هل الاسماء التجاريه العالميه فى مصر حقيقة ام وهم ؟

[mhkash]

طبعا احنا سبنا الموضوع وبقينا نتكلم في موضوع تاني بس مش مشكلة
يا جماعة الغالي مش بالضرورة تمنه فيه.

يعني يا أستاذ mhkash، العدسات اللي حضرتك جبتها بـ 850 جنيه مش بالضرورة أحسن من عدسات بـ 300 جنيه مثلاً. بل ممكن تكون مش أحسن من العدسات اللي بـ 100 جنيه.

في فرق للأسعار يبرره فرق الجودة طبعاً، بس لما الفرق يزيد قوي يبقى الموضوع نصب واحتيال.
احنا في معظم الأحيان بنفتكر أن الحاجة الغالية أوي دي أكيد غالية لأن جودتها عالية جداً. بس في كتير من الأوقات سبب غلو السعر هو نصب والايهام بأن المنتج ده جدير بسعرة.

الحكاية دي أكيد موجودة في العالم كله بس أكيد موجودة أكتر في مصر بسبب الضمائر الميتة و الفساد وعدم وجود أي نوع من الرقابة على الاطلاق.

المصيبة كمان أن السعر العالي مش بالضرورة معناه أن المنتج أساساً أصلي!
في ماليزيا والصين دلوقتي ساعات مضروبة متطابقة للأصليه. والمضروب أسعار مختلفة.
الساعة اللي بـ 10,000 دولار ممكن تلاقي منها مضروب بـ 1000 دولار. يعني مضروبة وبعُشر التمن بس برضو غالية نسبياً! ياما سمعت عن منتجات مضروبة بتتباع في مصر على انها اصلي و بسعر الأصلي ومش ممكن تميز بين المضروب والأصلي.

باختصار، السعر الغالي لا يضمن الجودة.
لازم لما تشتري حاجة تسأل نفسك اذا كان القيمة مقابل المال (value for money) مناسبة؟

اشكرك - احنا مخرجناش عن الموضوع الاصلى وى حاجة - بس ما باليد حيله وواضح ان الواحد لما بيشترى حاجه فى مصر - يبقى على حسب بخته
لو وقع فى ايد تاجر محترم يبقى بخته من السما - لو العكس يبقي العوض على الله

[M.Osman]

شنوري
اكيد بتهزر
صح
قول بس انك بتهزر
بالكيلو
نيييييييههههههههههههههههه

بص حضرتك..
انا بقيت اتوقع من الصين اي حاجة
اللى شغالين في مجال النظارات بيروحوا يجيبوها من دبي!
بتقف عليهم بـ من 2 لـ5 درهم !! تخيل؟؟
و ببتباع هنا بـ..... (إملأ مكان النقاط..)
و على فكرة بتكون شيك و خاماتها حلوة و بجراب و "بشكير" و كله تمام...

[AhmedGen2]

بغض النظر عن الكواليتى ، اسم الماركة ليه سعره.

[A_H_M_A_D]

أنا إشتريت مرة نضارة مكتوب عليها Made in Italy من محل كبير في مصر الجديده و قشرت من أول أسبوع
ساعتها إتأكدت إنها مضروبة بالنار

و عرفت بعد كده إن النضارات اللي بتتباع على الرصيف ب30 جنيه برضه مكتوب عليها Made in Italy

[D . a .\ AYMAN]

شنوري
اكيد بتهزر
صح
قول بس انك بتهزر
بالكيلو
نيييييييههههههههههههههههه
----------

ياباشا هوة ده اللى بيحصل فعلا وياريته بيحصل في محلات الدرجة التانية مثلا لأ ده بيحصل في محلات كبيرة جدا كمان ووكلاء لماركات عالمية أيضا ....

في حاجة كمان لازم تعرفوها إن أغلى نظارة تقليد المحلات دي بتجيبها بتكون واقفة عليهم بالكتير قوي بـ 15 - 20 جنيه (خمسة عشر الى عشرون جنيها - أحسن تفتكروا إن في صفر ناقص)

عشان كده زي ما بتقول الواحد لو ليه مزاج في حاجة أصلي يبقى لازم بالسيريال بتاعها من موقع المنتج الأصلي في بلده ويتأكد من كونها أصلية أم لا وبالمرة مدة صلاحيتها وما الى ذلك

كبوس
في فرق بين نضارات العتبة والبراندات الكبيرة
مش معنى كدة ان كل اللي في المحلات الكبيرة غالية
ومش معني كدة اللي في العتبة مضروب
في العتبة بتكون حاجات هاي كوبي
يعني نسخة نضيفة جدا ومقلدة بعناية عشان كدة بتتباع غالية فوق ال 100 جنية
لكن ماينفعش تقنعني ان نضارة ليها اسم كبير وماركة وموديل وسريال على الانترنت بيعرفك دي اتصنعت سنة كام وشهر كام وبعض الموديلات بتصنع نسخ محدودة زي بربري وارنيت وماركات فرنساوي كتير مش ايطالي
مش معقول نضارة تمنها يبدا من الفين جنية وانت طالع واللي يشتريها عبيط ومش عارف هو بيشتري ايه
عامة النضارة عشان من الاجزاء الملاومسة للجسم فوق ال 15 ساعة في اليوم زيها زي الساعة بفضل انها تكون ماركات قوية ومحترمة وليها سمعة وبعرف الموديل اتصنع امتى وتاريخ صلاحيتة كمان
اه ماتستغربش النضارات ليها تاريخ صلاحية عشان الخامات المدهونة منها والاكسدة والعوامل الجوية وغيرة
هاهاها
تخيل اني لما جيت ابيع كرسي السيارة بتاع الطفل بتاع اولادى واللي تمنه معدي الالفين جنية اللي بيشتري السلعة دخل على الانترنت وكتب سريال الكرسي الكراجو وعرف ان تاريخ صلاحيتة فاضلة سنة ونص بس وخفض 300 جنية من تمنه عشان كدة وهو معانا في المنتدى وزمانة بيقرى الكلام ده
هاهاهاهاها
ده مش نسكافية
ده اكسبيرد
فاكر الفيلم ده

أحب أضيف على كده إن أقل سعر لنظارة أصلية من ماركة عالمية زي كريستيان ديور أو كاريرا أو برسول أو ريبان بيكون من 400 دولار وانت طالع شوف بقى بالمصري هايكون كام عشان كدة كل النظارات اللى موجودة في مصر بتبقى حاجات درجة تانية ومطلوبة بمواصفات خاصة .. والحاجة الكويسة فيها بتكون بأسعار معدية الـ 2500 - 3000 جنيه وانت طالع برضه ... أقل من كده يبقى مش هوة ده الأصلي اللى بنقول عليه ... وطبعا لازم بالسيريال نمبر زي ما كريم باشا بيقول

[D . a .\ AYMAN]

أنا إشتريت مرة نضارة مكتوب عليها made in italy من محل كبير في مصر الجديده و قشرت من أول أسبوع
ساعتها إتأكدت إنها مضروبة بالنار

و عرفت بعد كده إن النضارات اللي بتتباع على الرصيف ب30 جنيه برضه مكتوب عليها made in italy

أنا كنت جايب مرة واحدة police شكلها كان جميل جدا مكتوب عليها made in italy إستحالة تفرقها عن الأصلية لدرجة إنها إتفصلت من واحد بتاع نظارات بـ 900 جنيه وانا واقف .... أنا كنت جايبها بـ 30 جنيه