الموضوع: الروااااس ,,, عاد اليكم من جديد !!

فى ظل الكلام الكتير والرغى اللى ملوش لزمه اللى بناخده من حظاظا كل يوم سبت فى عمود الاسرار وحريه الاختيار المخصص فى الصفحات الاولى من اخبار اليوم واللى لله الحمد ملوش اى لزمه من يوم ما اتعمل أطل علينا رجل المخابرات المصرى الهمام خالد اباظه بخبطه صحفيه جهنميه عن سر من اسرار حياه فرج الرواس الشخصيه

خير اللهم اجعله خير ومن مصادر خالد السريه اللى بيموت فى استعراضها فى مقالاته تحت عنوان ( فى محاوله لإعاده المياه الى مجاريها ) ان فرج الرواس توجه الى دبى يوم الاثنين الماضى للإجتماع مع العضو المنتدب لميتسوبيشى فى مكتبها الاقليمى للشرق الاوسط لعرض خطه عمل جديده تستمر لمده 12 شهر بهدف تحقيق متطلبات سبق وان طالبت بها ميتسوبيشى الرواس خلال العام الماضى ولم يستجيب

الطلبات على حد تعبير خالد اباظه كانت مراكز خدمه جديده للتوكيل وضخ مبلغ مالى كبير فى مجال قطع الغيار و تجديد مكتب الشركه الرئيسى فى القاهره وعمل ترتيب وتنظيم شامل لإداره الشركه فى مختلف النواحى وحتى القيام بتعديلات فى المناصب العامله بالشركه , ايضا شملت الخطه استيراد كميات اكبر من اللانسر ( الله يخربيت اللانسر اللى معنودش غيرها ) وبعض السيارات الاخرى

وعلمت اخبار اليوم ان الرواس عرض فتح اعتمادات فوريه تصل قيمتها الى 300 مليون جنيه يخصص لإستيراد موديلات 2011 , وفى عصر نفس اليوم اجرى الرواس مكامله مع مديره المالى للبدء فى فتح تلك الاعتمادات تأكيدا منه لميتسوبيشى على حسن نيته ومحاوله لكسب رضاهم


واوضح خالد اباظه ان الرواس لم يصطحب معه اى من افراد عائلته او موظفيه ولكن اكتفى فقط بمحاميه الخاص د. سمير صبرى والذى لحق بالرواس فى اليوم التالى مساءا ليلحق بالجلسات التى استمرت من الاربعاء وحتى الخميس بين الطرفين , ويأمل الرواس اقناع ممثلى ميتسوبيشى بمد العقد لمده سنه واحده كفتره تجربه استعدادا لفتح عقد جديد مدته 5 سنوات يتعهد خلالها بمواصله دهم اسم ميتسوبيشى فى مصر

المصيبه فين بقا !!! , المصيبه فى الحته الجايه دى

وأبدى الجانب اليابانى موافقته الفعليه على اعطائه مهله اخيرة حتى يوم 30 يونيو القادم لتقييم عمليه اصلاحه لجميع الاخطاء وتنفيذ كل مطالبهم ويمكن بعدها ان يتراجعوا عن سحب التوكيل منه وتمديد مده العقد لعام اخر قابل للتجديد ووعدهم الرواس بأنه سوف يكون اكثر جاهزيه لإداره التوكيل على اكمل وجه خلال الفتره القادمه



يعنى بالعربى البسيط الرواس راجع , بعد كل اللى شوفناه راجع , بعد ما افتكر انه وقع الشركه راجع , بعد ما نسينا معاه ان ميتسوبيشى دى شركه وان لانسر دى العربيه وبدأنا نقول العكس راجع , بعد الفلوس اللى اكلها مننا بدون وجه حق راجع

ومن المقاله نفهم ان ميتسوبيشى من السنه اللى فاتت طلبت منه تجديدات ومراكز خدمه وخطط عمل جديده وهو كبر دماغه , ده حتى الناس بتشتكى من مكتب التوكيل الرئيسى انه محتاج تجديد ( حاجه تكسف ) , ده بجانب انه الحمد لله اعتمد 300 مليون لأستيراد عربيات جديده ولانسر طبعا وكأن ميتسوبيشى خلاص تجسدت جسدا وروحا عنده فى العربيه السيدان اللى مش هنشوف غيرها دى

معنديش كلام تانى اقوله , وكل توكيل وانتم طيبين

والله يكرمك يا خالد يا اباظه سواء كتبت مقاله مفيده او هايفه برده متخصص فى التنكيد علينا