تجديد ترخيص الماروتى ل 3 سنوات قادمة

[sab3aawy]

هذة الأيام تكمل الماروتى معى 3 سنوات من عمرها المديد (ثانى سيارة -من اصل 17 سيارة-فى حياتى كلها تصل معى لهذا الرقم، ربنا يديها الصحة وطولة العمر، بحبهاالعفريتة دى) وقد استلزم هذا زيارة ودية لاصدقائنا فى مرور مدينة نصر(عشرة عمر، بتعامل معاهم من 16 سنة واللى كان بيناول الملفات لما كنت برخص أول عربية ديلوقتى رئيس قلم )، المهم دخلت عامل فيها اسد على نيابة المرور(ركبى كانت بتخبط فى بعض، بس جوة البنطلون الحمد لله محدش شايف) وبعد ساعة ونصف من الرعب دعمها الأرقام المهولة اللى عمال اسمعها فى الميكروفون والناس اللى بتعيط بالدموع على الشباك، تم نداء اسمى متبوعا برقم 5 جنيه (خمسة جنيهات فقط لا غير)نظير اداء الخدمة( هيييييييييييييييه براءة، تقريبا رادار المحور والدايرى مكانوش مستنضفين يصورونى او مش مصدقين عينيهم او العربية مش بتبان فى الصورة ) ، انا بصراحة كنت ناوى اجيب شهادة المخالفات بس النهاردة لكن لما لقيت العملية خلصت بدرى بدرى قلت نكمل شوية، فحص وطفاية وتأمين الخ، لقيتها مشيت قلت طب نخش للشباك اتاذ رفيق حبيبى قاعد وبعرف ألاغيه، وبقدرة قادر لاقيت نفسى خارج وفى يدى رخصة سارية حتى أواخر 2014، ربنا يدينا ويديكم طولة العمر

المهم نيجى للأرقام:
45 جنيه نماذج
235 جنيه تأمين اجبارى ضد اصابة الأشخاص لمدة 3 سنوات
440 جنيه ضريبة ل 3 سنوات
5 جنيه نظير استخراج شهادة مخالفات
115 جنيه محبة واكراميات وبدل ما اصلح خدشين او تلاتة فى جوانب السيارة ولزوم تسريع الاجراءات :)
5 جنيه انتظار فى جراج برة المرور بعد الفحص
2 جنيه قلم جاف + ملف
2 جنيه كباية شاى من بوفيه المرور

المجموع:849 جنيه
الزمن المستغرق: ساعة ونص شهادة مخالفات،نص ساعة فحص وتأمين،نص ساعة شباك، ساعة انتظار الرخصة المجموع 3 ساعات ونص
الرخصة صالحة لتسيير السيارة مدة 1096 يوم (2012 كبيسة فيها يوم زيادة :) )
يعنى الحكومة واخدة منى عن كل يوم استعمال للسيارة 77 قرش شاملة الاكراميات ، والله يا بلاش، برضه مصر ام الدنيا :)

[hamaza81]

مبروك يا سبعاوي
وسبحان مين عدى اليوم دا عليك

[egyptiandiver]

مبروك

[إبراهيم المصرى]

مبرووووووك من الاعماق والى الامام وبالتوفيق يارب

[Amr Axel]

الف مبروك يا م\ سبعاوي

[dr.hazem]

انا رخصت في تلات ايام بسبب ان العربية كانت معايا بتوكيل وعلى ما كتبتها باسمي وثم نقلتها تبع مرور مصر الجديده من مدينة نصر وفحصتها والذي منه
بس انا مديتش لولا واحد اي اكراميات ولا حتى نص جنيه
هههههههههههههههههه

ألف مبروك ياسبعاوي وعقبال اما نتطور ونبقى نرخص من اي مكان ونرتاح من هم المرورات ونقل الملكيات والقرف ده

[micromoud]

هندسة انا عندى الكربية فيها شرخ بسيط جدا فى الفانوس الورانى ولمبة بايظة فى السهارى دول مشكلة فى الفحص الفنى والطفاية القديمة السن بتاعها اللى فوق انكسر والبودرة وقعت دى حلها ايه؟

[LORD.ADeL]

الف الف مبروك ياهندسة اعبال اختها الكبيرة بقا ...

[sarah5]

الف مبروك لحضرتك
انا المفروض رخصة عربيتي تخلص اول الشهر الجاي وخايفة من مشوار تجديد الرخصة ده ومسترخماه بصراحة هو انا لازم اجددها اول ما تخلص ولا ممكن استني شوية وايه الاوراق بالظبط اللي اخدها معايا عشان اول مرة اجدد رخصة في حياتي

[Lion_Heart]

الف مبروك يا هندسة و عقبال 70 سنة ترخيص

[sab3aawy]

هندسة انا عندى الكربية فيها شرخ بسيط جدا فى الفانوس الورانى ولمبة بايظة فى السهارى دول مشكلة فى الفحص الفنى والطفاية القديمة السن بتاعها اللى فوق انكسر والبودرة وقعت دى حلها ايه؟

تتوقف على مهندس المرور، لو هو من النوع اللى بيتراضى يبقى ريال فى ايده وخلصنا، بس القانوس كامل وش وضهر ب 50 جنيه واللمبة السهارى ب5 جنيه، غيرهم وخلص نفسك، بالنسبة للطفاية لو المهندس غتت استحالة تعدى، عندنا فى مدينة نصر مهندس الطفاات حقانى اوى ومبياخدش قرش من يوم ما عرفته ، حسب المرور بتاعك، الطفاية آخر مرة اشتريتها كانت ب 110 ، معرفش بكام حاليا

[aymanay32]

الطفاية دلوقتى ب 121 فى مرور فيصل البافاريا و صمم اشترى واحدة جديدة علشان التاريخ بتاع طفايتى قديم مع انها ما استعملتش و شغالة
بالنسبة للانوار محدش هيتكلم لان الفحص بيكون بالنهار و ما بيطلبش منك تولع النور

و فى مرور فيصل المتبع الجديد ان العربية لو دخلت الصبح بدرى بتدخل ترفع البصمة و تخرج و ترجع بالورق للمهندس بدون العربية يملاه و يختمه من غير ما يشوف العربية

[micromoud]

شكرا يا بشمهندس سبعاوى وشكرا يا استاذ ايمن :)

[LORD.ADeL]

الطفاية دلوقتى ب 121 فى مرور فيصل البافاريا و صمم اشترى واحدة جديدة علشان التاريخ بتاع طفايتى قديم مع انها ما استعملتش و شغالة
بالنسبة للانوار محدش هيتكلم لان الفحص بيكون بالنهار و ما بيطلبش منك تولع النور

و فى مرور فيصل المتبع الجديد ان العربية لو دخلت الصبح بدرى بتدخل ترفع البصمة و تخرج و ترجع بالورق للمهندس بدون العربية يملاه و يختمه من غير ما يشوف العربية

ياحلاوة يعنى اللى عايز يفحص يبيت جنب مرور ويقف اول واحد من فجر هناك ياخد بصمه ويطلع يجري بالعربيه هههههههههههههههه ويرجع بالورق من غير ما يفحص حاجه ويوشف العربيه

لول

[micromoud]

رخصت النهاردة بعد عناء 3 أيام مابين الشبابيك وتحريك الملف وسماجة الموظفين بجد ربنا ما يورى لحد العناء اللى انا شفته بس فى حاجه الضريبة اللى دفعتها كانت 331 جنيه عن الثلاث سنوات مع العلم ان الرخصة كانت منتهية من شهرين يعنى أقل ماللى دفعه الاستاذ سبعاوى بالنسبة للفحص مبصش اصلا عالعربية يدوب مضى الورق وكان عندى وش الطفاية مكسور فاشتريت واحدة ب 121 والحمد لله المثلث وشنطة الاسعافات اتلغوا المخالفات طلعوا 320 جند لما بصيت عليهم لقيت واحدة سنة 2010 مقدارها 300 جنيه ال ايه تعطيل مرور !! والتانية انتظار صف تانى 20 جنيه برضه من 2010