حد حصلت معاه المشكلة دي

**shark_3li** · 02-09-2011 04:42 AM

السلام عليكم
طبعا بكمالة المشاكل الي عمالة تحصل في العربية مجتش على الدركسيون
أنا مش عارف حصلو إيه كنت ماشي كويس قوي بالعربية والدركسيون زي الفل وبعدين بركنها فـبرجع بضهري وهو بيلف معايا زي الفل
لكن أول ما جيت اعدل العربية لقيت الدركسيون تقل جدا كاني مش مدور العربية أصلا ما بقاش في بور خالص مرة واحدة والغريبة إن مفيش أي لمبة نورت أو أي رسالة طلعتلي على الشاشة .
طبعا أنا خلصت المشوار واضطريت أروَّح بالعربية وهي بالحالة دي لان مكنش في أي حد فاتح الساعة كانت 3 الفجر ربنا يستر وميكونش ده أثر على حاجة تانية أو بوظ حاجة تانية غير اللي باظت
في حد حصلتله المشكلة دي قبل كده أو عنده فكرة عنها مع العلم إن الدركسيون حصلوا كده فجأة فأعتقد إنه مش زيت بور

**ahmed.zahra** · 03-09-2011 05:52 PM

ممكن يكون زيت الباور فعلا أو طرمبة الباور قطعت أو علقت أو مبقاش واصل لها باور لأي سبب من الأسباب، اعتقد انها هتكون مشكلة بسيطةو اليمكانيكي حيعرف يحلهالك. ربنا معاك و طمننا

**MuhamedNabil** · 04-09-2011 02:15 AM

دى للاسف طلمبة الباور حقلك على كام حاجة ممكن تبص عليها بنفسك لان حصلى الموضوع ده و اشتاريت واحدة استيراد و بعد كده فكيت بتعتى القديمة عشان اشوف لو فيها حاجة تتصلح

- فيور الطلمبة و ده فى علبة فيوزات الكابوت و العلبة جواها دورين فوق بعض , الفيور MF2 30 amp حتفوك غطاء علبة الفيوزات حتلاقى شوية فيوزات ظاهريين ال MF2 تحت الكارتة دى , حتلاقيها ممسوكة ب 3 كلبسات بتدوس عليهم عشان تقدر تطلع الكارتة و تشوف الجزء التحتها

- زيت الطلمبة و ده حتلاقى خلف الكشاف اليميمن و ملكته صعبة شوية , حتلاقى غطاء عليه دركسيون تفكه و تشوف مقاس الزيت

- فيشة الطلمبة و دى لازم من تحت العربية تفكها و تشف لو فيه صدئ او الاطراف مماحة و هما عادتا بيحطوا شحم بعض المكانيكية و التوكيل احيانا لما العربية بتكون سخنة و الشحم سايح بيقلك الطلمبة جابت زيت من الفيشة و ده جائز برده , تقطع الشك باليقين انك تشوف الموضوع ده و العربية او الفيشة على الاقل باردة

- اخر حاجة بقى ان الطلمبة تكون قطعت نيجة ان فيها عطل برده متستسلمش لان ممكن تتصلح و ممكن لا

الطلمبة الجديدة ثمنها 3700 جم اصلى من عند غزال فى شارع دمشق و استعمال 1500-1600 عند واحد اسمه محمد سمك فى الحرافيين فى نص شارع المرسيدس اى حد يدلك عليه. و لو حتجيب استعمال يبقى لازم تشوفها بتتفك من العربية قدامك عشان فى منهم بيبقوا متصلحيين و بيبعوهم تانى.

الطلمبة عشان تعرف ممكن تتصلح و لا لا لازم تتفك و تتفصص حتت انا عندى الصور ليها بس شوف الحجات القلتلك عليها الاول.

**shark_3li** · 04-09-2011 04:30 AM

تمام يا محمد باشا انا بكرة الصبح هبص علي الحاجات السهلة زي الفيوزات و الفيش و ان شاء الله تطلع حاجة فيهم و تكون بسيطة
و الف شكر ليك و لازاهرا باشا و متحرمش منكم ولا من رجالة المنتدي

**shark_3li** · 05-09-2011 10:05 PM

للاسف مفيش حاجة من الحاجات البسيطة دي نفعت
بصيت علي الفيوزات ال٣٠ امبير كلها سليمة
وبصيت علي زيت الباور مليان لحد الماكس
ورفعت العربية بالكوريك وشيلت الفيش ونضفتها وركبتها تاني بس مفيش فايدة بردو الباور مش شغال

**MuhamedNabil** · 07-09-2011 12:51 AM

طيب كده بقى فاضل اخر حاجة و دى الحتفصل فى الموضوع بس الخطوة دى لو ناوى تشتغل فيها بنفسك اعمل حسابك على زروطة جامدة , نخوش على الخطوات

في سلك الارضى حتلاقيه اصفر فى اخضر و مربوط خلف الكشاف اليمين بص عاليه شوفوا عامل كونتكات مظبوط و لا مصدى الاول لقيته تمام خش على التقيل بقى

- تفك طلمبة الزيت و تصفى الزيت تماما منها
و عشان تفكها لازم تفك الاكسيدام و تفك قربة المية بتاعت المسحات و حتلاق الطلمبة قدامك واضحة و ممسوكة بتلات مسامير فقط

- بعد فك الطلمبة و تصفية الزيت حتفك القربة بتاعت الزيت من االطلمبة و هى مربوطة باربع مسامير تفكهم و حتلاقى الطلمبة بقت قطعتين و حدة هى الاربه السودة و التانية الجزء الفيه الشريحة و الماتور و ده الجزء الفيه الشغل و الجزء بتاع القربة تشيلو كده بالفى لان مش مفهوش شغل.
دى صورة الطلمبة متفككة للتوضيح و الشريحة دى الاحنا عايزين نوصلها

نمسك الجزء العلى الشمال و حنفك التلات مسامير الجوة و فى 6 مسامير من الخارج موضحين فى الصور

القطعة الفيها الشريحة ملزوقة بسيليكون عشان متسربش حتحتاج شوية عافية عشان تفك السيليكون بس منغير دق خالص

اول متتفك تخلى بالك لو فيه اى حاجة مفكوكة بداخل وقعت و ده المنظر

و المشكلة ان بيبقى فيه مكثف لحامه بيفوك ممكن تلاقيه واقع اصلا جوة الشريحة و ممكن تلاقى بعض الارجل لحمها فك و دى كانت الحالة العندى و اكتشفتها بتوفيق من ربنا ايدى جات على المكثف بدون قصد و لقيته مفكوك
لان الدايرة مكانش باين فيها اى عيب ظاهرى

و لو وقع بتلاقى مكانه فاضى كده

تاخد الشريحة لحد بتاع كهربة كويس يلحملاك المكثف تانى و خالى بالك من الاتجاه الفى الصور عشان ميلحمهوش بالمشقلب
انا وديتها للمأمون لحملى الاتنين تانى و رحعت قفلت بس لسة مجربتيش لان الموضوع كان اخد وقت منى بزيادة

و بالتوفيق

**shark_3li** · 07-09-2011 09:59 PM

يا محمد باشا أنت كده تعبت معايا بزيادة والله
بس أنا اللي استعجلت لاني كنت محتاج العربية ضروري فـ وديتها امبارح تتصلح ولسة مستلمها النهاردة وأنا هاقولك اللي حصل
دلوقتي هو أول مودتله العربية كشف عليها بالكمبيوتر وقال لي العيب عندك من الكنترول بتاع الطلمبة
وعيب الكنترول ده في منه البيتصلح وبيتكلف 600 جنيه وفي منه اللازم تغير الطلمبة كلها بـ 1500 جنيه وفي الحالتين هسيبله العربية بايتة عنده وهاعرف بالتلفون العيب من إيه
سبت العربية و كلمته بالليل قال لي هتتصلح قلتله صلحها مع إني كنت مستغلي السعر قوي بس يلا الحمد لله
وعملي كمان النتشة بتاعت الفتيس وأنا هاكتب في الموضوع اللي كنت عمله عن النتشة صلح النتشة إزاي
كمان مرة يا محمد أنا بشكرك جدا على تعبك معايا وإن شاء الله مردودالك في أي حاجة أنا اقدر أعملها

**MuhamedNabil** · 07-09-2011 11:31 PM

ولا يهمك برده عشان الناس تستفيد , انا اصلا كنت عايز اكتب الموضوع ده من فترة بس الكسل وحش اوى
و هما بقى بيعملوا اللعبة دى ب 600 جنيه للاسف كتير عليها هو شغل كتير بس مش للدرجة دى
ده انا نزلت الجير بوكس عشان اغير طقم الجوانات بتاع قربة زيت الجير و الكبالن و المكانيكى اخد 300 جم و مرضتيش افاصل معاه بس اطحن شغل
للاسف هنا بياخد منك نسبة من ثمن الحاجة البيصلحهالك و ان كان تكلفة المصنعية اقل بكتير
و يعودوا يماوهو عن العيب عشان متوصلوش و تعمله بتكلفة اقل
انا فى واحد قالى بنعملها سوفت وير للطلمبة ! و هى ملهاش اينترفيس اصلا بس للاسف الطمع و زيادة الثقة بالنفس سعات بتخالى الناس يبالغوا فى الهزيان.
على العموم مبروك عليك ياباشا و متنساش تيقى تشيك تحت العربية عشان لتر الزيت الطار ده متمكن يكون فى سيل بيسرب.

**shark_3li** · 08-09-2011 12:26 AM

هو أصلا كان قايلي قبل مايشتغل فيها إن لو فيها العطل اللي بيتصلح هيكون حاجة محروقة في البوردة وهيغيرها

وحتتكلف 600 وانا بصراحة فرحت إني مش هاشتري طلمبة جديدة

**MuhamedNabil** · 08-09-2011 01:47 AM

فداك يا باشا انا اخدت الاوبشن القتقل من كدة كمان و دخلت فى طلمبة استعمال المهم متنساش موضوع الزيت , و انا انشاء الله حجمع الخطواط الهنا و احطها فى موضوع عشان يبقى الموضوع واضح و العضاء يستفيدوا.