تقرير عن البيجو 307 موديل 2007 SW أوتوماتيك (الشكل الجديد كما يطلق عليه)
هذا الموضوع خاص لNile Motors وهو ليس منقول لذلك أرجو ذكر المصدر عند النقل
بداية أسف على التأخير فى عمل التقرير و أحب أوضح ان التقرير ده عن العربية ككل وليس تقييم للأداء لأن أصلا العربية بقالها معايا دلوقتى 3 شهور وعامله حوالى 34000 كيلو وانا كنت شاريها عامله 29000 يعنى يادوب 5000 كيلو. لذلك ده يعتبر تقرير مبدئى.
1) الشكل الخارجى
طبعا الشكل الخارجى غنى عن التعريف وهو يجمع بين الفخامة والرياضية كما هو موضح بالصورة. المقدمة هجومية جدا ولكن انسيابية فى نفس الوقت وهو سر جمالها.
السيارة مكونة من خمس أبواب وهى من فئة الHatch Back المشهورة بها بيجو حاليا.
2) الموتور
تأتى ال307 بمحرك 1.6 لتر 16V بنزين يولد 110 حصان عند 5800 لفة فالدقيقة ويعمل بنظام Electronic Multipoint Injection الموفر للبنزين. وبالرغم أن الموتور ليس قويا جدا نسبة لحجم ووزن السيارة ولكن برضو هو مش ضعيف والكيك داون بتاعه جامد وحسب الكاتالوج فإن العربية بتوصل من 100 – 0 كم فى 13.8 ثانية للأوتوماتيك
سعة خزان الوقود: 60 لتر
استهلاك البنزين داخل المدينة: 10.2 – 10.7 لتر/100 كم (عن تجربة)
استهلاك البنزين على الطرق السريعة: 9.5 لتر/100 كم
3) نظام الفرامل
الفرامل الأمامية: ديسكات مهواة مدعمة بنظام ABS و Electronic Brake Force Distributer (EBD)
القرامل الخلفية: ديسكات مهواة أيضا
بصراحة الفرامل بتاعتها قوية جدا ماشاء الله وفعلا ساعدتنى كذا مرة وأثبتت كفاءة فى مواقف صعبة.
4) نظام التعليق
الأمامى: تعليق مستقل من الشركة الشهيرة Macpherson وهو نظام طبعا موجود فى عربيات كتير وأثبت كفاءة كبيرة وهو مريح جدا ومفيش أى مشكلة فيه.
الخلفى: هو مكون من ذراعات على شكل حرف u وهو نظام رياضى.
العفشة عموما رياضية وناشفة شوية وساعات بتهبد طبعا وخصوصا على عيون القطط المنتشرة حاليا بس هى أحسن بكتير من عربيات تانية وأنا راضى عن أدائها بالرغم ان فيه ناس كتير مش عاجباها
5) ناقل الحركة:
نيجى بقى لأشهر حاجة فالعربية وهو الفتيس اللى الكلام عليه كتير أوى.
هو فتيس أوتوماتيك 4 سرعات مع نظام تيبترونيك من شركة بورش وهو جميل جدا وسريع الإستجابة ولحد الأن بعد 3 شهور مفيش أى مشكلة ظهرت معايا فيه ولا حسيت انه فيه أى حاجة غريبة مع العلم انى كان معايا قبليها لانسر كريستالة أوتوماتيك برضو و من وجهة نظرى الفتيس ده أحلى من اللانسر بكتير.
6) التجهيزات الأساسية والكماليات:
تتميز بيجو وخصوصا ال307 وأخواتها أمثال ال407 وال207 وانت طالع بكماليات كتير رفاهية ممتعة بصراحة بالنسبة لفئتها....ونبتدى باللا:
تجهيزات الأمان:
1) 6 Airbag (Driver – Passenger – 2 Side – 2 Curtain).
2) ABS + EBD
3) أحزمة أمان ثلاثية التثبيت 3 point seat belts
4) يمكن تغيير إرتفاع حزام الأمان للسائق والراكب الأمامى.
الكماليات: مش عارف ابتدى منين وخايف كمان أنسى حاجة!!
1) مفتاح ريموت مع وحدات رفع للزجاج من الريموت.
2) مرايات ضم مع قفل العربية وطبعا كهربا.
3) مثبت سرعة + محدد سرعة.
4) يمكن ظبط كرسى السائق والراكب الأمامى ب3 أوضاع والكراسى مريحه وواسعة ماشاء الله.
5) ذراع تحكم فالكاسيت Multi Function .
6) كاسيت CD مع 6 سماعات (صوت حلو أوى ونقى)
7) تكييف Dual Zone بعنى 2X1 يمين وشمال فكرة حلوة ومريحة لو مستفر ومعاك حد.
8) عجلة قيادة وفتيس جلد طبيعى (شكلهم حلو جدا ومحترم)
9) درج التابلوه فيه ثلاجة وجربتها وانا مسافر وفعلا بيسقع وممكن تقفله أو تفتحه عن طريق فتحة جوه التابلوه بتوصل الهواء من التكييف
10) درج التابلوه ليه مفتاح ودى ميزة كويسة علشان الناس اللى بتحب تدعبس كتير وتبص فالتابلوه!!
11) يوجد درج تخزين تحت كرسى السائق وكرسى الراكب الأمامى.
12) فيه 2 مدخل 12V واحد جنب السواق والتانى ورا
13) بلوتوث (جامد جداااا) بيشتغل على سماعات العربية وتقدر ترد وتقفل من الMulti function وبيقرا من الphone book بتاع التليفةن ويكتب الإسم على الشاشة لما حد يكلمك 14) كمبيوتر رحلات كامل يقولك استهلاك البنزين تقريبا قد إيه – درجة الحرارة برا كام...وحاجات كتير.
15) سقف بانوراما حلو جدا ومساحته واسع بس كا ممكن يبقى أحسن لو حتى كان يفتح نص فتحة كده بس ماشى الحال.
16) جنوط اسبور 16”
17) Rear Parking Sensors مهمة ومفيدة جدا فعلا خصوصا ان فالركن صعب تشوف أخر العربية بالتالى مابتعرفش المسافة بينك وبين الرصيف قد إيه
من أهم مميزات العربية ان الكنبة الخلفية مقسمة لكراسى وكل كرسى بيتحرك لوحده لقدام وورا وكمان يمكن إضافة صف تالت وتبقى العربية 7 راكب. السقف البانوراما
الصالون الداخلى (خامات نضيفة جدا وتقفيل ممتاز)
الكنبة الخلفية 7) أبعاد السيارة بالرغم من إن العربية ستيشن وكبيرة ماشاء الله من جوه إلا انه غير ما يعتقد البعض فهى طولها زى معظم العربيات السيدان زى الميجان II واللانسر والمازدا!! وده لأن تصميمها زى ما تقول كده مدملك!!
الطول: 4.42 متر
العرض: 1.75 متر
الإرتفاع: 1.58 متر (هى عالية حبتين بس ده مخلى الفاعدة جوا مريحة وواسعة)
الإرتفاع من الأرض:
الخلاصة:
1) العربية مناسبة جدا للعائلات وغير العائلات.
2) كماليات كتيرة ومفيدة.
3) السقف البانوراما جميل جدا وخصوصا لما تكون الشمس مش قوية والسما صافية.
4) وسائل أمان محترمة كعادة السيارات الأوروبية.
العيوب:
نظرا لأن الإستخدام لسه مش كبير أوى زى ماقلت فبصراحة أنا مش شايف عيوب تذكر حاليا غير ان التوكيل يعتبر من أهم عيوب العربية نظرا لضعفه الشديد والمعاملة السيئة والأسعار العالية لقطع الغيار والإكسسورات (سألت على المساحات الأمامية لقيتها ب450 جنيه!!!)...وربنا يسهل بقى ويتضبط.
أتمنى يكون التقرير أفادكم وعجبكم...وياريت ماكنش طولت عليكم...وانا تحت أمركم فى أى استفسار
تحياتى للجميع
م/ أحمد
المفضلات