كلمة ونص 24مايو 2007

[sab3aawy]

احد المناظر اللى بتجيبلى الضغط والسكر-والزيت والصابون- هو منظر ذلك البيه ابو قميص وبنطلون ونضارة وشكله كدة متعلم ومتساءاف ، ومع كدة تلاقيه راكب عربيته هو والمدام ، وإيه بأه مقعد البيه الصغير على حجره قدام الديريكسيون ، والبيه الصغير ابو....... اللى عنده بالكتير خمس سنوات ماسك الديريكسيون وسايق هذا الطن ونص من الحديد الذى يمكنه ببساطة بحركة غير محسوبة قتل شخص او اكثر اولهم ركاب السيارة انفسهم، قال إيه علشان ننوس عين ماما يطلع راجل ويتعلم السواقة من صغره، اينعم ان كل واحد يكون شايف ان ابنه هو سوبر مان صغير يستطيع تحقيق ما عجز عنه كل بنى البشر حتى الآن، لكن ان تصل الإستهانة بحياه الآخرين الى هذة الدرجة........... معلش يعنى دى يبقى اسمها سفالة

[شريف]

وايه رايك فى طفل سنه مقعده على حجره
انا لسه امبارح شايفه
يعنى لو اى فرمله و لو بسيطه العيل هيتفعص

[amrrashed]

صورة من صور الفوضى المنظمة اللى انتشرت فى المجتمع المصرى.....

[M_ElSabaa]

والله مش فارقة الواد الننوس يسوق ولا ابوه يسوق كلهم بيسوقوا فيها دلوقتى
لو كانوا لقوا ان رخصهم بتتسحب ولا بيدفعوا غرامة محترمة مكانوش عملوا كدة. قمة فى الاستفزاز

[Abdallah]

كلامك فكرنى بمشكلة بعانى منها حاليا, وهيا انى لما باجى مسافر مثلا طبعا بتبقا معايا المدام والامورة الصغيرة الى عندها 6 شهور, طبعا 6 شهور دى مينفعش تتحط فى كرسى الاطفال ولا فى كرسى السيارة, ولا ينفع ان مامتها تاخدها وتقعد بالخلف لان كدة انا هتخيل ومش هبقا مركز, يبقا الحل الوحيد ان مامتها تشيلها على رجلها فى الكرسى الامامى, لو حد عنده حل يا ريت يفيدنى

[memo_hefnawy]

أولا الحل يا عبدالله باشا إنها تقعد ورا هى و الأطفال و إيه إللى يخيلك ؟ عادى متخفش مش هايبان إنك سواق ولا حاجة و حتى لو مكسوف ولادك أهم

أما بقى إللى بيقعدوا الأطفال على حجرهم قدام دوول وهمه سايقيين ده راجل يا جماعه معندوش ari Bag فى عربيته و إستبدل ال Air Bag ب Baby Bag يعنى بيفادى نفسه بإبنه تتوقعوا ممكن نعمل مع إللى بالعقليه دى إيه ؟؟؟؟؟؟؟؟

[h_hezzah]

طبعا 6 شهور دى مينفعش تتحط فى كرسى الاطفال

من اول شهر ممكن استخدام كرسى الاطفال بتاع العربية اللى هو النوع اللى بيتشال بيد بلاستيك.
وده بيكون ليه وضعين للتركيب فى العربية.
فى الحالتين بيتربط بواسطة الحزام اللى فى العربية
1- الوضع الاول بيكون الطفل فى عكس اتجاه السير يعنى باصص للخلف وده علشان ظهر الكرسى يكون سانده فى حالة الفرملة. ويفضل انه يوضع فى منتصف الكنبة الخلفية لأن ده أأمن مكان فى حالات الحوادث.
2- الوضع الثانى لما الطفل يكبر على الوضع ده (لأن رجليه بتضايق) الكرسى يوضع فى اتجاه السير والكرسى يثبت بالحزام مع مراعاة انه لازم يثبط بالجزء العلوى مع السفلى للحزام.

ياريت كل واحد مهتم بسلامته وسلامة اولاده يحاول يلنزم بذلك، لأن الاطفال لما بتكبر شوية بيبدأوا يلعبوا فى الحجات الملونة اللى موجودة فى تبلوه العربية مما يؤدى لزيادة التشتيت اثناء السواقة