عملت حادثة على الدايري - الحمد لله

**Ahmod** · 02-11-2011 04:18 PM

السلام عليكم ورحمة الله وبركاته

في الاول الحمد لله على كل شئ والحمد لله انها جت على قد كدة

الطريق كان واقف ومش بيمشي تماما وتقريبا ماشي على سرعة 5 او 10 كم

كان قدامي ترلا بتغير فاردة كاوتش وعلى شمالي ترلا تانية

وفي مساحة تسمح اني اعدي من قدام الترلا اللى على شمال دست شوية ورحت معدي

تقريبا تلت اربع العربية عدت لكن بتاع الترلا اللى على شمالي ربنا يسامحه مستناش اني اعدي وراح داخل فيا مدمرلي الباب

صحيح اني اللى غلطان بس هو لو على الاقل لمس الفرامل ماكنش كل ده هيحصل ده ساب الترلا تجيب العربية عندي من اول الاكصدام اللى ورا لحد الباب

نزلت لقيته جاي بيقولي يعني ينفع حد يجي من اليمين كدة انت مش شايف في ترلا تانية واقفة بتغير فاردة كاوتش

انا بصيت لمنظر العربية رحت سايبه وراكب ومدور وماشي

الحمد لله على كل شئ كلمت الاستاذ كريم منير وان شاء الله هودي العربية للورشة عنده في الحرفيين

دي صورة الخبطة

هي طبعا كدة محتاجة تترد على السخن والباب يترش بالكامل ؟

هل ينفع اردها على البارد والقط مكان البويه اللى طالع ده ؟ وممكن لو طلع فيه اختلاف في اللون احط استيكر كبير على البابين

وتقريبا التكلفة لو افترضنا هنرش الباب بالكامل مع شغل السمكرة هتكلف كام تقريبا ؟ لان كريم قالي لازم اشوفها الاول

فاعمل حسابي على كام تقريبا ؟

في النهاية برضوا الحمد لله ومحدش يحاول يهظر مع تريلات تاني لانهم بيدوسو على العربيات اكنهم بيدوسو على نمل ماشي في الارض

**kimotop** · 02-11-2011 04:31 PM

الحمد لله انها جت على قد كدا
وربنا يعوضك ان شاء الله

**friendship7897** · 02-11-2011 04:33 PM

حمد الله على سلامتك
دائري و2 تريلا وأنت في النص - الحمد لله أنها جت على أد كده - دا كفاية الخضة والوضع النفسي بتاعك - ربنا معاك وتنسى الموقف ، وإن شاء الله التكلفة تطلع قليلة .

**Ahmod** · 02-11-2011 04:37 PM

المشاركة الأصلية كتبت بواسطة hema_lancer

اولا قدر الله وماشاء فعل
ثانيا بتاع المقطزرة مش غلطان لأنه مشفكش اصلا
ودي الغلطة اللي بقيع فيها كل سواقين الملاكي مع المقطورة
بييجي تحتيه وعايز يطلع قدامة وللأسف في الجزء ده السواق مش بيشوف مين قدامة
والمفروض كله ياخد بالة من حاجة زي دي

انا عارف انه مش غلطان وانا اللى كاسر عليه

عشان كدة نزلت وماتكلمتش معاه وحتى لو هو اللى غلطان كت هعمل ايه مالعربية خلاص اتخبطت

بس مش معقول مش شايفني يعني اكيد انا مش نملة معدية من جمبه ده المرايا بتاعتهم بتبقى ماشاء الله

وبعدين الراجل ماشاء الله اتوصى مادسش فرامل خالص ساب الترلا لحد ماجابت العربية من اولها لاخرها

ولو حضرتك تلاحظ انا العربية كلها عدت خلاص يعني انا بقيت قدامه كان ممكن كلام حضرتك انه مشفنيش لو كان خبطلي الباب اللى قدام

لكن ده جايب الباب اللى ورا يعني بعد مانا عديت خلاص

لكن الحمد لله

المشاركة الأصلية كتبت بواسطة kimotop

الحمد لله انها جت على قد كدا
وربنا يعوضك ان شاء الله

الحمد لله على كل شئ

كل اللى مضايقني ان العربية هترش ومش عارف اذا كان هيرجع زي الاول ولا لاء

المشاركة الأصلية كتبت بواسطة friendship7897

حمد الله على سلامتك
دائري و2 تريلا وأنت في النص

- الحمد لله أنها جت على أد كده - دا كفاية الخضة والوضع النفسي بتاعك - ربنا معاك وتنسى الموقف ، وإن شاء الله التكلفة تطلع قليلة .

الله يسلمك والحمد لله

مش عايز اقول لحضرتك لما نزلت شفت منظر العربية حسيت بايه

اكن الواحد خد الخبطة دي في جسمه بالظبط

الحمد لله

**Ahmod** · 02-11-2011 05:05 PM

المشاركة الأصلية كتبت بواسطة kareemz

قدر الله و ما شاء فعل .. الحمد لله انها جت فى العربية.

مش عارف ليه دايما كنت لما بعمل حاجه فى العربية كان يحصل لى حاجه .. ممكن تكون دى حسد عشان الجنوط .. عموما .. سواء حسد أو ابتلاء أو تكفير ذنب فهو خير ان شاء الله.

بس ايه السواد اللى على الجنط ده؟

هى ممكن تترد على البارد على فكره .. بس عاوزه سمكرى شاطر أوى عشان البومبيه اللى فى الباب .. خلى بالك ان فى سمكرى شاطر فى الرد على البارد و ان الخبطه متبانش .. و فى سمكرى تانى شاطر فى الحوادث .. و سمكرى تالت شاطر فى الفبر و الاكصدامات .. فاسأل كويس.

و الحته اللى اتخربشت دى ممكن تترم بدوكو على قدها بس هتبان شويه.

و فى الاخر احمد ربنا بجد .. و انت أحسن من غيرك بكتير .. أنا كل يوم على الدائرى .. و لما بنزل منه بحمد ربنا .. الحمد لله.

هي عين زي مانت قلت والحمد لله انها جت على قد كدة

ياريت فعلا تترد على البارد وبعدها ممكن حتى احط استيكر كبير على البابين يداري اثر الخبطة

والسواد اللى في الجنط ده من اثر الحكة الحمد لله انها متكسرش

انا ان شاء الله هروح لورشة كريم منير ومتفائل فيهم خير والحمد لله على كل شئ