طلب مساعده من الاخوه الاعضاء

[esam_comm]

السلام عليكم
اخوكم عصام بدوي مهندس اتصالات ليا سؤال ضروري بس عايز حد يشرح لي بالتفصيل
انا عندي ابني ساجد عنده سنتين عايز اسأل علي افضل انواع التعليم والمدارس وموضوع الدبلومه الامريكيه والمدارس اللي هي بتدي الشهادات الدوليه وايه انسب سن ادخله فيه المدارس معلش علشان انا تعليم حكومي فامعنديش خبره في نوعيه المدارس دي وياريت المصاريف في الحضانه بتكون كام علي فكره انا ساكن في الشيخ زايد يعني ياريت لو حاجه تكون قريبه او في 6 اكتوبر ولكم جزيل الشكر يا اخواني

[lancerevolution]

أولا انا ماليش فى الحاجات دى بس هحكيلك من واقع انا شايفه
انا من رأى إن كله محصل بعضه هنا فى مصر و مافيش فرق كل زمايلى الى واخدين دبلومة أمريكية عادين يعنى بالعكس كتير منهم فشلوا فى الجامعة منكرش إن فى منهم كتير متفوقين
الحكومة ميزتها مصارفها القليلة و محدش بيروح بالذات فى الثانوى نسبة الغياب بتوصل 100% فى مدرسة المساعى الثانوية العسكرية معظم الناس بتفضلها عشان كدا كدا بتاخد دروس
ممكن المدارس الخاصة فى الإبتدائى دى الى بتفرق شوية عشان بيهتموا شوية
و أسف إنى طولت عليك

[esam_comm]

أولا انا ماليش فى الحاجات دى بس هحكيلك من واقع انا شايفه
انا من رأى إن كله محصل بعضه هنا فى مصر و مافيش فرق كل زمايلى الى واخدين دبلومة أمريكية عادين يعنى بالعكس كتير منهم فشلوا فى الجامعة منكرش إن فى منهم كتير متفوقين
الحكومة ميزتها مصارفها القليلة و محدش بيروح بالذات فى الثانوى نسبة الغياب بتوصل 100% فى مدرسة المساعى الثانوية العسكرية معظم الناس بتفضلها عشان كدا كدا بتاخد دروس
ممكن المدارس الخاصة فى الإبتدائى دى الى بتفرق شوية عشان بيهتموا شوية
و أسف إنى طولت عليك

شكرا ياجميل علي ردك بس والله تعليم الحكومه بقي مرعب الله يرحم ايام الزمن الجميل بس هانعمل ايه بقي

[AhMeD EzZ]

بص مادام في مرحلة الابتدائي ابعد عن الهجص الي اسمة مدارس امريكية و انجليزية و كدة
دخلة مدرسة تجريبي عادية لحد 3 اعدادي و بعدها في الثانوي بس دخلة دبلومة امريكية

[M.Osman]

بصراحة انا مختلف مع الأخ evolution..

الإنجليزي مهم جداً بالذات في الصغر ... و رأي ان طالما يوجد اماكنية ان حضرتك تدخل ابنك مدارس لغات غير الحكومية يبقى احسن طبعاً..

و ربنا يبارك لك فيه

[Evo]

ازاي المدارس الاجنبية هجص في المراحل الاولى؟!
أنا مش قادر أتصور طفل في إبتدائي طول عمره في مدارس تجريبية أو حكومة عاديه وفجأه دخل بريتيش أو امريكان كركولم ؟
هيجلو صدمة عصبية من مستوى الاطفال إلي في سنه ومن طريقة تفكيرهم وهيتعقد نفسياً
التعليم في المدارس الاجنبية مختلف تماماً على كل المستويات .


حاول تدور على المدارس المعتمدة واللي لها فروع في بلدها الاصلية والإدارة هناك سواء في بريطانيا أو في أمريكا دي المدرسين فيها بيكونوا امريكان أو بريطانيين

المدارس المصرية إلي فاتحين قسم إنجليزي أو قسم أمريكي بيجيبو مدرسين عاديين ويدوهم كورسات في الجامعة الامريكية وأكيد الانجليزي بتاعهم بيكون زي ما إنت فاهم
دة غير إن فاقد الشيء لا يعطيه

الحضانة في الامريكان أو البريتش من ٢٠-٢٥ في السنة دة غير المصاريف الجانبية

[esam_comm]

شكرا لجميع الاخوه الاعضاء اللي اهتموا وردوا عليا بس انا احترت اكتر:b4_611: وياريت حد يكون عنده تجربه ويقولي وشكرا

[نور القمر]

ان رأيي مدرسة خاصة محترمة وهاي ليفل فرنساوي وانجليزي افضل مليون مرة من عقد اللغات
ده غير ان اللغات عايزة تفرغ من احد الابوين
انا بشوف صاحبتي عندها ولدين في ثالثة ورابعه لازم تكون معاهم طول الوقت في كل كبيرة وصغيره

[esam_comm]

ان رأيي مدرسة خاصة محترمة وهاي ليفل فرنساوي وانجليزي افضل مليون مرة من عقد اللغات
ده غير ان اللغات عايزة تفرغ من احد الابوين
انا بشوف صاحبتي عندها ولدين في ثالثة ورابعه لازم تكون معاهم طول الوقت في كل كبيرة وصغيره

شكرااااااااا لاهتمام حضرتك

[NFS]

انا كنت مدارس لغات من وانا صغير و دخلت اميركان ديبلوما فى الثانوى, مكنتش نقله كبيره ولا حاجه, المشكله ان النظام الاميركان مبيطبقش فى مصر صح غير فى مدارس محترمه تتعد على الصوابع, و بالتالى اكتشفت انى مدرستش اى حاجه تفيدنى, بس جاتلى الكليه الى انا عايزها, المشكله الى قبلتنى انى دخلت جامعه حكومه وكمان علميه علشان كده تعبت شويه لحد ما مشيت فيها زى الشهادات التانيه.

الخلاصه انا شايف ان مدرسه خاصه محترمه ,وحط تحت محترمه دى ميه خط, كويسه جدا, و لو عايز تهرب من الثناويه العامه والكلام ده, يبقى دخله من و هو صغير igcse الى هو النظام البريطانى, بجد ممتاز, المناهج جامده جدا علميه او ادبيه و الدراسه فيه فعلاً بتخلى الناس متخرجين منه شاطريين جدا, ومفيش حاجه اسمها مش فارقه مدرسه تجريبى من مدرسه خاصه من مدرسه انترناشيونال اكييد فى فرق و مش فى الدراسه بس طبعاً, ياعنى لو فى امكانيه انك تدفعله انا رايى ig او لو مش هاينفع, يبقى مدرسه لغات.