انا خلاص زهقت على الاخر

[maka]

يخرب بيت ام البطالة حرام والله بعد كل دى سنين تعليم اترمى كده واضيع عمرى ووقتى فى النوم والنت والقهوة
وتبقى المحصلة اليومى عمر بيعدى وخلص . المشكلة ان العملية بدات تقلب بكسل واكتئاب وبدات اطلع زهقى فى
الاكل ووزنى زاد بطريقة ملحوظة بعد ما كنت نشيط و خايف اتعود على كده لو زاد الوقت شوية والمشكلة التانية طالما
فيه وقت فراغ و طالما فيه شيطان يبقى دماغك هتبدا تسرح و الواحد بيجاهد وبيحاول يفرمل نفسه و المشكلة الاكبر انى مش
لقى حد افضفضله اصحابى نصهم زيى وعلى اخرهم والنص التانى داخل الدراسة
انا قدمت السى فى لاكتر من 100 شركة ومكتب بالميل واليد والفاكس واقول بكره تفرج لكن بكره طول اوى
حسبى الله ونعم الوكيل

[Terrible_DaRsH]

صلى على النبي الاول .

دى ظروف بلد بالكامل مش انت لوحدك و الله .

الشباب لما بيتخرج و مش بيلاقى شغل بيتقسم الى نصفين .

النصف الاول مضيها شارع و كلام هنا و هنا و مخدرات ان امكن و حوارات هو شايف انها الحل البديل .

اما النصف التانى بيسعى لطريقه و بيقضي اوقات فراغه بطريقته لحد ما تتحل المشكلة .

البلد فيها شغل والله بس مش مشكلتك انت او غيرك , لكن دى مشكلة الفساد .

كله بالواسطة و بالرشاوى , ده غير ان البلد بقت عبارة عن حيتان فقط !

[WalidAdel]

والله ياباشا دا حال ناس كتير في البلد و انا واحد منهم اهو بردوا زيك كده تمام مع اختلاف اني خريج تجاره
ربك يبعت بقي

حاول تقدم علي اي حاجه حتي لو كول سينتر في اي شركه لحد ماتلاقي شغلانه كويسه القاعده في البيت بتخالي الدماغ تصدي

[Ignition-Kid]

الصبر حلو وان شاء الله خير, حاول تنزل تشتغل اى حاجه حتى لو بعيده عن مجالك.

[Ahmed Nouh]

بالظبط زى ما قال الاخوه , مش لازم اول شغلانه تكون فى مجال تخصصك , اعتمد على ربنا وان شاء الله هتشتغل فى مكان كويس اوى ويمكن مكنتش تتخيل انك تشتغل فيه فى يوم من الايام

انزل اشتغل اى حاجه عاديه وبلاش تحس انها هتقلل من قيمتك , بالعكس ايا كان هى احسن من القعده فى البيت واللى هيترتب عليها , وبفلوس الشغل تقدر تاخد دورات وشهادات تؤهلك لقدرات اكتر ومميزات اكبر فى السى فى بتاعك علشان لما تروح شركه تبقى فرصه كويسه وتلاقى المكان اللى نفسك فيه , دلوقتى الشغل يا واسطه يا مهارات ولازم تكون مختلف عن غيرك علشان تلاقى مكان كويس

ببساطه اشتغل وقت فراغك ده فى ايجاد فرصه افضل علشان قعدتك كدا غلط وهتلاقى الدنيا بتجرى حواليك وتوصل بمرحله انك ولا لحقت تشتغل اى حاجه ولا فى وقت تتعلم حاجه جديده

ليا صديق مر بنفس تجربتك وهو كمان كان اسوء منك لانه خريج تجاره وانت عارف الكليه ده بتخرج كل سنه كام الف بنى ادم , اشتغل شغلانه طاحنه فى احد مراكز الغطس فى شرم الشيخ فى سقاله فى عرض البحر وكان بيبيع هناك انابيب الغطس لليخوت المصريه بتاعت السياحه اللى بتطلع رحلات غطس وفضل فى الشغلانه دى سنتين لحد ما عمل منها مبلغ كويس ونزل خد بالمبلغ ده شهادات معتمده فى المحاسبه ودورات تساعده فى تخصصه

بعد ما خلص سنه من الدورات دلوقتى ربنا يبارك فيه مش ملاحق على الشركات اللى عايزاه وشغال فى 3 اماكن وحياته اتشقلبت 180 درجه , ربنا يكرمك وتبقى احسن منه

[ams]

استغل الوقت فى تنمية مهاراتك ، انا عارف انه صعب لان الدراسة بتزهق لكن ده اكيد هينفعك عاجلا او اجلا

و طبعا الكلام ده صح قوى

حاول تقدم علي اي حاجه حتي لو كول سينتر في اي شركه لحد ماتلاقي شغلانه كويسه القاعده في البيت بتخالي الدماغ تصدي

انزل اشتغل اى حاجه عاديه وبلاش تحس انها هتقلل من قيمتك , بالعكس ايا كان هى احسن من القعده فى البيت

و خليك مؤمن انه رزقك هيجيلك و اللى ربنا كاتبهولك هيحصل فمتستعجلش ابدا ، انت متعرفش الخير فين ؟!
"عبدي أنت تريد وأنا أريد فإن سلمت لي فيما أريد كفيتك ما تريد وإن لم تسلم لي فيما أريد أتعبتك فيما تريد ولا يكون إلا ما أريد"

[Haytham1212]

اكثر من الاستغفار
مع اليقين بان الله سيفرج همك

والله قادر على كل شئ

[tmz9111]

الصبر حلو وان شاء الله خير

[M.Mosaad]

حاول تقضي الوقت دة في تنميه مهاراتك يعني حاول تنمي اللغه عندك دة شيء ضروري جدااااااا و كمان مهارات الكمبيوتر يعني تاخد كورسات برمجه او شبكات او جرافيك شوف انت ميال لايه في الكمبيوتر اقصد متستناش شغل يجيلك انت اللي هتفتح مجالات شغل لنفسك علشان توسع كمان دايرة اختياراتك في الشغل -- يعني خلي بالك بما انك مقدم في شركات كتير و محدش اتصل يبقي معني كدة ان العرض كتير و الطلب قليل يبقي تنمي مهاراتك علشان تعكس المعادله يبقي الطلب كتير و العرض قليل فتلاقي فرص احسن و بمميزات احسن و دي فرصتك دلوقتي لان لو نزلت اشتغلت الشغل هياخد كل وقتك و مش هتقدر تنمي مهاراتك

و ربنا يوفقك انشاء الله كلنا اتعرضنا لنفس الموقف دة عادي

الله يرحم فيفا 99 و need for speed 2 و Blood اتهريت لعب مكنتش بقوم من علي الكمبيوتر

[zanativich]

ربنا معك
و بالمناسبة إنت تخصصك اه؟

[bmya]

كلنا هذا الرجل بس انا جربت طعم الشغل ورجعت تاني للقعده في البيت غصب عني منه لله اللي كان السبب

[أبو صلاح]

انا عارف والله وحاسس باللي انت فيه
يمكن انا ربنا كرمني واشتغلت اول لما خلصت دراسة على طول
لكن في اول شغل لي عملت مشكلة بعد ما اشتغلت بسنة تقريبا فالمدير المالي للشركة للشركة راح معاقبني وقالي روح بيتكم ولما نحتاجك هنصل بيك وقعدت في البيت اسبوعين
كانوا تقريبا اسود اسبوعين في حياتي

ربنا يكفينا شر البطالة

وعايز اقولك على حاجة لازم تقبل اي شغل مؤقتا في اي حاجة وباي مرتب يكفي مصاريفك اليومية العادية وبرضه معلش احسن ما تمد ايدك للبيت وتقولهم هاتوا
في ميزة تانية عايز اقولك عليه هي انك هتكتسب خبرة التعامل في الشركات بدري قبل ما تشتغل في تخصصك ودي هتحس بيها قوي لما ربنا يكرمك كده وتلاقي تخصصك وتلاقي واحد زميلك جاي ده اول شغل في حياته هتلاقي فرق كبير جدا
ربنا يكرمك

[eng.octooo]

انت لو نزلت حتى تشتغل فى محل (زى سوبرماركت او مكتبة او مطعم او............)

والله الشغل مش عيب مش علشان انا خريج طب يبقى لازم دكتو لا ر فى الاول اشتغل اى حاجة علشان ربنا يكرمك حتى ولو هاتتكسف او المرتب هايكون قليل اعتبر انة الشغل الاولانى دة مجرد تسلية وتعامل مع الناس مش اكتر لحد ماتلاقى الشغل

[maka]

شكرا ليكم و الله و كلامكم مظبوط انا كنت ناوى فعلا اخد كورسات فى حاجات معينة بس قولت بعد ما اشتغل سنة علشان اريح

دماغى شوية من المذاكرة و شوف اذا كانت الحاجات اللى ناويها اخدها هتفعنى فى المجال اللى اشتغلت فيه ولا اخد كورسات تانية ا

احسن و بصراحة مجتش فى دماغى اشتغل فى غير تخصصى ومش فى دماغى حاجة معينة و مش عارف ادور فى مجالات ايه . ياريت تنصحونى

[maka]

ربنا معك
و بالمناسبة إنت تخصصك اه؟

انا تخصص كهرباء قوى