الله يكرمكم يا شباب ، شكرا لتعليقاتكم الجميلة :)

إحنا فيها يالا ننظم رحلة ونطلع سوا :)
ولو حسبت المسافة على فكرة ممكن تروح راس سدر مثلا هتكون نفس مسافة اسكندرية والساحل لأنها بعد السويس بحوالي 60 كيلو فقط

والله لولا الشغل لأني كنت رايح تالت يوم العيد وخطفت باقي الأسبوع لحد الجمعة ، لولا كدة كنت بفكر اروح العريش لأني مروحتهاش قبل كدة ، جنوب سينا غير الشمال خالص .. ميفوتكش طبعا


الأسعار معقولة جدا مش عالية يعنى القرية اللى كنا فيها خدنا شالية 3 أفراد المفروض كانو عاملين علية عرض علشان العيد بـ150 جنية لليوم وخدناة بـ130 ، وطبعا فى شاليهات أصغر ، ومجهز بالكامل طبعا ومريح جدا تكييف وتلاجة وحمام وتلفزيون ...
وفي قرية تانية تبع مجلس المدينة فيها الشالية أوضتين 3 سراير ب100 جنية و السريرين ب80 جنية ومستواة معقول برضو بس مفيهوش تلاجة

هجيبلكم ارقام التليفونات لما انزل ان شاء الله لأني سايبها فى العربية سواء بتاع اللى نزلنا فيها أو القري الأخري


أهم حاجة اللى بيفكر يروح :
-المشي يكون بالنهار يعني يفضل يتحرك بدري فى أول اليوم سواء رايح أو راجع

- شوية شماسات حلوة علشان الشمس فى العربية ، مش محتاجة تكييف مجرد انك تبقي فى الضل مع فتح شباك حاجة بسيطة الجو بيكون ممتاز لكن الشمس حامية فى الصحرا ، علشان كدة لازم شوية شماسات من اللى بتتلزق على الأزاز ويفضل نضارة شمس

- أي حاجة هتاخدها معاك هتنفعك وخصوصا الأكل ولو سخان كهربا وحلة معقولة وطبعا البويلر ، احنا كنا عايشين على المعلبات تونة وسردين وجبن ومكناش متشجعين نجرب بتاع السمك دة خالص لأن منظر المحل مش قد كدة (هوا موجود فى صورة المعيز على اليمين اسمة مطعم الحمد) بس طلع محترف ،، وفى كبابجي فى المدينة بس مينفعش الواحد يجربة أصلا ، وفى بتوع فراخ وكدة فى المينا بس برضو كعادة أكل الشارع يعنى اللى عايز لحوم ياخدها معاة ، و لو خدت كيلو لب ولا حاجة هينفع قوي :)

-الطريق طبعا لازم تلزم اليمين على طول إلا لو شايف كويس اللى جاي ممكن تقص الملفات وبالنسبة للمطالع لازم تفضل ساند رجلك على البنزين مينفعش تخفها خالص علشان هتعاني على ما تاخد سرعتك زى الأول ومتقرصش على العربية فى الطالع يعني ثبت رجلك وهيا سرعتها هتقل شوية بس هتطلع عادي ولو هتخسع ممكن تسقط نقلة ، ودة رآفة بالعربية لأن المطالع كتير واللى هيدوس فيها هيفرم العربية مع طول المسافة
والأهم بقى المنازل لازم الواحد يكون منتبة جدا ويفضل معشق العربية على غيار معقول وميدوسش بنزين قوي علشان يثبت العربية على سرعة معينة لأن لو سيبتها تتحدف ممكن تلاقي ملف قاسي فى نهاية المنحدر وتتسوح ، ومينفعش تدوس فرامل لمدة طويلة لأنها هتسخن وهتولع لازم تفضل لاممها بالفتيس ، ولو حبيت تسقط نقلة لازم تدوس فرامل على ما تنقل لو مورت العربية هتطير
ولازم برضو تاخد بالك من الدركسيون كويس لأن الهوا معظم الوقت شديد وبياخد العربية منك خالص خصوصا لو فى مطب أو كدة ، الهوا بيكون زاقق العربية على جنب ولو قابلك عربية كبيرة بتعمل خلخلة هوا تلاقي نفسك اتحدفت علية مرة واحدة ولما يعدي تتحدف الناحية التانية ، وكذلك لو دخلت بين جبل تلاقي الهوا اتحجز واول ما تطلع تلاقية راح لاطشك مرة تانية ، من الأخر يعنى مينفعش الواحد يمسك الدركسيون بصابعين وخد اقصي اليمين بعيد عن العربيات الكبيرة اللى مقابلاك

-يفضل جداااا تروح فى منتصف الشهر الهجري علشان يكون القمر طالع علشان تبقى قمة المتعة بالليل كمان مش بالنهار بس منظرة ملوش حل وهوا منور على الجبل والطريق والبحر مش ممكن بجد ، للأسف كنت مفتقدة المرة دي


وكفاية كدة بقي
و شكرا لمروركم :)

الأسعار اقامة بس طبعا زى ما قلت لأن هناك الواحد بياكل كتير الجو بيجوع مش عارف لية حتي لو منزلتش البحر ، علشان كدة خليك مع نفسك احسن

مش عارف بقى يوسف ممكن يستحمل الطريق ولا اية ، ممكن تستني كدة 20 سنة ويبدل معاك فى السواقة :) ربنا يباركلك فية

ههههه
عقبال سيريونتك يا جميل

علي فكرة الموضوع مكلفش كتير يعنى كنت انا واخويا و والدي والمصاريف كلها 1000 جنية تقريبا لـ4 أيام ، منهم 400 اقامة 3 ايام والباقي مصاريف وأكل ، بتدخل السوبر ماركت تلم شوية حاجات خايبة بخمسين جنية

لو شوفت البنجلوهات اللى في قرية رآفت الهجان سابقا دى اول ما اتعملت فى التسعينات كانت بعشرة جنية اليوم هههه واخر سعر ليها كان 85 بس معرفش بكام ناو

الله يسلمكم يا شباب ، وهوصل السلامات لعزيزة حاضر

*
محسبتهاش بالظبط الصراحة لأنك مينفعش تبقى مستني توصل علشان متتعبش ، هيا عموما من النفق حتي نخل حوالي 130 كيلو وممكن تاخد ريست وبعد كدة تكمل الباقي حوالي 230 كيلو
ممكن ياخدو متوسط 4 ساعات ومتوسط السرعة 100 علشان الملفات وكدة أأمن علشان متتفاجأش بالطريق ، لكن اخر 30 كيلو اللى هما بتوع وادي وتير هتاخدهم كلهم أبطئ من كدة لأن ملفاتة حادة فى حضن الجبل

Tyler_Durden
شكلك دايس هناك يا معلم