السلام عليكم ...
والله أنا شايف أن سلوكيات الناس تمثل 50 % من المشكلة و 50 % على الحكومة هوضح كلامي شوية , أنا حضرت للسعودية للعمل بها من كام شهر ووجدت ألتزام مروري ملوش مثيل وألتزام تام بأشارات المرور و لي جاري سعودي يعمل بالمرور وهو صديق وأخ فاضل قالي معلومة : قال ( أكثر المخاليفين مروريا بالسعودية هم المصريين ) والكلام بالأرقام طبعا و وجدت نفسي مكسوف منة جدا ولكن مقدرتش أتكلم لانني بصرحة كنت من الناس ده وكنت لسه ملسوع خمسين ريال مخالفة الوقوف في الممنوع.
المهم في الموضوع :

1 - أننا لازم نغير من نفسنا ونربي ولادنا على الألتزام بالمرور وبلاش الفهلوه المصري .
2 - شوية الضباط ألي قاعدين وراء المكاتب يهزوا نفسهم شوية ويتخيلوا أن في موكب رئاسي هيعدي ويساهموا بحل الأختناقات.
3 - عمل أماكن محدده للمشاه و المخالفة بفلوس أصل الواحد منا لما بيدفع بيزعل .
4 - عمل لوحات أرشادية للمواطنين توضح حركة المرور لحل الأختناقات المرورية .

فعلاً زي ما الأخ عمرو قال .. المشكلة 50 % من الناس و 50 % من الحكومة

بس ده مش عذر لبعض الناس إنهم يقولوا كده كده المنظومة بايظة ، مفرقتش بقى

لأ هتفرق كتير جداً

لسه امبارح شايف موقف يدل على أن الشعب هو الي مش منظم وهو سبب المشكلة

كنت عند مزلقان قطر ، والمزلقان مقفول ، المفروض فيه حارتين ، واحدة رايح وواحدة جاي

تلاقي على ناحيتين المزلقان .. الباشا الفهلوي داخل في الحارة المخالف

طبعاً بعد ما القطر عدا حصل Deadlock ومفيش ولا عربية عرفت تتحرك ، لدرجة إن المزلقان قفل تاني وإحنا واقفين

ما البني الآدم الي دخل في المخالف ده .. لو عنده جزء صغير جداً من العقل مكنش عمل كده ، والمشكلة إنه مستفدش حاجة بالي عمله

ربنا يتوب علينا من العقليات المريضة دي

اعتقد ان الموضوع تنفيذى جدا
مثال:
كام واحد بيعدى فى الاشارات من المشاة والاشارة مغلقة له
اكيد كتير قوى وفى كل الاشارات
طيب كام واحد من دول اخد مخالفة سير من الاخوة الامناء
ولا واحد طبعا
كام تريللا ونقل ونص نقل بيعدوا على اللجان وهم ماسكين الشمال
كتير جدا طبعا
كام واحد منهم اتوقف للسبب ده
ولا واحد
وقيس على كدة تصرفات كتير قوى خاطئة كلنا نفعلها وعارفين ان محدش هايحاسبنا عليها وعلشان كدة بنعملها
المشكلة فى التنفيذ مش فى القانون

بمناسبة السلوكيات انا لسه امبارح وانا راجع من الرحاب في طريق السويس لقيت عربية بيجو 7 راكب فوت فتحت الدائري فوقف في الحارة اليمين (الطريق كلو حارتين اصلا وسريع) والمصيبة بيرجع بضهره كمان ومن غير انتظار ولايحزنون واللي وراه كان هيلبس فيه بس ربنا ستر....
ربنا يستر طريقنا كلنا.....

انا لو مكانك ولوحدي كان زماني ركنت وراء وسبيتله وطلعت عين اهله وهعمل نفسي في الاخر اني اتعطلت ويبقى يفتح بقه

المشكلة في رأيي ليها ثلاث محاور رئيسية و تتمثل في
1 - الطرق الغير منظمة و الغير ممهدة و ديه بتعمل مشاكل جامدة زي الكروسات (التقاطعات ) مثلا زي التقاطع اللي في نهاية طريق السندباد و النقر و الحفر احيانا في ناس بتبقى عايزة تتفداها فيكسر على اللي جاي وراه
2- سلوك البشر اللى اصبح لا يحتمل
3 - عدم وجود نظام مروري متكامل لان القائمين عليه مستهترين طبعا مش كلهم (رجال المرور)

على فكرة

من ضمن مشاكلنا اننا مش حاسين بقيمة الانتماء

بمعنى ان انا دلوقتى ماشى بعربيتى فى الشارع . لو قيادتى سيئة ف أنا بضر البلد وأنا مش حاسس . ولو قيادتى محترمة ف أنا بافيد بلدى وأنا مش حاسس برضه
لأن باختصار شديد أنا وأنتوا الشعب والشعب يعنى البلد اللى عايشين فيها وبما ان البلد هى مصر إذا الشعب هو مصر ومصر - اللى هو احنا - قادرة ( أو قادرين ) على تعديل سلوكها فى سواقة العربيات وفى التعامل مع بعض

فيها إيه لو جربنا نحترم بعض فى السواقه

1- المخالفات هاتقل
2- تعداد المصابين والوفيات بسبب الحوادث هايقل
3- قطع الغيار سعرها هايرخص ( بسبب قلة الخبطات والحوادث ) وبالتالى عدم الاحتياج ليها بكثرة .
4- كمية السيارات اللى داخله البلد كل سنه هاتقل ( بسبب إن كل واحد هايحافظ على عربيته وبالتالى مش هايغيرها كل شوية لأنها هاتبقى مريحاه ) وبالتالى مش هانقع تحت رحمة أصحاب توكيلات العربيات اللى يقولك النهارده العربيه ب 75 ألف بكره ب 76 بعدوا ب 74

وشكرا