محروقة

[badblood]

تحيا مصر
ويحيا كل من وصل بلدنا لاقذر صوره
حسبي الله ونعم الوكيل

[fahd_628]

والله الأسكندرية نعمة :)

[emadkamel]

خبر وتعليق

الخبر: نزلت النهاردة من شغلى فى المهندسين فى تمام الخامسة آخر النهار علشان اروح بيتنا فى مدينة نصر ، وصلت ديلوقتى الساعة 8 بدون ان اتوقف فى الطريق لشراء اى شئ او عمل اى شئ

التعليق:

محروقة المهندسين على مدينة نصر على كوبرى اكتوبر على نفق الأزهر على صلاح سالم على المحور على الدايرى على القاهرة على الجيزة على مصر كلها، محروقة مصر على جامعة الدول العربية على اتفاقية الجات على اسرائيل على فلسطين على العراق على امريكا على استراليا، محروق بكالوريوس الهندسة على التعليم على اللى يتعلموه، محروق الشغل على ادارة المشروعات على التحكم الصناعى ، محروقة الشوارع على العربيات على المانيوال على الأوتوماتيك على الكورى على اليابانى على الألمانى ،محروقة البلد على اللى فيها غلى جنيهاتها على دولاراتها على زيتها على سمنتها على العيش والعيشة واللى عايشينها

دانا راكب عربية اوتوماتيك ورجلى الشمال تعبت من السواقة، فاضل ايه بعد كدة

بس خلاص

باشمهندس سبعاوى ..... احترمك واقدرك واعتقد ان ده شعور الجميع ... مقدر شعورك تماما ومتفق معاك على ان الوضع اصبح جنونى فى شوارع مصر .. انا لما بانزل مصر باكره حياتى كلها من السواقه والناس اللى حواليا .... انما اختلف معاك فى بعض الكلمات القاسيه على بلدنا حتى ولو فى لحظه انفعال ... ايا كان دى بلدنا وانا واثق انك ماتقصدش المعنى الحرفى ولا هو ده شعورك الحقيقى .... معلهش .. إن شاء الله هايعملوا للبلد دور تانى يخف من الزحمه شويه ... وفيه كلام ان المشروع "الناجح" اللى جاى للحكومه هو كوبرى لكل مواطن

روق كده وطفى النار اللى ولعتها فى المنطقه كلها :):):)

[tmz9111]

البلد بقت زحمة جدااااااااااااااااااااااااااااااااااااااا

[ابوحميد]

والله العظيم ومن قلبى بقول ربنا معاكم
ولما بتجينى سفرية عندكم بقول
محروقة المهندسين على مدينة نصر على كوبرى اكتوبر على نفق الأزهر على صلاح سالم على المحور على الدايرى على القاهرة على الجيزة على مصر كلها، محروقة مصر على جامعة الدول العربية على اتفاقية الجات على اسرائيل على امريكا على استراليا، محروق بكالوريوس الهندسة على التعليم على اللى يتعلموه، محروق الشغل على ادارة المشروعات على التحكم الصناعى ، محروقة الشوارع على العربيات على المانيوال على الأوتوماتيك على الكورى على اليابانى على الألمانى جنيهاتها على دولاراتها على زيتها على سمنتها على العيش والعيشة واللى عايشينها

[tutankhamoun]

طوكيو و لندن و نيويورك و باريس بهم سيارات أكبر من القاهرة
و لندن و باريس شوارعهم حواري
و مع ذلك المرور هناك أسرع من هنا
عارفين ليه
علشان هنا الناس عايزة الحرق بجاز
عارفين ليه
علشان عايشيين في قمة الفوضى .....
حتى النظام الحيواني مش قادرين نوصله
يعني لما الواحد يقعد في العربية 2 ساعة في مشوار لا يأخذ أكثر من 10 دقائق مش يبقى حرام و تضييع وقت و اهدار بترول بالهبل كما قدرته الأمم المتحدة بأن الخسارة السنوية من المحروقات البترولية في القاهرة وحدها بمليار جنيه سنويا
مليار جنيه محروقات يتم حرقها في الهواء بسبب عدم وجود نظام
و بسبب وجود الفهلوة و النصاحة المصرية
و اجدع سلام يا جدع للفهلوة و النصاحة المصرية

[Mohamed_Hegazy]

انا لما فكرت انزل من برة واعيش فى مصر لم افكر ابدا اعيش فى القاهرة مع اننى كنت بحلم اخد شقة فيها فى بداية حياتى الدنيا واسعة واحنا لابدين فى القاهرة والدولة والحكومة والمصالح والكل لابد فى القاهرة حتى انا عايز افسح اولادى فسحة كويسة لما انزل فى مارس ان شاء الله اكيد مش هلائى غير القاهرة

[memo_hefnawy]

هدى أعصابك يا أبو السباع ما إنت عارف النظام و أنا و إنت مشوارنا واحد :)

بس إنت إمبارح مشيت منين ؟ أنا إمبارح واخد الطريق المعتاد أكتوبر من البطل أحمد لحد الآخر نزولا من منزل الحى السادس هروبا من مصطفى النحاس تخريما على مكرم عبيد و نزلت من الشغل تقريبا 5.30 و وصلت 7.15 :) ربنا يدينا الصحة إن شاء الله هانتكهن قريب و إنت عارف أنا ركبتى اليمين هى إللى بايظة يعنى ماينفعش معاها ولا أوتوماتك ولا قرد أنا عايز جوى إستيك :)

نصيحتى الأبدية ليك لحد دلوقت أحسن طريق هو إللى أنا وصفته ده أنا ركبت كل الطرق بتاخد يا نفس الوقت يا أكثر منه لسه فيه طريق واحد إمبارح قالى عليه كوبرى الكيتكات سواح أميرية مصر الجديدة و بيقولى حلو لكن أعتقد هايكون ذيه ذى غيره

البلد دى حلها طايارة نبالم تولع فى الجيزة :) و نبنى على نضافة و بعد كده نولع فى القاهرة و ننقل على الجيزة لحد ما نبنى القاهرة و ساعتها هايقولوا قالى إللى بنى مصر كان فى الأصل حفناوى هه

توب علينا يا رب قبل ما نموت فى عربياتنا بالشلل الخماسى

[Karim_Monir]

حفناوي معرفش حوار الكيت كات بس دخلتك السواح هاتتزنق زنقتين زي الفل
واحدة عند ميدان السواح في مطلع كوبري مسطرد والشارع ده لحد القصر الجمعوري زي الفل مليان ميكروباصات من عينة العربجية سواء ال 26 بتاعت هاشم باص او ترامكوا وده المكان اللي كنت هاتعمل في ساندوتش من اسبوعين انا والعيا بسبب زبون بربع جنية
بعد ميدان السواح تطلع كوبري قصر الطاهرة تنزل تلاقي الدنيا واقفة وبتمشي تاتا تاتا ليه
عشان تقاطع جسر السويس مع روكسي وبعد كدة اشارة روكسي وبعد كدة الكوربة وقرفها
الحتة دي بس لو خدتها في ساعة تبقي انت والد فرود بجد وهايتحرق دمك كل ما تلاقي تباع واقف على شمالك وفتح الباب مرة واحدة يطلع وينزل زبون او بيتمطع سيادتة ويسلي نفسة بتجريح عربيتك ويقولك بكل بجاحة لا مؤاخذة يا بيه

اللهم اهلك الظالمين بالظالمين

[shady_elkady]

امبارح من الهرم لمصر الجديدة فى اربع سعات

[وائل عطية]

حرام عليك تقلب عليناالمواجع دي..فعلاً الواحد مبقاش عارف إيه الحل في البلد دي ..ياراجل دانا ساكن في العبور المفروض مدينة جديدة وبرده زحمة في الطرق بتاعتها ..وياسلام بقى على موقف الزفت العاشر ..وياسلامين على السندباد والكلية الحربية ومساكن شيراتون ..حاجة تُخنق ..كل يوم في القرف دا ..والله ياسبعاوي أنا شايف إن كلمة محروقة اللي انت قلتها دي قليلة على وصف الوضع اللي احنا فيه لأن ألأصل في كلمة محروقة هو النار فياريت تشوف لنا كلمة يبقى أصلها قنبلة نووية ولا هيدروجينية ونبني بعدها بـ 1000 سنة على نضافة !!..
أقولكم على موقف صغير: في راجل كبير في السن عنده مايقرب من 70 سنة ساكن في الزيتون أعرفه شخصياً ..له ابن قاعد في هولندا ومعاه الجنسية ..الراجل دا بيروح هولندا كل صيف بيقعد حوالي شهرين (مُصرح له تبعاً للقانون الهولندي) ..الراجل دا بيقول لما بيرجع بيمرض هنا في أم الدنيا ..وبيقسم بالله إنه وهو هناك مابيفكرش يرجع تاني ..بيقول الدنيا هناك حلوة والمواصلات آدمية والجو نضيف ..يعني حياة تانية خالص ..بيقول باشعر إني بني أدم مش حيوان ..دا حتى محصلناش الحيوانات!!

[Hossam_Hassan]

المشكلة الأساسية مش فى االشوارع و لا عدد العربيات، المشكلة هى احنا بسلوكياتنا الغير ملتزمة بأى قاعدة من قواعد المرور و صدقونى لو التزمنا بقاعدتين منها بس، المرور هيبقى فيه انسيابية - مش بقول الدنيا هتبقى ربيع - بس الأنسيابية هتوفر و قت ضابع كتير:

1 - الالتزام بالسرعات المحددة (كلنا ما نصدق 5 متر فاضيين و نكبس) طب ماهو طبيعى اننا نتكربس على مطلع كوبرى أو ملف مادمنا كلنا واصلين فى نفس الوقت.

2 - الألتزام بالحارة المرورية - السريع يمين و البطىء فى الوسط و اليمين اتوبيات و ميكروباصات - و نبطل نحدف على بعض لما الحارة تهدى او تقف و نبطل نيجى من اليمين علشان نطلع كوبرى او نلف او نركن من الشمال.

الأهم يا اخوانى اننا مانستناش الكل يبتدى و بعدين التزم، كل واحد يبتدى بنفسه و اللى ما يلتزمش، مايشتكيش

[ihab]

انا معاك طبعا ان الدنيا بقت زحمة و مقرفة و السواقة بقت تقرف و تعصب
بس انا ليا سؤال صغير :
ازاى رجلك الشمال هى اللى تعبتك

[TAG_Turbo0]

أعصابك يا بشمهندس والله مافى حاجه تستاهل تعب أعصابك

[عزوز]

احنا نركب عجل(دراجه)
اهو يبقى وفرنا البترول
ونشطنا نفسنا
ومحرقناش دمنا

ونعمل منتدى جديد اسمه(نايل سيكل)