عضو جديد فى منتدى تويوتا

[sab3aawy]

نقطة اخرى يا ابا السباع...... عرفنا اسبابك لتفضيل الكورولا على السيفيك..... لكن ما هى اسبابك لتفضيل الكورولا على الاوكتافيا؟

اللى انا اكتشفته فعلا فى هذة الفئة ان الفروق التى تحسم الاختيار هى فروق ضئيلة جدا لان هذة السيارات ليست لها مشاكل جمة
لذلك انا ممكن تكون النقاط اللى انا شفتها نقاط تميز للكورولا ممكن تكون نقاط رفض لدى البعض الآخر من الناس

1- موتور الكورولا اكثر تطورا 2 كامة-16 صباب- vvtويعطيها تسارع متميز فى السرعات المنخفضة والمرتفعة، فى حين ان محرك الأوكتافيا التقليدى لا تظهر امكانياته سوى فى السرعات العالية فقط وانا معظم حركتى فى طرق لا تسمح بالوصول لهذة السرعات
2- كورولا الجديدة مطورة منذ 2008 بشكل كلى عن الموديل السابق، فى حين ان الفانتازيا ماهى الا تعديل محدود على الa5 التى كانت بدورها تعديل غير مبالغ فيه على a4
3- تويوتا من اكثر السيارات التى يفهم فيها ميكانيكية مصر كلهم بعد ظهور الموديل بسنوات بسيطة، وهذا يعطيها خط آخر من الدعم الفنى بجانب التوكيل ويعطيها قبولا متميزا فى سوق المستعمل
4- التكونولجيا اليابانية عموما تكنولوجيا غير معقدة ، تعتمد على فكرة السهل الممتنع او بصيغة اخرى: انا هديلك اللى انت عايزه بدون زيدة لكن فى نفس الوقت بدون تعقيد وبدون تكلفة تشغيل خارج طاقتك
5- الكورولا أهدأ صوتا من الأوكتافيا
6- مميزات الأوكتافيا عن الكورولا لم تؤثر فى تأثير مميزات الكورولا، يعنى مسألة عزل صوت الشارع الرائع والاحساس بالمتانة الاوروبية لم تكن مسائل جذب عالية بالنسبة لى

دى اسباب عامة: لكن هناك بعض الأسباب التى قد تكون خاصة بالنسبة لى

1-شكل الكورولا كتنسيق عام -او بصورة اخرى منظر الاطار العام للسيارة من على بعد 20 متر، بعجبنى اكتر من شكل الاوكاتفيا اللى بحس انها وش موديل 2010 متركب على جسم موديل 2004 متركب عبى شاسيه موديل 2000، لكن طبعا الشكل ده مسالة اذواق
2- الأوكتافيا مش بتليق غير فى الاسود وانا مش بحب الاسود
3- مركز صيانة تويوتا جنب البيت
4- اسم تويوتا ايجبت وتاريخها يطمئننى اكثر من اسم توكيل سكودا الذى يعيش على موديل واحد هو الاوكتافيا
6- بحب شكل علامة تويوتا على الديريكسون قدامى اكثر من شكل علامة سكودا
7- اسم تويوتا فى عينى اكبر من اسم سكودا، حتى ولو اعتبرنا ان سكودا تمتلكها فولكس فاجن يبقى برضه اسم سكودا ميتقارنش باسم تويوتا لكن يتقارن مع اى اسم من الأسماء الأقل شعبية عالميا التى تمتلكها تويوتا مثل دايهاتسو او سوبارو
8- احساس عام بان السكودا يوم ما يجرالها حاجة انا هحتاس، لكن الكورولا ومن تجارب الأزمة السابقة الناس كلها بتصلحها بملالليم تحت السلم بعد ما تقدم شوية وتحتاج لاصلاح

هى كلها اسباب وبسيطة ورؤية قد تكون شخصية اكثر منها موضوعية لكن كان لها عامل كبير فى حسم اختياراتى

[adfarouk]

الف مبروك وربنا يديك خيرها ويكفيك شرها ان شاء الله

[sab3aawy]

بصراحه انا لسه عند رأيي في ان اسعار الياباني في مصر مبالغ فيها جدا
مش معنى ان المنافسين اسعارهم زادت ان الكورولا بقت بسعرها الحقيقي
طيب بغض النظر عن فكره الفتيس الاتوماتيك بص على فيات لينيا وشوف الكماليات والسعر دلوقتي هتلاقي كماليات أعلى بكتيير وبفرق سعر 35 الف جنيه (لينيا تربو جميع الكماليات) ... بص على الميجان اللي ب 145 وقارن الكماليات ... بص على الجيتا اول فئة ب 150 تقريبا وقارن .........
انا مش بشكك في اختيارك للكورولا :b4_388:..... بالعكس انا عندي رأي انها من اقوى واريح اللعربيات في فئتها ........ بس لو على سعرها ... لسه برضه مبالغ فيه

هو مش اليابانى بس اللى سعره غلى، كل العربيات سعرها غلى، انا هنا مش عايز ادخل فى حسبه كورى ويابانى التى قد تسبب مذبحة كما جرت العادة، لكن انا ببساطة شايف ان لما تكون السيراتو ب 126 ألف والكروز بنفس السعر تقريبا وانتظار شهرين او 3 على ما تستلم يبقى ال 145 ألف مش خسارة فى الكورولا تسليم فورى، شفت سهلة ازاى؟ اما العربيات اللى انت اقترحتها مثل اللينيا او والميجان ففيه عامل هام جدا انت مخرجه من الاعتبار هو ان ما لدينا من هذة السيارات هى تصميمات الاوروبيين بيعملوهالنا مخصوص (أحنا اللى هو مش بس المصريين يعنى لكن كل الدول اللى زى ظروفنا زى مصر وتركيا والبرازيل والهند)، يعنى اللينيا دى لن تجد منها واحدة فى ايطاليا كلها لأنها ببساطة عبارة عن جراند بونتو بشنطة ، وهو نموذج غير مقبول فى اوروبا، ومثلها الميجان ام شنطة وامثلة كتيرة كلها سيارات تصنع بمواصفات خاصة للتسويق فى دول بعينها ، لكن الكورولا بتتعمل فى كل مكان بنفس الاطار العام للمواصفات مع فروق كماليات فقط، وبالتالى هى تتقارن بالأوروبى ذو المواصفات العالمية مثل ال 307 والأوكتافيا والبرافو، لو بصيت على العربيات دى هتلاقى انهم بنفس رينج الأسعار او اعلى كمان

[bemocarlo]

الف مبروك عليك الكرولا يا باشا ومبروك علي منتدي التويوتا بيك.انته شخصيه محترمه وتستاهل كل خير.
bemo,ire

[ASD peugeot]

الف مبروك يا فندم
ربنا يديك خيرها و يكفيك شرها.

[mido777]

الف مبروك يا باشمهندس
ةربنا يديك خيرها ويكفيك شرها

ومتشوق لقراءة تقيمك عن العربية

[Michael_Lanos]

مبرووك يا مان

[Imhotep]

هى كلها اسباب وبسيطة ورؤية قد تكون شخصية اكثر منها موضوعية لكن كان لها عامل كبير فى حسم اختياراتى

دائما ما يحسم الاختيار هو تلك "الاشياء الصغيرة" او التفضيلات الشخصية التى تختلف من شخص الى اخر..... و صعوبتها انها هى هى نفس الاشياء التى تسبب الحيرة و التقلب بين الاختيارات المختلفة...... لكن حينما يتم حسمها، يكون الاختيار قد تم حسمه بنسبة 70% على الاقل.....

انا عند اختيارى للتيريوس حسم الاختيار احتياجى لسيارة ذات بناء قوى نظرا لان طريقى اليومى يحتاج الى عفشة سيارة نقل.... وكل يوم و انا باكل فواصل الدائرى البايظة اللى على شكل رقم 8 بالعربى على سرعة 90 و العربية بتتهبد حتة هبدة ممكن تقطم عفشة عربية سيدان..... ساعتها اتأكد ان اختيارى كان فى محله.....

[aif]

مبروك لتويوتا .....:b4_388:
مبروك عليكم سبعاوي

[Nile Heart]

اهم سؤال ياخالد

ليه غيرت الصنى؟ انت كنت مقتنع بها جدآ

[Ahlawy1]

بارك الله لك فيها وننتظر التقييم الجميل

[sab3aawy]

اهم سؤال ياخالد

ليه غيرت الصنى؟ انت كنت مقتنع بها جدآ

ولازلت مقتنع بها، ولولا انى كنت محتاج ثمنها كجزء من ثمن الكورولا لكنت ابقيتها وبعت الماروتى، لكن الموضوع كله كان خطوة للأمام للاستفادةة من عرض مغرى اتاحته لنا الشركة التى اعمل بها

[OilMan]

الف مبروك وانا كمان عاوز انضم ليكم
المصوغات كالتالى تويوتا كورولا 2009 هاى لاين مانيوال g65
ارجو قبولى عضو تيوتاوى جديد

[إبراهيم.صادق]

ألف مبروك باشمهندس سبعاوي
ربنا يباركلك فيها ويرزقك خيرها ويكفيك شرها

[محمد محمد]

الف مبروك وانا كمان عاوز انضم ليكم
المصوغات كالتالى تويوتا كورولا 2009 هاى لاين مانيوال g65
ارجو قبولى عضو تيوتاوى جديد

مبارك عليك السيارة واهلا بحضرتك وبأستاذ سبعاوي في منتدي تويوتا.