حيرة في وظيفة معروضة عليا-ياريت اعرف رأيكوا

[ams]

ما تروحش
الا فى حالة فى حالة واحده انك هتكتسب خبرة و من كلامك مفيش خبره يبقى ما تروحش

متستعجلش
واستغل وقتك فى تعلية قدراتك انت بقالك حوالى 13 سنة بتتعلم ابدء بقى اتعلم اللى انت عاوزه او محتاجه و خطط حياتك و اعرف ان رزقك هيجيلك هيجيلك

الحكاية مش حكاية رضا ، 550 دى قلة أدب

[A.Saad]

اى يوم تشتغل فيه فى الاول افضل
لانك
هتتعلم
هتحط اسم فى الCVبتاعك
لو ال cv فيها gap
يعنى فترات زمنية بين الوظيفة والتانية او انك قعدت كتير بعد التخرج على ما تشتغل بيكون مش حلو
فى الاولانية الناس بتقلق وفى التانية هيفضلوا الاجدد منك لانه بيكون عنده معلومة احدث
وفى الاخر بقولك
you have nothing to loseدى حكمتى الشهيرة

[lancerevolution]

من رأيى إقبل أهى خبرة تنفعك بعد كدا و شوف المرتب و ممكن تتدور على شغل فى مكان تانى يعنى إلعب على اليمتين مستنى شغل كويس و بتاخد خبرة

[ENG\AHMED]

مساء الخير
انا مهندس كهرباء قسم قوي كهربية دفعة 2009 ولسه ماشتغلتش ويوم الاربعاء اللي فات عملت مقابلة في شركة ساراتوجا بتاعت البطاطين في العاشر من رمضان وقبلوني في الوظيفة بس المشكلة ان المرتب محبط اوي 550 جنيه خلال فترة التدريب اللي مدتها 3 شهور وقالولي بعد فترة التدريب المرتب حايزيد ولما حاولت اعرف منهم حاتبقي الزيادة كام قالولي علي حسب انتاج الشركة وادائك في الشغل بس انا اتوقع ان المرتب يوم مايزيد حايوصل حوالي 700 او 750 جنيه
وبالنسبة لمواعيد الشغل من الساعة 8 الي 4 والاجازة يومين في الاسبوع السبت والاحد بس علشان احنا داخلين علي الشتاء وفي ضغط علي المصنع فبيشتغلوا السبت كمان يعني الاحد بس هو اللي حايبقي اجازة
ايه رأيكوا اقبل بالوظيفة دي ولا المرتب قليل مع ان في ناس زمايلي راحوا شركات وكان الكلام في المرتب علي 1000 جنيه
فبصراحة انا حيران وفي البيت عندي بيقولولي ممكن تعتبرها كأنك بتاخد كورسات بس المرة دي عملي وكمان بتاخد فلوس لغاية لما ربنا يكرم يحاجة كويسة بدل قعدة البيت وبالنسبة لي انا مش ساكت وببعت سيفيهات لأي شركة تنزل اعلان في الوسيط او الاهرام
تفتكروا اعمل ايه ؟؟؟؟؟؟

بغض النظر عن المرتب لأنة قليل الادب شوية بس هيبقى احسن من قعدة البيت .. انت ممكن تشتغل وتدور على شغل تانى فى نفس الوقت واهو منها تضيع وقت وبتتعلم
انت متعرفش هتلاقى الشغل اللى انت عايزة امتى ولا فين فالحاجة اللى قدامك اتمسك بيها لغاية لما تلاقى الاحسن , كدة او كدة انت مش خسران وجايز الشغل دة يفتح قدامك مجال لشغل تانى احسن.
نصيحة اهم من المرتب انك اول لما تدخل المكان تعرف هتوصل لأية وهل دة اللى انت عايزة ولا لأ .. يعنى بص لنفسك قدام بعد 10 سنين مثلا هتبقى اية وهتوصل لاية فى المكان دة , هل دة اللى انت عايزة فعلا ولا لأ
الشغل يعنى خبرة + مرتب .. متمسكش حاجة منهم على حساب التانية لأ،ك مش هتشتغل ببلاش فى سبيل الخبرة وفى نفس الوقت متفرحش بالمرتب العالى بدون خبرة لأن ممكن فى اى وقت مش تلاقية لأى سبب وساعتها هتضر تدور على شغل فى مكان تانى وهتبقى من غير خبرة فا نصيحة اعمل اتزان بين الاتنين

[medo_2060]

انا رأى ليك انك تتوكل على الله وتستلم الشغل دا ويا جماعه يالى بتقولوا راتب قليل الادب هو فى شغل اساسا عشان تختار الراتب الاعلى وبعدين الراجل لسه متخرج يعنى له مخدش خبره شغل عشان يطلب مبالغ كبيره (انا هتخرج السنه دى ان شاء الله هندسه برضه ولو اتعرض عليا الوظيفه دى هقبلها مؤقتا وعلى الاقل بتاخد خبره)

[yahiahelaly]

روح لحد ما تلاقي الافضل
وكل يوم بتشتغل بتاخد خبرة
واي مرتب افضل من قعدة البيت في انتظار شغل بمرتب اكبر

اقلت فاوفت
عندك حق الف مرة وغير كدة بتعمل علاقاااااااااااااااااات وهية ديه الاهم والي بتجيب فرص احسن

[M.Osman]

نصيحة قالهالي شخص عزيز عليا:
اشتغل في المكان اللي بيعلمك كويس و يديك خبرة كويسة
و سيبك من المكان اللي بيديك فلوس و مش بيعلمك حاجة

[bemocarlo]

مفيش حد في الدنيا بيرفض او حتي يتردد في اول فرصه عمل بتجيله حتي لو بمرتب تعبان.روح اشتغل هتكتسب (خبره-فلوس-علاقات) والاهم هتشغل وقتك.مش كده ولا ايه؟
bemo,ire

[asd7778]

احسب الموضوع من ناحيه هل القعده فى البيت بضيف شئ ليك؟؟
لة لا يبقى هذا الوضع احسن من الصفر فى البيت
موضوع المرتب ضعيف طبعا حرام بس روح وشوف ايه النظام يمكن هناك اشياء اضافيه اخرى طبعا احسن شئ توصل لحد جوا الشركه وتسأل
حتتعلم ايه هناك ؟
حجم العلاقات والخبرات الى حتكسبها
موضوع عدد سنين الخبره دى والشهادات الى معاك اصبح موضه قديمه قوى وفى الشركات النص لبه
لو بتتكلم على شغل ماتنى ناشونيل فى المستقبل
1- الشخصيه
2-قدرتك على التعلم
3- communication skills
4- Presentation skills
5- experience
6- education
صدقنى ده الترتيب الحقيقى للامر انا اعمل فى مجال المالتى ناشونل ومش حتصدق فى ناس رؤساء مجالس ادارات بتعليم عادى جدا بس عقليات وقدرات رائعه
العب على 1 و2 و3 و4 عشان تخد شغل محترم
5 و6 لنص لبه بس

[Eng.Mina]

متشكر ليكوا كلكوا علي الردود وانا خلاص قررت اني حاقبل في الوظيفة دي مؤقتا احسن من قعدة البيت وفي نفس الوقت انا مش ساكت وماشي في كذا وظيفة تانية وربنا يعمل اللي فيه الخير
شكرا مرة تانية

[aliabutaleb]

الشغل بيجيب شغل
خصوصاً وانت في مقتبل الحياة :)
ربنا يوفقك وييسر لك أمورك يارب

[hesham22822]

توكل على اللة و روح و اللى رزقك بيها يرزقك باحسن منها بس المهم السعى انا مهندس ميكانيكا دفعة 1985 و كان اول مرتب لى 120 جنية ودلوقتى الحمد للة

[A_H_M_A_D]

الشركات الكبيرة اللي بتدي مرتبات محترمة مابيشتغلش فيها غير نوعين
الوسايط و أصحاب الخبرات
يبقى لو انت ماعندكش واسطة لازم تاخد خبرة الاول كويسة في مجال معين عشان تقدر تنقل على شركة محترمة و يقدروك فيها كويس