هيونداى أفانتى 2009 تقرير كامل بالصور

[pqpqpqpqpq]

السلام عليكم ورحمة الله وبركاته

جايبلكم النهارده تقرير عن عربيه جديده فى موديلها
هيونداى افانتى

اكيد فيه ناس كتير هتستغرب من الاسم
بس فعلا العربيه دى موجوده بس فى كوريا الجنوبيه وما بتنزلش خارج كوريا الجنوبيه بالمواصفات اللى هتكلم عليها
انما هى موجوده بالاسم افانتى ده فى سوريا والاردن بدل الهيونداى النترا

والحمد لله انا جايب هيونداى افانتى موديل 2009 من كوريا استيراد شخصى

نيجى بقى للعربيه نفسها ونتكلم عنها من حيث الشكل الخارجى

هى نفس شكل الانترا مع كام اختلاف كده

الكاوتش كومهو عريض
جنوط16
غماز فى الجنب ومكتوب تحته VVT
المرايات لون العربيه
المقابض نيكل
يد الشنطه نيكل
مكتوب مكان كلمة هيونداى AVANTE
ومكان النترا S1.6
وطبعا من قدام فوانيس شبوره العاكس بتاعها مختلف عن الالنترا
ده من حيث الشكل الخارجى

تعالوا نتكلم دلوقتى عن الكراسى

الفرش جلد طبيعى بالكامل رصاصى فاتح
مع العلم لون العربيه اسمر ميتالك

عدد 4 مسند راس قابل للحركه بثلاث اوضاع

مخدع فى الكنبه الخلفيه مزود بمكانين لوضع كوب شاى او حاجه ساقعه بيبس

الكنبه الخلفيه منقسمه جزئين كل جزء منها قابل للثنى للامام بحيث يكون فى نفس مستوى الشنطه
وعلشان تتنى جزء فيه شداد خاص بكل جزء فى الشنطه
سيادتك تشده تقلب نص الكنبه
وممكن تقلب الاتنين مع بعض وتمشى بعربيه فان

نروح بسرعه على كرسى القياده هنلاقيه ممكن يتحرك لفوق وتحت
الى جانب طبعا سخان كراسى
كل كرسى له مفتاح خاص بيه تحت التكييف

مخدع امامى بين الكرسيين زى الموجود فى اللانسر بالظبط

تعالوا نشوف المرايات

مراية الصالون كهربا وفيها سينسور للضوء العالى
عشان وانت ماشى بالليل وييجى واحد تحفه جايب النور العالى وراااك
فى الحاله دى ولا يهمك ياباشا
المرايه بتقلب فاميه والنور ما يزغللش فى عينك
ونفس الوضع مرايات الجنب كهربا وضم كمان وليها زرار خاص بيها فى باب السائق

وطبعا السينسور ليه زرار وهنا ليك مطلق الحريه تشغيل الخاصيه دى او عدم تشغيلها

الاهم من كده مرايات الجنب فيها سخانات عشان الشبورة

بالنسبه لزجاج السياره بيقلب عسلى فى الشمس الساطعه

زجاج باب السائق له وضعيتين فى التحكم
يعنى ممكن ترفعه عادى وممكن ترفعه من ضغطه واحده

ولو فيه حاجه قدام الزجاج وهو بيترفع بيقف ويرجع لتحت حوالى 3 سم

وكذالك فتحة السقف لو بتقفلها وفيه قدامها حاجه بتقف وترجع زى الباب بالظبط

سخان الزجاج الخلفى موجود بمساحه الزجاج بالكامل مش تلتين كده وبس

الزجاج الامامى مدمج فيه ايريال الكترونى فى الاسفل تحت المساحات

نيجى بقى للتابلوه

فيه 2 ايرباج واحده فى الطاره وواحده امام كرسى الجنب
فى الانترا موجود فوق الكاسيت صندوق بيفتح من ضغطه
للاسف ملغى فى الهيونداى افانتى
اما جراب النظارة موجود

بالنسبه للعداد 220 وال آر بى إم 8

مؤشر البنزين واخد مساحه كبيره ومفيش مؤشر حراره
مجرد لمبه بيان لو فيه مشكله فى الحراره
طبعا العربيه مصممه لكوريا والجو هناك مش حر فمشمحتاجين يحطوا مؤشر حراره

فيه بقى شاشه الكترونيه تحت مؤشر السرعه
هى كبيره زى الموجوده فى العربيه الجيتا
والصور هتوضح كل ده
وفيها بيبان معاك الجيير بتاعكL 2 3 D N R P

الكاسيت سى دى ومختلف عن اللى فى الالنترا
التكييف تاتش ومش عارف هو التاتش بتاع الالنترا ولا لأ

وننزل تحت التكييف زى ما قلت قبل كده طفاية السجاير وزراير سخان الكراسى
ننزل تحت كمان شويه هنلاقى الولاعه ومخرج آخر12 فولت

الجديد بقى فى الافانتى موجود مدخل AUX
وجانبه مدخل USB سيادتك زى الباشا تجيب فلاشه وتحطها فى اليو اس بى وتعيش يا ريس

نشوف بقى الطاره عامله ازاى

الطاره هاند مييد مالتى فانكشن يمين وشمال
الشمال كنترول اوديو
اليمين بلوتوث والمايك بتاعك فوق السائق فى السقف
اما السماعات 6 سماعات
الطاره متحركه فى الاربع اتجاهات

بالنسبه للفرامل والتوازن

الافانتى فيها ABS , EBS , VDC

بالنسبه لحزام الامان متحرك فى القائم لأعلى واسفل
وتم الغاء موضوع الألارم واكتفوا بوضع لمبه فى التابلوه بتنور وتطفى على طول
وطبعا خايلانى طول ما انا ماشى

الابواب ليها لمبه فى التابلوه لو الباب مفتوح

الابواب الماميه فيها لمبة ستوب مش عاكس زى الالنترا

طبعا الباور كهرباء
انا كده خلصت التابلوه

العربيه من الخلف فيها عدد 3 سينسور فى الاكصدام

ذراع المساحات فيه بكره مكتوب عليها INT
ومن خلالها تقدر تتحكم فى زمن وقوف المساحات قبل ما تطلع على الزجاج
بالنسبه لفتحات المياه فهى 3 فى كل جنب
وممكن تخلى المساحات اوتو يعنى لو جيه ميه على الزجاج المساحات تشتغل

نشوف ذراع النور بقى بسرعه كده

اول لفه دى التابلوه وهنلاقى النور الامامى هنا الاشارات بضوء خافت بدل النور الابيض العادى الموجود فى الانترا
وطبعا ده ميزه مهمه جدا خاصه فى الطرق المصريه بالليل
لو جيبت الذراع للآىخر على الاوتو يبقى سيادتك ماشى على خاصيه النور الاوتوماتيك

لو ماشى فى ظلمه النور ينور لوحده وهنا ليك الحريه انت عاوز انهو نور ينور على الاوتوماتيك
يعنى لو ماشى بالنهار علدى نزلت نفق شيراتون او صلاح سالم بمجرد ما تنزل النفق النور ينور وبمجرد ما تخرج من النفق يطفى
وقيس على كده لو مسافر الفجر او المغرب

معلومه
العربيه بتعمل لوك للابواب اوتوماتيك بعد سرعه 40 ك وطبعا هتقف بعد كده ومجرد ما تبطل العربيه وتشيل المفتاح اللوك بيفتح لوحده
ولو انت بالليل وكنت مشغل النور برضه لو بطلت العربيه وشيلت المفتاح نور العربيه بالكامل بيطفى

نشوف الريموت
ممكن نفتح الشنطه من الريموت
لو فتحت العربيه بالريموت نور الصالون بينور مع الاشارات
ولو ما فتحتش الباب بعد 30 ثانيه بتقفل تانى لوحدها

انما لو فتحت الباب وقفلته ومشيت العربيه هنا ما تقفلش لوحدها زى معظم العربيات
ومفيش فى الافانتى دى انذار ولا وحدة رفع
ودى اكتر حاجه خنقتنى بس ناوى اعملها فى التوكيل

وجعت دماغكوا انا عارف
خلاص انا قربت اخلص

فيه حليه على مكان المفتاح عشان تشوف مكان المفتاح فى الظلمه

الشماسات فيها مرايه ولو فتحت المرايه فيه لمبه فى سقف العربيه فوق الشماسه بتنور

الشماسه نفسها فيها جزء قابل للامتداد عشان لو جيبتها على الجنب من الشمس تبقى مغطيه الباب بالكامل
طبعا الكلام ده فى الشماستين
الى جانب كشافات القراءه الموجوده مع زراير فتحة السقف

الملحقات اللى جايه مع الهيونداى افانتى
كتيب التعليمات والاستخدام وطبعا اللغه كورى ومفهمتش حاجه خالص
شنطه طبيه
مثلث
غطاء للسياره
مساحه للعربيه (رياشه)
مكنسه هاند بتشتغل على المخرج 12 فولت
طقم دواسات موكيت على جلد
شبكه زى اللى موجوده فى الجيتا
مفيش طفايه حريق
الحمد لله انا كده خلصت كلامى عن الهيونداى افانتى
ويارب اكون مانسيتش حاجه
وفيه بقى هنا 3 ملفات سيادتك هتنزلهم
فيهم صور تفصيليه للعربيه انا اللى مصورها بنفسى
يعنى تصوير على قدى كده
ويا رب الموضوع يعجب الجميع

الجزء الاول

الجزء التانى
الجزء الثالث

وممكن تتفرجوا اكتر على العربيه من خلال الرابط التالى

AVANTE

[HANGMAN]

موضوع جامد جدا بجد حبيت العربية ووصفك جيد جدا
وعلي كدا استوردتها بكام ودفعت جمارك اد اية وقفت عليك بكام

[Nile_Storm]

ياريت لو وقت حضرتك يسمح تيجي مقابله هيونداي القادمه يوم الجمعه القادم
و اهي فرصه نشوف الفروق علي الطبيعه

[bassam nagy]

الف الف شكر على المعلومات القيمة دى

[memoo_1st]

الف شكر على الموضوع الرائع وفعلا معلومات قيمة جدا عن السيارة

[HamadaMOMO]

بجد بجد احيك على شرحك الوافى للافانتى وربنا يباركلك فيها وبجد مزايا ممتازة
انا جبت الهاى لين من غبور 2007 تقريبا 3/4 من مزايا الافانتى

بجد مرة ثانية احيك على طريقة الشرح

[bishoo33]

موضوع رائع وجميل
بارك الله فيك

[kliken]

تسلم على المجهود و المعلومات القيمه

[outosend]

الف مبرووووك
انا عربيتى فيها حاجات كتير من اللى انت بتقول عليها دى بس شهاده الافراج وبتوع المعرض مصرين انها النترا وانا مصر انها افانتى
عموما الف مبروووووك تانى ولينا مقابله ان شاء الله

[outosend]

باشا ياريت معلش تتأكدلنا من الكتيب الكورى اللى مع حضرتك (انا عارف انه كورى ومش هاتقرا بس هيبان من الصور) موضوع اختلافات الموتور هل فى اختلاف فى دوره العادم فعلا؟ ولا لا
هاتظهر من المقارنه مع الصور فى كاتالوج عادى
وشكرا