حملة ايجابيه

[Anxs111]

أنا مشكلتي في قصة حملات المقاطعه ليه مفيش حملات لمسانده للبناء .
ممكن حملة لتنظيف شارع . ممكن حمله لزيارة ملجأ . ممكن حمله لمساعدة المسنين في منطقتنا . ممكن حمله للتوقف عن ألسب لمدة يوم كل شهر والسنة إلي بعديها تكون يوم كل إسبوع ....
أظن الفرق كبير وأثره على المجتمع كبير . هل جربت تشارك في حملة عشان تحسن شيء كويس مش تقاطع شئ خيبان بتديله قيمة بأنك تعمل حملة ضده .
أنا بفكر إطرح الموضوع ده في المنتدى : حملة لتحسين شيء وليس محاربة شئ وأنا عرف إن الناس دي موجودة بس أنا بحاول أسلط الضوء عليهم لأن أكيد كتير مسمعش عنهم زي ما سمع عن حملات المقاطعه (اللي في منهم أنا بدعمه ) ونفسي إن عددهم يزيد زياده فعالة لأن أكيد ده فرصة تطبق فيها دينك (مسلم ومسيحي ) وتفيد منطقتك وتفيد نفسك ومش محتاجه حكومة (عشان احنا فاكرين إن كل مشاكلنا سببها الحكومة )
مثل عملي :
حملة لمقاطعة مكدونالد
حملة لمقاطعة بيبسي
حملة لمقاطعة lays
حملة لمقاطعة الدنمارك
....................*
حملة حملة حملة حملة
تخيل لو محدش عايز يشاركك في حملة وأنت برد رحت ساعدت جارك المسن . هل في شيء أجمل من كدة في الدنيا . طب يا ترى دة لم يكون سياسة تفكير الشباب بدل ............ وبدل .............. وبدل .........
أن وانت وأبهتنا وأمهاتنا وأولادنا وبناتنا وربنا هنحس ببركة في علاقتنا معاهم إد إيه .

برجاء عدم التطرق للامور الدينيه حتي لو من باب النصح والتحذير
مشرف عام 1

[mo7a_mo7a]

قبل ما نناقش كلامك وهو راي يحترم
ارجو منك حذف العبارات المعبرة عن الطائفية
فلا يصح ان نذكرها درءا للمفاسد واتقاء للشبهات
(في ناس بتتلكك) والحكاية مش ناقصة واكيد انت وكل الاعضاء مقدرين

وارجو من الادارة بعد اذن العضو الفاضل صاحب الموضوع المبادرة بحذفها

[Bob2009]

ياريت بس المشكله برده هتكون فى الفشخره الكدابه بتاعت الشعب المصرى
انا مره نزلت الشارع وكنت راكن عربيتى اكتر من اسبوع لقيت تحت منها اكياس وبلاوى روحت عادى جدا مثل اى واحد محترم بيحب النظافه جبت مقشه من محل وشيلت الزباله دى ورميتها فى الصندوق الى هو على بعد متر واحد منها وكان يوم اصحابى تريقه والجيران وكل الناس حتى الى ماشين فى الشارع وكان انا بعمل حاجه غريبه والغريب فعلان ان كل الناس دى بره مصر بتعمل اكتر من كده
المشكله مشكله فشخره لكن متخفش فيه ناس يمكن بنسبه اقل من 3% من الشعب المصرى لسه بيحفظو على البلد دى ومتواضعين الحمد لله وبيحبو يعملو حاجه للصالح العام بس هما مختفين فى وسط الفشخره الكدابه بتاعت الشعب ده.
الاهم من كل ده وده انا عندى افكار كتير ممكن تفيد البلد دى بجد بس الشعب مش هيعرف يعملها الى المفروض يعملها الحكومه مش الشعب انا ممكن اعمل حاجه بسيطه زى مثلا الى انا عملتها دى انما صعب اعمل حاجات كتير تانى ولا انت شايف ايه وبعدين احنا نقدر نعمل ايه اكتر من كده ؟؟؟؟؟؟؟؟؟؟

[Mosso]

انا مع حضرتك في الفكره و المضمون انا بس مش مع حضرتك في حملات المقاطعه الكتير الي تحت دي غير مقاطعة الدنمارك,
غير كده باقي الشركات التانيه ليها مصانع و شركات مشغله مصريين بالالاف و مينفعش اني اقطع رزقهم,
الصح اني اعمل حاجه تنافسهم

[madoo]

نعم للحملات البناءه ولا لعنطظه الشعب اللى جايبنا لورا دى

[baz]

بشجع حملة الالتزام بالاخلاق وبالدين يوم واحد فى الاسبوع
وعايزين نعمل حمله عن الجمارك الى مخليانا نركب كورى وصينى
وحملة عن جشع التجار والتوكيلات
احنا لو قعدنا نقول ونعد مش هنخلص
هنسيب شغلنا ونعمل حملات

امتى بقى تقدرى ولادك يابلد

[Anxs111]

ارجو منك حذف العبارات المعبرة عن الطائفية
فلا يصح ان نذكرها درءا للمفاسد واتقاء للشبهات
(في ناس بتتلكك) والحكاية مش ناقصة واكيد انت وكل الاعضاء مقدرين

وارجو من الادارة بعد اذن العضو الفاضل صاحب الموضوع المبادرة بحذفها

أخي الفاضل ، مفيش فتنة طائفية والكلام مش للغرض ده أبداً . للعلم أنا مسلم والمدرسة اللي كنت فيها من أولى إبتدائي لحد ثانوية عامة مسيحيه ١٠٠٪ . أعز اصدقائي في مصر مسيحي وأنا أعز اصدقاؤه .

مش عيب 2ny أواجه مشاكلنا في مكان كل اللي فيه محترمين . وأنا ذكرت المثال ده عشان اوري قصة الحملات السلبيه وصلتنا فين.
صلب الموضوع هو تغييير التفكير السلبي إلى إيجابي و توجيه طاقات الناس لناحيه مفيدة لكل الفئات من حيث أي تصنيف . ومفيش أي حاجه في كلامي غير حقيقيه أو غير واقعيه أو معروضه بطريقة غير محترمه أو لغرض خبيث .
إذا كان في حد هيتدخل بطريقه غير محترمه ساعتها أنا كمان بطلب من الإداره أنها تشيل مشاركته لكن يشيله من مشاركتي ده في نوع من الظلم .

[seaman]

والله من غير حملات ..احنا لو التزمنا بالمبادىء والقيم حنلاقى حياتنا الطبيعيه على اساس الود والاحترام والمشاركه الايجابيه وحب مساعده الناس هو الموجود قينا احنا مصريين جدعان وفينا حاجات كتير حلوه بس التراب غطاها وان كان ولابد من حمله فممكن نعمل حمله لازاله التراب عن المواطن المصرى وانعاش شهامته ورجولته والست المصريه اللى ب100 راجل اللى تربى اجيال وتقف جنب الراجل تكبره ..والله هى دى مصر الحقيقيه اللى مستخبيه تحت التراب زى ماكان ابول الهول بالظبط .
صوتى وصوتك وصوت كل من حس باللى انا قولته فى حمله
إحياء المواطن المصرى

[Anxs111]

العبارات المعبرة عن الطائفية
فلا يصح ان نذكرها درءا للمفاسد واتقاء للشبهات
(في ناس بتتلكك) والحكاية مش ناقصة واكيد انت وكل الاعضاء مقدرين

هل الأحاديث الشريفه اللي كنت بتتكلم عن تعامل المسلم مع غير المسلم وواجبات المسلم تجاه دينه دي تعتبر طائفيه.
هل مواجهة الأفكار بكلام في نفس السياق تعتبر دعوة للمفاسد وأثاره للشبهات
هل الناس اللي بتتلكك تحكم علينا إيه اللي نقوله ولا الناس اللي فاهمة تقول الصح واللي يتلكك هو اللي كلامه يتشال .

كلام حضرتك فيه أتهام لية بالطائفيه ، وإثارة المفاسد والشبهات . أنا أرفض هذا تماماً .
طب لما الحكايه مش ناقصة وكل الناس عارفين إيه الحل في رئي حضرتك نفضل مستخبيين والحكاية تسخن أكتر