سؤال ال السادة سكان قاهرة المعز ...

[SOBKY]

يا اخواني انا لست من سكان القاهرة .. و معلوماتي الجغرافية عنها ( زيرو ) ..
عايز اخد شقة في القاهرة بس معاييش مبلغ كبير لاني داخل بيزنس قاطم وسطي ..
المهم .. سمعت عن منطقة اسمها ( حديقة بدر ) او النزهة 2 ( الجديدة ) على جسر السويس
و دي اللي جايبهالي اخويا . و بيشكرلي فيها . و بيقول حاتكون منطقة كويسة
فانا مش عارف انتو رايكم ايه .. هل مستقبلها كويس و لا حتكون لوكال و تلم ناس تعبانه ( الجار قبل الدار :? ) و لا ايه ؟؟؟
ارجو الافادة ..

[Ahmed Anwer]

المنطقة دي أنا عرفها كويس ، إحنا بانين هناك و أنا شقتي اللي اتجوزت فيها هناك
عيبها الأساسي مدخالها سيئة للغاية يا بتعدي من علي مصرف و سكة قطر يأما بتخشلها من حارة 12م من وسط عشش عرب عشوائية تقرف
غير كده بعد ما تخش التقسيم نفسه كويس الشارع الرئيسي 50 م و الشوارع الداخلية 10 و 12 م و العمارات كلها حديثة و فخمة بس مابيسبوش مسافات بين العمارات زي المناطق الراقية
مبيخشلهاش مواصلات إلا التوك توك لازم يبقي معاك عربية
الناس اللي واخدة هناك مستواهم معقول بس مش هاي كلاس و مش زبالة معظمهم شباب متعلم
مستقبلها كله متوقف علي حاجة واحدة ردم المصرف و عمل مدخل كويس مباشر من جسر السويس، وفي كلام إن ده قريب جدا خاصة إنهم ابتدوا يردموه من ناحية مدينة السلام ، لو ده حصل أسعارها هتولع
عايز تعرف في المستقبل هتبقي عاملة إزاي ؟؟ مش هتبقي في مستوي النزهة الجديدة أكيد ،، هتبقي حاجة وسط ما بين شارع العشرين و الأربعين اللي ورا حديقة بدر و تقسيم عمر بن الخطاب اللي في أول جمال عبد الناصر (راقي نسبيا)
بس بصراحة السكن فيها حاليا صعب شوية ، أنا شخصيا سايب شقتي و ساكن في النزهة الجديدة ،، ممكن في المستقبل تبقي أحسن
ميزتها إنها أرخص منطقة في القاهرة و ممكن تاخد فيها مساحة محترمة في عمارة حديثة بأرخص سعر و في نفس الوقت تعتبر في نص البلد مش في الصحرا ، عشر دقايق من المطار و جسر السويس ومصر الجديدة و عين شمس
رأيي الشخصي لو تقدر تاخد حاجة قسط في العبور أو الشروق يبقي مستقبلآ أفضل مع الأخذ في الإعتبار إنهم أبعد و لازم عربية كويسة جدا
لو عايز إحنا بنبيع شقق في عمارتنا ،، ممكن تبتعلي علي الخاص
اسف للإطالة بس عشان أحاول أديك كل المعلومات

[SOBKY]

يا حبيب قلبي 1000 شكر على الاجابة الوافية
انا لو هاقعد هناك مش هيكون قبل سنتين تلاتة
خليني اشوف اخويا وصل لحد فين في الحوار ده .. و لو فيه خير يبقى بيننا اتصال
طيب سؤال تاني .. اخبار اسعار العبور و الشروق ايه .. وموضوع العربية مقدور عليه انشاء الله
1000 شكر مرة تانية
:D

[Ahmed Anwer]

اللي اعرفه العبور سعر المتر من الأهالي 1500 متوسط ،، و ممكن تقسط علي خمس سنين
الشروق معرفش ،، بس هتكون أرخص
العبور أفضل كسكن الآن
الشروق مستقبل باهر بس المسافة أبعد ،، عارف ليه مستقبل باهر ؟؟ الشروق في وش مدينتي ،، أول ما مدينتي تخلص ،، الشروق هتبقي زي التجمع و الشروق مفيهاش منطقة صناعية و فيها الجامعة الفرنسية و نادي هليوبوليس و معظمها فيلات و إن كان فيها إسكان إقتصادي برده ، الشروق تروحلها من طريق السويس و طريق الإسماعيلية
العبور اللي مسوءها ،، سوق العبور،، المنطقة الصناعية ،، غير إن طالع عليها إشاعة إنها علي مياه جوفية ، :?: :?: بس هيا عمرانة و ليها مواصلات كتير ، بس ملهاش طريق غير طريق الإسماعيلية

[pippo3k]

Comment

الناس اللي واخدة هناك مستواهم معقول بس مش هاي كلاس و مش زبالة معظمهم شباب متعلم

Just a comment, human being should not be described as rubbish (Zebala)

Thanks for Understanding