لماذا اخترت عضوية نايل موتورز

[NaderNabil]

ما يربطني بنايل موتورز:

أول و أهم حاجة: حب خدمة الأخرين و إمدادهم بالمعلومات الصحيحة...
أحدث و أجدد معلومات و أخبار في السوق و الشارع المصري...و قبل حدوث الخبر بيكون عندنا هنا
كشف جميع الالاعيب و الخدع في سوق السيارات المصري سواء كسلع او خدمات
الإطلاع على كل تفصيلة كبيرة و صغيرة على معظم السيارات في سوقنا...و تجارب محترفة من جانب الأعضاء
مشاركة كل الأفكار و الإبتكارات اللي ممكن تنفع في مجال السيارات..و أقربهم موضوع ميزو :)
المنتدى الإجتماعي لو عوزت أسأل على أي حاجة غير العربيات بلاقي إجابه
و من أحلى الحاجات...روح المحبة و التعاون...و شكل الردود...معظم الردود بتكون إضافة حقيقية للموضوع...مش مجرد مشكووووووووووووور...لمجرد إثبات الحضور و زيادة عدد المشاركات

و بغض النظر عن كل اللي فات....إتعرفت على أصدقاء حقيقين من النادر إني ألاقيهم ...كل واحد فيهم بشخيصته المميزة...كبير و صغير...و المفروض هانتقابل تاني خلال الإسبوع ده:)

الحمد لله كنت من أول الناس اللي جات هنا نقلاً من كونتاكت...بس فعلاً انا منتمي لهذا المكان و تربطني به علاقة قوية...أتمنى انها تفضل علطول

[theking2690]

بصى انا جيت المنتدى هنا بالصدفه بسبب موضوع استاذ سبعاوى عن تقييم ال127 و كان الذ تقييم عربيه قريته فى حياتى ايه اللى شدنى بقى للمنتدى مش عارف بس فيه حاجه غريبه سحبتنى ليه خلتنى مش بقدر استغنى عنه حتى فى وسط امتحناتى جايزمعنديش خبره كبيره اقدمها للمنتدى بس انا استفدت منه كتير سواء فى العربيات او فى مجالات تانيه كتيره عارفه كده احساس جميل لما تلاقى واحد بينصحك وبيوجهك للحاجه الصح و هو مش مستنى منك اى حاجه فى زمن احنا افتقدنا فيه الكلام ده بصراحه انا بعتبره بيتى الثانى الملىء باخوانى واخواتى سواء الاكبر منى او الاصغر منى و يارب منتدانا يفضل دايما عامر بالناس ديه

[itsonlyme]

نايل موتوز كان أول منتدى عربي أشارك فيه رغم أني كنت بشارك في كذا منتدى تقني أجنبي وممكن أكون سجلت في منتدى أو اثنين عربي من غير ما شارك.

أول مرة أعرف أن كتير من مجتمع المصريين على النت بيتكلموا عربي.
كنت فاكر كل الناس بتتكلم انجليزي (فكرة طبقية ضيقة الأفق) أو عربي بحروف لاتيني.
فوجئت بالكل هنا بيتكلم عربي. بس معظم الناس بتكتب بالعامية.

ابتديت اتعلم الكتابة بالحروف العربي وكنت كمان بكتب كمان بالعربي الفصيح. بعدين رضخت للأمر الواقع وبقيب بكتب بالعامية. دلوقي ما بكرهش حاجة أد العربي المكتوب بحروف لاتيني.

بالنسبة لتخصص المنتدى، عرفت التقيمات الحقيقية للعربيات الموجودة في السوق المصري.

الواحد عرف عن عدم ثبات الفرنا وموتورها القوي و مشكلة حساسات الميجان وأعطالها الكتير .... الخ.

بحكم أني جديد نسبياً في السواقة (سنتين) ومكنت أعرف كتير عن سوق العربيات في مصر، المنتدى خلى الواحد عنده فكره كويسة عن العربيات الموجودة في السوق وعن حال السوق.

بس بصراحة الواحد متعلمش كتير عن صيانة العربيات (على الأقل المصطلحات الشائعة للأجزاء الميكانيكية والكهربية للسيارات). الواحد لازم يزور القسم التعليمي أكتر.

بالنسبة للأعضاء، في من كل لون.
بالتأكيد الأغلبية ناس محترمة لكن في العصبي والمشاحن والمتعجرف و المراهق الطائش.
يعني نموذج للمجتمع المصري، ولو أن الأغلبية ناس محترمة.
لدرجة الواحد بيتسائل، أمال مين الناس اللي سايقة بهمجية في الشارع اذا كان كل أعضاء نايل موتوز بيشتكوا من عدم مراعاة الآخرين لآداب القيادة؟!

مش عارف ليه حاسس اني رغيت كتير.
تتمسوا بالخير.

[SHNORY]

العصبي والمشاحن والمتعجرف و المراهق الطائش

اه والله يا باشمهندس عندك حق
المفروض الناس تتحكم في عصبيتها شويه علشان تعرف تعيش
وكل واحد يوزن كلامه قبل ما يقوله
بس برضه الواحد اتعرف علي ناس كتير محترمين من المنتدي سواء علي المنتدي او قابلهم شخصيا وفيه ناس الواحد نفسه يقابلهم بس الظروف لسه مرتبتش اللقاء وباذن الله الواحد يتعرف عليهم وحضرتك اولهم واستمتع بصحبتك باذن الله تعالي

[aymansaad]

المعلومات القيمة الموجودة+الشخصيات المحترمة

[itsonlyme]

اه والله يا باشمهندس عندك حق
المفروض الناس تتحكم في عصبيتها شويه علشان تعرف تعيش
وكل واحد يوزن كلامه قبل ما يقوله
بس برضه الواحد اتعرف علي ناس كتير محترمين من المنتدي سواء علي المنتدي او قابلهم شخصيا وفيه ناس الواحد نفسه يقابلهم بس الظروف لسه مرتبتش اللقاء وباذن الله الواحد يتعرف عليهم وحضرتك اولهم واستمتع بصحبتك باذن الله تعالي

أكون أنا أسعد يا أستاذ شنوري.

[aif]

[quote=itsonlyme;3872055134]

لدرجة الواحد بيتسائل، أمال مين الناس اللي سايقة بهمجية في الشارع اذا كان كل أعضاء نايل موتوز بيشتكوا من عدم مراعاة الآخرين لآداب القيادة؟!

مش عارف ليه حاسس اني رغيت كتير.
تتمسوا بالخير[quote]
الناس في مصر بتتحول الى شخص آخر مختلف تماما عنما تجلس خلف الدركسيون ......ما ينفعش تحكم على اي حد في مصر من خلال السواقة .....
شوف الاسد بيبقى شرس قد ايه في الصيد .... ورقيق قد ايه وهو بيلاعب اطفاله
.....
ساعد مساك

[kareemhisham]

انا كنت بدور علي اي حاجة بخصوص الفتيس الجديد بتاع الكورولا وكنا هانبيع العربية بسببه رحت داخل هنا علي المنتدي ولقيت بقي الناس شغالة طحن وكلام في الفتيس لغاية ما نزلت السوفت وير الخاص به وكنت من اوائل الناس اللى نزلوه وعملت موضوع فيه خبر عن نزول السوفت وير الجديد وده كان اول موضوع ليا في المنتدي.
بعد الموضوع ده حسيت ان المنتدي فيه حاجة اصفرة خلتني كل يوم اخش عليه واتعرفت علي ناس محترمين امثال حضرتك.









شوفت بقي الفتيس الmmt فيه اوبشن قد ايه.

الحمد لله انك ربنا هداك للمنتدى و انى عرفت حضرتك قبل ما تبيع العربية

[karaktar]

كنت وقتها بدور على عربية وبعمل بحث فى جوجل مصادفة لقيت هذا المنتدى الرائع بل اكثر من رائع بصراحه ومن غير تفكير سجلت على طول تحس ان شئ غريب بيشدك لهذا المنتدى رغم ان قعدت فتره بسيطه بعد اما جبت العربية مادخلش المنتدى غير مرات بسيطه بعد كده ادمنته تماماً ميعديش يوم غير اما افتحه حبيت اعضاءه اوى حبيت المواضيع جداً حسيت ان كل الاعضاء بيحبو بعض وبيخافو على بعض وبيساعدو بعض محدش بيبخل عن التانى بأى معلومه مهما كانت - طريقة كتابة المواضيع متميزه بصراحه ده اول منتدى اسجل فيه واحس ان لااعضاء مابيعملوش مواضيع عشان كتر المشاركه وخلاص ويبقى عضو فعال او برونزى والقاب فقط لأ بالمرة
بحس ان كل الاعضاء بيكتبو مواضيعهم بحب وناسيين موضوع الالقاب تماماً كمان المنتدى يوجد به مساعدات انسانيه بصراحه المنتدى ده نجح لأنى احس ان اصحابه اهل خير والكلام ده شوفتو فى كريم منير حسيت انو انسان خيير جداً قلت اكيد باقى المسؤولين عن المنتدى نفس الطبيعه
كمان روح المقابلات الشهريه بين الاعضاء خلتنى اتعرف على اشخاص محترمين جداً كل اللى قابلتهم حبيتهم بصراحه ( طبعاً حب فى الله )
جزاكم الله خيراً القائمين على هذا الصرح العملاق واعضاء المنتدى
انا حاسس قريباً ان المنتدى ده هايكون رقم واحد عربياً وقريباً عالمياً وهايكون فى مراكز متقدمه بين اكبر مواقع العالم بإذن الله

[Samah AbdAllah]

انا مضيفتش اختيار جميع ما سبق لسبب
انى اكتشفت ان حبى لنايل موتورز غير مرتبط بجميع ما سبق وانى بدخل المنتدى سواء عندى استفسار اولأ
بدخل لأطول وقت ممكن حتى لو مودى مش رايق ومش مهتمة انى اعرف اخبار السيارات بس يكفى وجودى على صفحات المنتدى ليزول اى ضيق ويحل محله الهدوء والسكون والبهجة
فى نايل موتورز اشعر دائما اننى بين اهلى واصدقائى المهتمين دائما ان يتشاركوا افراحهم واحزانهم من قلبهم مش مجاملة ولا مجرد مشاركات
بتحس بكل كلمة خارجة من القلب بتحس بالامان وانت واثق انك وسط ناس محترمين لو فكر حد منهم يزعل التانى تلاقيهم كلهم تكاتفوا لفض اى خلاف واحلال المودة وروح الحب بين الجميع
طبعا انا لا انكر فضل نايل موتورز واعضاؤه بما يقدمه من معلومات ومساعدات فى عالم السيارات
ولا ننكر الفضل الاهم والاكبر للقائمين عالمنتدى ومن اقاموه فى المقام الاول لانه لولاهم لما وجدنا المكان الذى نتجمع فيه الآن لاولاهم لما تعارفنا وترابطنا كالعائلة الواحدة
ولانهم لم يكتفوا فقط بانشاء المنتدى لكنهم اعطوه من وقتهم وجهدهم ما حافظ على وجوده وظهوره بهذا الشكل المحترم والمتألق دائما
من اجل ذلك أحب نايل موتورز

[totaa]

يمكن أنا انضمامى لنايل موتورز كان بتوجيه من أحد الاصدقاء

خاصة انى كنت مفتقدة لأكثر من شىء فى المنتديات سواء اللى مشرفة بيها او عضوة بيها وهى الحرية والمصداقية

طبعا أنا ميولي كانت عقبة قدامي لما دخلت هنا لانى بحب الشعر اوى وطبعا المنتدى كله بعيد شوية عن كدة لكن

قالولى جربي وشوية شوية هتحبي الجو ده وهتلاقي نفسك فيه ...وفعلا بقيت بحس ان فيه احترام متبادل بين جميع الناس هنا

وبتحسهم أهل واخوات بجد ومفيش حد بيبخل على حد باى معلومة سواء خاصة او عامة

وعشان كدة من يومها قعدت هنا ومش بتحرك وقلت اكتب سواء حد قرأ ليا أو لا المهم اكون متواجدة واحس انى فرد

من البيت الجميل ده وكل اللى فيه اخواتى اللى بحترمهم وبقدرهم
انا يمكن بعيدة عن باقى الاقسام بس هبدأ اتابع من هنا وجاى

عشان استفيد بجد وعشان مشاركااااااااااااااااااااااتى تزيد

بالتوفيق لكل القائمين علي استمرار نايل موتورز وللجميع مني فائق الاحترام وخالص الامانى

[Ghost2]

الموضوع ممتاز وطبعا افكارك الجديدة الجميلة اللي اتعودنا عليها .. بس لما جيت اختار احترت فعلا لان هو فيه كله المميزات .. ومشكورة على المجهود والمشاركات الهادفة

[Karim_Monir]

بحس ان كل الاعضاء بيكتبو مواضيعهم بحب وناسيين موضوع الالقاب تماماً كمان المنتدى يوجد به مساعدات انسانيه بصراحه المنتدى ده نجح لأنى احس ان اصحابه اهل خير والكلام ده شوفتو فى كريم منير حسيت انو انسان خيير جداً قلت اكيد باقى المسؤولين عن المنتدى نفس الطبيعه

ربنا يعزك ولا نزكي على الله احدا
وانا بستخسر ان اي عضو منا يتلهي في الدنيا ومايخدش الثواب الكبير ده بمجهود قليل جدا
-----------
رغم اني واحد من المؤسسين اللي لما كنا في كونتاكت اتفقنا يكون لينا مكان تحكمه قواعد وقوانين مش سايب زي هناك
ورغم اني من شارك بجلسات العمل الاولى وبعد تنصيب المنتدى وجيت اسجل لقيت فيه 31 سجلو قبلي
قولت ما شاء الله ايه البداية الجامدة دي
وسجلت برقم 32 ومارضيتش ارحل اسمي لقدام لاني كنت مبسوط برقمي (وده عمري حاليا على فكرة)
وخلال سنتين ونص بالظبط (اليوم 15 اكتوبر 2009 وبداية المنتدى 15 ابريل 2007 ) اصبح عدد اعضاء المنتدى 50 الف عضو (تقريبا الا 44 عضو)
50 الف عضو 99% منهم من مصر
بيساعدو بعض وقلبهم على بعض
50 الف عضو في منتدى سيارات مش منتدى موبايلات ولا منتدى تنزل برامج مسروقة ولا اغاني
منتدى معلومات فقط مش صور واغاني وافلام
منتدى اشبه بصالون ثقافي من بتوع زمان
عايز تسال عن اي حاجة وكل حاجة تلاقى الف واحد بيرد عليك
ولو واحد بس قال معلومة غلط تلاقي اللي بيصحح
واللي مش بيرد اكيد واحد من اتنين
واحد مش عارف وده بشكرة انه ما ردش غلط ولا يفتي عشان يكتر مشاركاته
وواحد عارف ومش عايز يرد مستخسر فينا المعلومة بشكره انه مش هاديله ثواب العلم اللي احتفظ بيه لنفسه ومعلمناش منه

بغض النظر عن واجبي نحو المكان ده ومسئوليتي ناحيتة بتزيد يوم عن يوم والوقت اليومي اللي بستقطعه من حياتي له
الا اني بيوحشني جدا اشارك كعضو عادي بدون صفتي في المنتدى اللي ناس بقت بتتعمد تاخد كلامي لصفتي وليس شخصي
وكعضو عادي رغم اشتراكي في العديد من المنتديات
الا اني مالقتش الكم الكبير ده من الصداقة والحب في الله في اي مكان اخر
ومالقتش كمية الاصدقاء دول اللي مجرد ما قول يا فلان عايز حاجة ابص الاقيها اتعملت حتى لو انا مش عايز اتعبه
عشان كدة حقيقي بحس ان واجب عليا اني اظل حريص على مصلحة هذا المكان لانه بيعتبر مصلحة اعضائة اللي شاركو في كل حرف من مادتة العلمية الضخمة جدا جدا
وكلها من واقع تجارب عملية وليس فتى او تخيلات
عشان كدة بعتبرة خلاصة خبرة ناس كتير قوي محطوط في برشام ومركز جدا

[egyegy]

كنت مع الجميع في حوارات كونتاكت كارز ثم تحولت إلى هنا

أعتقد ان مؤسسي المنتدى هم ايضا كانوا هناك

[Samah AbdAllah]

منتدى اشبه بصالون ثقافي من بتوع زمان

هو ده التعبير فعلا المناسب يا كريم صالون ثقافى مش مجرد منتدى