أنا بقيت مدمن سجاير , محدش يقولى الأقلاع عنها عزيمه

[tom_gr]

صديقى العزيز

هاكلمك كلام واقعى

اولا اسباب استهلاكك للعدد ده من السيجارة يوميا :-
1- طبيعة شغلك --- غالبا انت بتشتغل وظيفة حرة وانت حر نفسك او فى مكان انت بتكون حر فيه
2- طبيعة شخصيتك --- انت طيب وهادى جدا ولما بتتنرفز بتكتم جواك الاول لدرجات كبيرة انما لما بتنفجر بتكون عصبى جدا وده نادرا
3- ايقاع حياتك --- دائما ماتكون فى مشاكل يويمة ومستمرة ممكن تكون مشاكل بسيطة انما انت بتاخدها على انها مشاكل والسلام

العلاج :
1- لاتقلع عن التدخين مرة واحده لانك ببساطة لن تستطيع وسوف تصاب بالياس والاحباط من تكرار محاولات الاقلاع والفشل فيها
2- خذ اجازة لمدة 3 ايام متواصلة لاتخرج من المنزل مطلقاااااااااااااااااااااااا لاى سبب ( اكنك واخد دور برد ياسيدى )
- واشترى علبتين سجاير وخليهم معاك فى الاجازة ( ال 3 ايام )
3- اشترى منوم خفيف التاثير ونام اغلب وقت جلوسك فى البيت
4- تناول كميات طعام كبيرة ( طول مانت صاحى افضل تاكل )
5- اشترى مبسم سجاير ( النوع الكبير الى بيركب فيه فلتر ) ودخن السجاير بيه وانت فى الاجازة
6- اقفل تليفوناتك كلها ولا ترد على اى احد مهما كان
7- لا تتناول اى ادويه خاصة بالتاثير على معدل التدخين
8- بعد ما تخلص الاجازة دى اعمل لنفسك تقييم وشوف معدل تدخين قل ولا زى ماهو ( لو قل يبقى انت نجحت ) والتجربة القادمة قلل معدل التدخين كمان وهكذا


مجربة شخصيا بفاعليه مؤكده

وقلنا ايه الاخبار

[eldell]

بص انت دايما حاول تقرا عن أضرار السجاير و حرمتها .. خلى دايما معاك فى العربية شريط عن حرمة التدخين و اطبع ورق عن أضرار السجاير و اقراه من فترة لاخرى .. أنا بعمل كده دايما لما بكون حاسس انى مقصر فى حاجه معينه.

بس فى نوع من الناس تقول لك لأ أنا مش عاوز أسمع حاجه تأنب لى ضميرى .. أوعى تكون من النوع ده.

مهى المشكله ياكريم باشا ان اكترنا عارف ان التدخين حرام وعارفين مشاكله وحتى كل شويه يغيرولنا الصوره الى على علب السجاير بس برضه بنشتريها انا الحمد لله دلوقتى بقيت اشرب من 10 الى 15 سجاره بس لازم فعلا يكون عندك اراده

[mesaharaty]

أنا شربت شيشة على كبر وركزت فيها جامد لغاية ما جابت لى المرض فى قلبى

عاوز أقول لحضرتك إن السجاير حتتعبك حتتعبك بس مشكلتنا إن التعب بييجى فجأة ومش بيدى أى مقدمات
يعنى تبقى آخر حلاوة وبتشرب والحياة حلوة وفجأة التعب ييجى وفى الحالة دى بيكون تمكن المرض من الجسم

الله يخليك بطلها بمزاجك بدل ما تبطلها مغصوب
بطلها النهاردة لأنك كده كده حتبطلها

أنا مبطل الشيشة من 7 شهور وخلاص الموضوع خلص وانتهى
كنت مضيع صحتى وفلوسى ووقتى بدل ما باقعد على القهوة باقعد مع ولادى أحسن
نتائجها السلبية عندى كانت كتير جدا منها تلف الأسنان وآلام الأعصاب ومرض القلب

الحمد لله دلوقتى بطلت تماما ولا نية مطلقا للرجوع ومن غير إرادة ولا حاجة ده بس خوف على الصحة وده اعتقد وازع مهم جدا لحضرتك

حاول بس

[shadygalal669]

طيب
بص انا والدي بيشرب بقاله فوق ال40 سنه سجاير و كان بيشرب 3 علب في اليوم لحد من حوالي شهر كدا او 20 يوم تقريبا

صوته راااااااااح بقي عنده بحه و عنده مشكله في التنفس
وبعدين روحنا نكشف الدكتور قال في ورم في الحنجره و لازم ناخد عينه
وللاسف طلع ورم خبيث "سرطان الحنجره"
علاجه ايه بقي ؟
لو ربنا بيحبك و اكتشفت الموضوع بدري في المراحل الاولي هيبقي استئصال جزئي للحنجره
و الحل التاني بيبقي استئصال كلي للحنجره و يتعمل شق حنجري و بيتركب فتحه كدا في الرقبه للتنفس و طبعا خلاص كدا مينفعش تتكلم تاني طول عمرك غير بجهاز بيركب مكان الحنجره

عارف اول ما الدكتور حط المنظار عشان يكشف على الحاج قاله ايه اول كلمه ... قاله انت بتشرب سجاير يا حج .. و الدكتور اللي شاف نتيجه العينه اللي بينت انه ورم خبيث سئلني قالي هو بيشرب سجاير ..

الحاج بعد 40 سنه شرب سجاير بطلها دلوقتي عشان غصب عنه لازم يبطلها .. بطلها بمزاجك دلوقتي احسن ما تندم بعدين و تدوخ الدوخه اللي انا فيها دي دلوقتي

انا حالتي النفسيه زفت و كل العائله عندنا حالتها النفسيه زفت .. عشان الحاج كان بيشرب سجاير و اديك شايف اللي انا فيه دلوقتي

و عندي بكرا ان شاء الله عمليه و ان شاء الله ادعيلي الدكتور يقدر يعملها استئصال جزئي لانه اداني أمل انها تبقي جزئي و يقدر يرجع يتنفس و يتكلم بدون اجهزه