الموضوع: التكييف بيفصل لوحده!!!!

المشاركة الأصلية كتبت بواسطة beshomilan

اشكرك يافندم للرد

بس انا دايما عامل التكييف على التقليب الداخلى ومبغيرهوش خالص

بس استفسار اخر..

ليه لما بشغل المروحة بس بتطلع ريحة سيئة جدااا ولما بشغل التكييف بيكون الهوا نقى عادى
ايه الحل فى ريحة المروحة من غير فك اى حاجة او الذهاب لصنايعى لان التكييف سليم ومش عايز حد يلعب فيه
انا جربت ارش برفان على مخرج الهوايات فى التابلوه ولا حصل اى شىء
مش عارف اعمل ايه فى الريحة دى

السلام عليكم

الريحه بتيجى من كذا حاجه
1/ لو حد بيدخن داخل السياره.
2/ السياره اتغسلت والمياه دخلت تحت ،على الفرش واللباد اللى تحت الدواسات خصوصا لوالعربيه فيها طبب كاوتش بالشاسيه والدواسات وقعت او طارت من غسيل شاسيه السياره بالخرطوم بتاع ضغط المياه - دايما خليك بالمسدس الرزاز الكيرشر و من بعد وبدون جاز .
3/ البوابه بتاعه التوربيدو - السدراللى تحت المساحات - بيتسيبها مفتوحه و هنا الموضوع :-

البوابه معموله علشان تجدد الهواء الداخلى من المدخنين او السفر حيث لو مقفوله بيستهلك الاكسجين اللازم للتنفس و يتصاعد الزفير - اول اكسيد الكربون - و بالتالى يشعر قائد السياره بالنعاس واذا قدر الله تحصل حوادث لانك بتحس ان الاوكسجين قل وعاوز تنام .
طب لو سيبنا البوابه مفتوحه ايه اللى يحصل ؟؟؟؟؟

حاجتين بيحصلوا:-

1/ الهواء الخارجى الملوث بالعوادم و الاكاسيد الغازيه خصوصا الرصاص - من تاتج احتراق شكمانات العربيات - و ده بيموت فى حاجه اسمها الالومينيوم - بيمسك فيه زى السكينه ماتنزل فى حته الحيلاوه - و بتلاقى بعد فتره الثلاجه الداخليه ابتدت تتخرم و تنفس - وتتبتدى مشاكل اللحام و التغيير و تنفيض الجيوب.

طب زمان ليه الموضوع مكنش مؤثر اوى - من 8 الى 10 سنوات سابقه -

الاجابه

بسم الله الرحمن الرحيم
الثلاجات الداخليه كانت بتتعمل من الانتيمونيا اونحاس معالج مغطى بالقصديراو العوازل - وده كانت تكلفته معقوله - و النحاس من المعادن المقاومه - اما لما النحاس غلى جدا جدا - اتجهت شركات الصناعه لللالومينيوم - و سبحان الله كل حاجه مطوره ليها مزايا و عيوب .

و طبعا لما بنسيب البوابه مفتوحه بيدخل مع الهواء الخارجى - بخار مياه / اتربه .........الخ ودى لو مشغلين المكيف و الثلاجه بارده بتعمل طين و اتربه مخاطيه على الثلاجه و من هنا تتبتدى تطلع الروائح الكريهه

الاهم .....

الفطريات اللى بتتكون على الثلاجه نتيجه التبريد و بعدين نقفل التبريد عند الركن او نهايه السفر و الثلاجه ترجع لدرجه حراره الجو الدافيه العاديه - نلاقى الميكروبات و الفطريات بتنمو فى هذا الجو المهيئ للتكاثر - بارد رطب ثم دافء ..

علشان كده ناس كتير لما بتشغل المكيف تجيله حساسيه او كحه خصوصا لما يكون فيه سنافر صغيرين فى العربيه و ده طبعا لان مقاومتهم ضعيفه و بيتاثروا اسرع.


الحل من وجهه نظرى الشخصيه

1/ تجديد الهواء الداخلى بفتح البوابه عند السفر فقط على فترات قصيره 1/2 دقيقه مثلا و ذلك لما ميكونش فيه عوادم عربيات قدامك.
2/ الامتناع نهائيا عن فتح البوابه داخل المدينه.
3/ الاهتمام بركن العربيه فى الظل بدون ما تكون تحت شجر كتير علشان بينزل من فتحات التوربيدو على فتحه البوابه و احيانا كتيره بيتحشر و يخلى البوابه مواربه و تبتدى المشاكل.
4/ الاهتمام بتغيير و نظافه فلتر التكييف للسيارات الحديثه المزوده بذلك.
5/ تعقيم المجارى الداخليه كل 10 ايام على الاقل - خصوصا فى فتره الصيف كالاتى :-
1/ تنزل على اى هايبر ماركت كبير
2/ تروح قسم المعطرات المنزليه
3/ تدور على معقم هواء - جونسون اند جونسون - مستور و صناعه سعوديه - اخر مره جبته كاب ب 14 جم تقريبا - المهم اسمه aoust - اى اوست .
4 تروح محطه بنزين بنت حلال .
5/ تفتخ بوابه التكييف من غير ماتشغله
6/ تضرب خرطوم الهواء فى الفتحات و المجارى بتاعه خروج الهواء مع ملاحظه انك تقلب مفتاح التحكم فى اتجاه خروج الهواء اللى فى لوحه التحكم بتاعه مكيف الهواء ( من الداش بورد - الزجاج الامامى - الاقدام - الوجه ).وكل ده و انت طافى المروحه - بس فاتح البوابه علشان الهواء يخرج منها - و الكلام ده للسيارات اللى مافيهاش فلتر مكيف الهواء اللى فى التوربيو - واذا كان الفلتر راكب هنضطر نشيله علشان الهواء يخرج من البوابه .
7/ تشغل المروحه على اعلى سرعه للحظات و البوابه مفتوحه
8/ نقفل المروحه - نضرب المعقم - و هو من غير ريحه - فى كل الفتحات لمده 1/2 دقيقه كده و نستنى 15 دقيقه بعدين نشغل التكييف

بكده انت عملت 50 الى 60 % من تنظيف الكويل او الثلاجه و المجارى الداخليه


الصح و الاجمل كل 3 سنوات بنفك الثلاجه عند حد بتاع مكيفات محترم - تتغسل و تتطهر بالمعقمات زى داك السعودى او ديتول و ننظف المجارى ونشحن و فى مركز اعرفه بيعملى القصه دى بكفاءه وراضى جدا من النتيجه.

نصيحه

1/ وانت بتنظف الصالون من جوه استخدم مكنسه فقط طب ليه ؟؟؟

لان مهمها فتحت الابواب وخرطوم الهواء شغال بيبقى ضار على التابلوه والهوايات ( كانك بتنفض سجاده فى اوده مغلقه كلها ماعدا باب الغرفه فقط و بالتالى التراب بيمسك فى السقف و يخش فى التابلوه و يردم الثلاجه.
2/استخدم معطر ابن حلال و انسب مكان ليه تحت كرس السائق.

اسف للاطالة و صيف سعيد من غير مشاكل بمكيف الهواء


تحليلى لحاله المكيف عندك - الثلاجه فيها شوائب كتير و الثرموستات موش بيحس بالتبريد علشان كده مبيفصلش وو لما الكباس بيقعد شغال لمده و الثرموستات مفصلش الحمايه اللى على الكباس بتفصله اجبارى علشان الحمل اللى عليه و يرجع يشتغل تانى .و الله اعلم
دمت بود