طبيعى انك تفقد جزء من مية التبريد خلال التشغيل الطبيعى للعربية... مهم نسبة الفقد دة قد ايه
عادتا بيعتبر تزويد المية (او اى سائل اخر للعربية) بشكل دورى او بكميات كبيرة يدل على وجود تسريب... يعنى لو انت كل شهر بتزود نص لتر (سواء مية تبريد او زيت باور او زيت موتور) او كل اسبوع بتزود ربع لتر يبقى انت عندك حاجة بتسرب و دة مش طبيعى
معظم صناع العربيات بينصح بالكشف الدورى على السوائل بتاعت العربية... و لو احتاجت كمية قليلة لتكملة مستوى اى من السوائل عند الكشف دة يعتبر طبيعى... بس مش طبيعى ان عند كل كشف تحتاج اعادة تعبئة لاستعادة المستوى
مية التبريد تحديدا بتسخن جامد و دة بيؤدى الى تكون بخار... فى بعض الاحيان الضغط داخل دورة التبريد بيزيد عن حد الامان و الضغط الزائد بيخرج من خلال بلف غطاء الرادياتير او القربة و التنفيس دة حيخرج معاه جزء من بخار الماء مما يؤدى الى انخفاض مستوى مية التبريد
طبعا الكلام دة بنسب قليلة جدا جدا ممكن متحسش بيها الا بعد كذا شهر من الاستخدام... يعنى ممكن فى فصل الصيف تحس ان المستوى انخفض حاجة بسيطة و فى الشتاء المنسوب شبة ثابت
ارجو ان المعلومات دى ساهمت فى الاجابة على استفسارك
MMamdouh
المفضلات