هزقني .. شكرا !

[MoToRiZeR]

فيه ناس تيجي تقولك انا مسكت واحد و انا جي إنهاردة .. هزقته تهزيق !! بستفته !! مسحت بكرامته الأرض ! و تقولها بمنتهي الفخر و كأنه قد أحرز ميدالية أولومبية .. انا مش منهم .. مبحبش أحسس حد بالدونية خاصة البسطاء زي حارس أو عامل مثلاَ لأنها بتقلب معاه بحقد طبقي و بتخش في دماغه إن عشان انا غلبان يتعمل فيا كدة ولا إييه و تنزل في الخلفية أغنية نحن لا نزرع الشوك .. لأ انا بحب أعامل الناس كويس و أمشي و هما مبسوطين و فيه إبتسامة علي وشهم و في الخلفية ناس ماسكين أيدين بعض و بيغنوا محلاها عيشة الفلاح .. لأن كمان انا مؤمن اللي بيتهزق لازم بيحتاج ينفس فا يا هيروح يضرب مراته يا عياله يا عيل صغير بيشتغل عنده فا بتجنبهم خالص .. مش دي المشكلة .. المشكلة إن فيه ناس تكاد تكون بتتوسل إليك عشان تهزقها !!! فيه ناس بتحب تتهزق .. و متجيش إلا بالتهزيق .. ولو حاولت تتعامل معاهم بطريقة تانية هيسوقوا فيها ! مثال .. حارس أمن بالمقابلة أمس .. بعد إنتهاء المقابلة و كله جميل و إتفقنا علي الذهاب إلي مركز شباب الشيشة قلتلهم يا جماعة هروح أجيب العربية و أمشي وراكم عشان معرفش الطريق .. و رحت .. و فتحت العربية و ركبت و متوجه إلي باب الخروج و لقيت قمع قدامي .

الحارس : خير يا باشا .
انا : طالع برة إن شاء الله .
الحارس : أيوة بس النادي بتذاكر أو كارنيهات
انا ( أنظر حولي مستغرباَ ) : إحنا جوة النادي !!
الحارس : أيوة حضرتك يبقي تطلع من البوابة التانية و تمشي شوية عالأوتوستراد هتلاقي البوابة الرئيسية بتاعة النادي خش منها .
انا : انا مش عايز أدخل .. انا عايز أخرج !! انا مروح !! و بعدين إحنا بالفعل جوة هدخل كمان ليه !!
الحارس : طب ماهو لازم تذكرة
انا : امال انا دخلت هنا إزاي !؟ نطيت من عالسور بالعربية !؟ انا لي تصريح عالباب .. دخلت و ركنت العربية و قعدت شوية و ماشي !
الحارس : أنهي عربية !؟
انا : العربية دي !!
الحارس : إنت دخلت بالعربية دي دلوقت ؟!
انا : لأ انا جيت لوحدي و هي قابلتني هنا ! يا عم إنت بتقول إيه ! خلصني عشان فيه ناس مستنياني ! و مش خارج من بوابات تانية عشان فيه ناس مستنياني عالبوابة دي
الحارس : بص يا أستاذ .. مينفعش تخرج من هنا .

دي عينة بسيطة من الحوار .. و كان بهذا الحارس من الغباء يرتسم في طريقة نطقه و تعبيرات وجهه ما يكفي إنه يخليني أشد في شعري .. و قررت أن أشوط القمع و أخبطه بالعربية و أمشي .. قام رامي نفسه تحت العربية و متكلم في لاسلكي معاه جالي واحد تاني! قلتله البهيم ده بيقولي كذا كذا و بلهجة حادة جداَ .. قاله إيه يبني فيه إيه إيه اللي بتعمله ده ! و فتحلي الطريق ! و اللي يغيظ إن أصلاَ و انا داخل النادي من البوابة الرئيسية كمان قلبتلهم نور قاموا فاتحين الباب !

مثال أخر : القهوة اللي قريبة من البيت فيها ناس ساعات يجيبوا كراسي و يقعدوا جنب العربية و يسندوا الكراسي عليها و أحلي نقر تستناك تاني يوم و إنت نازل .. و الناس دي ناس معينة لا تتغير .. رحت مرة قلتلهم بوجه مبتسم ينفع يا رجالة اللي إنت عملتوه ده ؟ قاموا بقي لا مؤاخذة يا باشمهندس و الله ما نقصد و عربيتك في عنينا و بتاع .

تاني يوم .. هما هما .. نفس السندة .. نزلت (وش خشب) .. إيه يا جماعة إحنا مش لسة متكلمين ولا إيه !؟ لا مؤاخذة يا باشمهندس .. إبعد يا إبراهيم شوية عن العربية !

تالت يوم .. هما هما أكنهم راكور جنب العربية ... من البلكونة بقي (زعيق) إنت يا بني أدم إنت و هو .. هو انا موراييش غيركوا ولا إيه !؟ أجبلكم حكومة تقفل أم القهوة دي خالص !؟ ........* !!! و دي كانت أخر مرة يقعدوا فيها .

مثال كمان .. السايس بتاع الجراج اللي في الجامعة .. متغسلش العربية يا أحمد غير لما أقولك .. متحطنيش قدام الأمر الواقع كدة !

هو : ماشي يا باشا أؤمر إحنا بس بنحب نخدم .

بعديها بكام يوم أطلع ألاقي العربية مغسولة برضه و ألبس 7 جنيه ولا عشرة جنيه في ركنة .. يا أحمد انا مش قلتلك متغسلش العربية ؟ يا باشا أصل كانت متربة و الله و صعب عليا تمشي بيها كدة ! شغل محلسة بقي .

تالت مرة .. ............* يا أحمد !!! إنت هتشتغلي بقي !!!! طب مش دافع .. و إبقي إغسلهالي كل مرة ببلاش عشان مش هدفع حاجة .. و دي كانت أخر مرة أطلع ألاقي العربية مغسولة .

المشكلة في هذه الفئة اللي تتغذي و تترعرع علي التهزيق و قلة القيمة .. متاخدش منه حاجة و متتقيش شره غير لو إتهزق .. هذه الفئة اللي تربت في بيئات جعلت التهزيق لهم كأغنية لأم كلثوم يوم الخميس .. مزاج ! انا كنت بتجنب التعامل مع الناس دي بس فيه مواقف لازم بتضطر تتعامل معاهم فيها ! أعمل فيهم إيه بجد .. انا بضايق اما أضطر أهزق حد بس مش ممكن كمية الغباوة دي !! إيه الحل عشان مقللش من قيمة حد و محرقش دمي في نفس الوقت!؟

[SeiffoZ]

معلش هههههههههههههههه

موقف النادى ده يضحك جدا!!!

بس إللى إنت كلنته ده أكيد إنسان مستوى ذكاءه محدود شوية ....

بتوع القهوة دول ربنا يعينك عليهم ..

[أحمد كمال]

لسه من اسبوعين تلاتة كده كان عندي كورس في جراند حياة

و اتخانقت مع بتاع الأمن مرة بسبب الغباء برضه

و انا و الله ما باحبش اجي على حد زيك يا موتورايزر ...... بس هي فعلا هزأني شكرا زي ما انت بتقول

[Ahmed Samy]

ههههههههههههههه

خد من ده كتير يا موتو

هو دخول الحمام زي خروجه

[yossef]

فعلا الشعب ما بيجيش غير بالعنف

[M.Osman]

بصراحة يا محمود ..
انت بتجيب حاجات من بين السطور في حياتنا اليومية (زي برضه موضوع انا مش في الدايرة) .. ضحكتني.. و اعتقد مفيش حل غير المعاملة الهادية في الأول بدون عصبية لأن العصبية مش بتجيب غير المشاكل فعلاً

[pro_samir]

بقى من الصعب فعلا الواحد يمسك نفسة وميشتمش وهوا سايق

انهاردة الصبح شوفت شيخ فى التليفزيون كان بيتكلم عن الأيمان وان علشان الواحد يكون علشان يظبط نفسة لازم يظبط قلبة ، وتظبيط القلب بيبدأ من اللسان وحسن الخلق وان لازم الواحد ياخد بالة كويس من كلامة لأن دة مدخل للقلب

قلت الواحد هيبطل يشتم العالم الــ تيت وهوا سايق لأن الواحد بيقعد يسب ويلعن من اللى بيشوفة

طبعا بمجرد ما الواحد ينزل الشارع بيبقى نفسة يشتم

واللى كمل عليا الصراحة وانا راجع على الزراعي عربية فى الحارة الشمال خالص خابطة موتسيكل والواد اللى كان راكبة واقع قدام العربية شكلة ميت والعربية زى متكون داخلة فى عامود ، وبعدها بحوالى عشرة متر فى اقصى الحارة اليمين الموتسيكل واقع ومتكسر عشرين حتة

الله يرحمة لو كان مات ، بس فضلت طول الطريق وانا راجع بتخيل نفسى مكان الراجل اللى خبطة وعمال اشتم فى المرحوم طول الطريق

والظريف ان الناس كانو قاطعين الطريق ومش عايزين العربيات تعدي خالص مع ان فاضل ربع ساعة على المغرب

نفسي برضو زيك ألاقى حل ، بس كما قال رسول الله صلى الله عليه وسلم-: ليس الشديد بالصرعة، إنما الشديد الذي يملك نفسه عند الغضب (متفق عليه) .

ربنا يقوينا على نفوسنا

[eslamrace]

والله يا جماعه صراحه ساعات الواحد بيعدى ويستحمل وساعات بيبقى الواحد مضغوط فمش مستحمل حد يعامله بغباء فبيضطر يستخدم الاسلوب ده

بس اهم حاجه انك متجيش عليهم فى الفاضيه والمليانه
وموضوع جامد ومشكوووووور

[SeiffoZ]

فعلا الشعب ما بيجيش غير بالعنف

سؤال بس..

حضرتك مش من ضمن الشعب بردوا؟؟

[Terrible_DaRsH]

يوم الجمعة بالليل كنا داخلين مستشفى المقاولون و قابلنا برده بتاع امن زى اللى قابلك ده بالظبط على البوابة .

اخر لما زهقنا دخلنا غصب عنه و كنا هنخبطه و دخلت كشفت و خرجت و كنا هندوسه تانى . :)

طول ما انت فى مصر كل شيء جايز .

[mahmoud_magdy]

الظاهر ان العينات اللي بتحب تتهزق كتير اوي
ومش بس بيكونو قليلي العلم او مش مثقفين او من طبقه فقيره نسبيا جاهله
لا كمان بيكونوا متعلمين وعلى اعلى مستوى من الثقافه وطبقه ماديه متوسطه وغنيه
قابلت اتنين منهم امبارح ووبرغم صعوبة الموقف الا اني تمالكت نفسي
بس كنت هووووووولع من جوايا غيظااا
ومسكت نفسي عشان صايم والموقف مكانش يستحمل نرفزه كمان
الله يسامحهم

[بحري]

الحارس : إنت دخلت بالعربية دي دلوقت ؟!
انا : لأ انا جيت لوحدي و هي قابلتني هنا

ههههه.. جامدة جدا الحتة دي..بس سيبك الحوار لذيذ قوي ياريتني كنت مكانك عشان أنا بحب المواقف دي جدا وبسيب الزبون وأقعد أتأمل في الموقف وأخرب الدنيا ضحك

و كان بهذا الحارس من الغباء يرتسم في طريقة نطقه و تعبيرات وجهه ما يكفي إنه يخليني أشد في شعري .. و قررت أن أشوط القمع و أخبطه بالعربية و أمشي .. قام رامي نفسه تحت العربية و متكلم في لاسلكي معاه

الراجل ده وطني على فكره ولازم نحييه تحية كبيرة قوي

[SS]

هى فعلاً فى ناس ما تجيش غير كده....و تخليك تندم انك عاملتهم عدل من الاول....و العينات ديه موجودة ع كافة المستويات
بس المشكلة ع الرغم انه بيبقى يستاهل التهزيق....و احتمال كبير بيبقى كيف و مزاج....و تلاقيه وقع فى طريقك فى وقت يكون بقاله فترة مخدش الجرعة المعتادة....فتلاقيه بيستقتل معاك طمعاً فى انك تيديله انت الجرعة...

المشكلة بقى ان الواحد ساعات كتير بعد مالموقف يخلص بيحس انه هو مضايق و انه افترى ع اللى قصاده و بالغ فى رد فعله
لأن النوعية عادةً ما بيتسيبكش غير لما تتشتم و احياناً ما فيش مانع ايدك تتمد شوية
بس ممكن تلاقى نفسك بعد كده ..بتسأل طيب مش كان ممكن يتهزق بالادب من غير شتيمة ؟؟؟....طيب يعنى كان لازم امد ايدى ما هو خد اللى فيه النصيب من التهزيق؟؟.....طيب هل غلطه معايا مساوى لرد فعلى؟؟؟و لا رد فعلى اكبر و هو كده لى حق عندى؟؟
اى نعم هو يستاهل ....اى نعم هو مش ماشى بمبدأ "هزقنى شكراً " لأ ده ماشى مبدأ "و الغالى عندك لتهزقنى ابوس ايدك"
بس برده ده ما يمنعش ان الاسئلة ديه بتمر ع الواحد...اى نعم مش فى كل المواقف لأن فيه مواقف بالنسبة لك لو اتعادت هتتصرف فيها بنفس الشكل...بس اهى بتيجى ع بالك برده
عشان كده الواحد بقى يحاول يتجنب القرف ده....لحد ما قرب يقعد فى البيت ما يخرجش منه

[Imhotep]

انا عندى مبدأ ماشى بيه على طول...... طالما يوجد من يستطيع ان يقوم بعمل لا استطيع ان اقوم به او مينفعش اقوم به مهما كان بسيطا لكن ضروريا فله منى كل الاحترام و التقدير...... يعنى الزبال و بتاع تسليك المجارى و غيرها من المهن البسيطة لكن المهمة فى نفس الوقت تستحق كل تقدير...... و فى النهاية كلنا بنى ادمين و ننتمى الى الجنس البشرى فى كل شئ...... اما موضوع التهزيق ده فيجب ان يكون الموضوع تصاعديا زى موضوع القهوة ده......

[Sharky]

للأسف نظام هزأنى شكرا أصبح صفة يتميز بها العديد من المصريين