امبارح انا للاسف كان عندي كورس في القاهره مشيت من هنا الساعه 8 الصبح عشان اوصل قبل الصلا و صليت الجمعه في دار المشاه و ركبت العربيه كانت بتشتي جامد اوي هوب عاوز الف من تحت كوبري القبه عشان ارجع على مكان الكورس في عباس العقاد زحمة مووت و الطريق واقف اتاري فيه عربيات وقفت في مطلع كوبري القبه من المطر و بركه مياه محترمه
رحت الكورس و خلصت عالساعه 8 الا ربع قلت يا واد عشان ارجع صلاح سالم و الف لفه ما لهاش لازمه خد دائري مدينه نصر و ياريتني ما اخدته بس ما فرقتش كتير لان اكتشفت بعد كده ان صلاح سالم واقف و كوبري المطار واقف و الدائري واقف و كله واقف في واقف فضلت من الساعه 8 و نص في نص الدائري بتاع مدينه نصر وصلت البنزينه اللي بعد منزل كوبري الهايكستب الساعه 1 ونص بالليل و لقيت طوابيييييييير غفيره عالحمام هناك ستات و رجاله و السوبرماركت و طبعا عربيات عطلانه بالكوم و الميه واصله لغايه نور العربيه وقلت انا مش مروح النهارده و سامع صوت بكبكبكبكبكبكبكبك اتاري الشككمان كان غطسان في الميه و بيبكبك
و الكلاكس فصل الحمد لله
وصلت لبيتي الساعه 4 صباحااااا
انا النهارده طبعا مار وحتش الشغل و نمت ولا القتيل و اتعملي عارضه
سؤال بقى مش المفروض مطالع و منازل الكباري دي ليها صرف
فين البيارات اللي بتشيل ميه المطر ولا دي رفاهيات
ربنا يخللنا رقم 125 اللي مشوفتش ليهم ولا عربيه بتشفط الميه غير عند المطار 3 عربيات و كانوا بيرموا الميه اللي بيشفطوها في المطار