اسئلة فى الخطوبة و لبس الدبل و شراء الشابكة

[atamim]

اولا يا رب ربنا يوفق كل من هم على خير مع بعض

انا اخر حد اتخطب من عندنا كان من زمان اوى لدرجة مش فاكر بالتسلسل عملوا اى

هل شراء الدبل علشان لما الفاتحة تتقرآ يلبسوا دبلة ولا الدبلة يوم الخطوبة؟

اى افضل فترة ما بين قراءة الفاتحة و عمل خطوبة

الفترة المناسبة ما بين الخطوبة و كتب الكتاب و الجواز فى حالة ان الاثنين بيجوزا لوجة الل علشان يبنوا بيت مسلم و يكونوا رفقاء دنيا و اخرة يعنى مش حيعملوا اختبارات كتيرة لبعض ولا حيطولوا

[icehearted girl]

انا لسه شوية بس مففيش مانع اقول رأيي ولا ايه؟؟؟

موضوع افتحة ودبل او خطوبة وشبكة ميفرقوش كتير عن بعض ودا راجع لامكانياتك في الوقت الحالي يعني دي ترجع ليك

تقدم دبل او شبكة او تخلي الشبكة فكتب الكتاب

اثنيا متهيالي افضل فترة للزواج هو بعد مرور سنة من الخطوبة مش بس عشان توضبوا الشقة علي مهلكم لا

دا عشان كمان تعرفوا بعض كويس

اما بالنسبة للعقد..كتب الكتاب يعني اعتقد انه يكون قبل البناء بحوالي ثلاث ششهور مثلا


وربنا يوفقك ان شاء الله

[hamedo0]

يا فندم موضوع قرايه الفاتحه
في ناس بتقدم دبله ومحبس وتكمل الشبكه بعد كده
وفي ناس بتقدم شبكه علي طول كله علي حسب امكنياتك واهل العروسه عاوزين ايه
انا داخل علي الموضوع ده ان شاء الله علي العيد وحجيب شبكه عشان تبقي حاجه اتشالت من عليا وافوق للباقي
وربنا يؤفق الجميع ان شاء الله

[atamim]

شكرا يا شباب على الرد بس بردة مجاوبتوش على اسئلتى بوضوح انا بجيب الدبل ليوم قراءة الفاتحة و لا جبها بعديها ولا يوم الخطوبة ؟

[kh_talaat]

شكرا يا شباب على الرد بس بردة مجاوبتوش على اسئلتى بوضوح انا بجيب الدبل ليوم قراءة الفاتحة و لا جبها بعديها ولا يوم الخطوبة ؟

أولا ألف مبروك مقدما وربنا يبارك في زواجك ويرزقك بالزريه الصالحه

موضوع الدبل هو دايما العرف ان الدبل والشبكة بيبقى في الخطوبة على أساس انك بتعمل حفلة وتعزم المعازيم وتفرجهم على الشبكة وتلبس الدبل

والمعازيم يغنولك أغنية يا دبلة الخطوبة عقبالنا كلنا ونبني طوبة طوبة في عش حبنا

وتاخدلكم كام صورة وأنتو بتلبسو الدبل على كام صورة وأنت بتلبس العروسه الشبكة


إنما قراية الفتحه بتبقى ربط كلام مش أكتر ومفيش مانع ان العريس يقدم للعروسة يوم الفاتحه هدية لطيفه زي خاتم أو أنسيال (مسأله ذوقيه مش أكتر)

كل اللي فات دة زي ما قولت لحضرتك هو العرف المتبع ولكنه غير ملزم يعني

واحد صاحبي مثلا قال احنا مش هنعمل حفلة خطوبة وهنلبس الدبل في الفاتحه عادي يعني

[Nile_Storm]

الي اعرفه ان الفاتحه لوحدها
و الدبل و الشبكه مع بعض غالبا
عامه انا بس داخل اقولك مبروك مقدما و ربنا يعينك و ييسرلك الامور

[Eng.Osama.Afifi]

ربنا يوعدنا ونقدر نعمل تصويت في التوبيك ده

[amr.elsayed]

فين يا جماعة خبرات الناس المتجوزة فى المنتدى
وعلى فكرة بقى انا متابع باهتمام
والف مبروك وربنا يتمم بخير ان شاء الله

[eslamrace]

فين يا جماعة خبرات الناس المتجوزة فى المنتدى
وعلى فكرة بقى انا متابع باهتمام
والف مبروك وربنا يتمم بخير ان شاء الله

للاسف الاغلب فى المنتدى شباب لسه بيكونوا نفسهم فمتلاقيش خبرات كتير فى المواضيع دى
بس ميمنعش نستنى عنصر الخبره فى المنتدى

ودعواتكم معانا

[YaSSerwIN]

فى الأول بيتم قراية الفاتحة بعد الأتفاق على ما سوف يتم
بعد كدة شراء الشبكة
بعد كدة بيقوم أهل العروسة بعمل حفلة خطوبة وفيها بيتم تقديم الشبكة
وبعد كدة كتب الكتاب

[michohat]

فى الاول قراءة الفاتحه ويصاحبها الاتفاق على تفاصيل ما سوف يتم ولتجنب اى مشاكل يفضل التطرق لأدق التفاصيل ( الشبكه "هل هتتقدم كلها فى الاول ويكون فى حفل خطوبة ولا يكتفى بالدبل والشبكة تتقدم فى حفل الزفاف "- التأثيث " مين عليه ايه ومين مش عليه ايه "- الخ)

بعد كده نيجى لمرحله الخطوبة ودى الناس ليهم فيها اكتر من طريقة
1- يتم شراء دبل الخطوبة فقط وتأجيل شراء باقى الشبكه الى حفل الزفاف وهنا اعلان الخطوبة تكون فى جلسه عائلية مقصورة على افراد من كلتا العائلتين ( فى هذه المرحله يستحب ان تهدى والده الخاطب الى المخطوبة هديه )
2- يتم شراء الشبكه بالكامل و تهدى للمخطوبة و يتم اعلان الخطوبة بلبس الدبل فقط ولبس الشبكه يكون فى حفل الزفاف هذا يكون فى حاله عدم الرغبه فى او عدم امكانية اقامه حفل خطوبة
3- يتم شراء الشبكه بالكامل ويتم عمل حفل خطوبة
( لكل حاله من الحالات السابقة ميزة قد يحتاج اليها كلا الطرفين)

بعد الخطوبة تبدأ مراحل تجهيز مسكن الزوجية اذا كان موجود او البحث عنه اذا لم يكن موجود
ويفضل فى حاله عدم وجود معرفه سابقة بين ( الخاطب والمخطوبة) " جواز صالونات او عائلات" ان لا تقل فترة الخطوبة عن عام ولا تزيد عن عام ونصف لضمان حدوث التألف واتاحه الفرصه لكلا الطرفين لمعرفه الطرف الاخر

بعد مرور فترة الخطوبة تأتى مرحله كتب الكتاب والمرحله دى الناس فيها بتبقى حسب البلد يعنى ايه يعنى فى ناس بتفضل تكتب الكتاب قبل الزفاف مع الخطوبة وناس بتفضل تكتب الكتاب قبلها بشهر وناس تحب تكتب قبلها ب 3 ايام وناس بتفضل كتب الكتاب فى نفس يوم الزفاف

نيجى بقى ليوم الزفاف

ممكن فى حاله ان متعملش حفل خطوبة ان والد العروس يساهم فى تكاليف حفل الزفاف
وفى ناس بتفضل ميبقاش فيه حفل زفاف وبتكلفة الحفل ده يعملوه بيه اى شئ يستفادوا بيه زى عمره او اى شئ اخر يكون فيه افاده للعروسين

ده كان اختصار للى بسمعه من اصدقائى وزمايلى وكمان تجارب شخصية

[Ignition-Kid]

بجد نصيحه من اخ لاخوه حاول ماتزودش فتره الخطوبه عن سنه , والف الف مبروك مقدما.

[mobitic]

أولاً ألف مبروك وربنا يتمم بخير
المسألة أولا وأخيراً اتفاق بين الطرفين
يعنى مفيش قواعد أساسية مجبر انك تعملها
اللى عملته قرائة فاتحة مع شوية فاكهة محترمين على هدية ذهبية إن أمكن.
الخطوبة بتبقى تلبيس دبل.
فى الدخلة بتقدم الشبكة.
دا اللى انا عملته وبجد هتلاقى فى اختلاف كبير بين كل مكان والتانى ( أخوك من الصعيد الجوانى ) وكل عائلة وأخرى حتى فى داخل البلد الواحدة.
وارجع واقولك الحكاية من الأول للآخر اتفاااااااااااااااق بين الطرفين او العائلتين.
بس اياك تعمل زى عبد البر ؟؟؟؟؟؟ ....... دا واحد صاحبى متعرفوش .... بهزر طبعا
نصيحة بقى حاول الخطوبة متزيدش عن سنة وربنا يوفقك.
تقبل تحياتى وألف مبروك مرة تانية

[seaman]

بص يا سيدى خد المختصر المفيد...
1- قراءه الفاتحه بعد التعارق والتفاق على التفاصي ..فاهم التفاصيل بالظبط كل حاجه علشان ميحصلش لاقدر الله إختلاف بعد كده.
2- إعلان الخطوبه وتلبيس الدبل أو الشبكه بالكامل وده على حسب امكانيات كل واحد..يعنى اللى معاه بيجيب واللى مممعاهوش يبقى دبل بس وده احسن اليومين دول وفر يا مان.
3- الخطوبه على الضيق واهل العروسه بيقموا بيها او بتشاركهم وبالتالى يشاركوك فى حفل الدخله.
4- يفضل لن فتره الخطوبه سنه واحده بالكتير ..
5- ربنا يتمملك على خير ويرزقك الذريه الصالحه

[هيثم]

أولاً ألف مبروك وربنا يتمم بخير
المسألة أولا وأخيراً اتفاق بين الطرفين
يعنى مفيش قواعد أساسية مجبر انك تعملها

تقبل تحياتى وألف مبروك مرة تانية

والافضل تاجيل الشبكه الى قبل الدخله بحاجه بسيطه عشان لا قدر الله لو
ما حصلش اتفاق تبقى الخساير محدوده