رمضان.. ذكريات و حكايات

[OlaOsman]

طبعا كلنا لينا ذكريات مع رمضان.. ذكريات مع الصيام و احنا صغيرين.. الفطار.. السحور.. الرؤية و طقوس كل أسرة في رمضان.

انا عن نفسي و انا صغيرة كنت باخد رمضان كله لعب.. أصله كان بييجي في الأجازة.. فخد عندك بأه أجازة و صيف و رمضان و معيلة

كنت أشوف فوازير نيللي أو فطوطة و مع آخر كلمة في تتر النهاية أكون رجل جوه البيت و رجل براه عشان أنزل ألعب مع صحباتي في الشارع.. أيييييييييييييييوه في الشارع

أيامها كنا ساكنين في حتة جميلة أوي في شبرا اسمها الخلفاوي.. و كان شارعنا تقريبا ما بينامش في رمضان و احنا كلنا اللي بنلعب مع بعض ولاد ناس و بنلبس نضيف و مش بنشتم

كان آخري في الشارع الساعة 11 و كنت بازعل أوي لما ماما تطلعني من الشارع الساعة 11 عشان باسيب صحباتي يكملوا لعب لحد الساعة 1 و 2 و انا باطلع من بدري
إنما طبعا بعد ما كبرت إقتنعت بوجهة نظر ماما

كنت باطلع من الشارع ألاقي مسلسل لا إله إلا الله شغال.. أشوف اللي أقدر عليه من الحلقة و طبعا في نصها بالكتير أكون باكل رز بلبن مع الملايكة

رمضان في بيتنا كان له جو تاني.. قبل الفطار ماما كانت تشغل إذاعة القرآن الكريم على قرآن المغرب و تطفي نور الصالة و تشغل حبل لمبات صغيرة كده كان ألوان و بينور بطريقة إيقاعية بتعمل جو حلو أوي في البيت.. مش ناسية الجو ده لحد النهاردة.

مين تاني عنده من ذكريات رمضانية يحكيها لنا؟

[SHNORY]

انا كنت بعشق النهايه بتاعه الفوازير بتاعه فطوطه
ولحد وقت قريب كانوا بيجبيبوها في قنوات التليزيون بعد السهره


[youtube]http://www.youtube.com/watch?v=cZgZsWj3NKI[/youtube]

[توفيق طة]

ياااااااااة رمضان وذكرياتة المحفورة فى عقلى ووجدانى . وأنا صغير كنت ألعب كورة قبل الأفطار وبعدين أطلع البيت

ميت من العطش وعند سماع مدفع الأفطار أجرى على كوب الخشاف . خشاف انما ايـــــــــــة تين شرايح مع صنوبر مع زبيب مع بلح

مع جوز هند مع مشمش مقطع والأهم الكوب يسيل من الخارج ندى البروة من الثلاجة وهوب محتويات الكوب تسافر الى المعدة ؟

وبعد الأفطار أجرى على الراديو كنت أعشق حكايات ألف ليلة وليلة والخيال الممزوج بعبق الأساطير والتاريخ القديم ..

وأيضا رمضان لة طعم تانى فى وجدانى . فى حرب أكتوبر واحنا صايمين وهتاف الله أكبر يزلزل الرمال والمعدات وتقدمنا بسرعة

فى سناء وهروب اليهود الجبناء وأحتمائهم داخل مجنزراتهم ورفعهم الراية البيضاء خوفوا من أنتقامنا. ومنظر أغلى أصدقائى

فى الجبهة المصاب والمتوفى. كان قلبى يتمزق..

كدة ياعلا صحيتى الذكريات .

رمضان كريم وطكل سنة وأنتم جميعا بخير وبأحسن حال..

تحيــــــــــــــــــــاتى

[OlaOsman]

انا كنت بعشق النهايه بتاعه الفوازير بتاعه فطوطه
ولحد وقت قريب كانوا بيجبيبوها في قنوات التليزيون بعد السهره


[youtube]http://www.youtube.com/watch?v=cZgZsWj3NKI[/youtube]

انا حافظة تتر المقدمة و النهاية صمممممممممم

[OlaOsman]

ياااااااااة رمضان وذكرياتة المحفورة فى عقلى ووجدانى . وأنا صغير كنت ألعب كورة قبل الأفطار وبعدين أطلع البيت

ميت من العطش وعند سماع مدفع الأفطار أجرى على كوب الخشاف . خشاف انما ايـــــــــــة تين شرايح مع صنوبر مع زبيب مع بلح

مع جوز هند مع مشمش مقطع والأهم الكوب يسيل من الخارج ندى البروة من الثلاجة وهوب محتويات الكوب تسافر الى المعدة ؟

وبعد الأفطار أجرى على الراديو كنت أعشق حكايات ألف ليلة وليلة والخيال الممزوج بعبق الأساطير والتاريخ القديم ..

وأيضا رمضان لة طعم تانى فى وجدانى . فى حرب أكتوبر واحنا صايمين وهتاف الله أكبر يزلزل الرمال والمعدات وتقدمنا بسرعة

فى سناء وهروب اليهود الجبناء وأحتمائهم داخل مجنزراتهم ورفعهم الراية البيضاء خوفوا من أنتقامنا. ومنظر أغلى أصدقائى

فى الجبهة المصاب والمتوفى. كان قلبى يتمزق..

كدة ياعلا صحيتى الذكريات .

رمضان كريم وطكل سنة وأنتم جميعا بخير وبأحسن حال..

تحيــــــــــــــــــــاتى

أرجو اني ما كنش قلبت على حضرتك المواجع.

منور الموضوع يا أستاذ توفيق و كل سنة و حضرتك طيب

[SHNORY]

كان اصحاب العماره اللي احنا فيها قبل ما يمشوا ويسيبوها اول ما ييجي رمضان
العماره من اولها لاخرها يتحط عليها لمبات افراح ولمبات نايلون من اول رمضان لحد العيد والشارع كان هادي ومنور وجميل
قبل ما يفتح الجراج جنبنا وشركه الادويه والقهوه والسايبر
وكان شارعنا مفيهوش غير عمارتين والباقي فلل
وطبعا كانت زكريات اكياس البمب
والصواريخ اللي بفتيل
ولما نعمل جمعيه انا واصحابي وكل واحد يطلع بمبتين علشان نعمل قنبله في علبه بلاستيك ونحدفها لفووووووووق وتنزل تفرقع
ويا سلام بقي لو فرقعت علي عربيه وتسيب البقعه الصفرا المميزه للبمبه
والشوال اللي كان بابا بيجيبه اول رمضان ومليان ياميش وانا واختي كنا صغيرين لسه مش بنصوم
ونعيش بقي تقشير وتكسير
كانت ايام جميله

[pro_samir]

اللى مش ناسية خالص هوا الزينة اللى كنا بنعملها فى الشارع قبل رمضان كنا بنتلم كل الحتة وكل واحد يعمل حاجة

اللى يجيب السلم واللى يجيب ورق واللى يقعد يقص ويعمل زينة واللى يجيب الأحبال واللى يعمل النشا واللى يقعد يلزق والشاكوش والمسامير واللى يطلع يعلق ولا ولا

كل واحد بيعمل حاجة وروح جميلة وفى ظرف ليلة واحدة الشارع كلة يكون متسقف بالزينة

ولا ألف ليلة وليلة بتاع حسين فهمى ونجلاء فتحى تقريبا

كنت دايما بسمع التتر بتاعها "ألف ليلة وليلة ، بالزعبل ليلة ههههههههه " ، بينما هيا كانت "قصة كل ليلة"

ومن ألذ الحاجات اللى مش ناسيها لما كنت بمدد جنب والدى فى السرير واحنا بنتفرج على التليفزيون واروح فى النوم غصب عنى

ألا ليت الزمان يعود يوما

[Terrible_DaRsH]

انا لو افتكرت انا كنت بعمل ايه و بتفرج على ايه هتفتكروا انى عندى 200 سنة ولا حاجة :)

اصلى كنت طفل غريب شوية :)

[OlaOsman]

أنا كمان لسه فاكرة الزينة اللي كنا بنعملها و احنا صغيرين.. كنا بنقصها و نلزقها بمادة اسمها الجولة و لا حاجة زي كده. كنا بنشترك فيها مع أصحابنا من جيرانا و كان فعلا أحسن تدريب للأطفال على فريق العمل.

[SHNORY]

كان اسمها كوله
وكانت بتعمل ف المطبخ بدقيق وميه وحاجه تانيه معاهم
وتجيبي ورق النتايج تقصقصيه ويتلزق علي الخيط الغزل ويصول ويجول بين بلكونات الشارع
وما تيسر من جيران
ولما ربنا كرمنا واتطورنا جيبنا دباسه

[OlaOsman]

كان اسمها كوله
وكانت بتعمل ف المطبخ بدقيق وميه وحاجه تانيه معاهم
وتجيبي ورق النتايج تقصقصيه ويتلزق علي الخيط الغزل ويصول ويجول بين بلكونات الشارع
وما تيسر من جيران
ولما ربنا كرمنا واتطورنا جيبنا دباسه

أيوه.. اسمها الكولة فعلا

بس انا ما حضرتش الدباسة

[SHNORY]

أيوه.. اسمها الكولة فعلا

بس انا ما حضرتش الدباسة

اصل هي كانت دباسه واحده في مصر وكانت عندنا
علشان كده متلاقيش ناس كتير حضروها
وعدويه غنالنا وقالنا تقدر يا مستدبس تستدبسلنا سبع دبابيس زي اللي استدبسناهم من عند المستدبسين
اصلنا كان عندنا تلال فلوس بس منهم لله سباقات الخيل وبورصه القطن
ضيعوا كل ده ومش فاضل غير الدباسه وشريك متضامن بالدبابيس

[Samah AbdAllah]

جميل اوى الموضوع يا علا
قبل ما انسى
نور القمر بتقولكم كل سنة وانتوا كلكوا طيبين ورمضان كريم عليكوا

وبالنسبة لذكريات رمضان معايا غير الف ليلة وليلة والفوازير وخلافه كان اهم حاجة اللعب بالفانوس بس انا كان اخرى السلم مكنتش بنزل الشارع غير عشان اشترى بومب واخر مرة نزلت اجيب البومب عربية خبطتنى وانا بعدى الشارع ومن ساعتها مش بشترى بومب
باجيب صواريخ دلوقتى وببعت اى حد غيرى يشتريها
وكنت بقا احب العب بلى مع العيال فى داخلة البيت ياسلام فكرتينا باجمل ايام الطفولة
واول ما افتكر الصيام افتكره بالصيف لاننا اول ما ابتدينا نصوم كان رمضان بييجى فى الصيف والحر بس كانت اجمل ايام وافتكر مرة نسيت وشربت وقعدت اعيط لحد ما ماما قالتلى لا ما تخافيش اللى بيشرب وهو ناسى بيفضل صايم وربنا بيسامحه
شكرا يا علا عالموضوع الرائع ده