بسم الله الرحمن الرحيم
السلام عليكم ورحمة الله وبركاته
أخواني الأعزاء في منتدي نايل موتورز
بقالي فترة بشتكي من مشاكل الحرارة في الكمبيوتر بتاعي بس كنت مكسل اعمله لحد لما وصل لمرحلة انه بقي بيطفي خلال 10 دقايق من تشغيله ومن اول لما يشتغل المروحة علي اعلي سرعة
فقررت اني اعمله - بس لأني عارف انها مشكلة معظمنا بيشتكي منها - وللأسف محدش فينا بيلتزم بنصائح التكنيكال اللي بتقول كل 6 شهور بحد اقصي يجب تنظيف اللاب توب وتنظيف فتحات التهوية
عشان كدة محبتش اكون اناني واعملها لوحدي - وحبيت اشرك اخواتي في نايل موتورز معايا
والنهاردة جايلكم بطريقة فك وتنظيف اللاب الhp واللي مش هيختلف كتير ان شاء الله عن معظم انواع اللابات التانية
نبدأ بسم الله
أولا الأدوات المطلوبة
1- مفك عادة رفيع جدا
2- مفك صليبة رفيع جدا
3- بلاور - سيشوار - مكنسة كهربائية
4- فرشة اسنان

ثانياً خطوات الشغل
1- نفك البطارية من الكمبيوتر
2- نقلب الكمبيوتر علي ظهره

3- اي مسمار يقابلك فكه
يستحسن لو كل مجموعة مسامير تفكها تخليها لوحدها وتبقي عارف دي بتاعة ايه
لأن هتلاقي حوالي 3 مقاسات من المسامير - صحيح hp مميزة كل مجموعة من المسامير بلون معين - بس عشان ماتركبش مسمار طويل في مكان بيركب فيه مسمار قصير وتسبب مشكلة





4- هنفك الكابل بتاع الهارد ديسك عن طريق الجذب لأعلي

5- هنسحب الCD-Drive من مكانه
يستحسن لو تكون فاتح الCD من قبل ما تبدأ الشغل عشان ماتدخلش في متاهة الفتح وتدور علي دبوس تفتحه بيه من مكان فتح الطوارئ




6- هندفع (هتزق) الكيبورد من جنب كارت الwire-less بأي حاجة
أثناء الدفع هتسحب الكيبورد من فوق من نصها وبعدين هتسحبها من تحت لفوق


7- هتفك كابل الkeyboard من تحت الكيبورد عن طريق فتح الباب اللي قافل علي الكابل
8- هتفك اي مسمار يقابلك تاني
9- هتلاقي كابلات بتاعة الtouch-pad والسماعات والباور
هتفكهم زي ما فكيت كابل الكيبورد
10- هتفك الوش بتاع الكمبيوتر الفوقاني من النص التحتاني



11- هتلاقي الmotherboard قدامك

هتدي الأول نفخة بالبلاور او السيشوار او المكنسة الكهربائية
وبعدها هتبدأ تمسك المروحة وتمشي عليها فرشة السنان وتنفخ
وتنفخ في فتحات التهوية من برة
وترجع تنفخ تاني في المروحة من جوة
اكتر من مرة لحد لما يبطل يطلع تراب
في شوية صور لبعض المكونات ماعرفتش اصورها لأني كنت مستخدم ايدي الأتنين في الفك
فجيبتهالكوا من علي النت لنفس موديل الكمبيوتر بتاعي بحيث يبقي الموضوع متكامل
صورة كابل الكيبورد



صورة كابلات التاتش باد والسماعات والباور



طريقة فك الكيبورد الصحيحة


ملاحظاتي علي عملية الفك والتركيب
طبعاً التركيب اصعب شوية من الفك بس لو انت مرتب افكارك ومخلي كل مجموعة مسامير لوحدها هتلاقي الموضوع بقي اسهل شوية
كمان انت ممكن تستخدم الموضوع دة في التركيب مش بس الفك
عن طريق انك تجيبه من اخره لأوله
فك الكيبورد صعب شوية - بس في الأخر هتتفك معاك لو جمدت قلبك شوية
النتيجة بعد التنظيف
الفرق واضح جداً الحمد لله - المروحة تقريباً مش شغالة ومش سامعله اي صوت - كمان مش حاسس بالحرارة اللي كنت بحسها وانا شغال عليه قبل كدة
اتمني يكون التقرير عجبكم
لا تنسونا من صالح دعائكم
تحياتي للجميع
والله المستعان
،
،




Comment