الموضوع: بعد 8 مرات ترصيص .. وسنه ونصف هزه فى العربيه ...اتحلت والحمد لله

السلام عليكم اخوانى الأعزاء:
حبيت اشارك بتجربتى لعلها تفيد أحد غيرى....
أولا : انا كان عندى هزه فى العربيه من بعد سرعه 100كم/س تقريبا من ساعه ما جبت العربيه وهى هزه بتبقى فى العربيه كلها
ثانيا: انا رصصت حوالى 8 مرات منهم مرتين فى بريدجستون اللى فى لوران على البحر والعربيه مش عاوزه تتظبط وابدل العجل وبرضه مفيش فايده
ثالثا : جبت طقم كاوتش جديد (مش عشان المشكله مخصوص) وقولت ربنا يجعل فيه الشفا وبرضه مفيش فايده
رابعا:واحد زميلى فى الشغل(كان عنده نفس المشكله وكان هيغير جنوط ) دلنى على مركز خدمه اطارات (زوايا وترصيص ونيتروجين) جديد فى سموحه وهو بتاع اتنين مهندسين زملاء لنا فى نفس الشركه بس فى قطاع تانى وروحتلهم وشوفت عندهم جهاز ترصيص جديد مشفتهوش قبل كده
الجهاز ده فيه درفيل كبير بيلامس العجله اثناء دورانها على الجهاز علشان يجيب العالى والواطى فى الكاوتش نفسه وكمان بيجيب العالى والواطى فى الجنط نفسه وبعد كده يحددلك نقطه معينه على الجنط واخرى على الكاوتش علشان تلف الكاوتش على الجنط لحد لما النقطتين ييجوا على بعض علشان استداره العجله تبقى سليمه متبقاش عامله زى البيضه
غير كده الجهاز بيخلى الفنى يدى لكل عجله رقم معين من 1 الى 4 علشان يعلم بيهم العجل والجهاز بيسجل معلومات كل عجله بنفس الرقم على الذاكره بتاعته
بعد انتهاء ترصيص العجلات الاربعه الجهاز بيحددلك افضل توزيع للاربع عجلات فى العربيه بحيث انه يديك اقل اهتزاز وكمان بيقيس حدفه العربيه الناتجه عن مقاسات العجل الموجوده فى الذاكره وكمان ممكن تشوف جميع احتمالات توزيع العجل وفى كل احتمال بيحددلك الحدفه هتبقى كام نيوتن وفى اى اتجاه ( يمين او شمال)

على كلامهم الجهاز ده موجود فى مصر فى مكانين ... عندهم وفى توكيل جاجوار فى القاهره

النتيجه راااااااائعه والحمد لله ... الهزه راحت تماما بس فى هزه لما اجى افرمل وخاصه من سرعه عاليه بيتهيألى دى ليها دعوه بالطنابير مش من العجل - علشان كده احب اقول لأخواتى البروتونيين انا كنت دايما بأنصح بالتيل الريمسا اللى بقالوا معايا حوالى 25000 كم حتى الان وكفائته ممتازه فى الفرامل .. بس بصراحه مش عارف رجه الفرامل دى بسببه ولا لأ (وده لتحرى الأمانه فى نقل التجربه)

انا شرحت الموضوع بناءا على معرفتى البسيطه به ارجو المعذره فى حاله عدم الدقه

المحل ده فى عمارات الصيادله فى سموحه من ناحيه شارع مسجد حاتم واسمه (ديستينيشن destination)

فعلا ممنون للناس دى جدا .... ياريت لو حد راح يقول انه من طرفى (م/اسلام ابراهيم - جين 2 ) علشان هما عملوا معايا واجب جامد فى السعر وانا عاوز اردلهم الجميل

المشاركة الأصلية كتبت بواسطة ahmed_h_g

الف مبروك وربنا يباركلك فيها

الله يبارك فى حضرتك ويحميلك سيارتك من كل مكروه

المشاركة الأصلية كتبت بواسطة mbx4e

مبروك يا باشا الف مبروك حلوه المعلومات بتاعتك كتر خيرك بس ياريت تقلنا على التكلفه بالتفصيل عشان نستفيد
تاني حاجه الرجه اللي بتحصل دي بسبب الفرامل عايزة مراجعه دقيقة خطوة بخطوة
ابتداء بالبدال والحساسات والايه بي اس لو عندك وانوع وكمية سائل الفرامل والاولسيهات بتاعت المساتروالطنابير وسمكها ( على فكرة ممكن تكون عايزه تصنفر او تتخرط وكذلك التيل ممكن يكون عايز يتنظف او يتصنفر ) ونوع التيل وسمكه وما تنساش اللسوست اللي في الماستر بتاع كل فرده

التكلفه بالنسبه للترصيص 120 جنيه كل العجل والزوايا تقريبا ب 60 جنيه والنيتروجين تقريبا ب 20 جنيه دى الأسعار المعلنه بس انا عملوا معايا واجب علشان زملاء فى شركه واحده وبيتهيألى فى تخفيض 20% الأيام دى علشان فاتحين قريب

وشكرا على المعلومات الجامده دى انا كنت فاكر ان الموضوع طنابير والسلام .... بس مين ممكن يبصلى على كل الحاجات دى ؟؟

المشاركة الأصلية كتبت بواسطة tweety26980

كلامك تمام مليون الميه ياباشمهندس
وربنا يباركلك وعموما الرجه مع الفرامل دي طنابير او تيل ولكن الغالب من الطنابير ونصيحه مني الريمسا مش حلو وهو اللي بيبهدل الطنابير كده وعن تجربه

ان ضف تيل موجود حاليا اللي في التوكيل اللي علبته مكتوب عليها بروتون ازرق في ابيض
بيقعد فتره طويله وفرامله كويسه وقليل اوي لما بيصفر وسعره 250 جنيه تقريبا

لابنا يباركلك في عربيتك

تحياتي

انا بصراحه كنت بحب الريمسا لأنه طول معايا وفرامله كويسه بالنسبه للتيل الأصلى ..... بس من كلام حضرتك المره الجايه هجرب بتاع التوكيل وربنا ييسر .... والف شكر على المعلومه

المشاركة الأصلية كتبت بواسطة kareemz

الحمد لله ان المشكلة اتحلت.
بس ممكن تقول لنا عنوان المركز ده عشان لو حد حب يضبط زوايا أو يرصص.

المركز فى ضهر عمارات الصيادله اللى فى سموحه من ناحيه شارع مسجد حاتم بجانب مديريه الأمن

المشاركة الأصلية كتبت بواسطة أبومريم

شكرا على نقل التجربة يا اسلام باشا بس انت مقلتلناش المشكلة كانت فين؟

العفو حضرتك تأمر ... المشكله اتحلت لما لف الكاوتش حول الجنط زى ما الجهاز نصح ....بمعنى اخر ان كان فيه عالى فى الكاوتش مع عالى فى الجنط فكان مخلى العجله كأنها بيضاويه ..... ده اللى انا فهمته !!

المشاركة الأصلية كتبت بواسطة hosar

طب و التكلفة كام؟؟؟

مذكوره فى رد سابق

المشاركة الأصلية كتبت بواسطة Nistelrooy

ياريت الجهاز ده يكون موجود كمان في القاهرة

على حسب كلامهم موجود فى توكيل جاجوار .... سهله جدا .... ممكن حضرتك تشترى عربيه جاجوار وأستمتع بيه براحتك

المشاركة الأصلية كتبت بواسطة mahmoudbadr

يا ريت تكلفة الترصيص

و ضبط الزوايا

مذكوره فى رد سابق