الموضوع: اعود اليكم بعد 50.000 كم.. وحشتونى

بسم الله الرحمن الرحيم

الساده الأفاضل المحترمين زملاء الطريق والالنترا
انا عضو بالمنتدى من اواخر 2010 لما كنت لسه فى مرحلة البحث عن عربيه جديده وكنت ما بين الصنى والالنترا وربنا كرمنى بالنترا بتنجانى اول فئة فى الاوتوماتيك استلمتها يناير 2011 وكنت ساعتها حكيت القصه كلها وناس كتير من حضراتكم باركولى وادونى نصايح ف الجون
الحقيقه انى مقصر سواء فى المتابعه او فى الاشتراك فى المواضيع من حوالى سنه لظروف كتير اوى لكن انا رجعت علشان اتابع الدنيا معاكم وان شاء الله استمر فى المتابعه
المهم انا دلوقتى عملت خمسين الف كيلو.. بصراحه ماندمتش لحظه على اختيار الالنترا ويمكن الحاجه الوحيده اللى ساعات بتحز ف نفساويتى ان سحبها مش قوى لما اشغل التكييف (التكييف مع الاتوماتيك مشكله) لكن بخلاف كده تمام.. سمعت نصايحكم (بجد والله استفدت جدا جدا من النصايح دى وفيه ناس كأنهم اخوات واستفدت منهم جدا ) اللى هى اصلا كانت ماشيه مع شخصيتى اللى هى الحمد لله بعيده عن اسوأ ما فى المصريين الفهلوه والاستسهال.. الصيانه كانت بتتعمل فى ميعادها.. الف وبعدها خمس الاف وعشره وهكذا، تغيير الزيت كل 10000، ف الاول كنت باضرب المشوار لغاية ابو رواش وبعد كده بقيت اروح مركز خدمه فى الرحاب، معملتش اى حاجه فى العربيه من حيث الكماليات، اصلا ماليش ف الفيميه ولا الصوت العالى .. وبالنسبه للجنوط فلا ولا فوجات ولا حتى سينسور باركينج، مش عارف ليه كسلت اعمل كل ده لكن الحقيقه نفسى احط فوجات اللى اتكلم عليها الاستاذ كريم (زينون) وال (ليد) بتاع الصالون كمان، وبرضه السينسور باركينج لكن الجنوط لأ.. طبعا العربيه لأنها ماشيه فى شوارع المحروسه خدتلها كام خربوش على كام نقره وشوية تجريح .. مهتم بأن بعد كل صيانة اطلع ع البنزينه اغسل الموتور كيماوى والشاسيه بالجاز علشان التراب والطين والبلاوى اللى ف الطريق ماتسكنش العربيه.. كنت عملت حادثه موتوسيكل خيش ف الاكصدام وطلع عين اللى خلفونى ف تصليحه ف الحرفيين ولقيت الموضوع صعب اوى ما بين بتاع فيبر بيلحم وبوهيجى وفرن لدرجة انى قلت اقصر واجيب واحد جديد.. الحادثه دى جرحتلى قربة الميه بتاعت المساحات وجبتها اصلى جديده ب 220 جم.. آسف ع الاطاله لكن كان نفسى احكيلكه على تجربتى عند حدود ال 50000.. وتحت امركم فى اى سؤال
انا بقى ليا سؤالين: الاول) انا وصلت خمسين الف.. هل فعلا لازم اغير الأربع فرد كاوتش زى ماكتبولى ف الريبورت بتاع صيانة الخمسين ولا اخلى حد يبص عليهم الاول واغيرهم على ستين؟ ولو اغيرهم اجيب ايه يكون سعره معقول وآداؤه كويس، التانى) انضف حد اركب عنده السينسور والليد والفوجات وانسبهم سعرا مين؟ وهل فيه كماليات تانيه (((يكون مالهاش دعوه بأساسيات العربيه))) بتدى اضافه لشكل العربيه تنصحونى بيها
نسيت اقولكم وأوصيكم بالكلابش بتاع الدريكسيون واهميته القصوى فى الايام الغبره اللى عايشينها .. ونسيت اقولكو برضه على فرش العربيه وجبته جلد ف قماش من لبنان بحوالى 270 على ما اتذكر يعنى
تحياتى للجميع

المشاركة الأصلية كتبت بواسطة badreldinahmad

سؤال تانى بعد اذنك.. موضوع الكشف على الاطارات عند بريدجستون بيتكلف اد ايه؟

مافيش تسعير للكشف علي الاطارات
أنت ممكن تدخل تظبط ضغط الكاوتش أو تعمل ترصيص (لو الكاوتش محتاج) و هو بيشوف حالته و يقول لك , يعني 5 جنيه لو ظبط ضغط هوا تطبقهم و تديهم للواد هايقولك الكاوتش عامل أيه فردة فردة

و علي فكرة هيا مش محتاجة خبير يعني أنت ممكن تعرفها بنفسك من أرتفاع مداس الكاوتش عن العلامات الموجودة عليه

هأحاول أجيب لك صورة واضحة للموضوع ده