النصب بـ sms

[أبو إياد]

الحذر الحذر الحذر

اكيد فى اعضاء كتير مننا وبالذات اصحاب number busy اتعرضوا لمثل هذه الرسائل والتى بدون مقصد ممكن انك تتحول ضحية للوقع فى الفخ
الموضوع استفزازى اكتر من مادى

فى طبعا شركات كتير معروفه واسمها كبير وشركات عالميه بيجيلك منها رساله sms عبر تليفونك كنوع من الدعايه لمنتجات او عرض خدمات هذه الشركات وده طبعا شىء عادى وطبيعى والرساله طبعا مش بتجيلك من رقم وفى الاخر تلاقى توقيع باسم الشركه لا فى ظل التطورات وخدمات شركات الشبكات
انك تلاقى اسم الشركه نفسه بدل من رقم تليفون ياعنى تلاقى رساله جت تفتح تلاقى الرساله باسم شركه معينه وكانك مسجل رقمها باسم

المهم لقيت فى الفتره الاخيره رساله جت وافتح الرساله الاقى المرسل (ساميه) نص الرساله وكانى اعرفها وتعرفنى كان بيقول

ايوه يا ........... معلش سامحنى معرفتش اكلمك علشان انا جوالى ضاع منى واشتريت خط جديد وده رقمى الجديد (000000000000) رقم دولى
حاكينى على هذا الرقم
ساميه

طيب انا ماعرفش حد اسمه ساميه علشان يظهرلى اسمه على التليفون المهم سالت اهل الخبره فى الاتصالات والشبكات
حكالى قصه طويله عريضه وممله
المفيد فى الكام سؤال دول
ازاى يظهر اسم وانا مش مسجله ؟
دى شركات بتتعاقد مع شركات الاتصالات ويكون ليها اسم بدل من الرقم
اشمعنى مثلا جاتلى الرساله دى ومجاتش لواحد صاحبى ؟
لان شركات الاتصال دى فى موقع بيعمل احداثيات لكل ارقام التليفونات بيحدد فيه number busy سواء ارسال او استقبال وده بيكون اكتر من 12 ساعه فى اليوم خط مشغول والشركات بتعمل دعايه للناس دى على اساس انه مايبعتش لكل الناس

موضوع غريب جدا واول مره اعرفه قولت احذركوا منه علشان فعلا الواحد دلوقتى لازم يعد صوابعه ويتمم عليها من هنا ورايح

[Terrible_DaRsH]

شكرا على التحذير .

بس انا بنفض لاى حاجة غريبة و مبهتمش اساسا .

يعنى لو منى بعتت لى رسالة و قالت لى انا تحت البيت مش هبص من الشباك حتى :)

[أبو إياد]

يعنى لو منى بعتت لى رسالة و قالت لى انا تحت البيت مش هبص من الشباك حتى :)

يارااااااجل . مش عارف ليه مش مصدق الكى بورد بتاعك

[Terrible_DaRsH]

يارااااااجل . مش عارف ليه مش مصدق الكى بورد بتاعك

طب جرب كده تبعت رسالة و شوف انا هنفض ازاى ؟

[ahmedhilmy]

لأ انا اللي مستلمني فيه موضوع المتصل يرغب منك ان تدفع تمن المكالمة و ده بيحصل علي الخط بتاع اتصالات بتاعي و ديما من نفس النمرة المهم كنت علطول بنفض لغاية مرة ققرت اقبل الدفع اني حد يعبرني و يرد عليه مفيش و لقيت محسوب من رصيدي بتاع 5 جنيه و لم تتكرر تاني بالرغم من استمرار الاتصال من نفس الرقم

[Eslam.Elrefaey]

شكرا لتحذيرك

[mada121977]

الاسبوع اللى فات جالى رسايل من yahoo وقالوا لى انى كسبت 10 الاف دولار فى سحب عشوائى على ارقام تليفونات من كل العالم .. وكل يوم يتبعلى رساله تقول ان مندوب هايتصل بيك علشان تسجل بياناتك وبعد حوالى 5 ايام لقيتهم باعتين رساله انك لازم تحول نسبه 5 % من قيمه الجائزه لمنظمه خيريه فى نيجيريا وقال ايه انهم ماينفعش يقتطعوا ال 5% دى من الجائزه وانه لما توصلهم تأكيد من المنظمه دى بوصول القيمه هايبعتولى الفلوس على طول .. ياسلام على النصب

[نور القمر]

باختصار في امكانية لشراء سكربت رسائل من شركات معينة متخصصة في بيعها
والاسكربت ده بيتركب على موقع انترنت وتقدر تبعت من رسائل كيفما شئت وبأي اسم انت عايزة
وممكن كمان تحط اي رقم على اعتبار ان الرقم ده هو اللي باعت الرساله

يعني في الشركة عندنا في سركبت بنبيعه لادارة المدارس احنا بنشتري سكربت الرسائل برصيد كذا ونركبه للمدرسة اللي اشترت البرنامج بتاعنا علشان الادارة تقدر تراسل اولياء الامور وفي امكانية ان ادارة المدرسة تكتب ان الراسل ياهو او الراسل البيت الابيض او حتى الراسل فودافون او ممكن يكتبوا اي رقم ويظهر عندك كأن الرقم ده فعلا هو الراسل

[pro_samir]

يارااااااجل . مش عارف ليه مش مصدق الكى بورد بتاعك

انت مبتصدقش كيبورد حد ابدا هههه

و بالفعل لو بتبعت رسالة من النت ممكن تكتب اسم الراسل وبيظهر بدل الرقم ، لكن لو عايز تعرف الرسالة جايلك من النت ولا من شبكة الموبايل شوف البروفايدر بتاع الرسالة نفسها لو مكانش واحد من التلاتة بتوع التلات شبكات يبقى من النت

[ahmed4000]

عادى حكاية تغيير الاسم
السكاى باى فى الامكانية دى بس بفلوس
الاغرب انك ممكن تختار تليفون بدل الاسم يعنى ابعت الرسالة كانها من تليفون واحد تانى


عايز برده احكى على حاجة تانية علشان نخلى بالنا

كتير بيجلنا تحويل رصيد غلط والمفروض طبعا ترده لنفس النمرة

مرة الساعة 2 بالليل لقيت مسيج جايلى بتقول لقد تم تحويل رصيد بقيمة 50 جنيه لكم من تليفون كذا
ودقيقة ولقيت التليفون بيرن معلش انا حولتلك 50 جنيه غلط ممكن ترجعهوملى

طبعا كانوا صحونى من النوم ومش مركز وكنت على وشك انك احول

بس افتركت حاجة واحدة ان المفروض الرسالة تيجى من خلال فودافون مش من نمرة اللى حوللى

طببعا الباشا بيبعتلك الرسالة ويكلمك علشان تحوله رصيد ومستغل الوقت بالللي متاخر والناس مش مركزة

[أبو إياد]

عادى حكاية تغيير الاسم
السكاى باى فى الامكانية دى بس بفلوس
الاغرب انك ممكن تختار تليفون بدل الاسم يعنى ابعت الرسالة كانها من تليفون واحد تانى


عايز برده احكى على حاجة تانية علشان نخلى بالنا

كتير بيجلنا تحويل رصيد غلط والمفروض طبعا ترده لنفس النمرة

مرة الساعة 2 بالليل لقيت مسيج جايلى بتقول لقد تم تحويل رصيد بقيمة 50 جنيه لكم من تليفون كذا
ودقيقة ولقيت التليفون بيرن معلش انا حولتلك 50 جنيه غلط ممكن ترجعهوملى

طبعا كانوا صحونى من النوم ومش مركز وكنت على وشك انك احول

بس افتركت حاجة واحدة ان المفروض الرسالة تيجى من خلال فودافون مش من نمرة اللى حوللى

طببعا الباشا بيبعتلك الرسالة ويكلمك علشان تحوله رصيد ومستغل الوقت بالللي متاخر والناس مش مركزة

لما بتحصل معايا ارد عليه بكل هدؤ وبرود واقوله ده خط وماينفعش اساسا يتحول ليه رصيد واديله اللى فيه النصيب لغايه ماسمع تيت تيت تيت

[MTAK]

لما بتحصل معايا ارد عليه بكل هدؤ وبرود واقوله ده خط وماينفعش اساسا يتحول ليه رصيد واديله اللى فيه النصيب لغايه ماسمع تيت تيت تيت

ممكن تعمل حاجة تانيه
تقوله من عينى الاتنين
و ترسل له نفس الرسالة اللى بعتهالك