الآفوميتر، اداه هامة ورخيصة وينصح بوجودها فى كل سيارة

[sab3aawy]

الآفوميتر اداة بسيطة ورخيصة وسهلة الاستخدام جداوتمثل العين التى نرى بها فى اى عمليات كهربائية الأفوميتر الرقمى بيتباع عند اى كهربائى نضيف ب 17 -20 جنيه، وفى كارفور ب 25 جنيه فى قسم العدد اليدوية، هو كله حاجة كدة قد كف اليد ومحطوط فى علبة صغيرة ومكتوب عليها بالانجليزى digital multimeter ، واستخدامه من أسهل ما يمكن، لقياس المقاومة يتم ادارة المؤشر الوحيد الموجود فى الجهاز الى وضع قياس المقاومة (أللى مكتوب عليه علامات بالأوم ويرمز لها بحرف اوميجا اللاتينى) ثم يتم وضع سلكين الأفو الأحمر والأسود على فردتين الشئ المراد قياس مقاومته هتظهر المقاومة على الشاشة ، وبالمثل قياس الفولت، تحويل المؤشر على الفولت ووضع السلكين على الطرفين والقراءة مع ملاحظة انه لقياس فولت المنزل مثلا يتم تحويل المؤشر الى فولت التيار المتردد AC ولقياس فولت السياراتا والبطاريات والعاب الاطفال والأجهزة الألكترونية يتم استخدام علامة التيار المستمر DC

ودى صور للآفو ميتر الاقتصادى اللى بيتباع عند الكهربائية وفى كارفور واكثر الوانه انتشارا هى الأصفر والأسود كما بالصور


[mshosh2]http://www.supplierlist.com/photo_images/18655/Digital_Multimeter_DT830A.jpg[/mshosh2]


فىالصور نجد فولت التيار المستمر على أعلى يسار المؤشر(لاحظ فى الآفو الأسود مكتوب DCV وفى الأفو الاصفر مكتوب v وبجوارها علامة ترمز للتيار المستمر ، وهذا القياس يستخدم لفولت السيارات والألعاب والبطاريات)
وفولت التيار المتردد على اعلى يمين المؤشر ومكتوب عليه ACV فى الآفو الأسود و V بجوارها علامة التيار المتردد فى الأصفر ،اما قياس المقاومة فموجود اسفل يسارالمؤشر وعليه حرف أوميجا اللاتينى Ω والذى يرمز لوحدة المقاومة (الأوم) ، يبقى ان نعرف ان قياس الفولت يتم والتيار موصول(يعنى والحاجة شغالة) اما قياس المقاومة فيتم والتيار مفصول(يعنى الحاجة مطفية، فيع كمان اسفل يمين المؤشر استخدام آخر جميل جدا هو اختبار التوصيلية، اللى عليه علامة عاملة زى شبكة الموبايل، لما بنحط المؤشر على الوضع ده ونحط السلكين على فردتين الجاجة اللى عايز اختبرها ، لو الطرفين متوصلين ببعض الآفو بيصفر، وده استخدام ممتاز لاختبار الفيوزات ومفاتيح الكهرباء واى حاجة محتاج اعرف واصلة وللا مقطوعة ، وبرضه يتم استخدامه والتيار مفصول
بالنسبة لقياس الأمبير فهى مرحلة متقدمة الى حد ما توحتاج معلومات اكتر والاحتياج لها مش كتير لذلك ههملها فى هذة الرسالة علشان منعقدش الأمور، لكن لو حد مهتم بيها انا على اتم استعداد لشرحها فى رسالة آخرى بناء على طلب اى حد

[gazzar91]

هتقعدنا في البيت نحمر بطاطس..... ربنا يوفقك يابا الحاج
جزاك الله خيراً عنا
في رعاية الله

[sab3aawy]

استخدامات الآفو ميتر فى السيارة:

1- قياس كفائة البطارية: يتم باستخدام قياس الفولت دى سى (تيار مستمر)بين طرفى البطارية اثناء ما يكون النور العالى والع والعربية مبطلة ، مفروض يقرا قيمة اكبر من 11.5 فولت
2- قياس الشحن: يتم باستخدام قياس الفولت دى سى (تيار مستمر) بين طرفى البطارية والعربية دايرة والنور العالى والع والتكييف شغال لو العربية فيها تكييف، مفروض يكون قيمة اكبر من 13.5
3- قياس الفيوزات: يتم باستخدام قياس المقاومة بين طرفى الفيوز وهو مفصول، مفروض تقرا صفر او قيمة قليلة اقل من 1 اوم بالكتير او باستخدام قياس التوصيلية المفروض الجهاز يصفر عند توصيل طرفى الفيوز
4-اختبار وجود كهرباء فى نقطة معينة من الضفيرة:(مثلا فيش اللمبات لمعرفة هل اللمبة اللى محروقة وللا الفيشة بايظة، يتم باختبار الفولت بين موجب الفيشة واى نقطة معدنية غير مغطاه بالطلاء فى جسم السيارة او المحرك او حتى سالب البطارية ويكون ذلك مع وضع مفتاح النور فى وضع التشغيل، مفروض يقرا قيمة اكبر من 11.5 فولت، اما بالنسبة للطرف السالب للفيشة فيتم باستخدام قياس التوصيلية او المقاومة مع جسم السيارة او سالب البطارية ومفروض القيمة تكون صفر او الجهاز يصفر بحسم استخدام المقاومة او التوصيلية فى الآفو، فى حالة عدم معرفة اى فردة هى الموجب يتم وضع الأفو على وضع الفولت واختبار فردتين الفيشة كل على حدة مع جسم السيارة واللى فيهم هتقرا فولت تبقى هى الموجب، والفردة الاخرى سالب

5- اختبار اللمبات: يتم وضع سلكى الأفو بين فردتين اللمبة واختبار المقاومة، مفروض تقرا قيمة ما غير الرقم 1 الذى يظهر على اليسار ويعنى ان الدايرة مفتوحة، يعنى مثلا 200 اوم، 100 اوم، اى قيمة غير ال1 على اليسار

6- اختبار القفلة: يتم من خلال اختبار توصيليه النقط الموجبة المشكوك فيها مع جسم السيارة ، كل نقطة تعطى 1 على اليسار معناها انها سليمة لحين الوصول لنقط تقرا مقاومات قليلة او تصفر يبقى القفلة من السكة دى

دى امثلة لاستخدامات الىفو فى السيارة وتوجد استخدامات اخرى لا يحدها سوى سعة خيال المستخدم

[أبومعاذ]

تسلم أيدك يا هندسة و منور المنتدى

[moh19227]

متشكرين علي الافادة يا بشمهندس

[amr.elsayed]

تسلم ايدك يا هندسة على المعلومات القيمة

[Egyzizo]

شكــراً يا باشمهندس ، وماتغيبش عننا كتير.

[pedro732000]

الله ينور ياهندسة
وجزاك الله خير

[El Prince]

شكرا يا هندسة
معلومات قيمة وهامة

[فادى محمد]

جزاك الله خيرا ياباشمهندس.انا ان شاء الله كنت ناوي انزل اشتريه النهارده فعلا..بيستخدم برده في اختبار كفاءه حساس التي بي اس (مقاومه) والماب والماف سينسور(اشاره)بالفولت

[zegzaag]

موضوع جامد وحاجه ضرورية للي ايدو في العربيه

استاذنا سبعاوي فكرتني بايام معامل الكهربا على الكلية

وشكرا ليك

[mohkhattab]

الف شكر على المعلومات القيمة