تجربتى مع صيانة ال1000 كم للسيريون !

[د.محمد الشيخ]

السلام عليكم

حدخل فى الموضوع فى شكل نقاط :

1- الحجز عن طريق ال Call Center كان سهل ومتابعة ممتازة منهم وتأكيد على الموعد قبل الزيارة بيومين وتغييره لو حبيت .

2- وصلت مركز العبور الساعة 2 ظهرا دخلت العربية الساعة 3.30 عصرا واستلمها منى المهندس تامر بعد اخذ كل الملاحظات وطبعا راجل فى منتهى الذوق .

3- طبعا قاعة انتظار تطل على المركز لمتابعة ما يجرى على الطبيعة ولكن يبدو ان الفنيين اخدوا على كده خلاص وتعودوا على متابعة العملاء ليهم ورجعوا لاسلوب العك المعتاد للفنى المصرى .

4- صيانة الالف لم تاخذ منهم اكثر من 15 دقيقة من مراجعة على مستوى الزيوت والمياه وضبط ضغط الاطارات .

5- لن اتحدث عن ملاحظاتى التى ربما تكون عادية وعند كل الناس مثل الاحساس بضعف وهشاشة المكونات البلاستيك الداخلية فى العربية حول الابواب او حول الفتيس وفرامل اليد وكان رد المهندس تامر على ان ده طبيعى لكن لما كلمته عن ان زجاج الابواب شكله سايب ويحتاج الى تربيط خاصة عندما تغلق الباب وانت فاتح الازاز شوية تحس انه حيقع من الباب غير صوته اللى بيخبط المهم كان رده انه محتاج تربيط ولما خرجت العربية لقيت كل اللى اتعمل انهم رشول سبراى WD40 ( وطبعا شفتهم بنفسى ) فى مجارى الازاز داخل الابواب !! طبعا زيتوا الدنيا وكل ما تفتح الازاز وتقفلوا تلاقيه خرج مزيت !!
طبعا ده اللى عندهم بخصوص هذه الشكوى .

6- العيب الاساسى اللى رحت بيه هو ان العربية بتحدف سنة شمال بيبان اوى مع السرعة العالية ولما خرجت العربية قالى انهم لقوا فرق فى ضغط هوا الكاوتش ولما اكدت للمهندس تامر ان ده مش مظبوط طمنى وقالى انهم جربوا وكله تمام ....ماشى حنشوف .

7- طلبت قبل خروج العربية تركيب ال Security System او جهاز الانذار وسعره حوالى 890 جنيه وده اللى اخر خروج العربية الى الساعة 4.45 دقيقة والحقيقة ركب تمام وشغال زى الفل.

8- خرجت بالعربية بجرب الحدفة الشمال لقيتها زى ما هى !!! طبعا رجعت للمهندس تامر وطلبت منه يجرب بنفسه وبالفعل جرب بنفسه ولقى ان فيه سنة شمال محتاجة ظبط زوايا .....قلتله يبقى كده محدش جرب وده ميرضيش ربنا ! قالى متقلقش شرفنا فى اى وقت وانا اكشفلك على الزوايا ....طيب ليه مش دالوقت ؟...قالى لاننا خلاص الساعة 5 وحنمشى !!!
يعنى فيها مشوار تانى من 6 اكتوبر للعبور عشان الفنى مهانش عليه يجرب العربية وكدب وقال كله تمام .
طبعا ده ضايقنى جدا لانهم بصراحة كده معملوش حاجة تذكر فى صيانة الالف وكلها حاجات بيعملها اى حد عنده خبرة بسيطة من متابعة للزيوت والمياه وضغط هوا الكاوتش والمفترض انهم بيهتموا اكتر بشكوى العميل ....طيب انا قلت المشاكل لكن فى النهاية هم عملوا اللى على مزاجهم واللى البيه الميكانيكى شايفه !!!!
للاسف دايما بيفترضوا فى العميل انه مبيفهمش او انه بيبالغ او انه يمكن اول مرة يركب عربية !!!
لانى قلت للمهندس تامر الحدفة الشمال دى استحالة عن خبرة 15 سنة سواقة تبقى ضغط هوا لكن دون فائدة .

9- طبعا رايح بالعربية بتبرق نظافة جوه وبره ( وده طبيعى فى علاقتى بالعربية ) واستلمتها ملحوسة بره وجوه الابواب من الداخل وبصمة ايد الفنى المشحمة على الابواب طبعا كلمتهم على ده ونظفوا شوية لكن برده استلمتها وانا غير راضى عن نظافتها سواء جوه او بره .
ويمكن لو كنت رحت بالعربية مبهدلة يمكن كانت النظافة ظهرت شوية لكن يبدو ان هو ده مستوى النظافة اللى بيخرجوه .

10- اتصلوا بى الليلة لمعرفة انطباعى عن مستوى الخدمة وطبعا قلت كل ما سبق سواء مميزات او عيوب بما يرضى الله وطبعا على راسها اسعار قطع الغيار ! ولما سالنى عن التقدير العام جيد او جيد جدا او ممتاز ! طبعا كان ردى انه جيد ! .

11- الخلاصة :
توكيل يابانى توكيل المانى الفنى هو نفسه الاسطى الميكانيكى البلدى اللى ممكن تقابله فى اى مكان .
طبعا مهندسين ذوق ذوق ذوق لكن للاسف المهندس مغلوب على امره لانه للاسف راى وكلمة الفنى هى اللى بتمشى والمهندس ما هو الا مجرد واجهة للتوكيل .
12- بينى وبينكم يمكن ده خير انهم مظبطوش الحدفة الشمال البسيطة دى اللى مش محسوسة اوى لانهم كان ممكن يعكوا الدنيا اكتر وانا قررت انى مروحش تانى اظبطها ما دامت بسيطة بصراحة لعدم ثقتى فى الفنى اللى حيشتغل .
ممكن واحد يقولى طيب حتعمل ايه فى اللى جاى ؟
حقوله: وقتها حيبقى مجبر اخاك لا بطل اما المسائل البسيطة دى يبقى تجنب ايدى الفنيين دول بصراحة غنيمة لانهم شكلهم كده اكتر من تغيير الزيت والبوجيهات والسيور والحاجات الروتينية دى اكتر من كده بيبقى عك فى عك وده حال توكيلات مصرنا الحبيبة .
ولسة مجاش موعد تجربة توكيل سكودا اللى لا اتوقع انه حيفرق كتير عن توكيل دايهاتسو وربنا وحده اللى بيسترها معانا ومعاكم .

[medo_sirion]

اللف مبروك على الصيانة
والله يكون فى عونك واحنا كمان بجد اصل احنا تعبنا خلاص

مبروك الصيانة وأهلاً بيك في نادي مالكي السيريون
نتمنى نتشرف بحضرتك في مقابلات مالكي الدايهاتسو اللي بتتم دورياً
نصيحة إن ضبط الزوايا يتعمل في مكان زي برديجستون
لو مش أفضل على الأقل بيكون أرخص

[eslam_wega]

الف مبروك يا جميل السيارة ويريت انطباعك عنها

[halloween]

الف مبروك يا دوك.
هل انت حاسس بفروقات بين السيريون و الاسكودا؟

[rzeiny]

مبارك على السيارة ياباشا واحب اطمنك ان اغلب التوكيلات في مصر واحد . مجرد فني مؤدي للاوامر فقط
انا معايا اوبترا وساكن في م.نصر والتوكيل في اول الصحراوي واكون حاجز الساعة 9 ص واروح تدخل العربية الساعة 12,30 ظ وعندي مشاكل واطلع بنفس المشاكل ويقولي انا جربت وزي الفل ولما اكلمه يقولي تعالى بدري شوية .
على فكرة بتفضل العربية مركونة محدش يقرب منها ولازم الواحد يعلي صوته علشان يتحركوا ويجي واحد يقولك اصل الشغل كتير والعمالة قليلة بيت العربية يومين ونعملك الي انت عايزه
بصراحة عك *عك

[د.محمد الشيخ]

اللف مبروك على الصيانة
والله يكون فى عونك واحنا كمان بجد اصل احنا تعبنا خلاص

الله يبارك فيك ويكون فى عون الجميع ومعلش بقى ادينا بنصبر بعض.

مبروك الصيانة وأهلاً بيك في نادي مالكي السيريون
نتمنى نتشرف بحضرتك في مقابلات مالكي الدايهاتسو اللي بتتم دورياً
نصيحة إن ضبط الزوايا يتعمل في مكان زي برديجستون
لو مش أفضل على الأقل بيكون أرخص

الله يبارك فيك وطبعا يسعدنى ويشرفنى مقابلتكم فى اقرب فرصة .
وباذن الله اكيد حاخد بنصيحتك والف شكر .

الف مبروك يا جميل السيارة ويريت انطباعك عنها

الله يبارك فيك وباذن الله حعمل موضوع منفصل عن انطباعى لكن مبدئيا العربية ممتازة والحمد لله فقط كان ينقصها ان وزنها يزيد 150 ك كده ولا حاجة يتقلها شوية على الطريق.
بس استهلاك بنزين من وجهة نظرى ممتاز خاصة انها 1500 وكمان التكييف شغال على طول .

الف مبروك يا دوك.
هل انت حاسس بفروقات بين السيريون و الاسكودا؟

الله يبارك فيك وطبعا فى فروق كتير واعتقد مينفعش نقارن بينهم لان كل عربية من كاتيجورى مختلف يعنى السيريون من فئة الهاتش باك والروومستر من فئة ال مينى فان واكيد حيبقى فى فروق كتير.
يعنى لو السكودا كانت مينى فابيا مثلا كان ممكن المقارنة تكون صحيحة .

مبارك على السيارة ياباشا واحب اطمنك ان اغلب التوكيلات في مصر واحد . مجرد فني مؤدي للاوامر فقط
انا معايا اوبترا وساكن في م.نصر والتوكيل في اول الصحراوي واكون حاجز الساعة 9 ص واروح تدخل العربية الساعة 12,30 ظ وعندي مشاكل واطلع بنفس المشاكل ويقولي انا جربت وزي الفل ولما اكلمه يقولي تعالى بدري شوية .
على فكرة بتفضل العربية مركونة محدش يقرب منها ولازم الواحد يعلي صوته علشان يتحركوا ويجي واحد يقولك اصل الشغل كتير والعمالة قليلة بيت العربية يومين ونعملك الي انت عايزه
بصراحة عك *عك

للاسف هى دى توكيلات مصر بس يظل هناك فروق فيما بينهم يعنى بعيد عن عك الفنيين داخل الورش اللى ملوش علاج بيبان الفرق بين توكيل والتانى فى نقطة المواعيد والنظام والحجز والحرص على اعطاءك انطباع انهم خايفين على زعلك .
الحقيقة ده حسيته من توكيل دايهاتسو لكن طبعا ده مش كفاية لانه يظل عك الفنيين ورغبتهم فى عمل اللى على مزاجهم هو المصيبة الكبرى فى اى توكيل .
وربنا يسترها مع الجميع

[mecho_392]

مبروووووك يا باشا و عقبال المليون كم..
انا كمان معايا i10 2009 و معملتش صيانة ال 1000 كم و ناوى معملش حاجه فى التوكيل بجد بهدله انك تسوق 4 ساعات و تقضى معاهم يومك و فى الاخر كل اللى بيتعمل يعمله عيل عنده 10 سنين.. انا معايا ماتريكس 2007 عملت 56500 كم من غير ما اروح التوكيل غير مره و حرمت من ساعتها و العربية الحمد لله زى الفل بتغيير الزيت و الفلاتر.. و ان شاء الله فى صيانة ال 60000 هجيب كل حاجه من التوكيل و اروح عند ميكانيكى اعرفه 100 100 يركب كل حاجه و هيكون قدامى و كفايه انى عارف شغله و نظافته.

[د.محمد الشيخ]

مبروووووك يا باشا و عقبال المليون كم..
انا كمان معايا i10 2009 و معملتش صيانة ال 1000 كم و ناوى معملش حاجه فى التوكيل بجد بهدله انك تسوق 4 ساعات و تقضى معاهم يومك و فى الاخر كل اللى بيتعمل يعمله عيل عنده 10 سنين.. انا معايا ماتريكس 2007 عملت 56500 كم من غير ما اروح التوكيل غير مره و حرمت من ساعتها و العربية الحمد لله زى الفل بتغيير الزيت و الفلاتر.. و ان شاء الله فى صيانة ال 60000 هجيب كل حاجه من التوكيل و اروح عند ميكانيكى اعرفه 100 100 يركب كل حاجه و هيكون قدامى و كفايه انى عارف شغله و نظافته.

الله يبارك فيك ومبروك عليك انت كمان ال i10 وربنا يباركلك فيها .

طبعا عين العقل ما فعلت خاصة لما تكون عربية محفوظة وسهلة للميكانيكى لكن ده بيبقى صعب لما تبقى العربية جديدة ومحدش اشتغل فيها كتير بره ساعتها بتضطر صاغرا الذهاب للتوكيل على الاقل خلال فترة الضمان .
ربنا يرزقك خيرهم

[hhhmmmzzzz]

ياباشا الف مبروك واظاهر كدة الحلوين هيزيدو واحد انا خلاص وقعت واشتريت السيريون ياعم كنت قولتلي كدة الاول يلا حصل خير وهشوف بعينى كل اللى حكيته وامرنا لله