امسك قلم وتعالي واكتب...فقط لمن يجرؤ

[icehearted girl]

مؤسسة القدس تنعى القائد الكبير الرئيس ياسر عرفات
"كل من عليها فان ويبقى وجه ربك ذو الجلال والإكرام"

ببالغ الحزن وعميق الأسى تنعى مؤسسة القدس إلى الشعب الفلسطيني والعالمين العربي والإسلامي وأحرار العالم القائد الكبيرالرئيس ياسر عرفات رئيس منظمة التحرير الفلسطينية، ورئيس السلطة الفلسطينية، ورئيس حركة فتح الذي وافاه الاجل صباح اليوم الخميس 28- رمضان 1425 الموافق 11-11-2004 بعد عمر مديد قضاه في

خدمة القضية الفلسطينية على جميع الاصعدة المحلية والإقليمية والدولية، وقدم في سبيلها الغالي والثمين.

قال فضيلة العلامة د. يوسف القرضاوي متحدثاً بأسى عن الشيخ محمد متولي الشعراوي: لقد فقدت الأمة الإسلامية بموت الشيخ محمد متولي الشعراوي عَلماً من أعلامها وكوكباً من كواكب الهداية في سمائها، فقدت رجلاً عاش عمره في خدمة العلم وخدمة القرآن وخدمة الإسلام، وموت العلماء لا شك مصيبة على الأمة خصوصاً إذا تكرر فقدهم واحداً بعد الآخر وقد فقدنا في هذه الفترة عدداً من هؤلاء النجوم، فقدنا الشيخ الغزالي والشيخ خالد محمد خالد والشيخ جاد الحق علي جاد الحق، والشيخ عبد الله بن زيد آل محمود، والشيخ عبد الفتاح أبو غدة. وقد جاء في الحديث الصحيح أن النبي صلى الله عليه وسلم قال: "إن الله لا يقبض العلم انتزاعاً ينتزعه من صدور الناس، ولكن يقبض العلم بقبض العلماء حتى إذا لم يبق عالم اتخذ الناس رؤوساً جهالاً فسُئلوا فأفتوا بغير علم فضلوا وأضلوا".

وفاة رجل الأعمال محمد نصير بعد صراع طويل مع المرض في ألمانيا

اعذروني لو بدأت كلامي بكذا نعي من كذا عصر مختلف


بس هوا داللي بفكر فيه

ياتري مين فينا يقدر يكتب نعيه دلوقتي؟؟!!

دا مش استنكار..دا سؤال محتاجاله اجابة

تقر انت وانتي تكتبوا نعيكم دلوقتي حالا؟؟

وهتكتبوا في ايه...هل هتكتبوا انجازاتكم مثلا في الحياة...دالوكان لينا انجازات اصلا

مش متخيلة نعيي هيكون ازاي

طب حد فكر يكتب نعيه قبل كدا ويشيله مع حد عزيز عليه؟؟

وياتري لو كتبته ممكن تغيره من وقت والتاني؟

وهتبقي صيغته ازاي ووقعه اي علي اللي حواليك؟

[Nile_Storm]

انا بفكر في الحوار ده كتيييييييير
بس بشكل تاني

ياتري هكون مستعد للموت باعمال صالحه ولا لأ؟ و للاسف حاسس ان الواحد لساله كتيييييييييير علي مايكون مستعد و الامل في رحمه الله كبير

بفكر هيبقي شكل العزا ازاي و مين هيحضره؟
الناس هتفتكرني ازاي ؟ و هينسوني بسرعه ولا لأ ؟
هكون من الناس الي يسيبوا فراغ كبير ولا لأ ؟
هلحق اكون شخص مؤثر ومهم ولا لأ علشان يتكتبلي نعي اصلا ولا لأ

هنا في المنتدي هيعرفوا ازاي و مين الي هيحط الموضوع :) و ياتري هييجو العزا

في الكليه ايه الوضع هتتعملي يافطه فقدت الكليه رجل من اغلي الرجال و اعز الرجال :) بصفتي مفجر الثوره الحديثه فيها :)

كده يعني ساعات كتيييييييييير جدا بفكر فيه فعلا
شفتو السرحااااااااان بيوصل لفين

[icehearted girl]

ونت هتفضل فلكلية ياستورم لحد مــ....


كفاية بقي ارحمنا واتخرج

اللي انت بتقوله كلنا بنفكر فيه

وكل مقابل حد اتخيل رد فعله ازاي لوعرف اني مت

بس انا بتكلم عن النعي تحديدا

فكرت هيبقي عامل ازاي؟؟ او فكرت تكتبه بنفسك؟؟

جرب كدا

[deee]

بالنسبالى ميهمنيش نعيى يكون شكله ايه ..
او مكتوب فيه ايه ..
المهم ان الواحد يكون ساب أثر نقى وراه ..
يكون خدم البشرية بحاجة معينة فى نطاق معين (أهله - أصحابه - مجتمعه - العالم) ..
بيتهيألى هو ده اسمى حاجة ممكن الواحد يعملها فى حياته ..
الباقى بأه كله بتاع ربنا ..
وربنا يحسن ختامنا جميعاً ..
السلام عليكم .

[icehearted girl]

انافهمة حضرتك والله عندك حق


بس انا بتكلم عن النعي


النعي

النعي

وليس الوفاة في حد ذاتها

ربنا اللي عالم احوالنا هتكون ايع ساعتها

[icehearted girl]

مرة وصل إلى الجريدة خبر موت شخصية هامة في البلاد في اللحظات الأخيرة لصدور العدد فكتب رئيس التحرير خبر نعي مات فلان أسكنه الله فسيح جناته وكتب على جانب الخبر "إن كان له مكان" يقصد الخبر فنزل النعي كالتالي: مات فلان أسكنه الله فسيح جناته "إن كان له مكان !! ي

[icehearted girl]

رجل مصاب بالسرطان في ألمانيا التعامل مع الموت بأكبر قدر ممكن من خفة الظل حيث تفنن في كتابة نعي ينشر في الصحف بعد وفاته بشكل ينتزع الابتسامة من كل من يطالعه.ونشرت صحيفة برلينر مورجن بوست الالمانية في صفحة الوفيات النعي غير المعتاد والذي جاء فيه: أنا يوهان بيندرماخر ، المولود في الثاني من نيسان/أبريل 1940 ، والمتوفى في التاسع عشر من نيسان/ابريل 2009 انتقلت إلى مكان آخر وعنواني الجديد في مقابر ايتشتراسه ببرلين.. سأسعد جدا بزيارتكم لي. وطلب يوهان/69 عاما/ رسم صورة قبعة مع النعي في الصحيفة حيث ان القبعة كانت من السمات المميزة لمظهره وشخصيته في حياته.

[MOSHAKS]

انا مفضلش انى اعمل نعى ولا شئ كفاية ان اللى حوليا يعرفوا بانى توفيت
ومش طالب غير انهم يصلوا عليه بعد صلاة جماعة علشان يبئا فى عدد كبير فى الجامع ويطلعوا يدفنونى وادعوا الله يكون العدد كبير لان ثواب الدفن حاجه عظيمة وكفاية حد يتذكرنى ويئول الله يرحمه ويقرا الفاتحة
ربما تكون السبب فى زيادة ميزان حسناتى

[Ahmed_Gadalah]

أنا كمان مش عايز أعمل نعي ليا ..أنا كل اللي أنا طالبه وبتمناه اني أخرج من الدنيا على خير ويكون مغفور لي ويصلي عليا أكبر عدد من المصلين ويدعوا لي بالرحمه والتثبيت عند السؤال وان يكون القبر روضه من رياض الجنه......اللهم ارزقنا حسن الخاتمه واختم لنا بخاتمة السعاده.
.....النفس تبكـــــي على الدنيــــــا وقد علمت ... ان الســــعادة فيــها ترك مافيها لادار للمـــرء بعد المـــــــوت يســــــكنها ... إلاالتــــي كان قبل الموت بانيها فإن بناهـــا بخير طــــــــاب مســــــــــكنه ... وإن بنــــــــــاها بشر خاب بانيـها أموالنا لذوي المــــــيراث نجمعــــــــــها ... ودورنا لخــــــــراب الدهر نبنـــيها اين المـــــــــلوك التي كانت مســـــلطنةً ... حتى سقاها بكأس الموت ســاقيها....

[ams]

سهله :
أحمد مات

[asbeats]

عارفة...الموضوع ده بيشغلني قوي...

لما اموت يا ترى الناس هتفتكرني بايه بالظبط...

يعني...فيه عالم مشهور...سميرة موسى...مصطفى مشرفة وغيرهم

رجال دين...الألباني رحمه الله

سياسيين...صحفيين...اطباء

ناس سابت اثر مش بس في حياة واحد ولا اتنين ولا عشرة,لأ,دول سابوا اثر في حياة اجيال...ومنهم اللي نفع الدين والدنيا بكل صدق ووضوح

طيب احنا فين من الناس دي...صحيح احنا لسه قدامنا وقت على ما نوصل للسن اللي حققوا فيه انجازاتهم...والله اعلم...لكن على الأقل الناس دي كان عندها مقومات ومقدمات للنبوغ

في اعتقادي... لسه بدري اوي على ما نلاقي حاجة نكتبها في النعي...

[نور القمر]

انا بقه اتكتب لي نعي بالفعل
ايوة مش مصدقة !!!

حد ظريف من حوالي سنة ونص عمل هاك على موقعين يخصوني وبدل الموقعين ظهر نعيي بملأ الشاشة اسود والكتابة بالابيض
طبعا الاتصالات انهالت عليا واضطريت اخرج ومردش على الموبايل خالص لاني زهقت كل اتصال احكيلو الموضوع

بس اكتر موقف اثر فيا عمتي كانت عضوة في واحد من المواقع دي وهي اول من اكتشف واتصلت بيا ومنهارة من العياط
واقولها انا اهو كويسة وبكلمك ومعرفتش اهديها خالص

[pro_samir]

ربنا يصبركم علي فراقي مش عارف هتستحملو الدنيا من بعدي ازاي ، طول عمري طيب وحنين وقلبي ابيض و كريم وناجح و أهم صفاتي التواضع .. يلا بقي نحن السابقون وأنتم الاحقون

[نور القمر]

ربنا يصبركم علي فراقي مش عارف هتستحملو الدنيا من بعدي ازاي ، طول عمري طيب وحنين وقلبي ابيض و كريم وناجح و أهم صفاتي التواضع .. يلا بقي نحن السابقون وأنتم الاحقون

هههههههههههههههههه ربنا يديك الصحة وطول العمر وتفضل متواضع كدة ديما

[icehearted girl]

سهله :
أحمد مات

شايفين البساطة

بتفكرني بمرسي ابن الزناتي اتهزم يامينز