اية اضرار عملية الليزك

[ahmedhcl]

بجد يا جماعة انا بحثت على النت كثير عن اضرار العملية دى
علشان انا محتاج اعملها بجد علشان شغلى
لكن كل واحد بيقولى مليش اى اضرار وانا مش قادر اصدق طب ازاى
عايز حد يكون عملها او دكتور فاهم يجاوبنى

[weller]

السلام عليكم ورحمة الله وبركاته
بص ياباشا انا عاملها بقالي سنييين كتير فهقولك علي اللي حصل معايا
العمليه ملهاش اضرار تماما وهو ده اللي بيتقال فعلا وده الحقيقه بس الله اعلم علي المدي الطويييييل بس هي العمليه امان جدا ونتايجها ماشاء الله تحفه بس المهم الاختبار اللي قبل العمليه المفروض الدكتور بيعملك اختبار في الاول بيشوف العين نفسها تصلح للعمليه ولا لا لو قالك متنفعش اوعي تعملها لو النتايج طلعت كويسه توكل علي الله العمليه كلها 10 دقايق وكويسه جداااااااااااااااا وربنا يوفقك

[sting_2010]

واحد صاحبى عاملها من خمس سنين ولبس نضارة تانى .!!

[MohammedAladel]

أنا سمعت برنامج من فترة لورا بيتكلم عن الموضوع دا

الفكرة كلها فى حاجة .... إنه فيه غطاء على العين أو طبقة معينة بيتم قشطها زى بوابة كدا بتفتحها عشان تعمل العملية وتقفلها تانى ...هنا تأتى الخطورة فى العملية دى ...بس فيه جهاز دقيق جدا بيقشط الطبقة رفيعة جدا ويقفلها تانى

بس هى دى الفكرة كلها

[mem]

الدكتور قالى الناس اللى بيبقى عندها استجماتزم عالى بيبقى ليها ضرر
فى ان الاستجماتزم بيخلى طبيعى العين فيها جفاف شويه
فالليزك بيخلى الجفاف ده اكتر
وده اللى مخلينى متردد انى اعملها

[YahiaAshraf]

أنا رأى خليك بالنظارة أفضل اامن طريقة لتصحيح او حفاظ النظر

ابسط مثال شريف مدكور بتاع مذيع برامج الطبخ اللى كان على نايل فاميلى كان لابس نظاره و بعديها عمل العملية دى

يدوب مكملش لو تلاحظ هتلاقيه لبس نظاره تانى

[El Prince]

واحد معرفتى عملها من حوالى 4 سنين و دلوقتى عاملاله مشاكل كبيره و غالبا هايحتاج عملية جراحية أو أكتر

[abdulhafeez]

العملية دي بسيطة جدا وفكرتها انه يقشط طبقة خفيفة جدا من القرنية فيغير معاكل انكسار الضوء بتاعها ... المشكلة بتكون ان في ناس سمك القرنية عندهم بيكون قليل ... فلو تم قشط الطبقة دي القرنية هتبقى ضعيفة امام ضغط السائل الزجاجي بتاع العين فالنتيجة ان القرنية هتطلع لبرة اكتر ويصبح شكلها مخروطي فمعامل انكسار الضوء بتاعها هيتغير تاني ويمكن النظارة ما تقدرش تعدل الفرق الكبير في انكسار الضوء ..... وهيكون العلاج الوحيد ساعتها هو زراعة القرنية ...

العامل الاساسي في نجاح العملية وفشلها هو سمك القرنية ... ودا اللي الجهاز بيحدده قبل العملية ... ( بصراحة مش فاكر الرقم قام بالضبط .. )

لو السمك مناسب يبقى العملية مش هتعمل مشاكل ......

في حاجة تانية ... كل مايكون قصر النظر اكبر دا معناه انه هيقشط طبقة اكبر فاحتمال ظاهرة القرنية المخروطية هيزيد

بينما لو قصر النظر درجة بسيطة العملية هتدي نتايج حلوة بمشاكل اقل .....

ودا اللي بيفرق في نتائج العملية من شخص للتاني ........ يعني لو الدكتور قال لك العملية مش كويسة بالنسبالك فمتحاولش معاه ...... لانها ممكن تدي نتائج حلوة في الاول وبعد جدا يحصل ظاهرة القرنية المخروطية اللي بتسبب استيجماتزم