حوار لطيف بين زوج وزوجته

**compuland** · 09-05-2009 11:34 AM

هو: حبيبتي أنا حأطلب بيتزا، عايزة حاجة؟

هي: لا يا حبيبي

هو : أووكى

هي: ولا اقولك..؟

هو: ها، أطلب لك كمان؟

هي: مش عارفة

هو: مش عارفة اذا كنتي عايزة؟

هي: لا

هو: انتي جعانة؟

هي: يعني

هو : يعني إيه يعني...؟

هي: يعني مش متأكدة إذا كنت جعانة ولا لأ

هو: الواحد لما بيكون جعان بيعرف

هي: لأ بس يمكن أجوع بعدين

هو: يعني اطلب لك بيتزا؟

هي: طيب وإذا ما كنتش جعانة وقتها..؟

هو: ما تاكليش

هي : بس ده كده يبقى تبذير

هو: خلاص، تبقي تاكليها بكرة

هي: وإذا ما كانش لي نفس آكل بيتزا بكرة؟

هو: مش محتاجة نفس، الواحد عادي ممكن ياكل بيتزا كل يوم

هي: أنا لا.. أنا مش باكل بيتزا إلا لما يكون عندي نفس للبيتزا

هو: طيب بلاش، أطلب لك حاجة تانية؟

هي: بس أنا مش عايزة حاجة تانية

هو: يعني عايزة بيتزا؟

هي : لا

هو: يعني مش عايزة حاجة؟

هي: لأ برضه

هو : جننتيني، طب أعمل إيه؟

هي: اطلب أنت لنفسك

هو: الحمد لله، أخيراً.. ماشي ..

هي : بس أطلب بيتزا بالتونة

هو: نعم؟ أنا مش بحب البيتزا التونة

هي: بس أنا بحبها

هو: وأنتي مالك؟ هو أنا حاطلب ليا ولا ليكي

هي: ليك طبعا

هو: طيب أطلبها ليه بأه بالتونة...؟

هي: يمكن أجوع لما يوصل الأكل

هو : وبعدين؟

هي: يا سلام، يعني تفتكر آكل حاجة مش عاجباني؟

هو: ليه هو أنتي – أصلاً - عايزة تاكلي؟

هي : ليه لأ؟

هو: يا مثبت العقل.. هو أنا حاطلب بيتزا ليا عشان إحتمال أنتي تاكليها إذا

كنتي جعانة؟

هي: بالضبط

هو: وأنا بلاش آكل؟

هي: يمكن وقتها أكون مش جعانة

ملاحظة : محكمة الجنايات قررت تبرئة الزوج من تهمة 'قتل الزوجة مع سبق الإصرار

والترصد'، وتحويل توصيف التهمة إلى.. 'قتل الزوجة دفاعاً عن النفس

**نور العمر** · 09-05-2009 11:39 AM

ههههههههههههههههههههههههه ههههههههههه

بس الموضوع مكانش يستاهل يوصل لقتل

نصيبها كدة ... إلى كل الزوجات لا تطلبن بيتزا بعد اليوم

ولا تتناقشون عنها مع أزواجكم ... ألطف يا لطيف

**ahmed1981** · 09-05-2009 11:55 AM

أما زوج بخيل جلدة بصحيح
ما يطلب إثنين بيتزا وخلاص

أنا أطالب القاضي بإعادة المحاكمة
وإعدام الزوج بأن يتم إطعامه بيتزا بها زرنيخ بالتونة

**نور العمر** · 09-05-2009 12:03 PM

المشاركة الأصلية كتبت بواسطة ahmed1981

أما زوج بخيل جلدة بصحيح
ما يطلب إثنين بيتزا وخلاص

أنا أطالب القاضي بإعادة المحاكمة
وإعدام الزوج بأن يتم إطعامه بيتزا بها زرنيخ بالتونة

**MoOoD** · 09-05-2009 12:21 PM

يقتلها ليه بس
منتاش شايف الرقه ممكن تاكل اكله وميهمهاش ...بس مزاج
انا لو منه أقوم ارمى نفسى من البلكونه من غير تفكير ...أصل ممكن تعمل معاه كده برده لو عرفت

جميله فعلا

**compuland** · 09-05-2009 12:22 PM

المشاركة الأصلية كتبت بواسطة ahmed1981

أما زوج بخيل جلدة بصحيح

ما يطلب إثنين بيتزا وخلاص

أنا أطالب القاضي بإعادة المحاكمة

وإعدام الزوج بأن يتم إطعامه بيتزا بها زرنيخ بالتونة

هوا فعلا قال لها اطلب اتنين بيتزا
هي : بس ده كده يبقى تبذير

**Abdo_Eldesokey** · 09-05-2009 01:10 PM

الواحد يلحق ياكل بيتزا على قد ما يقدر قبل ما يتجوز

يا ساتر

**compuland** · 15-06-2009 08:20 AM

روحت امبارح كلت بيتزا
واول ماجت المنيو
جالى هيستريا من الضحك
وقلت ربنا يستر

**jisso82** · 15-06-2009 12:17 PM

المشاركة الأصلية كتبت بواسطة نور العمر

ههههههههههههههههههههههههه ههههههههههه

بس الموضوع مكانش يستاهل يوصل لقتل

نصيبها كدة ... إلى كل الزوجات لا تطلبن بيتزا بعد اليوم

ولا تتناقشون عنها مع أزواجكم ... ألطف يا لطيف

هى دى مناقشة برده أنا متهيألى إذا ما كانش الموضوع خلص كده كان زمان 90% من أعضاء المنتدى مكان الزوج فى المحكمة.