الموضوع يبدأ بلعبة!!!!!!!!!!!!!!!!!!!!!!!!!!!!!!!!

[OsKaR]

و ايه الغريب في كده مطول عمرها شركه الالعاب دي فيها حاجات زي كده افتكرتوا تتكلموا دلوقتي
عندك مثلا في لعبه Age Of Empires فيها مهمات المطلوب منك فيها تدمر المسجد الاقصى او الاهرام و تسيطر على الوطن العربي و تموت بن لادن و صلاح الدين الايوبي -معرفش هو عملهم ايه-
و على هذا المقياس قيس لعب كتير

[Abu Aly]

دى مجرد لعبه !!! .. اللى عايز يعمل لعبه بتحصل فى شوارع لندن ولا شيكاغو يعمل !
و الافلام الامريكانى ياما بتعمل على حاجات من ديه بتحصل فى امريكا و حتى غزو من الفضاء
او من دول تانية .. و بعدين يا حسره حيحتلوا مصر على ايه ؟ لا بترول و لا غيره و بلد كلها فوضى ..

[meza]

أولاً الجرافكس بتاعة اللعبة رهيبة ... و ده اللى بيفسر ليه هيا رقم واحد فى أمريكا

و مصممى اللعبة حاولوا يخلوها واقعية فدخلوا فيها حكاية الحرب على الإرهاب و حطوا أماكن من عدة دول معظمها دول عربية و بعض المناطق فى دول أجنبية

لكن المصيبة هنا إنهم حطوا مناطق من مصر ... و ده مش بيدل غير على شىء واحد ... الشعب الأمريكى اللى متوجههة اللعبة دى حاطط فى دماغة إن مصر زيها زى العراق و أفغانستان و سوريا و لبنان ...... ميعرفش حال البلد و لا الناس عايشة إزاى و لا الإصلاحات ... كل اللى بيوصله السلبيات .... يبقى منقدرش نلوم الشعب الأمريكى .. نلوم نفسنا الأول !!! .. إحنا اللى حطينا جدار عازل بيننا و بينهم .. فبالتالى هما مش هيعرفوا عننا غير اللى بيوصلهم من شبكات الأخبار الإسرائيلية .... و ده أكيد شىء مش فى صالحنا.

لكن تخوفك يا أستاذ سبعاوى ... زيادة شوية
أولاً هجوم أمريكى على مصر صعب جداً فى الوقت الحالى ... هتقولى أمريكا مش هتغلب
صحيح بس نبص الأول أمريكا لما تروح بلد مش رايحة عشان تخسر ... لما راحوا العراق رغم الأموال الطائلة اللى صرفوها على الحرب ... لكن أكيد مكاسبهم أكتر بمراحل ... كمية النفط اللى إستولوا عليها رهيبة ده غير سيطرتهم على المنطقة و لو فكروا يهاجموا إيران أو سوريا .. الموضوع بقى سهل ...... لكن مصر ... مفهاش حاجة .. أخرها السياحة و هما مش هييجوا ياخدوا الآثار ... صحيح موقعنا ممتاز لكن ده مش كفاية فى الوقت الحالى لأن أمريكا ملهاش أطماع فى أفريقيا اللى مش لاقية تاكل .. كمان دول جنوب أوروبا مش هتسكت على إن يكون فى قوات أمريكية قريبة منها بالشكل ده .....

كمان حضرتك اللعبة دى بتعكس فكر الشعب الأمريكى المعزول عننا مش الحكومة
و فكر الأمريكان هيتغير مع الوقت .... خصوصاً مع نمو قطاع السياحة و الدعاية لمصر ... كمان علاقاتنا الدبلوماسية بيهم متوازنة يعنى ولا مدلوقين عليهم عشان منخسرش العرب و لا معادينهم عشان منخسرهمش ... و دى سياسة حكيمة جداً و إحنا المستفيدين فى الأخر

إحنا بس نصبر شوية لغاية ما ذكرياتهم عن الفترات اللى فاتت عن مصر تتنسى و يعرفوا أحوال البلد على حقيقتها ..... صحيح إحنا أحوالنا لا تسر عدو و لا حبيب بس ماشيين لقدام الحمد لله مش لورا.

[ibrahimsaad]

اختلف معك اخى ميزا فى موضوع الارهاب ومصر لان مصر اصلا لايوجد بها ارهاب كالذى موجود بالعراق وافغانستان وغيرها مع العلم انه ليس ارهاب بقدر ماهو مقاومه ودفاع عن النفس ضد المحتل

الارهاب هو الذى يحدث فى الجزائر الان من قتل مدنيين وان مصر وخصوصا الجماعات الاسلاميه التى كانت تتبنى العنف الان قامت باستنكار هذا العنف الحادث بالجزائر

يبقى ازاى بقى حضرتك وصفت مصر ان بها ارهاب ؟ الكلام ده غير مقبول

الشئ الثانى من دعى او يقلل من قيمه مصر للاسف يبقى اكبر غلطان وخاسر

صحيح مصر كشعب همجى وغير منظم وغير حضارى وفقير ومش لاقى اللضى انا معاكم فى كده

لكن اصله طيب وكريم واهم ميزه فيه انه خير اجناد الارض كما وصفه رسول الله صلى الله عليه وسلم

ولهذا فان اى بلد تعمل له الف حساب وحساب مع ضعف قدراته التكنولوجيه لكن

لو رجعتم للتاريخ لوجدتم الاتى وان هذا الكلام يصدق قول النبى عنا خير اجناد الارض

لم يقل عنا رسول الله خير قاده الارض ولكن قال خير اجناد الارض وهذا يدل على انه كان يعلم ان القاده لدينا سيكونون فاسدين ولكن الشعب منهم صالح وانه لو اتخذ الخلفاء منهم جنودا سيكونون خير الاجناد ويتم بهم فتح البلاد والدفاع عن اعدائها

وبالفعل لو رجعنا للوراء وفتحنا صفحات التاريخ لوجدنا الاتى

حينما تولى عمرو بن العاصى اميرا على مصر انظروا ماذا فعل بها وكيف اصبحت وهو قائد غير مصرى لكن الجنود مصريين

حينما حكم صلاح الدين الايوبى مصر ماذا فعل بالصليبين وهو قائد سورى لكن الشعب والجنود مصريين

حينما قاد محمد على باشا وهو البانى مصر وجنود مصر ماذا وصل وكيف كانت قوته العسكريه فلم تتحطم الا بفساد حاكمها بعده

حينما نصب قطز نفسه حاكما وقائدا لمصر وقت ان كانت بلا حاكم ماذا فعل بالتتار وهو غير مصرى لكن الجنود مصريين

انظروا فى حرب الخليج الاولى كان الجندى المصرى هو الوحيد بالمقدمه وكان الامريكان وباقى الجنود بالمؤخره لجبنهم

حينما فسدت احوال قاده مصر كما حدث فى نكسه 67 ماذا حدث ؟

الان ماهى حالتنا من ضعف وزل ؟

التاريخ يقول ان مصر لو اخلص قادتها اخلص جندها لانه يكون بمثابه قائد وامام لها فلو كان رب البيت بالشيمه ضارب فان اهل البيت 00000000

فياريت لايقلل احد من قيمه الشعب المصرى رغم تخلفه وهمجيته لانه يفتقد الان الى قائد ولكن انتظروا منه حينما يأتى القائد سترون مالم ترون من قبل

النقطه الاخرى

اليس لدى مصر اكبر ممر ملاحى يتحكم فى اقتصاد العالم كله (قناه السويس)
اليس لدى مصر اكبر ثروه زراعيه
اليس لدى مصر اكبر مورد مائى وهو الان الذى سيحدث عليه صراع وحروب المستقبل
الا تعلمون ان اسرائيل وامريكا يضغطان على مصر باعاده تقسيم مياه النيل وهى الان تلعب بدماغ يوبيا
اليس وجود امريكا الان فى اثيوبيا وتدخله العسكرى الان بجند اثيوبيا فى الصومال اليس ذلك دليل على مااقول

اليس تدخل امريكا الان فى السودان دليل على ذلك

ان امريكا واسرائيل يقودون العرب ويحكمون القبضه عليهم وانتم للاسف لاتعلمون

هم بدأوا بحرب ايران مع العراق لانهاك قواهم ثم بافغانستان وقضوا عليها ثم توجهوا الى العراق وقضوا عليها ثم حطموا لبنان والصومال والسودان فى الطريق ويستعدون الان لسوريا و بعدها مصر

ومن قبل الخليج حيث تم زرع اكبر قاعده وترسانه عسكريه لم يرها التاريخ من قبل

اليس ذلك كله ياعالم حصار امريكى اسرائيلى لكل الدول العربيه

بالله عليكم ماذا تنتظرون منهم ان يكونوا فى بيوتكم لتصدقوا ذلك ؟

فلاتتعجلوا سوف يحدث ان لم نفيق

وعليه العوض ومنه العوض فى العقل والمخ العربى اللى نايم فى العسل نوم

[meza]

أخى الفاضل ... أنا مقولتش مصر فيها إرهاب ... أنا قلت اللى واصل الشعب الأمريكى عن مصر إنها فيها مجموعات إرهابية زيها زى لبنان و سوريا و الجزائر و المغرب

لكن أنا عن نفسى عارف إن حالنا أفضل من دول كتير و الحكومة بتبذل أكبر مجهود عشان تقضى على المجموعات دى لكن فيه مجموعات إرهابية فى مصر ... بدليل هجمات شرم و دهب و طابا و متقوليش ده دفاع عن الوطن لأننا مش فى حالة حرب و اللى ماتوا كانوا ناس أبرياء و برضه متقوليش نبذوا العنف .. لو حضرتك بتتكلم على الإخوان تبقى غلطان بدليل اللى حصل فى الإنتخابات و فى جامعة الأزهر و غيره .. لو بتتكلم على الجهاد برضه غلطان لأن حركة الجهاد دى لو أتيحت الظروف ليها إنها ترجع للعنف هترجع ... لكن حالياً لأنها فقدت شعبيتها فبتعمل زى ما تقول بتجر واطى .. عشان ميتقضيش عليها تماماً.

أما بالنسبة للعراق ... فى أول الحرب كانت مقاومة صحيح لما فقد الجيش العراقى دوره إضطر الناس يدافعوا عن بلدهم.
لكن لو اللى بيحصل دلوقتى ده مش إرهاب يبقى إيه الإرهاب ...... شوف حضرتك كم واحد عراقى بيموت كل يوم ... ملهمش أى ذنب غير إنهم غلابة و مش قادرين يخرجوا بره البلد .. و عدد الجنود الأجانب اللى بيموتوا لا يذكر .. يبقى ملهاش لازمة الهجمات دى ... الهجوم على مستشفى و مدرسة ده يبقى دفاع عن الوطن ... كأنه عايز يثبت إن الحرب على العراق فشلت بدليل إن مفيش أمن و كل يوم ناس بتموت أهه .. لكن للأسف الوسيلة اللى إستخدمها عشان يثبت الكلام ده رخيصة و دنيئة ... لما بشوف منظر الناس بعد الهجمات فى العراق بعرف قد إيه اللى بينفذ الهجوم ده فقد كل شىء يثبت إنه إنسان.

و بالنسبة للتفكير فى الهجوم على مصر أنا مقلتش مستحيل .. أنا قلت مستبعد فى الوقت الحالى .. لكن الواحد ميعرفش إيه اللى ممكن يحصل فى البلد و يكون حجة لأمريكا لدخول مصر فى المستقبل.

[ibrahimsaad]

اخى ميزا
هجمات شرم الشيخ ودهب وطابا هذه ليس لمصر علاقه بها وانما لها علاقه باطراف خارجيه ولم يتم التعرف اليها بعد
لكن مش عارف ليه انت متحامل على الاخوان وجماعات الجهاد

انا لست من هذا او ذاك لكن بخصوص الجهاد هم الان تابوا وقرروا المراجعه راجع مراجعات الجهاد الان وانهم نبذوا العنف وده موضوع معروف الان

اما الاخوان ليس لهم فى العنف اصلا ومش عارف ليه انت وصفتهم بعنف فى الانتخابات لانى انا بقى كنت فى الانتخابات وشفت بعينى بقى اللى حصل من تزوير وضرب واهانه لكل مرشح اخوان وكل من ينتخبه وكمان القضاه انضربوا قدامى

وتم تدمير كاميرا قناه الجزيره امامنا واعتقلوا مصورها امام الناس علانيه وتم ضرب قنابل على الناس وانا كنت معاهم دا ناهيك عن اللى اتقتلوا برصاص الشرطه وبلطجيتها وتيجى تقول لى اخوان

ياراجل حرام عليك تقول كده اما لو ماكنتش انا موجود وشفت بعينى دا ان كنت هااموت

انت اكيد مش عايش فى مصر او انك بقى تبع الحزن الوطنى اللى عمال يسمع الناس فى اسطواناته المشروخه الفاشله

من الاخر مصر مافيهاش ارهاب والحمد لله ولكن الحكومه هى الارهاب بعينه دلوقت

[sokasoon]

حسبى الله ونعمة الوكيـــــــــــــــــــــــــل

[meza]

:D

حزب وطنى إيه بس اللى أنا تبعه ... لأ طبعاً ... أنا مش تبعه بس مش معنى كده إنى ضده فى كل حاجة ...فى حاجات بيعملوها كويسة قوى و فى حاجات بصراحة تحرق الدم و تحسسك إنهم بيقولوا حاجة و يعملوا عكسها

بالنسبة للهجمات .. الفكرة حضرتك إنها حصلت جوه البلد و مصريين بدو هما اللى نفذوها ... يعنى فكرة تجنيد مصريين لهجمات إرهابية ممكنة ... و كل شوية نسمع عن واحد مصرى متورط فى هجمات إرهابية ده غير أيمن الظواهرى ... و ده الكلام اللى بيوصل للأمريكان .. واحد مصرى عمل هجمة إرهابية .. يبقى أكيد هيثبت فى دماغهم إن مصر فيها خلايا إرهابية ..... يعنى مثلاً مسمعوش عن واحد إماراتى راح فجر نفسه.

أما بالنسبة لحركة الإخوان .. أنا مش متحامل عليهم ولا حاجة
بس كل اللى بسمعوا عنهم فى الأخبار (مش النيل للأخبار لأ الجزيرة و العربية) و اللى بشوفوا منهم فى الكلية (طبعاً عندنا مش عنف لكن طريقة التفكير و محاولة نقد كل ما هو متعلق بالحكومة حتى ولو كان كويس ... يقعدوا يحسسوا الواحد إنه عايش فى جهنم و النعيم على إيديهم هما إن شاء الله .. بس هما يوصلوا للحكم) كل ده بيدل إنهم متمسكين قوى بالسلطة ... و اللى بيجرى ورا السلطة مستعد يعمل أى حاجة عشان يوصل و لما يوصل ربنا يستر بقى من اللى هيجرى ... لأن من دلوقتى و مرشدهم بيقول طز فى مصر .... طب بذمتك واحد زى ده لو مسك رئيس جمهورية هيعمل إيه فى البلد !!!


أما بالنسبة للجهاد أنا عارف حضرتك إنهم نبذوا العنف و ياما سمعت ليهم لقاءات و بصراحة أنا فرحت لما لقيت التغيير الجذرى فى طريقة تفكيرهم ....... لكن الخوف من طبيعة تنظيمهم اللى ممكن ترجع العنف تانى لو إتغيرت الظروف الموجودة فى البلد ... مثلاً جه حد مسك السلطة و مش عاجبهم ... ساعتها ممكن يفكروا فى العنف تانى ..... لكن دلوقتى هما كويسيين جداً و لو حافظوا على طبيعة تنظيمهم هيبقى كويس قوى.

بالنسبة لأخر جملة لحضرتك ... أنا ليا تعليق عليها
أولاً ... مصر مفهاش إرهاب.. صحيح... لكن حضرتك ال TNT والمتفجرات اللى لقيوها فى سيناء دى بتاعة مين و هيعملوا بيها إيه ..... التنظيمات الإرهابية محتاجة مناخ معين عشان تتكون و المناخ ده متوفر فى مصر ... صحيح البداية هتكون من بره .. يعنى حد من تنظيم القاعدة مثلاً يجى و يجند ناس مصريين مش هيجيب حد من بره ... لكن حالياً و الحمد لله مفيش خلايا إرهابية موجودة أو على الأقل نشطة .

ثانياً ... الإرهاب هو الحكومة ... ده تعبير أنا رأيى إنه مبالغ فيه ... الإرهاب اللى بتكلم عليه هو إن واحد يروح يقتل ناس أبرياء ملهمش أى ذنب ... يروح يقتلهم و خلاص .. حتى الهدف مش بيكون واضح ..يعنى ولا عايز فلوس ولا عايز سلطة ولا أى حاجة ... هو إتبرمج يروح يفجر نفسه و يقتل أكبر عدد ممكن من الناس !!!

لكن الحكومة رغم إنها السبب فى معاناة الكثيريين .. لكن مش هتوصل إنها تقتلهم ... يبقى اللى بتعمله ده نتيجة للفساد اللى موجود مش نتيجة لفكر إرهابى.

و على فكرة زى ما حضرتك حسيت إنى أنا متحامل على الجهاد و الإخوان أنا برضه حاسس إنك متحامل على الحكومة ;)

[ibrahimsaad]

:D


و على فكرة زى ما حضرتك حسيت إنى أنا متحامل على الجهاد و الإخوان أنا برضه حاسس إنك متحامل على الحكومة ;)

يبدوا انك ماعندكش فكره عن التعذيب اللى فى اقسام الشرطه وقمع الحريات وحركات التغيير ومسك البلد بالحديد والنار وقانون الطوارئ وقانون مكافحه الارهاب والفقر والبطاله وسوء التعليم وتدنى احوال المعيشه ورفع الدعم وارتفاع الاسعار واعتصامات العمال والموظفين لاجل لقمه العيش وتصدير الغاز لاسرائيل باقل من ثمنه وووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووووووووووووووووووووووووووووووووووو

مش بقول لك انك مش عايش فى البلد ولسه التقيل جاى فى الطريق

[meza]

يا باشا أنا مقولتش الحكومة كلها ملايكة

عارف حضرتك كل الكلام اللى قلته ده ... و على فكرة أنا عامل موضوع عن فيلم "هى فوضى" اللى صور الفساد و القمع ده ... و قلت إن سبب الفساد إن إحنا إدينا سلطة لواحد و مفيش رقابة عليه ... يبقى هيستغل سلطته أسوأ إستغلال
و جزء من غياب الرقابة هو قانون اطوارىء اللى إدى للشرطة صلاحيات كتيرة جداً لدرجة توصلها لإنتهاك حقوق الإنسان من غير ما حد يقول لأ ..... و أدينا بنشوف كل يوم بلاوى .. واحد إتقتل و فيديو لواحد إعتدى عليه فى قسم الشرطة و ... و ...... بلاوى
لكن حضرتك اللى بيتمسك منهم بيتحاكم ... رغم إن شايف إن الأحكام مخففة قوى .. لكن عدم إنكار حدوث التعذيب ... ده جزء من الحل
و أكيد حضرتك سمعت عن خطة لإلغاء قانون الطوارىء و إستبداله بقانون الإرهاب .. اللى برضه حاضرتك رافضه ... من قبل حتى ما يتعمل .... كل الكلام اللى وصل لحضرتك عن قانون الإرهاب من طرف واحد و هو اللى بيقولك دول هيدخلوا بيتك و يفتشوه و ياخدوك على القسم من غير ما حد يقدر يقولهم كلمة ... و الكلام ده حضرتك غلط لأن الحكومة مش عبيطة و لا مخبولة إنها تشيل قانون الطوارىء و تحط بداله قانون أوحش منه ... يبقى كده هيا بتلعب بالنار .. و مش الشعب بس اللى هيتقلب عليها ... لأ كل الدول و المنظمات مش هيسكتوا ....
قانون الإرهاب ده عشان لو حصل و فى هجمات إرهابية ناويين ناس يعملوها .... لسه هيستنوا عشان يثبتوا عليهم و بعد كده يقبضوا عليهم بعد فوات الأوان ... لازم تصرف سريع و ده اللى أتاحه قانون الإرهاب ... لكن مثلاً قانون الإرهاب مقلش تعذب المتهم فى التحقيق لغاية ما يعترف زى ما بيحصل تحت قانون الطوارى ( اللى لو تم تطبيقة كله دلوقتى .... هيحصل بلاوى و محدش يقدر يتكلم ... حضرتك اللى مطبق من قانون الطوارى الآن لا يذكر)

كل المشاكل التانية حضرتك هتتحل مع تحسن الإقتصاد ... و ده اللى إحنا شايفينه بيحصل بشهادة منظمات دولية مش الحكومة.

أنا شايف إن حضرتك مركز على السلبيات لمجرد إنتقاد الحكومة ...... حضرتك حلو إنك تنتقد الحكومة لكن مش كل اللى بتعمله الحكومة يبقى وحش ... كده إحنا بنهد فى نفسنا.

[Abu Aly]

مجرد حتى لعبه عاملها واحد بيتسلى ! ثم حتى لو العربيات المدرعة ده بتاعة الامريكان اللى فى الصورة حبت تتقدم ناحية ميدان العباسية و شارع الجيش مش حتقدر علشان الشوارع زحمة و المرور واقف .. انا لو كنت جنرال فى الجيش الامريكى انصحهم يستعملوا التوك توك !! ..

[ibrahimsaad]

اخى ميزا هذا المقال يؤكد كلامى ان مصر لايوجد بها ارهاب وان الارهاب من الخارج

--------------------
باحث إيطالي يؤكد: واشنطن خططت لتنفيذ عمليات إرهابية بدول عربية


كتب حسين البربري (المصريون): : بتاريخ 14 - 12 - 2007


أكد باحث إيطالي أن هناك مخططًا أمريكيًا كبيرًا تجرى حلقاته الأولى بالمنطقة العربية حاليًا ويهدف إلى خلق أجواء مشحونة بالتوتر والغضب بين الشعوب وأنظمتها، من أجل العمل على إحداث فوضى خلاقة من شأنها أن تدفع هذه الدول إلى حافة الهاوية.
وأوضح الباحث اليساندرو إيمانويل في مقال نشرته جريدة "المساجيرو" الإيطالية أمس الأول أن الرئيس الأمريكي جورج بوش يريد تحقيق نصر له قبل رحيله من البيت الأبيض، وذلك من خلال مخطط أشرف عليه يهدف إلى تقسيم بعض الدول العربية وخلق الفوضى في دول المنطقة.
وأضاف أن هناك قيادات سياسية وعسكرية أمريكية اتفقت خلال الشهر الماضي على تنفيذ عمليات "تخريبية" في أكثر من بلد عربي، في إطار تنسيق وتعاون مع دول صديقة منها إسرائيل وفرنسا.
وقد استطاعت الولايات المتحدة - كما يؤكد الباحث- تجنيد معارضين للأنظمة ببعض الدول العربية المستهدفة من الولايات المتحدة، منها مصر التي شهدت في الفترة الأخيرة صدامات بين مسلمين ومسيحيين، في الوقت الذي يطالب فيه أقباط المهجر بتوليهم مناصب قيادية رفيعة داخل السلطة.
إضافة إلى مصر، أشار الباحث إلى أن المخطط الأمريكي يستهدف دول لبنان والسعودية وفلسطين والعراق والسودان، لافتًا إلى أن الفشل الأمريكي في تحقيق أهداف مرسومة من خلال عملية عسكرية خلق داخل العقيدة السياسية الأمريكية رؤية بأن المكيدة أفضل وأسرع لتحقيق الهدف.
وأكد أن هناك خلايا إرهابية مدربة ومزروعة في الدول العربية المعنية، لها ارتباطات مباشرة ببعض السفارات الأوروبية، والسفارات الأمريكية بالمنطقة التي تتلقى تعليماتها من طواقم خاصة.
وأضاف الباحث أن هذه الخلايا صدر لها الأوامر بإثارة أجواء توتر في كل من مصر ولبنان والعراق وقد نجحت إلى حد ما في خلق جو مشحون بالعداء بين أصحاب الأديان السماوية وبين المذاهب المختلفة لأبناء الدين الواحد.
وأوضح أن هذه الخلايا صدرت لها أوامر بتنفيذ عمليات إرهابية وإلصاقها بمجموعات وتنظيمات متطرفة في دول عربية أخرى منها الجزائر والعراق واليمن والسعودية.
وتوقع الباحث الإيطالي أن تشهد الأيام القليلة القادمة عمليات إرهابية في عدد من الدول العربية وفتنا وصدامات في دول أخرى، مؤكدا أن الرئيس بوش لا يريد الخروج من البيت الأبيض قبل تخريب الدول العربية.
وأشار إلى أن حالة الاحتقان السياسي بين مصر وإسرائيل خلال الأيام الماضية جعلت نظرة الولايات المتحدة تتغير تجاه النظام المصري الذي كانت تنظر إليه دائما بعين الرضا، ووضعته ضمن الدول التي لابد أن تعاقب بطريقة مباشرة من خلال زيادة حدة التوتر بين المسلمين والمسيحيين وتشجيع بعض المراكز الحقوقية على انتقاد النظام المصري.

---------------------
المصدر

http://www.almesryoon.com/ShowDetails.asp?NewID=42223&Page=1

[meza]

المقال ده فعلاً بيوضح الصورة و أنا متفق معاه فى كل اللى إتذكر

و على فكرة أنا مع حضرتك إن مصر مفيهاش إرهاب .... بس أنا بقول الصورة واصله للشعب الأمريكى إن عندنا إرهاب لكنه مش نشيط دلوقتى ..... فإحنا لازم نغير الصورة دى عندهم ..

تانى حاجة المناخ عشان تتكون خلايا إرهابية موجود فى مصر من فقر وبطالة و حرب العراق و لبنان و فلسطين و غيره ... كل ده ممكن فى يوم و ليلة يؤدى لتكوين خلايا إرهابية لو أتيحت ليهم الظروف ... ده كان كل قصدى

و شكراً على الحوار :)

[TAG_Turbo0]

فعلا هم ببحبونا نفسيا

[CryptonX]

بالنسبة للموضوع الاصلي يا جماعة

انا لسة مخلص اللعبة دي من كام يوم كدة
ملخصها ان في شخصية عربية عملت ثورة ( اسمه " خالد الآسد " بالمناسبة )
و احتل معظم الدول العربية بجيشه و ضرب صاروخ نووي في كام بلد

وتحالف ما بين الجيش الامريكي و البريطاني بيحاول يوقفه
لحد مااطضح انه مجرد دمية و الاعب الحقيقي هو ثوري روسي يريد ان يسيطر علي العالم و يمحوا امريكا و بريطانيا من الخريطة .

بالنسبة للمهمة الي في مصر , مفيهاش اي نوع من الاسائة او خلافه , لأنهم المفروض جنود سوريين محتلين مصر ( lol ) .

ودي مش اول و لا اخر لعبة تحط مصر في الموضوع , و يا جماعة ده عادي جدا لا لي علاقة بالسياسة و لا نيلة ,, صنع الالعاب دلوقتي بقت تاني اكبر ايرادات و دخل في امريكا و بريطانيا بعد صناعة السينما .