اليوم ذكرى وفاة الزعيم جمال عبد الناصر

[PRO-DRIVE]

هي الناس يا تبقي ملائكه يا تبقي شياطين !!

[badblood]

عمل كتيير علشان مصر
اللى بعده بقى عملوا ايه ؟؟

ايوة كتير زي ايه؟
ماهو اللي بعده واللي بعده خرااااب بردو

[Terrible_DaRsH]

بدل ما نفكر فى اللى جاى بنفكر ده عمل ايه و ده عمل ايه ..

ربنا يرحم جميع موتانا و موتى المسلمين سواء زعماء او روساء او فقراء .

نفسي نفكر هنختار مين و ليه بدل ما نقول الله يرحم كذا و كذا .

[dr-mohamed]

ايوة كتير زي ايه؟
ماهو اللي بعده واللي بعده خرااااب بردو

هقولك حاجات بسيطة جدا وانت قول هو عمل ولا معملش
- السد العالي اللى لولاه كان زماننا موتنا من العطش في مجاعة الثمانينات وكان زمانا لغاية النهاردة عايشين على الشمعة ووابور الجاز ومفيش لا صناعة ولا دياولو
- قوانين الاصلاح الزراعي اللى جت في صالح الشعب المصري الحقيقي مش شوية المرتزقة وقوانين التاميم اللى اعادت للبلد ممتلكاتها
كون ان حصل اساءة استخدام لهذه الممتلكات فليس ذنب ناصر
- المصانع زي مجمع الالومنيوم في نجع حمادي والحديد والصلب في حلوان وبدء تصنيع السيارات والاسلحة في مصر
كون ان تم اهمالها بعد وفاته مش زنب ناصر
- المساعدة في تحرير الدول لاعربية من الاستعمار وشوف محبي ناصر من اليمن والكويت للزائر اتحدي لو زعيم عربي يجد نفس الحب سواء حي او ميت
- مات وعليه ديون 3 الاف جنيه كما ذكر احد الاخوة . حد يقولي غيره ميت ولا عايش له كام وعنده كام
وبرغم كل ده بردو بقول ان له سيئاته كما كانت له حسناته رحمه الله ورحم الجميع الاموات والاحياء

[tmz9111]

الله يرحمه و يرحم كل زعماء مصر الاوفياء و المخلصين

[dr_walid]

زعيم بمعنى الكلمة

[MoToRiZeR]

الله يرحمه بقي

[ecybrarian]

عبد الناصر..ماذا اقول عن عبد الناصر..لن تعرفوا عبد الناصر. لو رحتوا سوريا، أو ليبيا، أو تونس، أوالجزائر ستعرفون حقا من هو عبد الناصر.

عبد الناصر ليس ملاكا وله العديد من الأخطاء ولكن لماذا يكون المصريون دائما بلا رموز. في امريكا يجرم القانون الاستهزاء بجورج واشنطون. وفي تركيا صور اتاتورك في كل المحافل الرسمية. يعني هو واشنطون ولا اتاتورك كانوا ملايكة؟ اكيد لا. وبعدين احنا مش عاجبنا محمد علي ولا سعد زغلول ولا النحاس ولا عبد الناصر..امال مين الزعيم المؤسس لمصر إللي احنا عايشينها دلوقت؟؟

الثورة المصرية كانت إنقلابا ثم اصبحت ثورة...ثورة تغيير في نظام الحكم..ثورة تعليم وصناعة...ثورة تحديث وتطوير...لا ينكر احد ان ازهى عصور مصر الفكرية (تعليم وثقافة) كانت من عام 56 حتى عام 67.
عبد الناصر يستحق صفحة في جريدة الاهرام في يوم وفاته. عبد الناصر يستحق اكليل من الزهور على قبره يضعه اكبر راس في البلد...

[kh_talaat]

على رأي أحد مثقفين مصر في وصفه لعصر عبد الناصر

عظيم في إيجابياته وعظيم في سلبياته

اللي عايز أقوله ان غلطة عبد الناصر الكبرى هي إرساء نظام الحكم الديكتاتوري والشمولي في البلد ووضع كافه السلطات في يد رئيس الدوله فقط والذي مازلنا نعاني منه حتى الآن

يعني تخيلو كدة لو كان عبد الناصر أرسى نظام ديمقراطي يقوم على انتخاب حقيقي لرئيس الجمهورية لمدتين فقط كل منهما 5 سنوات

مش كانت الدنيا دلوقتي اتغيرت كتيييييييييييييير

[totaa]

على رأي أحد مثقفين مصر في وصفه لعصر عبد الناصر

عظيم في إيجابياته وعظيم في سلبياته

اللي عايز أقوله ان غلطة عبد الناصر الكبرى هي إرساء نظام الحكم الديكتاتوري والشمولي في البلد ووضع كافه السلطات في يد رئيس الدوله فقط والذي مازلنا نعاني منه حتى الآن

يعني تخيلو كدة لو كان عبد الناصر أرسى نظام ديمقراطي يقوم على انتخاب حقيقي لرئيس الجمهورية لمدتين فقط كل منهما 5 سنوات

مش كانت الدنيا دلوقتي اتغيرت كتيييييييييييييير

انت متفائل جدا طيب إنت تفتكر إن الحال كان هيبقى أفضل من كدة؟؟؟؟

أشــــــــــــــــــــــــــــــك لأننا ماشيين بمنطق اللى نعرفه أحسن من اللى منعرفوش
واحب التنويه فقط على شىء نحن لم نسجل أخطاء أى إنسان وإنما التاريخ يسجل
كل صغيرة وكبيرة حسنة كانت او سيئة .......وأنا اتفق جدا ان العالم كان يخشى
عبد الناصر ويحترمه مسيري أعرف السبب

[timonet2020]

يا جماعة فعلا عبد الناصر عمل السد العالى و فعلا امم القناة
و يجوز كمان فعلا انه مات مديون .... لان الراجل ما كانش بتاع فلوس .... انما كان بيحب السلطة و الزعامة .. وعاش طول عمره يدور على كده و بالفعل حصل على ما تمنى
و لكن
- اولا مفيش حاجة اسمها ثورة ده كان انقلاب عسكرى سببه الرئيسى انتخابات نادى الظباط .. و لما الملك ما قاومش هما ساقو فيها و كملوا و طردوه و قالو انها ثورة ( ثورة يعنى يقوم بيها الشعب للتمرد على اوضاع خاطئة )
-ثانيا عبد الناصر غدر باول رئيس لمصر و اللى لولاه مكانش الانقلاب ده نجح و حدد اقامته فى بيته
-ثالثا عبد الناصر و اعوانه كانوا مجموعة ظباط برتب صغيرة لا يعلمون شيئا عن السياسة و فجاة بقوا بيحكموا بلد و فجاة نطت رتبهم لفوق لدرجة ان بعضهم بقى مشير !!!!
-رابعا الراجل ما دخلش حرب واحدة و كسبها !؟ و طبعا توجهم بالنكسة
-خامسا استولوا على ممتلكات الملك بعد رحيله
-سادسا الاصلاح الزراعى ده كان من اكبر الخطط الخبيثة .. خد الارض من ملاكها قليلى العدد و وزعها على الفلاحين و ده خلاه فى نظرهم طبعا فرخة بكشك و بيموتوا فيه للنهارده .. انا مش ضد اننا ناخد الارض من مغتصبيها و غير ذى الحق لكن انا ضد اننا ناخد الحلو مع الوحش . لان وسط الناس الملاك دول كان فيه باشاوات اشراف كتير و فلوسهم حلال و طبعا كل الناس عارفة سعد باشا زغلول و مصطفى النحاس و غيرهم
يعنى كان المفروض يكون فيه تحقيق فى مصادر ثروتهم بدل ما ناخد العاطل بالباطل
-سابعا اللى كان بيفتح بقه بس ماكانش حد بيشوفو تانى
- ثامنا فعلا كان فيه مراكز قوى و يشهد عليها رجال عبد الناصر نفسه و ماهياش اختراع السادات
-تاسعا اهل الثقة كانو هم اهل النكسات المتتالية على هذا البلد لانهم بلا خبرة

الراجل يا جماعة له حسناته و له سيئاته لكن رأىى ان سيئاته اكتر بكتير .. بس الشو الاعلامى و الكاريزما بتاعته و مساعدته للعرب الى جانب طبعا سذاجة و طيبة المصريين هما اللى عملوله الهالة و الزعامة اللى كان عايزهم
ده راىى و الخلاف فى الراى لا يفسد للود قضية

[kh_talaat]

انت متفائل جدا طيب إنت تفتكر إن الحال كان هيبقى أفضل من كدة؟؟؟؟

أشــــــــــــــــــــــــــــــك لأننا ماشيين بمنطق اللى نعرفه أحسن من اللى منعرفوش
واحب التنويه فقط على شىء نحن لم نسجل أخطاء أى إنسان وإنما التاريخ يسجل
كل صغيرة وكبيرة حسنة كانت او سيئة .......وأنا اتفق جدا ان العالم كان يخشى
عبد الناصر ويحترمه مسيري أعرف السبب

الأخت الفاضله totaa

نعم انا متفائل جدا بالديمقراطية لأنها أثبتت انها الحل الأمثل لتقدم الشعوب وأمثلة الدول اللي نجحت وتقدمت بالديمقراطية لا حصر لها

والقرآن بيقول (( وأمركم شورى بينكم ))

ودة لأننا كبشر عاملين بالظبط زي لعبة Puzzel يعني كلنا بنكمل بعض لكن لو حد فينا لعب لوحده يبقى اللعبة هتقف ومش هنتقدم خطوة



بالديمقراطية هيبقى كل انسان في البلد واخد حقه بدون واسطة ولا محسوبيه

بالديمقراطية هنقدر نخطط صح بدون خوف ولا ارهاب من قمه الهرم

بالديمقراطية هنقدر نحاصر الفساد والفاسدين ونقضي عليهم في مهدهم قبل ما يبقوا ديناصورات وهما اللي ياكلونا

بالديمقراطية هنقدر نلم ثروات البلد ونوزعها صح على مواطنين البلد بدون نهب ولا سرقه

[zyadahmed]

كلنا تقريبا لما بدأنا القراءة واحنا طلاب فى ثانوى وبدأنا نفهم شوية حبينا عبد الناصر وقدسناه ولما كبرنا اكتر وفهمنا اكتر كرهناه ( باتكلم عن نفسى ومعظم اصدقائى ) ودورنا على زعيم اخر نحبه وننتمى ليه وكان السادات صانع المعجزات !!!!!!!! بطل الحرب والسلام

لكن لما كبرنا اكتر و قرينا اكتر عن حرب اكتوبر وحقيقة اللى جرى فيها وما تلاها من كامب ديفيد (كامب ام ترتر ). وكامب شيزار وكل كامبات السادات احتقرناه

وقلنا هانعمل ايه لابد من وجود زعيم وقدوة لهذا الشعب العظيم ..؟؟؟؟؟؟؟؟ وتوجهنا للجرايد اللى حسستنا اننا فى ازهى عصور الزعامة وصدقنا نفسنا ( مشروع توشكى - ترعة السلام - ترعة الاحلام - ترعة الالام - مدينة الاوهام ........ ) ولما جت ساعة الحسم والتخرج والشقة والجواز وشوفنا حال البلد على ده الحال ........ راجعنا نفسنا وقلنا العيب مش فى الزعماء العيب فينا احنا !!!!!!!!!!

وقلنا مش مهم ظروفنا المادية صعبة نتحمل سافرنا واتغربنا وحنينا لوطنا ورجعنا قالوا فى انتخابات وهاتعوض كل اللى فات صوت امانة استخرخ بطاقىة انتخابية

واخذتنا النشوة والفرحة اخيرا بنعيش فى عصر ديموقراطية وانتخابات مجلس الشعب اهى وطلعنا البطاقة وكلنا امال وقلنا بلا سادات ... بلا جمال ولا ستينات ولا سبعينات احنا جيل التسعينات الواعد وذهبت للصندوق الانتخابى ومعايا معظم اصحابى واحبابى

وفوقت من الحلم على صدمة كبيرة وضربة اليمة من عسكرى امن مركزى بعصاه الغليظة وهو بيقول ( غور ياد من هنا ) اشتكيت للضابط قال يلا يا بابا قفلنا الصندوق وكانت الساعة 10 صباحا لاقيت بتاع حقوق انسان برة واشتكيت له قالى شكلك جديد فى التصويت

معلش طولت عليكم بس دى تجربتى مع الزعامات وبلاش نقلب فى اللى فات ....
وادينا عايشين

[ahmed_esmail]

جمال عبد الناصر
انا بعشقه كان شجاع حاسم مخلص فى عمله لا يتظاهر جد فى توحيد صفوف الامه
فلسطين - سوريا - اليمن - الجزائر
بس برده هو مش ملاك .. وصل لدرجه دكتاتور فى بعض القرارات الصعبه ومنها مثلا تامين القناة وما تبعه من حرب 67
الله يرحمه

[Dr Zezo]

وأنا اتفق جدا ان العالم كان يخشى
عبد الناصر ويحترمه مسيري أعرف السبب

يمكن لأن شعبه حتي لو لم يختره كان يؤيده ويدعمه ...

يمكن فهم امكانات بلده وعمل علي استغلالها و تحويلها الي بلد اخر ينافس و يتقدم ....


يمكن لأنه حول الحلم الي حقيقة كادت ان تكتمل لولا التأمر و اخطائه هو نظامه ....

الاسباب لن تخرج عن هذه لأن عدوك لن يحترمك الا بسبب واحد علي الاقل من هذه الاسباب

و احدها يكفي لأحترم هذا الرجل ...