احداث صيانة الـ40 الف في مركز العبور

[hitham_sh]

اشتريت قبل ما اروح الصيانه من توكيل Ngk طقم بوجيهات اريديوم Ngk وكان سعرهم 150 جنيه زي ما نصحني اخ عزيز ليا هنا في المنتدى وخدتهم معايا التوكيل علشان يركبوهملي وانا بعمل الصيانه علشان هما سعر البويجهات عندهم 440 جنيه
بس لما جيت اعمل الصيانه قولت للمهندس عمرو انا من نايل مورتورز وعايز استفيد بالخصم اتاكد ان اسمي موجود وقالي تحت امرك يا فاندم قولتلو انا ليا طلب عندك انا جايب البوجيهات معايا وياريت لو تركبوهالي قالي طيب هسالك دخل الورشه وطلع وقالي للاسف يا فندم مش هنقدر نركبهملك لازم تبقى من عندنا قولتلو طيب خلاص متركبوش بوجيهات وانا هركبهم بره قالي ماشي رحت متصل بالمهندس احمد عبد الوهاب وقلتلو انا عايز اركب البوجيهات الي انا جايبها معايا قالي لا احنا مبنركبش Ngk واحنا بنركب دينسو وال Ngk بتعمل مشاكل في العربيه وتخليها تاكل بنزين ولو عايز انا ممكن اركبهملك بس هتمضيلي على ورقه ان احنا مش مساولين عن اي عطل يحصل بسبب البوجيهات
قولتلو لا خلاص مش مهم
وبعد ما خلصت الصيانه رحت ركبت البوجيهات في مركز صيانه في المعادي والمفجاه كانت ان البوجيهات الي طالعه من العربيه القديمه يعني الي جيه من اليابان ماركتها Ngk زي الي كنت جايبها ومرضوش يركبوها في التوكيل وعرفت كمان ان في التوكيل بيركبو Ngkاريدوم زي الي انا جايبها بالزبط ومبيركبوش دينسو ولا حاجه
بجد اضايقت جدا من الحركه دي مكنتش متوقع طيب لو كان فرق السعر بين بره وعندهم معقول كنت هقول ماشي بس الفرق تقريبا ضعفين تمنها من 150 الى 450 فرق كبير جدا
مطولش عليكو المهم انا دفعت في التوكيل النهارده بعد الخصم 1392 وتفصيلهم كالتالي
300 جنيه مصنعيات( ومخصموش مصنعية تركيب البوجيهات الي انا مركبتهاش )
52 جنيه مصنعية تركيب تيل فرامل
48 جنيه فلتر زيت
402 جنيه تيل الفرامل
176 جنيه فلتر الهواء
120 جنيه سير الاداره
8 جنيه الحزام الي بيمسك الطاسه في الجنط
10 جنيه متنوعات (الي مش عارف هيا ايه بالزبط)
9 جنيه زيت فرامل
120 جنيه زيت Xhp
60 جنيه تمن جالون مياه تبريد موبيل (ومرجعوليش الي فاضل معنو كان كتير )
35 جنيه زيت فتيس
والخصم كان 54 جنيه على كلو
والضريبه 106 جنيه على كلو
والراجل بتاع الخزنه مكانش معاه فكه وليه عندي 2 جنيه لو رحت التوكيل ده تاني هبقى ادهملو فكروني :)

نصيحه اخويه محدش يعمل الصيانه في التوكيل تاني انتو كده عرفتو الحجات الي بتتعمل اعملوها بره اوفر كتيييييير

[shrafoo]

الله يعوض عليك محدش بيتعلم ببلاش
:K_crying[1]:

[Eng_aly]

لا حول ولا قوة الا بالله انا مش عارف اقول ايه ...كدة يا جماعة احنا ممكن نفقد الثقة فى التوكيل عدم المصداقية من المهندسين ممكن تخلى الواحد يروح يعمل الصيانة فى اى حتة وخلاص مش هتفرق كتير بقى ...الكل عايز يكسب منك وياخد منك اعلى او اكتر فلوس واحنا مابنلاقش الفلوس فى الشارع احنا كمان بنتعب فيها ...زى ما ابو عبد الله بيقول شغل الصانيعية مش زى بعضة وان التوكيل بيشتغل بأسلوب محترم وتقنى بشكل يحافظ على العربيه وعلشان كدة بياخد فلوس كتير طيب ماشى بس مايكدبوش ليه يضحك عليا ودى مش اول مرة يحصل فيها حاجة زى كدة ...ارجو ان نتخذ موقف.

[أبو عبدالله]

الف مبروك يا هيثم
ولكن ياريت لو معاك صورة للبوجيهات اللي انت اشترتها يبقى افضل
علشان نقدر نعرف هيا نفس الموديل ولا لأ لأن في اكتر من موديل في الأيريديوم
لأن فرق السعر كبير ولازم نتأكد الأول قبل ما نتكلم أكيد علشان لما نتكلم يبقى على ثقة
بدل ما حد يحرجنا ان احنا مش عارفين الفرق
مش كده افضل

طبعا موضوع مية التبريد ده شئ طبعا مستفز جدا
وفي كمان شئ اخر وهو نص اللتر اللي بيبقى باقي من الأربعة لتر اللي انت بتحاسب عليهم
لأن العربيه بتاخد 3.5 لتر فقط زيت وليس اربعة
وهما بيستخدموا موبيل وان اللي كل لتر في زجاجة واحده
مش الأربعة لتر في زجاجة واحده

ربنا يهيدنا ويهديهم ان شاء الله

وياريت تقولي انت اشتريت منين البوجيهات ؟؟؟

[hitham_sh]

هيا دي يا باشا صورة البوجيهات الي انا جبتها
وجبتها من شركة التوفيق وكيل NGK
5 شارع الحريه - المعادي
0109996884- 25168172
ودي صورة البوجيه الي خارج من العربيه

[أبو عبدالله]

ده النوع اللي انت اشتريته يا هيثم



Ultimate Performance
• Fine Iridium tip ensures high durability

• Built for today's high performance engines

• Ultimate design, technology and performance




وده النوع اللي راكب في العربيه
يعني في فرق في الموديلين الاول عادي مش ليزر والتاني ليزر
ولكن انهي افضل بصراحه لا أعلم




OEM Style
• Laser welded Iridium tip ensures precise gap over plug life

• Superior anti-fouling characterics
• Best OEM Iridium spark plug available

• OEM approved

[hitham_sh]

الصور مش باينه عندي يا ابو عبدالله
على فكره انا سالتلك على الانزار قالي انو زي القديم واقل منو كمان
مفهوش اي حاجه جديده

[MoToRiZeR]

طب ليه مخصموش مصنعية تركيب البوجيهات و معلقتش عالموضوع يا هيثم ؟

انا شايف التوكيل لازم يعيد النظر في سعر المصنعيات تحديداَ و في سعر الكثيييييييييييييير من الإكسسوارات و بعض قطع الغيار .

لأن أي حاجة بلاقي تمنها الضعفين أو التلاتة علي طول، و زي ما قلت قبل كدة الإنذار اللي ركبته في التوكيل ب 560 ركبته هو هو في الكليو ب 150 جنيه فقط شامل التركيب و بنفس فترة الضمان .

إضافة لحاجات كتير كنت ناوي أشتريها و عرفت سعرها و عمري ما هفكر أشتريها طبعاَ زي ال bluetooth kit اللي في التوكيل مثلاَ سعرها 3000 جنيه ! و عن قطع الغيار طبعاَ في حاجات سعرها غريب بداتنا معاها كانت الكارتيرة الضعيفة جداَ الغالية جداَ 310 تقريباَ ، و حالياَ البوجيهات .

و كذا نقطة أخري زي ليه في ضريبة مبيعات عالزيت طب ماهو بيتباع برة بسعر أقل شامل الضريبة ... و ليه فيه ضريبة مبيعات عالمصنعية هو انا باخد الصنايعي و انا مروح !؟

[أبو عبدالله]

يا محمود مش عاوز نظلم ونتكلم بدون ادلة
البوجيهات مش زي بعض
لما نعرف انهي افضل ساتها نقدر نحدد ولما كمان نعرف سعر اللي كانوا في العربيه بكام خارج التوكيل
لأن زي ما انا وضحت الأتنين مش زي بعض

--------------------
دي يا هيثم صفحة Iridium IX من على موقع NGK نفسه اللي انت اشتريته

ودي صفحة LASER IRIDIUM اللي راكب في العربيه
وطول ما هناك فرق يبقى لازم نسأل على الموديل ده بكام بره التوكيل علشان نقدر نحدد ساعتها التوكيل مغلى ولا لأ

[MoToRiZeR]

انا بتكلم عامة يا ابو عبد الله فيه حاجات مغالاة في سعرها جداَ زي الإنذار من 150 ل 560 ليه !؟

كارتيرة ب 300 و شوية ليه !؟

ماهي الفكرة إن الموضوع هيبقي مقبول لو الحاجات دي الأصلية الخاصة بالعربية و لكنها نفس الحاجات اللي في السوق .. فا طبيعي و إنت بتدفع في حاجة إنت عارف إن سعرها الحقيقي أقل من ثلث اللي إنت دافعه بتبقي متضرر .

و دي نقطة مش في صالح التوكيل لأن انا و غيري مثلاَ ركبنا الإنذار في التوكيل بالسعر الغالي عشان عارف إن التوكيل شغله نضيف و مش هيحصل مشاكل في الكهرباء و حفاظاَ علي ضمان العربية .. إنما أكيد السعر خض ناس تانية و قالتلك هركبه برة أو بناقص الإنذار خالص .

انا عن نفسي الكارتيرة إتقطعت و ملصمها لأن كل شوية واحد يريح عليا تقوم كلبسة طايرة و الكارتيرة واقعة فا مش معقول كل شوية هشتريلي كارتيرة ب 300 جنيه ؟