية

[نور القمر]

انا كمان النمل مستمر عندي طول الصيف وخلاص يأست من مقاومته لانه بيجي من جنينة فيلا ورانا وشبابيكنا فاتحه عليها

الحمد لله مش بيروح للاكل
هو متمركز في الحمام وعلى كولمن الميه
معرفش كل سنه يروح للكولمن عاجبه ايه فيه

[كابوس الليل]

بص احنا النمل كان تقريبا بيعد ياكل معانا ف الغدا والعشاء بس الفطار لا بيبقا لسة مصحيش
احسن حل له وعن تجربة
العجينة السحرية
حتلاقيها ف علبة زرقة وبتتاع عند اى صيدلية
وهتشوف الفرق

[ahmedhilmy]

بص احنا النمل كان تقريبا بيعد ياكل معانا ف الغدا والعشاء بس الفطار لا بيبقا لسة مصحيش
احسن حل له وعن تجربة
العجينة السحرية
حتلاقيها ف علبة زرقة وبتتاع عند اى صيدلية
وهتشوف الفرق

العجينة السحرية دي هتخليهم موجودين طول اليوم الا وقت الفطار بس بيكونوا لسه مدروخين صح؟ههههههههه انا بهرج معاك طبعا طيب هي ليها ريحة لان دي اهم حاجة بالنسبالي علشان الولاد