كلمة ونص 8-مارس 2008

[sab3aawy]

انا والنفق:

نفق الأزهر انجاز حضارى جميل جدا لكن تصرفات كثير من المواطنين معاه مش حضارية خالص

ادخل النفق من الشمال علشان انا باخده بسرعة متوسطة 70 -80، تلاقى واحد متنًح فى الشمال وماشى 40 تزمرله تزغرطله تصوطله مالوش دعوة ولا كانه على كوكب الأرض اصلا، يبدو انه مصدق كذبة ان السرعة فى النفق بتتصور
اقول خلاص هم اللى بيتنًحوا غاويين شمال ادخل النفق من اليمين، ألاقى واحد تانى متنًح يمين ، وده متننح فى حقه مقدرش اكلمه ، ويرسى الأمر فى النهاية انى يا إما اتنًح ورا المتنًح الأصلى او ورا اللى متنًحين وراه، يا إما اخدها غرز معرضا نفسى لمخالفة تغيير الحارة اللى الله اعلم هى حقيقة وللا خيالية،

ايها المتنٍحون فى الأنفاق، تنًحوا فى اليمين كما تحبون واتركوا اليسار للى مستعجل

[Moh.Fahmy]

ده زمن المتنحين سبعاوي باشا
مش في الانفاق بس ده تلاقيهم علي الكباري و اقصي الشمال علي كورنيش اسكندرية لغاية ما يجبرك انت تعديه من يمينه
متيألي التناحة دي ملكة و موهبة يعني مش اي حد يقدر يتنح حتي لو حاولت حيبان عليك انك متنح تايواني مش اصلي ..يعني من الآخر التناحة ليها ناسها
مواجهة التناحة تكون بالامبالاه و الصبر امال عايز تدخل الجنة بسهولة كده يا ابو السباع
يعني لازم تكبر الجي و تروق الدي ( الجي و هي الجمجمة و الدي و هي الدماغ )


محمد فهمي

[hussein]

خالد باشا السرعة القصوى فى النفق 50 كم
ولا انت عايز الناس تمشى مخالفة؟

[sab3aawy]

خالد باشا السرعة القصوى فى النفق 50 كم
ولا انت عايز الناس تمشى مخالفة؟

لا يوجد تصوير للسرعة فى النفق وتجارب تشغيل الرادار فى النفق فشلت بالكامل ، وبعدين اللى عايز يمشى 50 ما يمشى على اليمين براحته،

وهل انت شايف ان سرعة 50 دى منطقية، وللا هى الحكومة عايزة تبقينا اكبر وقت ممكن فى النفق عشان نشم اكبر قدر ممكن من هباب النفق سئ التهوية؟

[tutankhamoun]

مع أتفاقي في الرأي على موضوع التناحة المتأصلة في الناس دلوقتي مش بس السواقة

ولكن ........ أعتقد أن السرعة المناسبة جدا في نفق الازهر لا يجب أن تزيد عن 60 أو 70 نظرا لضيق الحارات و أيضا للإلتواءات الموجودة في الطريق أسفل النفق
و كان هذا رأيي في موضوع السرعة المناسبة داخل النفق

أما الناس اللي معندهاش دم و بتمشي بأقل سرعة ممكنة على يسار الطريق فلا نستطيع أن نقول إلا
حسبــــــــــــي اللــــــــه و نعم الوكيــــــــــل

فيهم و في الشرطة
اللي ما بتعملش حاجة خالص أو هو أنعدام قوانين
الواحد زهق
الشعب المصري لازم حد يحكمه في الشارع شويه علشان شوارعنا بقت غابة خلاص و لازم الشرطة تعمل حاجة علشان تظبط الناس دي و تخليهم يمشوا على العجين ما يتلخبطش

و شكرا أستاذ سبعاوي على إثارة هذه النقطة

[Ghamrawy]

مش في الانفاق بس ده تلاقيهم علي الكباري و اقصي الشمال علي كورنيش اسكندرية لغاية ما يجبرك انت تعديه من يمينه
متيألي التناحة دي ملكة و موهبة يعني مش اي حد يقدر يتنح حتي لو حاولت حيبان عليك انك متنح تايواني مش اصلي ..يعني من الآخر التناحة ليها ناسها
أكيييييييييييييييد و انا بعانى منهم انيل معناه و دايما تلاقى المتنح ده مستخبى فى الكرسى و مانتش عارف اذا كان راجل ولا ست و غالبا بتطلع ست لابسه بونيه على راسها و يا عينى سايقة كأن حد قاعد فى الكنبة اللى ورا و حاطط فى جنبها مدفع ألى و بيقولها سوقى تديها كلاكس او نور مافيش فايدة و للاسف 80 % من اللى بيوصلوا أولادهم المدارس الصبح بتبقى من العينة دى و طبعا تروح شغلك و انت مش طايق نفسك و ضارب بوز عباسى محترم على الصبح فى وش زمايلك
الواحد خلاص قرب يروح لدكتور سكر و ضغط من البلاوى اللى بيشوفها كل يوم

[mo3tazelgamal]

والله التتنيح مش فى الأنفاق والكبارى بس إنما أى طريق فيكى يا مصر ولا يوجد إختلاف راجل كبير وخايف يجيى ناحيه اليميين أو الشمال لأحسن يقع أو شاب صغير ماشى يدلع بعربيه الحاجه أو واحدة ست بتفكر فى دور نظريه النسبيه فى عمل المهلبيه أو سواق تاكسى بيدور على زبون وكله كدة
هى دى مصر محدش بيعرف أو بيعترف أنه غلطان فيها أبدا !!!!!!!!!!!!!
أنا حصل معايا موقف فى أول شهر فبراير إللى فاتت كنت راجع من جنازة عمى (رحمه الله عليه) وأعصابى مش مستحمله الهوا وفيه كوبرى على الطريق السريع يا دوب بيأخد عربيتين جنب بعض وأنا ماشى قدامى أوبترا فيها راجل كبارة ومعاة المدام وخايف ليقع من على السرير قصدى الكوبرى
المهم كلاكس مفيش فايدة كمان كلاكس ولا الهوا أضطريت أعلق أيدى على الكلاكس لغايه ما عدانى والمشكله أنه مش عاجبه وعمال يشتم ويشوح بإيديه .
بصراحه أتغظت منه ورحت كابس على الفرامل مرة واحدة وعلى أتم أستعداد أنى ألبسه فى الكوبرى !!!!
بس بصراحه قلت هى مش ناقصه ذنوب وكفايه الرعب إللى شافه !
صحيح أنا كنت بجرى ومستعجل بس هو لا ماشى يمين وشمال !
المطلوب منى إيه أستناة لغايه يفوق من الغيبوبه؟؟
حاجه تحرق الدم

[emadkamel]

يا بيه تعالالى هنا فى بورسودان وانت تشوف الشلل وحرق الدم اللى على اصوله، الناس هنا كلهم ماسكين الشمال وماشيين على 40 .. والطرق اصلا ضيقه صعب قوى تعدى من اليمين او تعمل غرزه شمال ....

والله العظيم انا مشيت ورا واحد فى طريق سفر وكل اللى جاى يمين تريللات وانا مش عارف اتحرك ..والله يسامحه ماشى على 20!!!!! 20 كلم/ ساعه على طريق سفر لمده 10 دقايق ...لغاية ما جالى سكر وانا فى العربيه وكان هاين على اخبطه !!! الذ حاجه تضرب كلاكس او ترعش نور او تطلع راسك وتصرخله ومافيش فايده خاااالص

[mo3tazelgamal]

الواحد بيفكر أنه يجيب ونش ولا لودر يشيله فى شنطه العربيه ولما يحتاجه يطلعه ويشيل بيه العالم الحمل دول

[modux]

و احلي حاجة الستات !!!

تلاقيها 20 - 30 كم و في نص الشارع و لا هممها حد من الناس !!!

دي بصراحة اكتر حاجة بتحرق دمي

[memo_hefnawy]

خالد أنا بطلت من زمان أحاول أصحى حد من الثبات العميق خالص إللى نايم ينام إلا فى حالة إن الحارتين نايمين و هنا بقلب نور مرتين 3 عمل عبيط بكلكس عمل حمار بقلب تانى و كلكسين صدر عبده التنح بحط إيدى على الكلاكس و بيحرق دمى الله يحرق دمه

لكن عادة بيكون أحد سالكى الحارتين بيفهم و بيوسع أو بيقرص حبة مش يمشى جمب التنح و فى الآخر مفيش حاجة إسمها مخالفة تغيير الحارة أنا بمشى من النفق من زمان و عمرى ما مسكت حارة واحدة

[badblood]

مصر بلاد العجايب كل يوم بنقابل تحف
وعجبي

[loai-omar]

يا باشا ماحدش عارف ان اليمين للبطيء و اليسار للسريع

كله بيستهبل و يعمل عبيطك و انتا وراه

[electroman]

مع أتفاقي في الرأي على موضوع التناحة المتأصلة في الناس دلوقتي مش بس السواقة

ولكن ........ أعتقد أن السرعة المناسبة جدا في نفق الازهر لا يجب أن تزيد عن 60 أو 70 نظرا لضيق الحارات و أيضا للإلتواءات الموجودة في الطريق أسفل النفق
و كان هذا رأيي في موضوع السرعة المناسبة داخل النفق

و شكرا أستاذ سبعاوي على إثارة هذه النقطة

+ 1
الشارع المصرى غالبا يا واحد ماشى بتهور شديد و متصور ان فتك و بيسبق كل العربيات و هو مصدر للحوادث لانه ماشى زجزاج
و بيغير اتجاهه طول الوقت من اليمين للشمال و العكس و كتير من النوعية ديه بيتسبب اما فى حوادث للمشاه او يلبس عربيتين فى بعض
و هو يطلع عادى كأنه ماعملش حاجة !! و نوع تانى ماشى ببطء يفرس و ياخد شمال و يتنح مما يثير اعصاب اللى حواليه و لا يؤثر فيه نور و لا كلاكس و لا اى شئ فى العالم ممكن يخليه يتحرك .. الا نفاق بالذات تحتاج لسواقة عاقلة لان مفيش فيها مجال كبير للمناورة و الحادثه
فيها ممكن تسبب عطلة ساعات طويلة .. فى العالم كله السرعة فى الانفاق محددة .. و اعتقد فعلا 60 فى الساعة مناسب ..

[electroman]

فى نقطة اخرى طبية خاصة بالنسبة للسواقة فى الانفاق و هى ان الهواء قليل رغم انظمة التهوية
المتبعة فى الانشاء و ممكن يحصل فى حالات نادرة مشاكل خاصة للناس اللى عندها مشاكل
تنفسية و ممكن يحصل دوخة وعدم اتزان .. و فى كمان ناس عندها مشاكل او فوبيا فى الاماكن المغلقة
مثل الانفاق و ده ممكن يسبب حوادث تصبح مميته فى حالة القيادة السريعة و المنحنيات و حادثة الاميرة ديانا
مش بعيد ..