العمليه بسيطه و صعبه في نفس الوقت. نحدد دلوقتي مين اللي ممكن يرجع و مين مش ممكن يرجع؟
في الاعياد تلاقي البلد فضيت خالص يعني على الاقل نصفها مش فيها ده معناه انهم عماله غير مستقره في المدينه يعني بيروحوا و ييجوا كل اسبوع او شهر دول نحدد سبب قدومهم الى القاهره و نوفرها ليهم في بلدهم الاصلي!
على سبيل المثال عامل شغال في مصنع في العبور او اكتوبر مصنع مواد غذائيه نقوم ببناء 4 او 5 مصانع قطاع عام او خاص في 4 او 5 مناطق مركزيه في الصعيد و وجه بحري بكده حنوفر ليه عمل قريب من محل سكنه يعني مواصلات اقل تكلفه ترابط اسري بينه و بين اسرته و ده برضه معناه تربيه لأولاده في وجود ابوهم معاهم.
مصنع ادويه نعمل 3 او اربع مصانع . مصنع كيماويات. مصنع اجهزه كهربيه. مصنع غزل و نسيج. و هكذا دواليك. و طبعا العماله الغير مستقره دي تفضل تشتغل في بلدها الاصلي او على الاقل في بلد جنب بلدها و بيتها. و ده حيقلل الزحام في العاصمه و حيوفر فرص عمل لأبناءها الاصليين!!
دا غير ان مشاريع بناء المصانع دي حيوفر فرص عمل مهوله لطائفة المعمار من مقاولين و عمال و غفر و بناءين مما يؤدي الى استقرار ابناء الطائفه دي في مدنهم الاصليه لتوافر فرص عمل ليهم بالقرب من مسكنهم و اهلهم و بالتالي توفير فرص عمل لأبناء العاصمه العاملين في هذا المجال للحصول على فرص عمل بدلا من البطاله و ايضا تخفيض الزحام!!
المحافظ السابق على الرغم من ان الاغلبيه هاجمته (غالبا لانهم مشمولين في اقتراحه) كان على حق و كان اقتراحه ده مش عشوائي يعني مكنش حيتعمل في يوم و ليله!!!! نعمل كمين و نبص في البطاقه و اللي مش مواليد القاهره يرجع! طبعا ده سذاجه في التفكير و سطحيه! المشروع كان ممكن يستغرق دراسه سنه او اتنين و تنفيذ محتاج ميزانيه و فتره قد تصل ل 5 سنوات ميزانيه لدعم المستثمرين اللي حيبنوا المصانع دي! و مع توافر المصانع و عودة العماله سيتم بناء مدارس و مستشفيات و سيعود المدرسين و الاطباء و الممرضين المهاجرين الى القاهره الى مدنهم الاصليه حيث يتواجد اسرهم و بيوتهم! مما سيؤدي مره اخرى لتوافر فرص عمل لأطباء و ممرضات و معلمين من ابناء القاهره و سيقل الزحام بنسبه لا تقل عن 50% و ستنخفض اسعار المواد الغذائيه و الايجارات و الوحدات السكنيه!
المعادله لو تم تنفيذها سيصبح الجميع فائزين ! صحه نفسيه و بدنيه افضل (لعدم وجود زحام و تلوث و وجود تقارب اسري)! توافر فرص عمل للجميع! انخفاض الاسعار. زيادة الصناعه و الناتج القومي للبلد !
انا مش بتكلم عن اللي جده او والده جه القاهره من 50 سنه و ميعرفش بلده فين او ميعرفش قرايب ليه و نيجي نقوله انته روح سوهاج علشان جدك كان من هناك و هو ميعرفش سوهاج فين اساسا!!!!
ارجو التعمق في فهم الفكره قبل التعليق عليها!
و شكرا للجميع

1- كل النقل العام الموجود ده يتشال ويتعدم ويجيبو اتوبيسات ادميه
2- يلغو كل الميكروباصات والمشاريع اللي مليه البلد
3- يتعمل مواقف مخصصه لوقوف الاتوبيسات مش تقف في اي حته والسلام
4- الأهتمام بالطرق والأشارات
5- واخر حاجه الوعي الفكري للشعب الجميل لان كل اللي فات ملوش لازمه لو فضل الشباب مقضينها غرز والتاكسيات مقضياها بلطجه والمشاه مقضينها استهبال وتعديه من اي حته

ودمتم

فعلا الاتوبيسات و الميكروباصات سبب رئيسي.
في دول الاتحاد الاوروبي و في اي دوله محترمه الاتوبيسات ادميه واسعه بتسير ببطئ و على الجنب اليمين علطول بتقف في المحطه و بعدين تفتح الباب زي المترو بالضبط! لو في اوتوبيس جوه المحطه قبله يستنى وراه لحد ميطع و بعدين يدخل و يفتح الباب و يستنى لحد ما كل الناس تدخل و بعدين يقفل الباب و يتأكد انه اتقفل و بعدين يمشي.
في اتوبيسات بتمشي بالكهرباء برضه نفس الموضوع
التاكسي استحاله يقف صف تاني حتى لو ثانيه واحده علشان يركب او ينزل حد.
ضابط مرور على ناصية كل شارع رئيسي الناس بتحترمه زي مبيكون لواء شرطه مش عسكري!
لو عملت اي مخالفه مفيش ياما ارحميني و ميعرفوش كلمة معلهش اللي خاربه بيتنا!
الشوارع الخلفيه مفيش عسكري واقف فيها علطول بس في عربية دوريه او اتنين ليهم منطقه معينه بيلفوا في شوارعها الخلفيه علطول لو في حادث او مشكله او سياره عطلانه او واحد بيهزر و قافل الطريق او عربيه صف تاني او اي حاجه ليها علاقه بالامن او بالاخلال بالمرور.
النظام علاجه الوحيد اهتمام الحكومه نفسها بالنظام. لكن اذا كان رب البييت بالدف ضارب فسمة اهل البيت ال.....

الكلام دة لو حدث تبا القاهرة مفهاش ناس لان معظم اهالى القاهرة او اى مدينة كبيرة اصلها اما من الارياف او الصعيد

الكلام ده غير صحيح بالمره! ايام الحمله الفرنسيه على مصر كان تعداد سكان العاصمه في اول تعداد سكاني منظم من قبل المستعمر الفرنسي اوضح ان تعداد سكان العاصمه نصف مليون نسمه من اصل 5 مليون نسمه لمصر ككل! في نهاية الاستعمار البريطاني تم عمل تعداد اثبت ان سكان العاصمه تجاوز ال 2 مليون نسمه! يعني بحسبه بسيطه للتكاثر نلاقي ان التعداد الطبيعي للعاصمه على فرض وجود هجره داخليه طبيييييييييييييييعييييييييية سكان القاهره المفروض يكونوا من 6 الى 8 مليون نسمه!!! ده مع فرض وجود هجره طبيعيه و متوسطه مش ضئيله او هجره جماعيه زي اللي بنشوفها دلوقتي. بس اللي حصل ان مصر مساحتها يتجاوز المليون كيلومتر مسطح تعداد سكانها كله لو يقدر يتحشر في القاهره الكبرى اللي مساحتها 214.2 كيلومتر مسطح و هذا السبب اللي يعطينا كثافه سكانيه تتجاوز 35000 مواطن للكيلومتر المسطح في العاصمه!!!!!!
للعلم فقط عند عمل البنيه التحتيه لأي مدينه يتم عمل خطه خمسيه او عشريه بدراسه نسبة المواليد و معدل النمو السكاني (لتوفير مرافق و مدارس و مستشفيات و تعمير مدن جديده) تدرس النمو السكاني الطبيعي و يتم اضافة نسبه زياده من 5 الى 10 في المائه للهجره الداخليه. اللي بيحصل هجره تتجاوز ال 100% !!! مما يؤدي الى حدوث نقص حاد بالموارد و المرافق و الخدمات! على سبيل المثال المياه تصل حاليا الى 85% فقط من سكان العاصمه! الكهرباء الى 97% من سكان العاصمه. هيئة نظافة و التجميل تزيل المخلفات ل 68% فقط من سكان العاصمه! بسبب العشوائيه في الهجره.

وجود سيارات الشرطه أو الدراجات الناريه التابعه للمرور للقيام بمهامها ايضا عامل رئيسي للحد من الازمه المروريه

الحقيقي انا مش عارف اقول حاجة بعد الي قاله الاستاذ mmffor وعندك حق في كل الي قولتله لوكن للاسف حضرتك بتاذن في مالطه وكل في وادي يغني على ليلاه , حضرتك بافكارك دي ممكن تلاقيها في دول الخليج حتى مش لازم تسافر لاوروبا لكن هتعمل ايه , كل الي هما بيعملوا انهم ازاي ينكدوا علينا وينغصوا علينا عيشتنا بشوية قوانين وقرارات اما هدفها تجميع فلوس او الهاء الناس في مشاكل لا اخر لها

اناهربت من زحام القاهره وذهبت الي العاشر من رمضان وابتديت من جديد
رغم ان تجارتي وعملي في القاهره
الخل الوحيد هي نقل اسواق الجمله والوزرات الي مناطق واسعه
وان تكون كل محافظه مستقله لا تحتاج تاشيره وزير ولا وكيل وزاره
بمعني ان تلخص المصلحه في ورقه واحده وليس دوسيه

المرض العضال هو البيروقراطيه. و لا يوجد علاج لها لانها مرض متوطن منذ قديم الازل في مصر من ايام الفراعنه تلاقي الكاتب بيكتب كل حاجه و قبل ميستلم المحصول لازم يعمل تقرير و يمضيه من كبير الكتبه اللي بيروح يوافق عليها من مسئول المخازن اللي بيوافق عليه من مدير المخازن اللي بيخلي الوزير يصدق عليها بعد موافقة الفرعون ولما الدوسيه بيكتمل يسمحوا للفلاح يدخل المحصول للمخازن العموميه بعد ما بيكون السوس اكلها. عموما مبدأ استقلال الادارات معلوم للكل و الجميع بينادي بيه من قديم الازل و هو الغاء نظام الاداره المركزيه و دعم الادارات المحليه او الفرعيه . و لكن لا حياة لمن تنادي.

وكان افلاطون يحلم بمدينة يخلو منها الشر حيث يسود بها الصفاء والنقاء,,,, وقد وافتة المنية قبل ان يتحقق واحب اضيف انة لم ولن يتحقق

حضراتكو بتحلموا ياسادة, الفساد والتعفن قد امتد من جذورالشجرة الى اوراقها فى بلد اشتهر بسن قوانين للقوانين

هتحل ازاى التكدس والاختناق المرورى فى الشوارع هقولك زى مالحكومة مابتعمل ابنى كوبرى ,لحد مالبلد بقت كلها كبارى ودة اللى بيستنزف موارد الدولة. (كوبرى زى 6 اكتوبر واحد من اكثر الكبارى الحيوية لو عربية واحدة عطلت علية الساعة 3 العصر هتعمل اية فى الكوبرى كلة ؟؟؟؟؟)
هتوسع الشوارع ازاى برضة حاجة من اتنين ياتبنى كوبرى ياتشيل تجمع سكنى وافتح طريق وارمى الناس الغلابة فى الشارع,
دلوقتى بيركبو فى كل اشارة كاميرات مراقبة لاصطياد العربيات المخالفة ومجربوش يراقبو رجال المرور طاب دول هتصلح اخلاقهم ازاى وهتعرف ازاى انهم بيصرفو وقفا للمعايير اللى نصها القانون.

النقل والنقل العام والميكروباصات والتاكسيات هتحل مشكلتهم ازاى

قانون المرور الجديدة - حملات مكثفة لتطهير الشوارع - هتافات سمعناها وارتعدنا منها وقولنا خلاص الاصلاح فى الطريق والناس هتمشى على الصراط المستقيم اية اللى حصل موجة وعدت زى اللى قبليها وبانت اهداف القانون الجديد زادت علينا الغرامة ل10 اضعاف القوانين القديمة فى وقت المواطن محتاج يوفر كل قرش عشان يحارب الغلاء المستمر وارتفاع الاسعار. ورجال المرور ايديها شغالة بتكتب نمر اللى رايح واللى جى(انا بحس ان فى تارجت Target لازم يوصلولة) ياعنى الكل هيدفع طبعا ماعدا طبقة (مراد بية و زينهم باشا)

برضة سلوك المواطن المصرى اصبح لايخلو من ارتكاب وافتعال الاخطاء لانة حاسس انة مقهور فى بلدة ناس بتسنلة قوانين بتحد وتشل من حركتة فبقى بيستلذ بكسر القوانين ويمشى مخالف ويقطع الطريق ويقول انا اهه.

احنا خلاص راحت علينا وماينفعش فينا اصلاح الحل الوحيد اللى انا شايفة هو توعية وارشاد وتعليم الاجيال القادمة اللى لسة ماخرجتش من المدارس لازم يبقى فى كتاب يتوزع على الطلبة ويدرس ويبقى مادة وسموة زى ماانتو عايزين (مش فاكر اسمة اية الكتاب الصغير اللى وزعوة علينا فى اولى ثانوى تربية وطنية ولا تربية فكرية حاجة زى كدة) لازم الاجيال الجديدة يتم تعريفها ياعنى اية قوانين وان الدنيا ماشية بنظام وانك مجبر شئت ام ابيت تطيعها و تحترمها ويتم تعريفة بالعقوبة المنتظرة لكل مخالف لية. هو دة الحل الوحيد اللى هيطلع لنا جيل نظيف يحترم القوانين ويطيعها سواء كظابط او محامى او مهندس او سواق او حداد حتى وساعتها المخالف هيتعرف لوحدة.

انا مع حضرتك في كل الكلام دة لانه يجب ان ندير مشاكلنا
لكن الموضوع محتاج توجه دولة

النهارده بعض ما طلعت من طلعة الدائري في صقر قريش اتجاه الجيزه الدائري كان واقف من اول الطلعه الى ما شاء الله. انا علشان اوصل نزلة زهراء مصر القديمه بعديها ب 3 كيلو خدت مني 35 دقيقه مع ان عادة بتاخد 3 او 5 دقايق!!! و على كده الطريق كان واقف امامي على مرمى البصر

الأخ mmffor قدم أقتراح لحل أذمة المرور الخانقة بالقاهرة و هذا من وجه نظره , فلماذا الهجوم عليه و لماذا لا نتناقش بهدوء و بتحضر لأن مشكلتنا الكبرى هي عدم التحضر و عندما تقول لسائق مخطأ في الطريق لماذا تفعل كده يقول لك أنت مالك هي بلد أبوك و لا أنت عشان راكب عربية مكيفة . هل هذا بالذمة منطق و انا بأقول أذا لم نغير أنفسنا و سلوكيتنا أولا لن تستطيع و زارة الداخلية كلها عمل شئ و ليس ادارة المرور بمفردها .

ياسلاااااااااااااااااااااااااااااااااام
ماشى انا من اسيوط و بشتغل مهندس برمجيات .... مجال عملى كله فى القاهره
يعنى انا مجبر انى اشتغل فى القاهره ... انا نفسى اشتغل فى اسيوط على الاقل بلد هاديه و نظيفه
هاتلى شغل فى اسيوط و انا حجرى و حشتغل هناك لوحدى

المشكلة ان الطريق ضيق و الميكروباص اللي بيوقف بيوقف الشارع كلة معاه

انا من رايي نفجر القاهرة دة و نبنيها من اول وجديد